ಕಂಪ್ಯೂಟರ್, ಮೊಬೈಲ್ ವೇಗ ಹೆಚ್ಚಿಸಲು, ಸೇಫ್ ಮೋಡ್ ಬಳಸಿ

ಮಾಹಿತಿ@ತಂತ್ರಜ್ಞಾನ ಅಂಕಣ – 97: ಅವಿನಾಶ್ ಬಿ. (ವಿಜಯ ಕರ್ನಾಟಕ, ಅಕ್ಟೋಬರ್ 13, 2014)

ಇತ್ತೀಚೆಗೆ ನನ್ನ ಸ್ಮಾರ್ಟ್‌ಫೋನ್ ಪದೇ ಪದೇ ರೀಸ್ಟಾರ್ಟ್ ಆಗುವ ಸಮಸ್ಯೆಗೆ ಸಿಲುಕಿತ್ತು. ಈ ಸಮಸ್ಯೆಗೆ ಕಾರಣ ಮತ್ತು ಪರಿಹಾರ ಕಂಡುಹಿಡಿಯಲು ಅಂತರ್ಜಾಲದಲ್ಲಿ ಜಾಲಾಡಿದಾಗ ಮತ್ತು ಕಸ್ಟಮರ್ ಕೇರ್‌ಗೆ ಇಮೇಲ್ ಮೂಲಕ ಸಂಪರ್ಕಿಸಿದ ಬಳಿಕ ಉತ್ತರ ಸಿಕ್ಕಿತು. ವಿಂಡೋಸ್ ಅಥವಾ ಮ್ಯಾಕ್ ಕಂಪ್ಯೂಟರ್‌ಗಳಲ್ಲಿ ಕೂಡ ಯಾವುದೇ ಸಮಸ್ಯೆ ಬಂದಾಗ, ಅದರಲ್ಲಿನ ತಾಂತ್ರಿಕ ದೋಷಗಳನ್ನು ಪತ್ತೆ ಮಾಡಿ ಸರಿಪಡಿಸುವ ನಿಟ್ಟಿನಲ್ಲಿ (ಟ್ರಬಲ್ ಶೂಟಿಂಗ್ ಎನ್ನುತ್ತಾರೆ) “ಸೇಫ್ ಮೋಡ್”ನಲ್ಲಿ ರೀಬೂಟ್ ಅಥವಾ ರೀಸ್ಟಾರ್ಟ್ ಮಾಡಲಾಗುತ್ತದೆ ಮತ್ತು ವೈರಸ್ ಸ್ಕ್ಯಾನ್ ಮಾಡಲಾಗುತ್ತದೆ. ಆಂಡ್ರಾಯ್ಡ್ ಮೊಬೈಲ್ ಫೋನ್‌ಗಳನ್ನು ಕೂಡ ಸೇಫ್ ಮೋಡ್‌ನಲ್ಲಿ ಆನ್ ಮಾಡಬಹುದು ಎಂಬುದು ಆಗಲೇ ನನಗೆ ಗೊತ್ತಾಗಿದ್ದು. ನಿಮ್ಮ ಸಾಧನದ ವೇಗ ಹೆಚ್ಚಿಸಲು ತೀರಾ ಸುಲಭವಾದ ವಿಧಾನವನ್ನು ನೀವೂ ಮಾಡಿ ನೋಡಬಹುದು.

ಸೇಫ್ ಮೋಡ್ ಯಾಕೆ: ಕಂಪ್ಯೂಟರ್ ಅಥವಾ ಯಾವುದೇ ಸಾಧನವನ್ನು ಸೀಮಿತ ಬಳಕೆಗೆ ಆನ್ ಮಾಡುವ ಮೂಲಕ, ಸಮಸ್ಯೆಗಳನ್ನು ಪತ್ತೆ ಹಚ್ಚಲು ಸೇಫ್ ಮೋಡ್ ಅಥವಾ ಸುರಕ್ಷಿತ ಮೋಡ್ ಸಹಕಾರಿ. ಈ ಮೋಡ್‌ನಲ್ಲಿ ಕಂಪ್ಯೂಟರ್ ಆನ್ ಚಾಲನೆಯಾಗಲು ಅಗತ್ಯವಿರುವ ಮೂಲಭೂತ ಫೈಲುಗಳು, ಡ್ರೈವರ್‌ಗಳು ಮಾತ್ರ ಸ್ಟಾರ್ಟ್ ಆಗುತ್ತವೆ. ಈ ಮೋಡ್‌ನಲ್ಲಿರುವಾಗ ಸ್ಕ್ರೀನ್‌ನ ನಾಲ್ಕೂ ಮೂಲೆಗಳಲ್ಲಿ Safe Mode ಎಂಬ ಪದಗಳು ಕಾಣಿಸುತ್ತವೆ. ಸಾಮಾನ್ಯ ಮೋಡ್‌ನಲ್ಲಿ ಕಾಣಿಸಿಕೊಂಡ ದೋಷಗಳು ಸೇಫ್ ಮೋಡ್‌ನಲ್ಲಿ ಬರುವುದಿಲ್ಲ ಎಂದಾದರೆ, ಕಂಪ್ಯೂಟರಿನಲ್ಲಿನ ಮೂಲ ಡ್ರೈವರ್‌ಗಳು ಹಾಗೂ ಸೆಟ್ಟಿಂಗ್‌ಗಳಿಂದಾಗಿ ಏನೂ ಸಮಸ್ಯೆ ಇಲ್ಲ ಎಂದರ್ಥ. ಬಳಿಕ, ನಿಮ್ಮ ಸಿಸ್ಟಂಗೆ ನೀವಾಗಿಯೇ ಇನ್‌ಸ್ಟಾಲ್ ಮಾಡಿದ್ದ ಪ್ರೋಗ್ರಾಂ, ಆ್ಯಪ್ ಅಥವಾ ಸಾಫ್ಟ್‌ವೇರ್‌ಗಳನ್ನು ಒಂದೊಂದಾಗಿ ರನ್ ಮಾಡಿ ನೋಡಿದರೆ, ಯಾವುದು ಲಾಂಚ್ ಆಗುವುದಿಲ್ಲವೋ ಅಥವಾ ಕ್ರ್ಯಾಶ್ ಆಗುತ್ತದೆಯೋ ಅದುವೇ ಸಮಸ್ಯೆ ಮೂಲ ಎಂದು ತಿಳಿದುಕೊಳ್ಳಬಹುದು.

ಹೇಗೆ: ವಿಂಡೋಸ್ ಎಕ್ಸ್‌ಪಿ ಮತ್ತು ವಿಂಡೋಸ್ 7ರಲ್ಲಾದರೆ, ಸ್ವಿಚ್ ಆನ್ ಮಾಡಿದಾಗ ವಿಂಡೋಸ್ ಲೋಗೋ ಕಾಣಿಸಿಕೊಳ್ಳುವ ಮೊದಲು F8 ಒತ್ತಿ ಹಿಡಿದುಕೊಂಡರೆ, ಅದು ಸೇಫ್ ಮೋಡ್‌ನಲ್ಲಿ ಸ್ಟಾರ್ಟ್ ಆಗುತ್ತದೆ. ವಿಂಡೋಸ್ 8ರಲ್ಲಾದರೆ, ಸ್ಕ್ರೀನ್ ಮೇಲೆ ಪವರ್ ಬಟನ್ ಕ್ಲಿಕ್ ಮಾಡಿ, ರೀಸ್ಟಾರ್ಟ್ ಎಂಬ ಆಯ್ಕೆಯನ್ನು ಒತ್ತುವ ಮುನ್ನ ಕೀಬೋರ್ಡ್‌ನಲ್ಲಿ ಶಿಫ್ಟ್ ಕೀಲಿ ಒತ್ತಿ ಹಿಡಿದುಕೊಂಡರಾಯಿತು.

ಇದೇ ರೀತಿ ಆಂಡ್ರಾಯ್ಡ್ ಫೋನನ್ನು ಸೇಫ್ ಮೋಡ್‌ನಲ್ಲಿ ಆನ್ ಮಾಡಲು, ಪವರ್ ಬಟನ್ ಒತ್ತಿ ಹಿಡಿದಾಗ, ಪವರ್ ಆಫ್ ಎಂಬ ಬಟನ್ ಗೋಚರಿಸುತ್ತದೆ. ಅದನ್ನು ಒತ್ತಿ ಹಿಡಿದುಕೊಳ್ಳಿ. ಸೇಫ್‌ಮೋಡ್‌ನಲ್ಲಿ ರೀಸ್ಟಾರ್ಟ್ ಆಗುತ್ತದೆ.

ಪ್ರಯೋಜನಗಳು: ಮುಖ್ಯವಾಗಿ ಈ ಮೋಡ್ ನಿಮ್ಮ ಸಿಸ್ಟಂ ಅನ್ನು ಸಂಪೂರ್ಣವಾಗಿ ರೀಫ್ರೆಶ್ ಮಾಡುತ್ತದೆ. ಡ್ರೈವರ್‌ಗಳೇನಾದರೂ ದೋಷಪೂರಿತವಾಗಿದ್ದರೆ (ಕರಪ್ಟ್), ಸೇಫ್ ಮೋಡ್‌ನಲ್ಲಿ ಸರಿಯಾಗುವ ಸಾಧ್ಯತೆಗಳಿವೆ. ಸೇಫ್ ಮೋಡ್‌ನಿಂದ ನಿರ್ಗಮಿಸಲು ಶಟ್ ಡೌನ್ ಮಾಡಿ ರೀಸ್ಟಾರ್ಟ್ ಮಾಡಿ; ನಾರ್ಮಲ್ ಮೋಡ್‌ಗೆ ಮರಳುತ್ತದೆ. ಸಿಸ್ಟಂ ಹಿಂದಿಗಿಂತ ವೇಗವಾಗಿ ಕಾರ್ಯಾಚರಿಸುತ್ತದೆ. ಯಾಕೆಂದರೆ ಅದರ ಡ್ರೈವರ್‌ಗಳು, ಅಪ್ಲಿಕೇಶನ್‌ಗಳು ಪುನಶ್ಚೇತನಗೊಂಡಿರುತ್ತವೆ. ಕೆಲವೊಂದು ಆ್ಯಂಟಿ ವೈರಸ್ ತಂತ್ರಾಂಶಗಳನ್ನು ಸೇಫ್ ಮೋಡ್‌ನಲ್ಲೇ ರನ್ ಮಾಡಿ ಸಿಸ್ಟಂ ಸ್ಕ್ಯಾನ್ ಮಾಡಿಸಬೇಕೆಂದು ಕಡ್ಡಾಯವಾಗಿ ಸೂಚಿಸಿರುತ್ತಾರೆ.

ಸ್ಮಾರ್ಟ್‌ಫೋನ್ ಸೇಫ್ ಮೋಡ್‌ನಲ್ಲಿ ರೀಬೂಟ್ ಆದಾಗ, ಫ್ಯಾಕ್ಟರಿ ಇನ್‌ಸ್ಟಾಲ್ ಮಾಡಿರುವ ಆ್ಯಪ್‌ಗಳು ಮಾತ್ರ ಗೋಚರಿಸುತ್ತವೆ. ಉಳಿದವನ್ನು ನೋಡಲು ಸೆಟ್ಟಿಂಗ್ಸ್‌ನಲ್ಲಿ ಆ್ಯಪ್ಸ್ ಅಂತ ಇರುವಲ್ಲಿ ಹೋಗಿ ನೋಡಿದರಾಯಿತು. ನಿಮ್ಮ ಸ್ಮಾರ್ಟ್‌ಫೋನ್ ನಿಧಾನವಾಗಿ ಕೆಲಸ ಮಾಡುತ್ತಿದೆಯೆಂದಾದರೆ, ಅದನ್ನು ವೇಗವಾಗಿಸಲು, ಫ್ಯಾಕ್ಟರಿ ಡೇಟಾ ರೀಸೆಟ್ ಎಂಬ ಆಯ್ಕೆಯ (ಇದರಲ್ಲಿ, ನೀವು ಇನ್‌ಸ್ಟಾಲ್ ಮಾಡಿದ ಎಲ್ಲ ಆಯ್ಕೆಗಳು, ನಿಮ್ಮ ಎಲ್ಲ ಮಾಹಿತಿ, ಸಂಪರ್ಕ, ಫೈಲ್‌ಗಳು ಡಿಲೀಟ್ ಆಗಿಬಿಡುತ್ತವೆ) ಬದಲಾಗಿ, ಸೇಫ್ ಮೋಡ್‌ನಲ್ಲಿ ಒಮ್ಮೆ ರೀಬೂಟ್ ಮಾಡಿದರೆ ಸಾಕಾಗಬಹುದು. ನಂತರ ಸಾಮಾನ್ಯ ಮೋಡ್‌ನಲ್ಲಿ ರೀಸ್ಟಾರ್ಟ್ ಮಾಡಿದಾಗ, ಗೂಗಲ್‌ನ ಆ್ಯಪ್‌ಗಳನ್ನು ಹೊರತುಪಡಿಸಿ, ಬೇರೆಲ್ಲಾ ಆ್ಯಪ್‌ಗಳಿಗೆ (ಫೇಸ್‌ಬುಕ್, ಟ್ವಿಟರ್ ಇತ್ಯಾದಿ) ನೀವು ಪುನಃ ಲಾಗಿನ್ ಮಾಡಬೇಕಾಗುತ್ತದೆ ಎಂಬುದು ನೆನಪಿರಲಿ.

ಟೆಕ್ ಟಾನಿಕ್
ಮಂಗಳನಲ್ಲಿಗೆ ಹೋಗಲು ಎಲ್ಲರಿಗೂ ಸಾಧ್ಯವಾಗದಿದ್ದರೂ, ಕನಿಷ್ಠ ನಮ್ಮ ಹೆಸರನ್ನಾದರೂ ಮೈಕ್ರೋಚಿಪ್ ಮೂಲಕ ಬಾಹ್ಯಾಕಾಶಕ್ಕೆ ತಲುಪಿಸುವ ಅವಕಾಶವೊಂದನ್ನು ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ ಮಾಡಿಕೊಟ್ಟಿದೆ. ಜಾಗತಿಕ ಬಾಹ್ಯಾಕಾಶ ಆಸಕ್ತರ ಸಮಾಜ ರಚಿಸುವ ಗುರಿ ನಾಸಾ ಸಂಸ್ಥೆಯದು. ಓರಿಯಾನ್ ಎಂಬ ಬಾಹ್ಯಾಕಾಶ ನೌಕೆಯ ಪರೀಕ್ಷಾ ಪ್ರಯೋಗ ಡಿ.4ರಂದು ನಡೆಯಲಿದ್ದು, ಆ ನೌಕೆ ಪೆಸಿಫಿಕ್ ಸಾಗರಕ್ಕೆ ಬೀಳುತ್ತದೆಯಾದರೂ, ಮುಂದೆ ಮಂಗಳನತ್ತ ಯಾವುದೇ ನೌಕೆಯನ್ನು ಹಾರಿಬಿಟ್ಟಾಗ ನಿಮ್ಮ ಹೆಸರಿಗೆ ಇಂತಿಷ್ಟು ಮೈಲುಗಳು ಸೇರ್ಪಡೆಯಾಗುತ್ತವೆ. ಇದಕ್ಕಾಗಿ ನಿಮ್ಮ ಹೆಸರಿಗೆ ಬಾಹ್ಯಾಕಾಶ ಯಾನದ ಬೋರ್ಡಿಂಗ್ ಪಾಸ್ ದೊರೆಯಬೇಕಿದ್ದರೆ go.usa.gov/vcpz ಎಂಬಲ್ಲಿ ಹೋಗಿ ಹೆಸರು ದಾಖಲಿಸಿ.

‌ವೈಫೈ ಡೇಟಾ ಕಾರ್ಡ್: ಒಂದೇ ಸಿಮ್‌, ಹಲವು ಸಾಧನಗಳಿಗೆ ಇಂಟರ್ನೆಟ್‌

ಮಾಹಿತಿ@ತಂತ್ರಜ್ಞಾನ ಅಂಕಣ – 96: ಅವಿನಾಶ್ ಬಿ. (ವಿಜಯ ಕರ್ನಾಟಕ, ಅಕ್ಟೋಬರ್ 06, 2014)

ಅಂತರ್ಜಾಲ ಈಗ ಬದುಕಿನ ಅವಿಭಾಜ್ಯ ಅಂಗವಾಗಿರುವ ಕಾರಣಕ್ಕೆ ಹೆಚ್ಚಾಗಿ ಮನೆಗಳಲ್ಲಿ, ಕಚೇರಿಗಳಲ್ಲಿ ಬ್ರಾಡ್‌ಬ್ಯಾಂಡ್ ಇಂಟರ್ನೆಟ್ ಸಂಪರ್ಕ ಇರುತ್ತದೆ. ಮನೆಯಲ್ಲಾದರೆ ಅದಕ್ಕೆ ವೈರ್‌ಗಳು, ಕೇಬಲ್‌ಗಳ ಕಿರಿಕಿರಿ. ಹೀಗಾಗಿಯೇ ಪುಟ್ಟದಾದ ಇಂಟರ್ನೆಟ್ ಡಾಂಗಲ್‌ಗಳು ಎಂದು ಕರೆಯಲಾಗುವ, ಎಲ್ಲಿ ಬೇಕಾದರೂ ಹೊತ್ತೊಯ್ಯಬಹುದಾದ ಯುಎಸ್‌ಬಿ ಡೇಟಾ ಕಾರ್ಡ್‌ಗಳು ಜನಪ್ರಿಯವಾಗಿವೆ. ಈ ನಿಟ್ಟಿನಲ್ಲಿ ಬಿಎಸ್ಸೆನ್ನೆಲ್, ಏರ್‌ಟೆಲ್, ವೊಡಾಫೋನ್, ಟಾಟಾ ಡೊಕೊಮೊ, ರಿಲಯನ್ಸ್, ಎಂಟಿಎಸ್, ಐಡಿಯಾ, ಏರ್‌ಸೆಲ್ ಮುಂತಾದ ಎಲ್ಲ ಮೊಬೈಲ್ ಆಪರೇಟರ್ ಕಂಪನಿಗಳೂ ತಮ್ಮದೇ ಡಾಂಗಲ್‌ಗಳನ್ನು ಮಾರುಕಟ್ಟೆಗಿಳಿಸಿವೆ. ಅವುಗಳಲ್ಲಿ ಹೊಸ ಟ್ರೆಂಡ್ ಎಂದರೆ ಪ್ಲಗ್-ಆ್ಯಂಡ್-ಪ್ಲೇ ವ್ಯವಸ್ಥೆಯ ವೈ-ಫೈ ಡಾಂಗಲ್‌ಗಳು ಕಮ್ ರೌಟರ್‌ಗಳು.

ಇಂತಹಾ ಉಪಯುಕ್ತ ವೈಫೈ ತಂತ್ರಜ್ಞಾನದ ಬಗ್ಗೆ ಅರಿವಿಲ್ಲದವರಿಗೆ, ವಿಶೇಷವಾಗಿ ಗ್ರಾಮೀಣ ಭಾಗದವರಿಗಾಗಿ ಈ ಸಲಹೆ.

ಮುಖ್ಯವಾಗಿ ನಾಲ್ಕು ವಿಧದ ವೈ-ಫೈ ಡಾಂಗಲ್‌ಗಳಿವೆ. 1. ಸಿಮ್ ಆಧಾರಿತ ವೈಫೈ ಡಾಂಗಲ್, 2. ಯುಎಸ್‌ಬಿ/ಡೇಟಾ ಕಾರ್ಡ್ ಆಧಾರಿತ ವೈಫೈ ಸಾಧನ, 3. ವೈಫೈ ಹಾಟ್‌ಸ್ಪಾಟ್ ಅವಕಾಶವಿರುವ ಯುಎಸ್‌ಬಿ ಡೇಟಾ ಕಾರ್ಡ್ ಮತ್ತು 4. ಯಾವುದೇ (ಯೂನಿವರ್ಸಲ್) ಸಿಮ್, ಬ್ಯಾಟರಿ, ಮೆಮೊರಿ ಕಾರ್ಡ್ ಸ್ಲಾಟ್ ಇರುವ ಪ್ಲಗ್-ಆ್ಯಂಡ್-ಪ್ಲೇ ಕೂಡ ಆಗಬಲ್ಲ ವೈಫೈ ಡಾಂಗಲ್.

ಇಂಟರ್ನೆಟ್ ಸಂಪರ್ಕಕ್ಕಾಗಿ ಮೋಡೆಮ್, ಕಂಪ್ಯೂಟರ್ ಆನ್ ಮಾಡುವುದು, ಆಫ್ ಮಾಡುವುದು ದೊಡ್ಡ ಕಿರಿಕಿರಿ. ಕರೆಂಟ್ ಹೋದಾಗಲಂತೂ ಮತ್ತಷ್ಟು ಸಮಸ್ಯೆ. ಬದಲಾಗಿ, ಪ್ಲಗ್‌ಗೆ ಒಂದು ಡಾಂಗಲ್ ಸಿಕ್ಕಿಸಿದರೆ, ಅದನ್ನೇ ವೈ-ಫೈ ಹಾಟ್‌ಸ್ಪಾಟ್ ಆಗಿಸಿ ಮೊಬೈಲ್, ಕಂಪ್ಯೂಟರ್, ಲ್ಯಾಪ್‌ಟಾಪ್ ಎಲ್ಲದಕ್ಕೂ ಸಂಪರ್ಕ ದೊರೆಯುವಂತಾದರೆ? ಒಂದು ಇಂಟರ್ನೆಟ್ ಸಂಪರ್ಕ ಪಡೆದುಕೊಂಡು ಅದನ್ನೇ ನೀವು ಹಾಗೂ ಮನೆಯವರಲ್ಲಿರುವ ಎಲ್ಲರ ಮೊಬೈಲ್/ಲ್ಯಾಪ್‌ಟಾಪ್/ಟ್ಯಾಬ್ಲೆಟ್ ಸಾಧನಗಳೂ ಬಳಸುವಂತಾದರೆ?

ಇದಕ್ಕೆ ನೆರವಿಗೆ ಬರುವುದೇ ಪ್ಲಗ್-ಆ್ಯಂಡ್-ಪ್ಲೇ ವೈಫೈ ಇಂಟರ್ನೆಟ್ ಡಾಂಗಲ್ ಅಥವಾ ಡೇಟಾ ಕಾರ್ಡ್. ಈ ಡಾಂಗಲ್ ಅನ್ನು ಅದರ ಜತೆಗೆ ಬರುವ ಅಡಾಪ್ಟರ್ ಮೂಲಕ ಕರೆಂಟ್ ಪ್ಲಗ್‌ಗೆ ಸಿಕ್ಕಿಸಿದರೆ ಸಾಕು, ಇಂಟರ್ನೆಟ್ ಸಂಪರ್ಕ ಆನ್ ಆಗುತ್ತದೆ ಮತ್ತು ವೈ-ಫೈ ಮೂಲಕ ಈ ಡಾಂಗಲ್‌ಗೆ ಕನಿಷ್ಠ ಐದು ಸಾಧನಗಳನ್ನು (ಸ್ಮಾರ್ಟ್‌ಫೋನ್, ಟ್ಯಾಬ್ಲೆಟ್, ಕಂಪ್ಯೂಟರ್ ಇತ್ಯಾದಿ) ಸಂಪರ್ಕಿಸಬಹುದು. ಇದಕ್ಕೆ ಪಾಸ್‌ವರ್ಡ್ ರಕ್ಷಣೆ ಇರುತ್ತದೆ. ಆದರೆ ಎಲ್ಲ ಸಾಧನಗಳಲ್ಲೂ ವೈ-ಫೈ ಸೌಲಭ್ಯ ಇರಬೇಕು. ಈ ಡೇಟಾ ಕಾರ್ಡ್‌ಗೆ ಅಪರಿಮಿತ ಡೇಟಾ (ಅನ್‌ಲಿಮಿಟೆಡ್ ಇಂಟರ್ನೆಟ್) ಸೌಕರ್ಯವಿರುವ ಒಂದು ಸಿಮ್ ಕಾರ್ಡ್ ಅಳವಡಿಸಿದರಾಯಿತು. ಕೆಲವು ಡಾಂಗಲ್‌ಗಳಲ್ಲಿ ರೀಚಾರ್ಜೆಬಲ್ ಬ್ಯಾಟರಿಯೂ ಇರುತ್ತದೆ. ಪವರ್ ಕಟ್ ಸಂದರ್ಭ ಸುಮಾರು ನಾಲ್ಕು ಗಂಟೆ ಇದು ಅನುಕೂಲ ಕಲ್ಪಿಸುತ್ತದೆ.

ಬಹುತೇಕ ಎಲ್ಲ ಮೊಬೈಲ್ ಆಪರೇಟರ್‌ಗಳೂ ಇಂತಹಾ ವೈ-ಫೈ ಡಾಂಗಲ್ ಮಾರುಕಟ್ಟೆಗೆ ಬಿಟ್ಟಿದ್ದಾರಾದರೂ, ನಿರ್ದಿಷ್ಟ ನೆಟ್‌ವರ್ಕ್‌ಗೆ ಸೀಮಿತವಾಗದೆ, ಹೆಚ್ಚುವರಿ ಅನುಕೂಲಗಳಿರುವ ಡಾಂಗಲ್ ನೀವು ಖರೀದಿಸಬೇಕೆಂದರೆ, ಅಂಗಡಿಯಾತನಲ್ಲಿ ನೀವು ಕೇಳಬೇಕಾದ ವಿಷಯಗಳು – ವೈ-ಫೈ ಹಾಟ್‌ಸ್ಪಾಟ್, ರೀಚಾರ್ಜೆಬಲ್ ಬ್ಯಾಟರಿ, ಮೆಮೊರಿ ಕಾರ್ಡ್ ಸ್ಲಾಟ್, ಯೂನಿವರ್ಸಲ್ ಡಾಂಗಲ್ (ಇದರಲ್ಲಿ ಯಾವುದೇ ಕಂಪನಿಯ ಸಿಮ್ ಕಾರ್ಡ್ ಹಾಕಬಹುದು). ಹ್ಯುವೈ (Huawei), ಬೀಟೆಲ್, ಇಂಟೆಕ್ಸ್, ಅಲ್ಕಾಟೆಲ್, ಡಿ-ಲಿಂಕ್ ಮುಂತಾದ ಕಂಪನಿಗಳ ಡೇಟಾ ಕಾರ್ಡ್‌ಗಳನ್ನು ಪರಿಗಣಿಸಬಹುದು. 3-4 ಸಾವಿರ ರೂ. ಆಸುಪಾಸಿನಲ್ಲಿ ಈ ಸೌಕರ್ಯಗಳಿರುವ ಡಾಂಗಲ್ ಸಿಗುತ್ತದೆ.

ಹಳೆಯ ಸ್ಮಾರ್ಟ್‌ಫೋನ್ ಇದೆಯೇ? ಅದೇ ಸಾಕು: ನಿಮ್ಮಲ್ಲಿ ಹಳೆಯ ಸ್ಮಾರ್ಟ್‌ಫೋನ್ ಇದ್ದರೆ ಅದನ್ನೂ ವೈಫೈ ಹಾಟ್‌ಸ್ಪಾಟ್ ಆಗಿ ಬಳಸಿ ಸದುಪಯೋಗ ಮಾಡಿಕೊಳ್ಳಬಹುದು. ಅದರಲ್ಲಿರುವ ಟಿದರಿಂಗ್ ಆ್ಯಂಡ್ ಹಾಟ್‌ಸ್ಪಾಟ್ ಎಂಬ ಸೌಕರ್ಯವನ್ನು ಉಪಯೋಗಿಸಿಕೊಳ್ಳಬೇಕು. ಆ ಮೊಬೈಲಿಗೊಂದು ಅನ್‌ಲಿಮಿಟೆಡ್ ಇಂಟರ್ನೆಟ್ ಪ್ಯಾಕ್ ಹಾಕಿಸಿಕೊಂಡರೆ ಸಾಕು. ಅದರ ಸಂಪರ್ಕವನ್ನೇ ವೈಫೈ ಮೂಲಕ ಬೇರೆ 4-5 ಸಾಧನಗಳಿಗೆ ಹಂಚಬಹುದು.

ಇನ್ನು, ಈಗಾಗಲೇ ಬ್ರಾಡ್‌ಬ್ಯಾಂಡ್ ಸಂಪರ್ಕ ಪಡೆದುಕೊಂಡವರು ಕೂಡ ವೈಫೈ ಮೂಲಕ ವಿವಿಧ ಸಾಧನಗಳನ್ನು ಸಂಪರ್ಕಿಸಿಕೊಳ್ಳಬಹುದು. ಇದಕ್ಕಾಗಿಯೇ ಮೋಡೆಮ್‌ಗೆ ಅಳವಡಿಸುವ ಮತ್ತು ಬೇರೆ ಡೇಟಾ ಕಾರ್ಡನ್ನೂ ಅಳವಡಿಸಬಹುದಾದ ವೈಫೈ ರೌಟರ್‌ಗಳು ಮಾರುಕಟ್ಟೆಯಲ್ಲಿ ಸಿಗುತ್ತವೆ.

ಟೆಕ್ ಟಾನಿಕ್
ಆನ್‌ಲೈನ್‌ನಲ್ಲಿರುವಾಗ ಬುದ್ಧಿಮತ್ತೆ ಹೆಚ್ಚಿಸಿಕೊಳ್ಳಿ: ಫೇಸ್‌ಬುಕ್, ಟ್ವಿಟರ್ ಮತ್ತು ಮೆಸೇಜಿಂಗ್ ಮುಂತಾದ ಇಂಟರ್ನೆಟ್ ಜಮಾನದಲ್ಲಿ ಹಾಗೂ ಎಲ್ಲದಕ್ಕೂ ಗೂಗಲ್ ಇದೆ ಎಂಬ ಭರವಸೆಯ ನಡುವೆ ನಮ್ಮ ಐಕ್ಯೂ ಅಂದರೆ ಬೌದ್ಧಿಕ ಕೌಶಲ್ಯ ಅಥವಾ ಜಾಣ್ಮೆ ತುಕ್ಕು ಹಿಡಿಯುತ್ತಿದೆ ಎಂಬ ಮಾತುಗಳನ್ನಿಂದು ಕೇಳುತ್ತಿದ್ದೇವೆ. ಮೆದುಳಿಗೆ ಕೆಲಸ ಕೊಟ್ಟರೆ ಮಾತ್ರ ಅದು ಹರಿತವಾಗಿರುತ್ತದೆ. ಹೀಗಾಗಿ ಇಂಟರ್ನೆಟ್‌ನಲ್ಲಿರುವಾಗ ಸಮಯ ಮಾಡಿಕೊಂಡು ಈ ತಾಣಕ್ಕೆ ಭೇಟಿ ನೀಡಿದರೆ, ಬುದ್ಧಿಮತ್ತೆಯನ್ನು ಒರೆಗೆ ಹಚ್ಚಬಹುದು. ಮಕ್ಕಳಿಗೆ ಅತ್ಯಂತ ಸೂಕ್ತ ತಾಣವಿದು. ದೊಡ್ಡವರಿಗೂ ಕೂಡ. https://memorado.com/

WhatsApp ನಲ್ಲಿ ಸ್ವಯಂ ಡೌನ್‌ಲೋಡ್ ತಡೆಯಲು ಹೀಗೆ ಮಾಡಿ

ಮಾಹಿತಿ@ತಂತ್ರಜ್ಞಾನ ವಿಜಯ ಕರ್ನಾಟಕ ಅಂಕಣ 95: ಸೆಪ್ಟೆಂಬರ್ 29, 2014

ಹೆಚ್ಚಿನವರು ಸ್ಮಾರ್ಟ್‌ಫೋನ್‌ಗಳಲ್ಲಿ ವಾಟ್ಸಾಪ್ (WhatsApp) ಎಂಬ ಪ್ರಭಾವಶಾಲಿ ಸಂವಹನ ಆ್ಯಪ್ ಬಳಸುತ್ತಾರೆ. ಫೇಸ್‌ಬುಕ್, ಟ್ವಿಟರ್ ಜತೆಗೆ ವಾಟ್ಸಾಪ್ ಕೂಡ ಈಗ ಸಂಪರ್ಕಸೇತುವಾಗಿ, ಸ್ನೇಹ ಸೇತುವಾಗಿ, ಫೈಲ್‌ಗಳ ಹಂಚಿಕೆಗಾಗಿ, ಗುಂಪು ರಚನೆಗಾಗಿ ಉತ್ತಮ ಸಾಮಾಜಿಕ ಮಾಧ್ಯಮವಾಗಿ ಹೊರಹೊಮ್ಮಿದೆ. ಈ ಆ್ಯಪ್ ಅಳವಡಿಸಿಕೊಂಡರೆ, ಲೈವ್ ಚಾಟ್ ಮಾತ್ರವೇ ಅಲ್ಲದೆ, ಫೋಟೋ, ವೀಡಿಯೋ, ಧ್ವನಿ ಸಂದೇಶಗಳ ವಿನಿಮಯ ಸಾಧ್ಯವಾಗಿದ್ದು, ಶೀಘ್ರದಲ್ಲೇ ಉಚಿತವಾಗಿ ಅಂದರೆ, ಇಂಟರ್ನೆಟ್ ಮೂಲಕ ಕರೆ ಸೌಲಭ್ಯವೂ ದೊರೆಯಲಿದೆ.

ಆದರೆ, ಇದರಲ್ಲಿ ಬರುವ ಫೈಲ್‌ಗಳ ಆಟೋ-ಡೌನ್‌ಲೋಡಿಂಗ್ ಹಾಗೂ ಅದಕ್ಕಾಗಿ ಅನವಶ್ಯ ಡೇಟಾ (ಇಂಟರ್ನೆಟ್) ವೆಚ್ಚ ವ್ಯಯವಾಗುತ್ತಿರುವ ಬಗ್ಗೆ ಕೆಲವರು ದೂರಿದ್ದಾರೆ. ಫೇಸ್‌ಬುಕ್‌ನಲ್ಲಿರುವಂತೆ ಇಲ್ಲಿಯೂ ತಮ್ಮನ್ನು ಯಾವುದೋ ಒಂದು ಗ್ರೂಪ್‌ಗೆ ಸೇರಿಸಿ, ದಿನಕ್ಕೆ ಹತ್ತು ಹಲವಾರು ಆಡಿಯೋ, ವೀಡಿಯೋ, ಫೋಟೋ ಫೈಲ್‌ಗಳು ಬರುತ್ತಿವೆ ಮತ್ತು ಪದೇ ಪದೇ ಫೋನ್ ನೋಟಿಫಿಕೇಶನ್ ಧ್ವನಿ ಕಿರಿಕಿರಿ ಮಾಡುತ್ತಿದೆ ಎಂಬುದರ ಬಗ್ಗೆ ಮತ್ತೆ ಕೆಲವರು ದೂರಿದ್ದಾರೆ. ಅದಕ್ಕೆ ಒಂದಿಷ್ಟು ಟಿಪ್ಸ್.

ಮೊದಲನೆಯದಾಗಿ, ನಮ್ಮ ಪ್ರೈವೆಸಿ ಅಂದರೆ ಖಾಸಗಿತನದ ರಕ್ಷಣೆ. ನಿಮ್ಮ ಪ್ರೊಫೈಲ್ ಜತೆಗೆ, ಎಷ್ಟು ಹೊತ್ತಿಗೆ ನೀವು ಈ ಆ್ಯಪ್ ಬಳಸಿದ್ದೀರಿ (‘last seen’) ಎಂಬ ಮಾಹಿತಿಯನ್ನು ಯಾರು ಬೇಕಾದರೂ ನೋಡಬಹುದು. ಈ ಮಾಹಿತಿ ಮುದ್ರೆ ಬೇರೆಯವರಿಗೆ ಕಾಣಿಸದಂತೆ ಮಾಡಲು, ವಾಟ್ಸಾಪ್ ತೆರೆದು, ಅದರ ಬಲ ಮೇಲ್ಭಾಗದಲ್ಲಿರುವ ಮೂರು ಚುಕ್ಕಿಗಳಿರುವ ಗುರುತು ಟಚ್ ಮಾಡಿದ್ರೆ ಸೆಟ್ಟಿಂಗ್ಸ್ ಮೆನು ತೆರೆದುಕೊಳ್ಳುತ್ತದೆ. ಅದರಲ್ಲಿ Accounts ನಲ್ಲಿ Privacy ಎಂಬಲ್ಲಿ, Last Seen ಎಂಬ ಆಯ್ಕೆಯನ್ನು ಪ್ರೆಸ್ ಮಾಡಿದ ಬಳಿಕ ಲಭ್ಯವಿರುವ ಮೂರು ಆಯ್ಕೆಗಳಲ್ಲಿ Nobody ಎಂಬುದನ್ನು ಗುರುತು ಮಾಡಿದರಾಯಿತು. ನೀವು ಎಷ್ಟೊತ್ತಿಗೆ ವಾಟ್ಸಾಪ್ ಬಳಸಿದ್ದೀರಿ ಎಂಬುದು ಯಾರಿಗೂ ತಿಳಿಯಲಾರದು.

ಇನ್ನು, ವಾಟ್ಸಾಪ್ ಸಂದೇಶಗಳಲ್ಲಿ ಯಾರೇ ಕಳುಹಿಸುವ ಮೀಡಿಯಾ ಫೈಲ್‌ಗಳು (ವೀಡಿಯೋ, ಆಡಿಯೋ, ಫೋಟೋ ಇತ್ಯಾದಿ) ಸಾಧನದ ಆಂತರಿಕ ಮೆಮೊರಿಯಲ್ಲಿ (ROM) ತಾನಾಗಿಯೇ ಡೌನ್‌ಲೋಡ್ ಆಗಿಬಿಟ್ಟು, ಉಳಿದ ಫೈಲ್ ಸೇವ್ ಮಾಡಲು ಜಾಗವೇ ಸಾಲದಾಗಬಹುದು. ಅದಕ್ಕೇನು ಪರಿಹಾರ? ಪ್ರಸ್ತುತ, ವಾಟ್ಸಾಪ್ ಮೀಡಿಯಾ ಫೈಲ್‌ಗಳನ್ನು ಎಸ್‌ಡಿ ಕಾರ್ಡ್‌ಗೆ ಡೌನ್‌ಲೋಡ್ ಆಗುವಂತೆ ಮಾಡಲು ಸಾಧ್ಯವಿಲ್ಲ. ಆ್ಯಪ್ ಅನ್ನೇ ಎಸ್‌ಡಿ ಕಾರ್ಡ್‌ಗೆ ಮೂವ್ ಮಾಡಿದರೆ ಮಾತ್ರವೇ ಇದು ಸಾಧ್ಯವಾಗುತ್ತದೆ. ಆದರೆ, ಈ ಆಯ್ಕೆ ವಾಟ್ಸಾಪ್‌ನಲ್ಲಿನ್ನೂ ಲಭ್ಯವಿಲ್ಲ. ಆದರೆ ಈ ಫೈಲ್‌ಗಳು ಸ್ವಯಂಚಾಲಿತವಾಗಿ ಡೌನ್‌ಲೋಡ್ ಆಗದಂತೆ ತಡೆದು ಇಂಟರ್ನೆಟ್ ಡೇಟಾ ಶುಲ್ಕದಲ್ಲಿ ಉಳಿತಾಯ ಮಾಡಬಹುದು. ಅದಕ್ಕೆ ಹೀಗೆ ಮಾಡಿ.

ಸೆಟ್ಟಿಂಗ್ಸ್‌ನಲ್ಲಿ Chat Settings ಎಂಬ ವಿಭಾಗಕ್ಕೆ ಹೋದರೆ, Media Auto-download ಎಂಬ ಆಯ್ಕೆ ಲಭ್ಯವಿರುತ್ತದೆ. ಅದರೊಳಗೆ ಪ್ರವೇಶಿಸಿದರೆ, When using mobile data ಅಂತ ಬರೆದಿರುವುದನ್ನು ಪ್ರೆಸ್ ಮಾಡಿದರೆ, ಚಿತ್ರ, ವೀಡಿಯೋ ಅಥವಾ ಆಡಿಯೋ ಪ್ರತ್ಯೇಕವಾಗಿ ಡೌನ್‌ಲೋಡ್‌ಗೆ ಆಯ್ಕೆ ಮಾಡಿಕೊಳ್ಳುವ ಅವಕಾಶವಿರುತ್ತದೆ. ನಿಮಗೆ ಬೇಕಾಗಿರುವ ಬಾಕ್ಸ್‌ಗೆ ಚೆಕ್ ಗುರುತು ಹಾಕಿ. ಎಲ್ಲ ಬಾಕ್ಸ್‌ಗಳಿಂದಲೂ ಅನ್-ಚೆಕ್ ಮಾಡಿದರೆ ಯಾವುದೂ ಸ್ವಯಂಚಾಲಿತವಾಗಿ ಡೌನ್‌ಲೋಡ್ ಆಗುವುದಿಲ್ಲ. ಆದರೆ, ಉಚಿತ ವೈ-ಫೈ ಸೌಕರ್ಯವಿದ್ದಲ್ಲಿ, ವೈಫೈ ಮೂಲಕ ಮಾತ್ರ ಸ್ವಯಂ-ಡೌನ್‌ಲೋಡ್ ಆಗುವಂತೆ ಹೊಂದಿಸುವ ಆಯ್ಕೆಯೂ ಸೆಟ್ಟಿಂಗ್ಸ್ > Media Auto-download ವಿಭಾಗದಲ್ಲೇ ಇದೆ. ಬಳಿಕ, ಯಾರಾದರೂ ಕಳಿಸಿರೋ ಫೈಲ್ ಬೇಕೆಂದಾದರೆ, ನೀವೇ ಆ ಚಿತ್ರ/ವೀಡಿಯೋ ಮೇಲೆ ಮಾತ್ರ ಕ್ಲಿಕ್ ಮಾಡಿದರೆ ಅದು ಡೌನ್‌ಲೋಡ್ ಆಗುತ್ತದೆ.

ನೀವೇನಾದರೂ ವಾಟ್ಸಾಪ್‌ಗೆ ಲಿಂಕ್ ಆಗಿರುವ ಮೊಬೈಲ್ ಸಂಖ್ಯೆಯನ್ನು ಬದಲಾಯಿಸಬೇಕಿದ್ದರೆ, ಸೆಟ್ಟಿಂಗ್ಸ್‌ನಲ್ಲಿ Account ಅಂತ ಹೋದ್ರೆ, ಅಲ್ಲಿ Change number ಎಂಬ ಆಯ್ಕೆ ಇರುತ್ತದೆ. ಹಳೆಯ ಹಾಗೂ ಹೊಸ ಸಂಖ್ಯೆಯನ್ನು ಹಾಕಿದರಾಯಿತು. ಆದರೆ, ನಿಮ್ಮ ಎಲ್ಲ ವಾಟ್ಸಾಪ್ ಸ್ನೇಹಿತರಿಗೂ ಅವರವರ ಮೊಬೈಲ್‌ನಲ್ಲಿ ನಿಮ್ಮ ಹಳೆಯ ನಂಬರ್ ಡಿಲೀಟ್ ಮಾಡಲು ಮತ್ತು ಹೊಸದನ್ನು ಸೇರಿಸಲು ಸಂದೇಶದ ಮೂಲಕ ಒತ್ತಾಯಿಸುವುದು ಅಗತ್ಯ.

ಟೆಕ್-ಟಾನಿಕ್: ಹೆಚ್ಚಿನ ಸ್ಮಾರ್ಟ್‌ಫೋನ್‌ಗಳಲ್ಲಿ ಆಂತರಿಕ ಸ್ಥಳಾವಕಾಶ (ಇಂಟರ್ನಲ್ ಮೆಮೊರಿ) ಕಡಿಮೆ ಇರುತ್ತದೆ. 2ರಿಂದ 4 ಜಿಬಿ ಇರುವ ಫೋನ್‌ಗಳಿಗಂತೂ ಒಂದಷ್ಟು ಆ್ಯಪ್‌ಗಳನ್ನು ಇನ್‌ಸ್ಟಾಲ್ ಮಾಡಿಕೊಂಡ ತಕ್ಷಣ, Not Enough Memory ಎಂಬ ಸಂದೇಶ ಬರಬಹುದು. ಕೆಲವು ಆ್ಯಪ್‌ಗಳನ್ನು ಮೆಮೊರಿ ಕಾರ್ಡ್‌ಗೆ (External SD Card) ವರ್ಗಾಯಿಸುವುದು ಸಾಧ್ಯವಿಲ್ಲ. ಆದರೆ ಮತ್ತೆ ಕೆಲವನ್ನು ವರ್ಗಾಯಿಸಬಹುದು. ವರ್ಗಾಯಿಸಬೇಕೆಂದಿದ್ದರೆ, ಸೆಟ್ಟಿಂಗ್ಸ್ ಕ್ಲಿಕ್ ಮಾಡಿ, Apps ಅಂತ ಕ್ಲಿಕ್ ಮಾಡಿದಾಗ ಎಲ್ಲ ಆ್ಯಪ್‌ಗಳ ಪಟ್ಟಿ ಕಾಣಿಸುತ್ತದೆ. ಒಂದೊಂದೇ ಆ್ಯಪ್ ಮೇಲೆ ಕ್ಲಿಕ್ ಮಾಡಿದಾಗ, ಅದರ ಕುರಿತು ಮಾಹಿತಿ ಮತ್ತು Move to SD Card ಎಂಬ ಆಯ್ಕೆಯೊಂದು ದೊರೆಯುತ್ತದೆ. ಕ್ಲಿಕ್ ಮಾಡಿದರಾಯಿತು.

ಜಿಮೇಲ್‌ನಲ್ಲಿ ಬೇಡವಾದ ಮೇಲ್‌ಗಳನ್ನು ನಿವಾರಿಸಿ, ಸ್ಥಳಾವಕಾಶ ಹೆಚ್ಚಿಸಿಕೊಳ್ಳಿ

ಮಾಹಿತಿ@ತಂತ್ರಜ್ಞಾನ ವಿಜಯ ಕರ್ನಾಟಕ ಅಂಕಣ 94: ಸೆಪ್ಟೆಂಬರ್ 22, 2014
ಇತ್ತೀಚಿನ ದಿನಗಳಲ್ಲಿ ಆನ್‌ಲೈನ್ ವ್ಯವಹಾರಗಳು ಹೆಚ್ಚಾಗುತ್ತಿವೆ. ಫೇಸ್‌ಬುಕ್, ಟ್ವಿಟರ್ ಮಾತ್ರವಲ್ಲದೆ ಹಲವಾರು ಚಿತ್ರವಿಚಿತ್ರ ಸೇವೆಗಳಿಗೆ, ಆ್ಯಪ್‌ಗಳಿಗೆ ನಮಗರಿವಿದ್ದೋ, ಇಲ್ಲದೆಯೋ ನಾವು ನಮ್ಮ ಇಮೇಲ್ ಖಾತೆಯನ್ನು ಬಳಸಿಯೇ ಲಾಗಿನ್/ಸೈನ್ ಅಪ್ ಆಗಿಬಿಡುತ್ತೇವೆ. ಈ ಕಾರಣದಿಂದಾಗಿ, ನಮ್ಮ ಇಮೇಲ್ ವಿಳಾಸ ಬಟಾಬಯಲಾಗುತ್ತಿದೆ. ಇದರಿಂದಾಗಿ ಸ್ಪ್ಯಾಮ್ (ಅನಗತ್ಯ, ಮಾರುಕಟ್ಟೆ ಉದ್ದೇಶಕ್ಕಾಗಿಯೇ ಇರುವ) ಸಂದೇಶಗಳ ಹಾವಳಿಯೂ ಜಾಸ್ತಿಯಾಗುತ್ತಿದೆ.

ಇದಲ್ಲದೆ, ಇಮೇಲ್ ಮೂಲಕ ಫೋಟೋ, ವೀಡಿಯೋ ಅಟ್ಯಾಚ್ಮೆಂಟ್ ಕಳುಹಿಸುವುದು ಮತ್ತು ಸ್ವೀಕರಿಸುವ ಪ್ರಕ್ರಿಯೆಯೂ ಜಾಸ್ತಿಯಾಗತೊಡಗಿದೆ. ಇದರಿಂದಾಗಿ ಉಚಿತವಾಗಿ ಇಮೇಲ್ ಸೇವೆ ನೀಡುತ್ತಿರುವವರೆಲ್ಲರೂ ಈಗಾಗಲೇ ಇದರ ಮಿತಿಯನ್ನು 15 ಜಿಬಿ (ಗಿಗಾಬೈಟ್)ಗೆ ಏರಿಸಿದ್ದಾರೆ. ಹಲವಾರು ವರ್ಷಗಳಿಂದ ಇಮೇಲ್ ಬಳಸುತ್ತಿರುವವರಲ್ಲಿ ಇತ್ತೀಚೆಗೆ ಅವರ 15 ಜಿಬಿ ಕೋಟಾ ಬೇಗಬೇಗನೇ ತುಂಬುತ್ತಿರುವಂತೆ ಅನ್ನಿಸಿರಬಹುದು.

ಹೊಸಬರು ಹಾಗೂ ಹಳೆಯ ಬಳಕೆದಾರರು ಈಗಲೇ ಇಮೇಲ್ ಖಾತೆಯನ್ನು ಕ್ಲೀನ್ ಆಗಿರಿಸಿಕೊಂಡರೆ, ಇರುವ ಸ್ಥಳಾವಕಾಶವನ್ನು ಸಮರ್ಥವಾಗಿ ಬಳಸಿಕೊಳ್ಳಬಹುದು. ಜಿಮೇಲ್‌ನಲ್ಲಿ ಸಾಕಷ್ಟು ಫಿಲ್ಟರ್‌ಗಳು ಲಭ್ಯ ಇರುವುದರಿಂದಾಗಿ ಹಳೆಯ ಮತ್ತು ಅನಗತ್ಯ ಇಮೇಲ್‌ಗಳನ್ನು ಅಳಿಸಿಹಾಕಬಹುದು; ಸ್ಟೋರೇಜ್ ಜಾಗ ಮುಕ್ತವಾಗಿಸಬಹುದು. ಇದು ತೀರಾ ಕಷ್ಟದ ಕೆಲಸ ಏನಲ್ಲ, ಅದಕ್ಕಾಗಿಯೇ ಇರುವ ಕೆಲವೊಂದು ಶಾರ್ಟ್‌ಕಟ್ ವಿಧಾನಗಳ ಮೂಲಕ ಯಾರು ಕೂಡ ಕ್ಲೀನ್ ಮಾಡಿಕೊಳ್ಳಬಹುದು.

ಜಿಮೇಲ್ ಎಂಬುದು ಸರ್ಚ್ ಎಂಜಿನ್ ದೈತ್ಯ ಕಂಪನಿ ಗೂಗಲ್‌ನದ್ದೇ ಆಗಿರುವುದರಿಂದ, ಅದೇ ಸರ್ಚ್ ಎಂಜಿನ್ ಮೂಲಕ ನಿರ್ದಿಷ್ಟ ಇಮೇಲ್‌ಗಳನ್ನು ಫಿಲ್ಟರ್ ಮಾಡಿ, ನಮಗೆ ಬೇಕಾದ್ದನ್ನು ಮಾತ್ರ ಅಳಿಸಲು ಇಲ್ಲಿ ಕೆಲವು ಸಲಹೆಗಳಿವೆ.

ಮೊದಲನೆಯದಾಗಿ ಅತಿದೊಡ್ಡ ಗಾತ್ರದ, ಅಂದರೆ ಹೆಚ್ಚು ಜಾಗ ಆಕ್ರಮಿಸುವ ಫೋಟೋ, ವೀಡಿಯೋ ಅಟ್ಯಾಚ್‌ಮೆಂಟುಗಳಿರುವ ಮೇಲ್‌ಗಳನ್ನು ಅಳಿಸಬೇಕು. ಇಂಥವನ್ನು ಹುಡುಕಲು ಒಂದು ಫಿಲ್ಟರ್ ಕಮಾಂಡ್ ಬಳಸಿದರಾಯಿತು. ಅದಕ್ಕಾಗಿ ಹೀಗೆ ಮಾಡಿ: ಜಿಮೇಲ್ ಲಾಗಿನ್ ಆದ ಬಳಿಕ, ಮೇಲ್ಭಾಗದಲ್ಲಿ ಸರ್ಚ್ ಬಾರ್ (ಹುಡುಕಾಡಲು ಇರುವ ಪಟ್ಟಿ) ಕಾಣಿಸುತ್ತದೆ. ಅದರಲ್ಲಿ Larger:10M ಎಂದು ಟೈಪ್ ಮಾಡಿ, ಹುಡುಕುವ ಚಿಹ್ನೆ (ಭೂತಕನ್ನಡಿ ಚಿತ್ರ) ಕ್ಲಿಕ್ ಮಾಡಿಬಿಡಿ. ಅಂದರೆ 10 ಎಂಬಿಗಿಂತ ಹೆಚ್ಚು ಗಾತ್ರ ಇರುವ ಇಮೇಲ್‌ಗಳೆಲ್ಲವೂ ಕಾಣಿಸುತ್ತವೆ. 10M ಎಂಬುದರ ಬದಲು, ವಿಭಿನ್ನ ಗಾತ್ರದ ಫೈಲ್‌ಗಳಿಗಾಗಿ ಹುಡುಕಾಡಿ ಅವನ್ನು ಡಿಲೀಟ್ ಮಾಡಬಹುದು. ಸರ್ಚ್ ಬಾರ್ ಕೆಳಭಾಗದಲ್ಲಿರುವ ಒಂದು ಬಾಕ್ಸ್ ಕ್ಲಿಕ್ ಮಾಡಿದರೆ, ಕಾಣಿಸುವ ಎಲ್ಲ ಮೇಲ್‌ಗಳನ್ನೂ ಏಕಕಾಲದಲ್ಲಿ ಸೆಲೆಕ್ಟ್ ಮಾಡಬಹುದು, ಎಲ್ಲವುಗಳ ಮೇಲೆ ಕಣ್ಣು ಹಾಯಿಸಿ, ನಿಮಗೆ ಬೇಕಾಗಿರುವ ಮೇಲ್‌ಗಳನ್ನು ಡೀಸೆಲೆಕ್ಟ್ ಮಾಡಿ (ಪ್ರತೀ ಇಮೇಲ್ ಎಡಭಾಗದಲ್ಲಿರುವ ಬಾಕ್ಸ್ ಕ್ಲಿಕ್ ಮಾಡಿದರಾಯಿತು), ಡಿಲೀಟ್ ಬಟನ್ ಒತ್ತಿ.

older_than:1y ಅಂತ ಸರ್ಚ್ ಬಾರ್‌ನಲ್ಲಿ ಹಾಕಿ ಎಂಟರ್ ಕೊಟ್ಟರೆ (ಅಥವಾ ಸರ್ಚ್ ಬಟನ್ ಕ್ಲಿಕ್ ಮಾಡಿದರೆ), 1 ವರ್ಷದ ಹಿಂದಿನ ಮೇಲ್‌ಗಳು ಕಾಣಿಸುತ್ತವೆ. ಬೇಕಿದ್ದರೆ ವರ್ಷದ ಸಂಖ್ಯೆಯನ್ನು ಬದಲಾಯಿಸಿಕೊಳ್ಳಬಹುದು. ಅದೇ ರೀತಿ ನಿರ್ದಿಷ್ಟ ದಿನಾಂಕದ, ಉದಾಹರಣೆಗೆ ಈ ವರ್ಷದ ಜನವರಿ 31ರ ಹಿಂದಿನ ಇಮೇಲ್‌ಗಳು ಬೇಡವೆಂದಾದರೆ, ಅವುಗಳನ್ನು ಹುಡುಕಲು Before:2014/01/31 ಅಂತ ಸರ್ಚ್‌ಬಾರ್‌ನಲ್ಲಿ ಹಾಕಿದರಾಯಿತು. ಇದು ಇಸವಿ/ತಿಂಗಳು/ದಿನಾಂಕ ಮಾದರಿಯಲ್ಲಿರುತ್ತದೆ. ಇದೇ ರೀತಿ, ಇಂತಿಷ್ಟು ವರ್ಷ ಹಿಂದಿನ ಮತ್ತು 1 ಎಂಬಿಗಿಂತ ಹೆಚ್ಚು ಗಾತ್ರವಿರುವ ಇಮೇಲ್‌ಗಳನ್ನು ಫಿಲ್ಟರ್ ಮಾಡಿ ಅಳಿಸಬೇಕೆಂದಾದರೆ, ಸರ್ಚ್ ಬಾರ್‌ನಲ್ಲಿ has:attachment larger:1M older_than:1y ಅಂತ ಟೈಪ್ ಮಾಡಿದರಾಯಿತು. ಸರ್ಚ್ ರಿಸಲ್ಟ್ ಬಂದ ಬಳಿಕ, ನೋಡಿ ಡಿಲೀಟ್ ಮಾಡಿಬಿಡಬಹುದು.

ನಿರ್ದಿಷ್ಟ ವ್ಯಕ್ತಿಯಿಂದ ಅಥವಾ ಸ್ಪ್ಯಾಮ್ ಇಮೇಲ್ ವಿಳಾಸದಿಂದ ಬಂದಿರುವ ಇಮೇಲ್‌ಗಳನ್ನು ಫಿಲ್ಟರ್ ಮಾಡಬೇಕಿದ್ದರೆ, ಸರ್ಚ್ ಬಾರ್‌ನಲ್ಲಿ ಆಯಾ ಆ ಇಮೇಲ್ ವಿಳಾಸ ನಮೂದಿಸಿದರಾಯಿತು. ಎಲ್ಲವೂ ಒಂದೇ ಕಡೆ ಸಿಗುತ್ತವೆ ಮತ್ತು ಏಕಕಾಲದಲ್ಲಿ ಡಿಲೀಟ್ ಮಾಡಬಹುದು. ಸರ್ಚ್ ಬಟನ್ ಸಮೀಪ, ತ್ರಿಕೋನಾಕೃತಿ ಐಕಾನ್ ಕ್ಲಿಕ್ ಮಾಡಿದರೆ, ಹುಡುಕಾಟಕ್ಕೆ ಮತ್ತಷ್ಟು ಆಯ್ಕೆಗಳನ್ನು ಸೇರಿಸಬಹುದು. ಟ್ರೈ ಮಾಡಿ ನೋಡಿ.

ಟೆಕ್ ಟಾನಿಕ್
ಆ್ಯಪ್‌ಗಳಿಗೆ ನಿರ್ಬಂಧ: ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ ನಿಮಗೆ ಬೇಕಾಗಿರುವ, ಬೇಡವಾಗಿರುವ ಆ್ಯಪ್‌ಗಳೆಲ್ಲವೂ ಧುತ್ತನೇ ಕಾಣಿಸಿಕೊಳ್ಳುತ್ತವೆ. ಆದರೆ ಯಾವ ರೀತಿಯ ಆ್ಯಪ್‌ಗಳು ಕಾಣಿಸಿಕೊಳ್ಳಬೇಕು ಎಂಬುದನ್ನು ನಿಮ್ಮ ಆಂಡ್ರಾಯ್ಡ್ ಫೋನ್ ಅಥವಾ ಟ್ಯಾಬ್ಲೆಟ್‌ನಲ್ಲಿ ನೀವೇ ನಿರ್ಬಂಧಿಸಬಹುದಾಗಿದೆ ಎಂಬುದು ಗೊತ್ತೇ? ಮಕ್ಕಳೇನಾದರೂ ನಿಮ್ಮ ಮೊಬೈಲ್ ತೆಗೆದುಕೊಂಡು ಪ್ಲೇ ಸ್ಟೋರ್‌ನಿಂದ ಯದ್ವಾ ತದ್ವಾ ಗೇಮ್‌ಗಳನ್ನು ಡೌನ್‌ಲೋಡ್ ಮಾಡಿಕೊಂಡರೆ? ಇದಕ್ಕಾಗಿ ಆ್ಯಪ್ ನಿರ್ಬಂಧಿಸಬೇಕಿದ್ದರೆ, ಗೂಗಲ್ ಪ್ಲೇ ಸ್ಟೋರ್ ಓಪನ್ ಮಾಡಿ, ಅದರ ಸೆಟ್ಟಿಂಗ್ಸ್ ಮೆನುವಿಗೆ ಹೋಗಿ, ಯೂಸರ್ ಕಂಟ್ರೋಲ್ಸ್ ಎಂಬಲ್ಲಿ ಕಂಟೆಂಟ್ ಫಿಲ್ಟರಿಂಗ್ ಎಂಬ ಆಯ್ಕೆಯೊಂದಿದೆ. ಕಡಿಮೆ ಮೆಚುರಿಟಿ ಉಳ್ಳವನ್ನು, ಹೆಚ್ಚು ಪ್ರಬುದ್ಧವಾಗಿರುವವುಗಳನ್ನು ಅಥವಾ ಎಲ್ಲ ಆ್ಯಪ್‌ಗಳನ್ನು ತೋರಿಸುವ ಆಯ್ಕೆ ಲಭ್ಯವಾಗುತ್ತದೆ. ಇದನ್ನು ಬದಲಾಯಿಸಬೇಕಿದ್ದರೆ ನೀವೇ ಆಯ್ಕೆ ಮಾಡಿಕೊಳ್ಳುವ ಒಂದು ಪಿನ್ ನಂಬರ್ ಹಾಕಬೇಕಾಗುತ್ತದೆ.

ಸ್ಲೋ ಆಗಿರುವ ಕಂಪ್ಯೂಟರಿನ ವೇಗ ಹೆಚ್ಚಿಸಬೇಕೇ? ನೀವೇ ಮಾಡಿನೋಡಿ!

ಮಾಹಿತಿ@ತಂತ್ರಜ್ಞಾನ – ವಿಜಯ ಕರ್ನಾಟಕ ಅಂಕಣ-93, ಸೆಪ್ಟೆಂಬರ್ 15, 2014
ಸಮಯ ಕಳೆದಂತೆ ನಮ್ಮ ಡೆಸ್ಕ್‌ಟಾಪ್ ಅಥವಾ ಲ್ಯಾಪ್‌ಟಾಪ್ ಸ್ಲೋ ಆಗುವುದು ಸಹಜ. ಆರಂಭದಲ್ಲಿದ್ದಷ್ಟು ವೇಗದಲ್ಲಿ ಕೆಲಸ ಮಾಡುವುದು ಸಾಧ್ಯವಾಗದು. ಈ ರೀತಿ ನಿಧಾನಗತಿಗೆ ಸಾಕಷ್ಟು ಕಾರಣಗಳಿರುತ್ತವೆ. ಸಾಮಾನ್ಯವಾದವೆಂದರೆ, ಮೆಮೊರಿ (ಅಂದರೆ ಆಂತರಿಕ ಸ್ಟೋರೇಜ್, RAM) ಕಡಿಮೆ ಇರುವುದು, ಮಾಲ್‌ವೇರ್/ವೈರಸ್ ಬಾಧೆ, ಹಿನ್ನೆಲೆಯಲ್ಲಿ ಸಾಕಷ್ಟು ಪ್ರೋಗ್ರಾಂಗಳು ರನ್ ಆಗುತ್ತಿರುವುದು, ಹಾರ್ಡ್ ಡ್ರೈವ್‌ನಲ್ಲಿ ಸಾಕಷ್ಟು ಸ್ಥಳ ಇಲ್ಲದಿರುವುದು, ಕರಪ್ಟ್ (ದೋಷಪೂರಿತ) ಅಥವಾ ಫ್ರಾಗ್ಮೆಂಟ್ ಆಗಿರುವ ಹಾರ್ಡ್‌ಡ್ರೈವ್ ಇತ್ಯಾದಿ.

ಆದರೆ, ಕಂಪ್ಯೂಟರ್ ಸರ್ವಿಸ್ ಸೆಂಟರಿಗೆ ಹೋಗದೆ ಕೆಲವೊಂದನ್ನು ನಾವೇ ಹೆಚ್ಚು ಶ್ರಮವಿಲ್ಲದೆ ಪ್ರಯತ್ನಿಸಬಹುದು ಎಂಬುದು ಗೊತ್ತೇ? ಈ ಸರಳ, ಉಪಯುಕ್ತ ಸಲಹೆಗಳು ನಿಮಗೂ ಇಷ್ಟವಾಗಬಹುದು. ಮಾಡಿ ನೋಡಿ.

ಹಾರ್ಡ್ ಡಿಸ್ಕ್ ಡೀಫ್ರ್ಯಾಗ್ಮೆಂಟ್: ನಿಮ್ಮ ಕಂಪ್ಯೂಟರ್‌ನಲ್ಲಿ ವಿಂಡೋಸ್ (ಸ್ಟಾರ್ಟ್) ಬಟನ್ ಒತ್ತಿದ ಬಳಿಕ ಪ್ರೋಗ್ರಾಮ್ಸ್‌ನಲ್ಲಿ, ಆ್ಯಕ್ಸಸರೀಸ್ ಎಂಬಲ್ಲಿ, ಸಿಸ್ಟಂ ಟೂಲ್ಸ್ ಎಂಬ ಫೋಲ್ಡರ್ ಇರುತ್ತದೆ. ಅದರಲ್ಲಿರುವ ಡಿಸ್ಕ್ ಡೀಫ್ರ್ಯಾಗ್ಮೆಂಟರ್ ಎಂಬುದನ್ನು ಆಯ್ಕೆ ಮಾಡಿದರೆ, ಯಾವ ಡ್ರೈವ್ (ಸಿ, ಡಿ, ಇ, ಎಫ್ ಇತ್ಯಾದಿ) ಅನ್ನು ಆಯ್ಕೆ ಮಾಡಿಕೊಂಡು, ಚದುರಿಹೋದ ಸಿಸ್ಟಂ ಫೈಲ್‌ಗಳನ್ನು ವ್ಯವಸ್ಥಿತವಾಗಿರಿಸಿದರೆ, ವೇಗ ವರ್ಧಿಸುತ್ತದೆ.

ಸ್ಟಾರ್ಟ್-ಅಪ್‌ನಲ್ಲಿ ಕಡಿಮೆ ಪ್ರೋಗ್ರಾಂ ಇರಲಿ: ಕಂಪ್ಯೂಟರ್ ಪ್ರಾರಂಭಗೊಳ್ಳುವಾಗ ಆರಂಭವಾಗುವ ಪ್ರೋಗ್ರಾಂಗಳು ನಿಮ್ಮ ಕಂಪ್ಯೂಟರ್ ನಿಧಾನ ಬೂಟ್ ಆಗಲು ಕಾರಣವಾಗಬಹುದು. Start > Start Up ಫೋಲ್ಡರ್‌ನಲ್ಲಿರಬಹುದಾದ ಈ ಪ್ರೋಗ್ರಾಂಗಳನ್ನು ಕನಿಷ್ಠ ಸಂಖ್ಯೆಯಲ್ಲಿಟ್ಟುಕೊಳ್ಳಿ. ಅಗತ್ಯವಿಲ್ಲದಿರುವುದನ್ನು ಡಿಸೇಬಲ್ ಮಾಡಿಬಿಡಿ. ಬೇಕಾಗಿರುವುದನ್ನು ಬೇಕಾದಾಗ ಮಾತ್ರ ತೆರೆಯಬಹುದು,

ತಂತ್ರಾಂಶ ಅಪ್‌ಡೇಟ್ ಮಾಡಿ: ಕಂಪನಿಯೇ ಆಗಾಗ್ಗೆ ರಿಲೀಸ್ ಮಾಡುವ ಹಾರ್ಡ್‌ವೇರ್ ಮತ್ತು ಸಾಫ್ಟ್‌ವೇರ್ ಅಪ್‌ಡೇಟ್ ಮಾಡಿಕೊಳ್ಳುತ್ತಾ ಇರುವುದರಿಂದ ಪಿಸಿಯನ್ನು ಸುರಕ್ಷಿತವಾಗಿರಿಸಿಕೊಳ್ಳಬಹುದು ಮತ್ತು ವೇಗವಾಗಿಯೂ ಕಾರ್ಯನಿರ್ವಹಿಸುವಂತೆ ಮಾಡಬಹುದು. ಇದರಿಂದ ಪಿಸಿಯ ಕಾರ್ಯಕ್ಷಮತೆಯೂ ಹೆಚ್ಚುತ್ತದೆ.

ಅನಗತ್ಯ ಟೂಲ್‌ಬಾರ್‌ಗಳು ಬೇಡ: ಯಾವುದೇ ಹೊಸ ತಂತ್ರಾಂಶ ಅಳವಡಿಸಿಕೊಳ್ಳುವಾಗ ವಿಭಿನ್ನ ಟೂಲ್‌ಬಾರ್‌ಗಳನ್ನು ಇನ್‌ಸ್ಟಾಲ್ ಮಾಡಿಕೊಳ್ಳುವಂತೆ ಪಾಪ್-ಅಪ್ ಸೂಚನೆಗಳು ಬರುತ್ತವೆ. ಏನೆಂದು ನೋಡದೆ ಎಲ್ಲದಕ್ಕೂ ‘ಓಕೆ’ ಎಂದು ಕ್ಲಿಕ್ ಮಾಡುತ್ತಾ ಹೋದರೆ, ಅನಗತ್ಯ ತಂತ್ರಾಂಶಗಳು ನಿಮಗೆ ತಿಳಿಯದೆಯೇ ಇನ್‌ಸ್ಟಾಲ್ ಆಗಿ, ಕಂಪ್ಯೂಟರನ್ನು ಸ್ಲೋ ಮಾಡಬಹುದು. ಹಾಗಾಗಿ ಅವನ್ನು ಗಮನವಿಟ್ಟು ಓದಿಕೊಳ್ಳಬೇಕು.

ಡೆಸ್ಕ್‌ಟಾಪ್ ಕ್ಲೀನ್ ಆಗಿರಲಿ: ಹೆಚ್ಚಿನವರು ಎಲ್ಲವನ್ನೂ ಡೆಸ್ಕ್‌ಟಾಪ್‌ನಲ್ಲೇ ಇರಿಸಿಕೊಳ್ಳುವ ಅಭ್ಯಾಸ ಹೊಂದಿರುತ್ತಾರೆ. ಇದನ್ನು ತಪ್ಪಿಸಬೇಕು ಹಾಗೂ ಸಿ ಡ್ರೈವ್‌ನಲ್ಲಿರುವ “ಮೈ ಡಾಕ್ಯುಮೆಂಟ್ಸ್” ವಿಭಾಗದಲ್ಲಿರುವ ಎಲ್ಲ ಐಟಂಗಳನ್ನೂ (ಉದಾ: ಚಿತ್ರಗಳು, ಆಡಿಯೋ, ವೀಡಿಯೋ ಫೈಲ್‌ಗಳು ಇತ್ಯಾಗಿ) ಬೇರೆ ಡ್ರೈವ್‌ಗೆ ವರ್ಗಾಯಿಸಬೇಕು. ಸಿ ಡ್ರೈವ್ ಸಾಧ್ಯಲಿದ್ದಷ್ಟೂ ಖಾಲಿ ಇರಿಸಿಕೊಂಡರೆ ಸಿಸ್ಟಂ ಸ್ಲೋ ಆಗುವುದನ್ನು ಸ್ವಲ್ಪ ಮಟ್ಟಿಗೆ ತಡೆಯಬಹುದು.

ಕುಕೀಗಳು ಮತ್ತು ಟೆಂಪರರಿ ಫೈಲ್‌ಗಳನ್ನು ನಿವಾರಿಸಿ: ಬ್ರೌಸರ್‌ನಲ್ಲಿ ನಿಯಮಿತವಾಗಿ ಕುಕೀಗಳು ಹಾಗೂ ಟೆಂಪರರಿ ಫೈಲ್‌ಗಳನ್ನು (cache) ಡಿಲೀಟ್ ಮಾಡುತ್ತಿರಬೇಕು. (ಕ್ರೋಮ್ ಮತ್ತು ಫೈರ್‌ಫಾಕ್ಸ್‌ನಲ್ಲಿ ಶಿಫ್ಟ್+ಕಂಟ್ರೋಲ್+ಡಿಲೀಟ್ ಬಟನ್ ಒತ್ತಿ). ಇಲ್ಲವಾದಲ್ಲಿ, ಈ ಕೆಲಸ ಸುಲಭವಾಗಿಸುವ CCleaner ಎಂಬ ಉಚಿತ ತಂತ್ರಾಂಶ ಬಳಸಿ.

ಹಾರ್ಡ್ ಡಿಸ್ಕ್ ಕ್ಲೀನ್ ಮಾಡಿ: ಹಾರ್ಡ್ ಡಿಸ್ಕ್‌ನಲ್ಲಿ ಎಲ್ಲ ರೀತಿಯ ಜಂಕ್ ಫೈಲ್‌ಗಳೂ ಇರುತ್ತವೆ. ಕಣ್ಣಿಗೆ ಕಾಣಿಸುವ ಅನಗತ್ಯ ಫೈಲ್‌ಗಳನ್ನು ನೀವೇ ಡಿಲೀಟ್ ಮಾಡಿ. ಇಲ್ಲಿ ಸ್ಥಳಾವಕಾಶ ಹೆಚ್ಚು ಮಾಡಿಸುವ ನಿಟ್ಟಿನಲ್ಲಿ, ಪ್ರೋಗ್ರಾಮ್ಸ್ > ಆ್ಯಕ್ಸಸರೀಸ್ > ಸಿಸ್ಟಂ ಟೂಲ್ಸ್‌ನಲ್ಲಿರುವ ಡಿಸ್ಕ್ ಕ್ಲೀನಪ್ ಎಂಬ ತಂತ್ರಾಂಶವನ್ನು ತಿಂಗಳು-ಎರಡು ತಿಂಗಳಿಗೊಮ್ಮೆ ರನ್ ಮಾಡುತ್ತಾ ಇರಿ. ನಿಮಗೆ ತಿಳಿಯದ ಫೈಲುಗಳನ್ನು ಅದು ವ್ಯವಸ್ಥಿತವಾಗಿರಿಸುತ್ತದೆ.

ಅನಗತ್ಯ ಪ್ರೋಗ್ರಾಂಗಳನ್ನು ತೆಗೆದುಬಿಡಿ: ನಿಮ್ಮ ಪಿಸಿಯಲ್ಲಿರುವ ಎಲ್ಲ ಪ್ರೋಗ್ರಾಂಗಳೂ ಉಪಯೋಗಕ್ಕೆ ಬರಲಾರವು. ಬೇಡದೇ ಇರುವುದನ್ನು ನಿರ್ದಾಕ್ಷಿಣ್ಯವಾಗಿ ಅನ್‌ಇನ್‌ಸ್ಟಾಲ್ ಮಾಡಿಬಿಡಿ. ಇನ್‌ಸ್ಟಾಲ್ ಮಾಡಿಕೊಳ್ಳುವಾಗಲೇ, ಅದರ ಅಗತ್ಯ ಇದೆಯೇ ಎಂದು ಎರಡೆರಡು ಬಾರಿ ಯೋಚಿಸಿ. ವಿಶ್ವಾಸಾರ್ಹವಲ್ಲದ ಕಡೆಯಿಂದ ತಂತ್ರಾಂಶ ಸ್ಥಾಪಿಸಿಕೊಂಡರೆ, ಅದರಲ್ಲಿ ವೈರಸ್/ಮಾಲ್‌ವೇರ್ ಇರುವ ಸಾಧ್ಯತೆಗಳಿರುವುದರಿಂದ, ಎಚ್ಚರ ವಹಿಸಿ.

ಶಂಕಾಸ್ಪದ ಲಿಂಕ್/ವೆಬ್ ತಾಣಗಳ ಬಗ್ಗೆ ಎಚ್ಚರ: ವೈರಸ್ ಸಹಿತ ಮಾಲ್‌ವೇರ್‌ಗಳು ನಿಮ್ಮ ಕಂಪ್ಯೂಟರನ್ನು ನಿಧಾನವಾಗಿಸುತ್ತವಷ್ಟೇ ಅಲ್ಲದೆ, ಹಾನಿಯನ್ನೂ ಉಂಟು ಮಾಡುತ್ತವೆ. ಹೀಗಾಗಿ ಶಂಕಾಸ್ಪದ ಲಿಂಕ್‌ಗಳನ್ನು ಕ್ಲಿಕ್ ಮಾಡಬೇಡಿ ಮತ್ತು ಅಂತಹ ವೆಬ್ ತಾಣಗಳಿಗೆ ಹೋದರೆ ಯಾವುದೇ ಲಿಂಕ್‌ಗಳನ್ನೂ ಕ್ಲಿಕ್ ಮಾಡಬಾರದು. ವಾರಕ್ಕೊಮ್ಮೆ ಕಂಪ್ಯೂಟರನ್ನು ಒಳ್ಳೆಯ ಆ್ಯಂಟಿವೈರಸ್ ಮೂಲಕ ಸ್ಕ್ಯಾನ್ ಮಾಡಿಸಿಕೊಳ್ಳಬೇಕು. ಇದರಿಂದಲೂ ಕಂಪ್ಯೂಟರ್ ನಿಧಾನವಾಗುವುದನ್ನು ತಡೆಯಬಹುದು.

ಆಪರೇಟಿಂಗ್ ಸಿಸ್ಟಂ ಪುನಃಸ್ಥಾಪನೆ: ಏನೇ ಮಾಡಿದರೂ ಕಂಪ್ಯೂಟರ್ ವೇಗವಾಗಿ ಕೆಲಸ ಮಾಡುತ್ತಿಲ್ಲ ಎಂದಾದಲ್ಲಿ, ಒಳ್ಳೆಯ ನುರಿತವರ ಸಲಹೆ ಪಡೆದು ಆಪರೇಟಿಂಗ್ ಸಿಸ್ಟಂ ಅನ್ನು ರಿಇನ್‌ಸ್ಟಾಲ್ ಮಾಡಿಕೊಳ್ಳಬೇಕು (ಫಾರ್ಮ್ಯಾಟ್ ಮಾಡುವುದು). ಇದು ಸಂಕೀರ್ಣವಾಗಿದ್ದು, ಸ್ವಲ್ಪ ಹೆಚ್ಚು ಸಮಯ ಬೇಕಾಗುತ್ತದೆ. ಕಂಪ್ಯೂಟರ್‌ನ ತಂತ್ರಾಂಶವು ಹೊಚ್ಚ ಹೊಸದರಂತೆ ಆಗುತ್ತದೆ. ಪರಿಣಿತರ ಸಲಹೆ ಪಡೆಯುವುದು ಕಡ್ಡಾಯ.

ಟೆಕ್ ಟಾನಿಕ್
ನಿಮ್ಮ ಪಾಸ್‌ವರ್ಡ್ ಕದ್ದಿದ್ದಾರೆಯೇ?
ಕಳೆದ ವಾರ ಸುದ್ದಿ ಮಾಡಿದ್ದು, ವಿಶ್ವಾದ್ಯಂತ 50 ಲಕ್ಷದಷ್ಟು ಜಿಮೇಲ್ ಬಳಕೆದಾರರ ಪಾಸ್‌ವರ್ಡ್ ಮಾಹಿತಿಯು ಸೋರಿ ಹೋಗಿದೆ ಅಂತ. ಜನರೆಲ್ಲಾ ಬೆಚ್ಚಿ ಬಿದ್ದರು. ಕೆಲವರೆಲ್ಲ ಸುದ್ದಿ ತಿಳಿದಾಕ್ಷಣ ತಮ್ಮ ಇಮೇಲ್ ಪಾಸ್‌ವರ್ಡ್ ಬದಲಾಯಿಸಿಕೊಂಡರು. ಭದ್ರತೆಗಾಗಿ ನಮ್ಮ ಪಾಸ್‌ವರ್ಡ್ ಆಗಾಗ್ಗೆ ಬದಲಾಯಿಸಿಕೊಳ್ಳುತ್ತಿರುವುದು ಸೂಕ್ತವೇ ಆಗಿದ್ದರೂ, ಇಲ್ಲೊಂದು ವೆಬ್ ತಾಣವಿದೆ. https://isleaked.com/en ಎಂಬಲ್ಲಿ ನಿಮ್ಮ ಇಮೇಲ್ ಐಡಿ ದಾಖಲಿಸಿ, ಪಾಸ್‌ವರ್ಡ್ ಸೋರಿ ಹೋಗಿದೆಯೇ ಎಂದು ತಿಳಿದುಕೊಳ್ಳಬಹುದು. ಇದು ಉಚಿತ ಸೇವೆ. ಸ್ಪ್ಯಾಮ್ ಮೇಲ್ ಕಳುಹಿಸುತ್ತಾರೆ ಎಂಬ ಆತಂಕವಿದ್ದರೆ, ನಿಮ್ಮ ಇಮೇಲ್ ಐಡಿಯಲ್ಲಿರುವ 2-3 ಅಕ್ಷರಗಳ ಬದಲು ಅಷ್ಟೇ ಸಂಖ್ಯೆಯ * ಚಿಹ್ನೆ ಹಾಕಿಯೂ ನೋಡಬಹುದು. ಉದಾಹರಣೆಗೆ, abcdefg@gmail.com ಇದ್ದರೆ, ab***fg@gmail.com ಅಂತ.

ಸ್ಮಾರ್ಟ್‌ಫೋನ್ ಸ್ಕ್ರೀನ್ ಕ್ಲೀನ್ ಆಗಿರಿಸಿಕೊಳ್ಳಿ…

ವಿಜಯ ಕರ್ನಾಟಕ ಅಂಕಣ ಮಾಹಿತಿ@ತಂತ್ರಜ್ಞಾನ 92- ಸೆಪ್ಟೆಂಬರ್ 8, 2014
ಟಚ್ ಸ್ಕ್ರೀನ್ ಇರುವ ಸ್ಮಾರ್ಟ್‌ಫೋನ್‌ಗಳು ಈಗ ಕಡಿಮೆ ದರದಲ್ಲಿ ಕೈಗೆಟಕುತ್ತಿವೆ. ಇಂಟರ್ನೆಟ್ ಜತೆಗೆ, ಕೈ ಬೆರಳಿಂದ ಸ್ಕ್ರೀನ್ ಸ್ಪರ್ಶಿಸಿದರೆ ಎಲ್ಲ ಕೆಲಸ ಮಾಡುವುದೇ ಈ ಸ್ಮಾರ್ಟ್‌ಫೋನ್‌ಗಳ ವೈಶಿಷ್ಟ್ಯ. ಆದರೆ, ಅವುಗಳನ್ನು ಎಚ್ಚರಿಕೆಯಿಂದ ಬಳಸದಿದ್ದರೆ ಆರೋಗ್ಯ ಸಂಬಂಧಿತ ಸಮಸ್ಯೆಯೂ ಉಂಟಾಗಬಹುದು ಎಂಬುದು ಹೆಚ್ಚಿನವರಿಗೆ ಗೊತ್ತಿಲ್ಲ.

ಶಾಲೆಗಳಲ್ಲಿ ಉಗುರು ಕತ್ತರಿಸಿ ಸ್ವಚ್ಛವಾಗಿಟ್ಟಿರುತ್ತಾರೆಯೇ, ಕೈಗಳಲ್ಲಿ ಕೊಳೆಯಿದೆಯೇ, ಬಾಯಿಗೆ ಕೈ ಹಾಕುತ್ತಾರೆಯೇ ಎಂದೆಲ್ಲಾ ಪರೀಕ್ಷಿಸುವ ಜವಾಬ್ದಾರಿಯನ್ನು ಶಾಲಾ ಮಂತ್ರಿಮಂಡಲದ ‘ಆರೋಗ್ಯ ಸಚಿವರಿಗೆ’ ವಹಿಸುವ ಪರಿಪಾಠವಿತ್ತು. ಯಾವುದೇ ಕಾಯಿಲೆ ಹರಡದಂತೆ ಅಥವಾ ಬಾರದಂತೆ ಕೈಗಳ ಸ್ವಚ್ಛತೆಗೆ ಅಷ್ಟೊಂದು ಪ್ರಾಧಾನ್ಯವಿದೆ. ಊಟ ಮಾಡಿದ ಕೈಯಲ್ಲಿ, ಅಥವಾ ತಮಗರಿವಿಲ್ಲದಂತೆಯೇ ಮೂಗು, ಕಿವಿ, ಬಾಯಿಗೆ ಕೈ ಹಾಕುವುದು, ಪುಟ ತಿರುಗಿಸಲೂ ಬಾಯಿಗೆ ಕೈ, ಊಟ ಮಾಡುತ್ತಿರುವಾಗಲೂ ಸ್ಮಾರ್ಟ್‌ಫೋನ್ ಬಳಸುವವರಿದ್ದಾರೆ… ಇವೇ ಕೈಗಳು ಸದಾ ಕಾಲ ಸ್ಮಾರ್ಟ್‌ಫೋನ್‌ಗಳ ಸಂಪರ್ಕದಲ್ಲಿರುವುದರಿಂದ ಇದನ್ನು ನೆನಪಿಸಬೇಕಾಯಿತು.

ಸ್ಮಾರ್ಟ್‌ಫೋನ್‌ಗಳ ಸ್ಕ್ರೀನ್ ಕೈ, ಕಿವಿ, ಮತ್ತು ಬಾಯಿಗೆ ಸದಾ ಸಂಪರ್ಕದಲ್ಲಿರುವುದರಿಂದಾಗಿ ಅದು ಕೀಟಾಣು, ವೈರಸ್, ಬ್ಯಾಕ್ಟೀರಿಯಾಗಳ ಆವಾಸ ಸ್ಥಾನವಾಗಬಲ್ಲುದು ಎಂಬುದನ್ನು ಹಲವು ಸಂಶೋಧನೆಗಳೂ ತೋರಿಸಿಕೊಟ್ಟಿವೆ. ಕೈಗಳನ್ನಾದರೆ ನೀರು ಹಾಕಿ ಆಗಾಗ್ಗೆ ಶುಚಿ ಮಾಡಬಹುದು, ಆದರೆ ಈ ಟಚ್ ಸ್ಕ್ರೀನ್‌ಗಳನ್ನು? ಅವುಗಳನ್ನು ಆರೋಗ್ಯಪೂರ್ಣವಾಗಿಡುವುದು, ಸೋಂಕು ತಗುಲದಂತೆ ನೋಡಿಕೊಳ್ಳುವುದು ಹೇಗೆ? ಇಲ್ಲಿವೆ ಕೆಲವು ಸಲಹೆಗಳು.

ಕೆಲವರು ಸ್ಕ್ರೀನ್ ಗಾರ್ಡ್ (ಸ್ಕ್ರೀನ್ ಪ್ರೊಟೆಕ್ಟರ್) ಎಂಬ ತೆಳುವಾದ ಪದರವನ್ನು ಅಂಟಿಸಿಕೊಂಡಿರುತ್ತಾರೆ. ಇದರಲ್ಲಿ ಗ್ಲಾಸಿ (Glossy) ಬದಲು ಒಂದಿಷ್ಟು ದೊರಗು ಮೇಲ್ಮೈ ಇರುವ ಮ್ಯಾಟ್ (matt) ಸ್ಕ್ರೀನ್ ಗಾರ್ಡ್‌ಗಳನ್ನು ಆಯ್ದುಕೊಂಡರೆ, ಬೆವರು-ಧೂಳು ಸೇರಿ ಆಗುವ ಕಲೆಯಾಗುವುದನ್ನು ಕೊಂಚ ಮಟ್ಟಿಗೆ ತಡೆಯಬಹುದು. ಆದರೆ ಆಗಾಗ್ಗೆ ಅದನ್ನು ಬದಲಿಸುತ್ತಿರಬೇಕು. ಇನ್ನೊಂದು ಗಮನಿಸಬೇಕಾದ ಅಂಶವೆಂದರೆ, ಯಾವುದೇ ಎಲೆಕ್ಟ್ರಾನಿಕ್ ಸಾಧನವನ್ನು ಸ್ವಚ್ಛಗೊಳಿಸುವ ಮುನ್ನ ಅದನ್ನು ಸ್ವಿಚ್ ಆಫ್ ಮಾಡಬೇಕು, ತೆಗೆಯಬಹುದಾಗಿದ್ದರೆ ಅವುಗಳ ಬ್ಯಾಟರಿ ತೆಗೆದ ಬಳಿಕವೇ ಕ್ಲೀನ್ ಮಾಡುವುದು ಉತ್ತಮ.

ಸ್ಕ್ರೀನ್ ಒರೆಸಲು, ಧೂಳಿನ ಕಣ, ಕಣ್ಣಿಗೆ ಕಾಣಬಲ್ಲ ಕೊಳೆ ಹಾಗೂ ಬೆರಳಚ್ಚಿನ ಕಲೆಗಳನ್ನು ನಿವಾರಿಸಲು ಮೆದುವಾದ ಬಟ್ಟೆ ಅಥವಾ ಮೈಕ್ರೋಫೈಬರ್ ಬಟ್ಟೆಯಿಂದ ಒರೆಸಿ. ಟಿಶ್ಯೂಪೇಪರ್ ಅಥವಾ ಪೇಪರ್ ಟವೆಲ್‌ಗಳನ್ನು ಬಳಸಿದಲ್ಲಿ, ಅವುಗಳಲ್ಲಿರಬಹುದಾದ ಧೂಳಿನ ಕಣಗಳಿಂದಾಗಿ ಸ್ಕ್ರೀನ್‌ಗೆ ಹಾನಿಯಾಗುವ ಸಾಧ್ಯತೆಗಳಿರಬಹುದು. ಮಾರುಕಟ್ಟೆಯಲ್ಲಿ 700-800 ರೂ. ಆಸುಪಾಸಿನಲ್ಲಿ ಗ್ಯಾಜೆಟ್ ಕ್ಲೀನಿಂಗ್ ಕಿಟ್ ದೊರೆಯುತ್ತದೆ. ಇದರಲ್ಲಿ ಸ್ಕ್ರೀನ್ ಅಥವಾ ಲೆನ್ಸ್ ಕ್ಲೀನ್ ಮಾಡಲು, ಧೂಳು ನಿವಾರಿಸಲು ಜೆಲ್, ಮೈಕ್ರೋಫೈಬರ್ ಬಟ್ಟೆ, ಹ್ಯಾಂಡ್ ಬ್ಲೋ ಪಂಪ್, ಬ್ರಶ್ ಮುಂತಾದವು ಇರುತ್ತದೆ. ಒಂದು ಕಿಟ್ ತಂದಿಟ್ಟುಕೊಂಡರೆ ಕ್ಯಾಮೆರಾ, ಲ್ಯಾಪ್‌ಟಾಪ್, ಟ್ಯಾಬ್ಲೆಟ್, ಸ್ಮಾರ್ಟ್‌ಫೋನ್, ಕೀಬೋರ್ಡ್, ಮಾನಿಟರ್ ಇತ್ಯಾದಿ ಗ್ಯಾಜೆಟ್‌ಗಳನ್ನು ಶುಚಿಗೊಳಿಸಲು ಬಳಸಬಹುದು.

ಜಾಸ್ತಿ ಕೊಳೆ ಇದ್ದರೆ ಒಂದಿಷ್ಟು ಡಿಸ್ಟಿಲ್ಡ್ ವಾಟರ್ ತೆಗೆದುಕೊಂಡು, ಸ್ಪ್ರೇಯರ್ ಮೂಲಕ ಮೆದುವಾಗಿ ಹಾಗೂ ಒಳಗಿನ ಭಾಗಗಳಿಗೆ ತಗುಲದಂತೆ ಎಚ್ಚರಿಕೆಯಿಂದ ಸ್ಪ್ರೇ ಮಾಡಿ, ಬಳಿಕ ಮೈಕ್ರೋಫೈಬರ್ ಬಟ್ಟೆಯಿಂದ ಒರೆಸಿರಿ. ಕೊಳೆಯ ಅಂಶ ಗಟ್ಟಿಯಿದ್ದರೆ, ಈ ಡಿಸ್ಟಿಲ್ಡ್ ವಾಟರ್ ಜತೆ ಕೊಂಚ ವಿನೆಗರ್ ಬಳಸಿ. ನೀರಿನಂಶವೇನಾದರೂ ಒಳಭಾಗಕ್ಕೆ ಹೋಯಿತು ಎಂಬ ಶಂಕೆ ಬಂದಲ್ಲಿ ಅಕ್ಕಿ ಅಥವಾ ಸಿಲಿಕಾ ಜೆಲ್ ಹರಳುಗಳ ಮಧ್ಯೆ ಸ್ಮಾರ್ಟ್‌ಫೋನನ್ನು ಸ್ವಲ್ಪ ಹೊತ್ತು ಇರಿಸಿ ತೆಗೆಯಿರಿ. ಇದು ನೀರಿನಂಶವನ್ನು ಹೀರಿಕೊಳ್ಳಬಲ್ಲುದು. ಆದರೆ ತೇವಾಂಶ ನಿವಾರಿಸಲು ಹೇರ್ ಡ್ರೈಯರ್ ಯಾವತ್ತೂ ಬಳಸಬಾರದು. ಸೂಕ್ಷ್ಮ ಭಾಗಗಳಿರುವುದರಿಂದ, ಬಿಸಿ ಜಾಸ್ತಿಯಾಗಿ ಅಥವಾ ವೇಗದ ಗಾಳಿಯಿಂದ ಬಿಡಿಭಾಗಗಳಿಗೆ ತೊಂದರೆಯಾಗಬಹುದು.

ಲ್ಯಾಪ್‌ಟಾಪ್ ಅಥವಾ ಟ್ಯಾಬ್ಲೆಟ್‌ಗೆ ಉಪಯೋಗಿಸುವ ಕೀಬೋರ್ಡ್‌ಗಳನ್ನು ಕೂಡ ಇದೇ ಮಾದರಿ ಸ್ವಚ್ಛಗೊಳಿಸಬಹುದು. ಈ ಗ್ಯಾಜೆಟ್‌ಗಳ ಪೋರ್ಟ್‌ಗಳನ್ನು ಸ್ವಚ್ಛಗೊಳಿಸಬೇಕೆಂದಾದರೆ, ತುಂಬಾ ಎಚ್ಚರಿಕೆಯಿಂದ ಮೆದುವಾಗಿ ಕಾಟನ್ ಬಡ್ ಬಳಸಿ. ಒಳಗಿನ ಧೂಳು, ಕೊಳೆ ನಿವಾರಿಸಲು, ಗ್ಯಾಜೆಟ್ ಕ್ಲೀನಿಂಗ್ ಕಿಟ್‌ನಲ್ಲಿ ಅಥವಾ ಪ್ರತ್ಯೇಕವಾಗಿ ದೊರೆಯಬಹುದಾದ ಹ್ಯಾಂಡ್ ಪಂಪ್ (ಕೈಯಿಂದ ಅದುಮಿ ಜೋರಾಗಿ ಬ್ಲೋ ಮಾಡುವ ಸಾಧನ) ಬಳಸಿ. ಒಟ್ಟಿನಲ್ಲಿ, ನಮ್ಮ ಕೈಗಳನ್ನು ಸ್ವಚ್ಛವಾಗಿಟ್ಟುಕೊಂಡರೆ, ಗ್ಯಾಜೆಟ್‌ಗಳೂ ಸ್ವಚ್ಛವಾಗಿರುತ್ತವೆ.

‘ನಾನು’ ಆ್ಯಪ್ ಮತ್ತೆ ಬಂತು
2ಜಿ ಸಂಪರ್ಕದಲ್ಲಿಯೇ ಉಚಿತ ಕರೆಗಳನ್ನು ಮಾಡಲು ಅನುಕೂಲ ಮಾಡಿಕೊಡುವ ಘೆಚ್ಞ್ಠ ಆ್ಯಪ್ ಬಗ್ಗೆ ಎರಡು ವಾರಗಳ ಹಿಂದೆ ಬರೆದಿದ್ದೆ. ತಾಂತ್ರಿಕತೆಯ ಸುಧಾರಣೆಗಾಗಿ ಅದು ಆಂಡ್ರಾಯ್ಡ್ ಪ್ಲೇ ಸ್ಟೋರ್‌ನಲ್ಲಿ ಇರಲಿಲ್ಲ. ಈಗ ಸರಿಪಡಿಸಲಾಗಿದೆ. ಆಸಕ್ತರು ಘೆಚ್ಞ್ಠ ಅಳವಡಿಸಿಕೊಳ್ಳಬಹುದು. ಕಿರು ವಿಳಾಸ ಇಲ್ಲಿದೆ: http://bit.ly/NanuApp

ಟೆಕ್ ಟಾನಿಕ್
Notable PDF
ನೋಟೆಬಲ್ ಪಿಡಿಎಫ್ ಎಂಬ ಎಕ್ಸ್‌ಟೆನ್ಷನ್ ಒಂದನ್ನು ನಿಮ್ಮ ಗೂಗಲ್ ಕ್ರೋಮ್ ಬ್ರೌಸರ್‌ಗೆ ಅಳವಡಿಸಿಕೊಂಡು ಬಿಟ್ಟರೆ, ಬ್ರೌಸರಿನಲ್ಲೇ ಪಿಡಿಎಫ್ ಫೈಲುಗಳನ್ನು ಎಡಿಟ್ ಮಾಡಲು ಅನುಕೂಲವಾಗುತ್ತದೆ. ಇದಕ್ಕಾಗಿ ಪ್ರತ್ಯೇಕ ಸಾಫ್ಟ್‌ವೇರ್ ಖರೀದಿಸಬೇಕಾಗಿಲ್ಲ. ಈ ಎಕ್ಸ್‌ಟೆನ್ಷನ್ ಅನ್ನು ಇನ್‌ಸ್ಟಾಲ್ ಮಾಡಿಕೊಂಡು ಖಾತೆ ರಚಿಸಿಕೊಂಡರೆ, ಪಿಡಿಎಫ್ ತಿದ್ದುಪಡಿ ಮಾಡಿ, ಅದಕ್ಕೆ ಕಾಮೆಂಟ್‌ಗಳನ್ನು ಹಾಕಬಹುದು. ಡ್ರಾಪ್‌ಬಾಕ್ಸ್ ಮತ್ತು ಬಾಕ್ಸ್ ಎಂಬ ಕ್ಲೌಡ್ ಸೇವೆಗಳಿಂದಲೂ ಪಿಡಿಎಫ್ ಓಪನ್ ಮಾಡಲು ಮತ್ತು ಸೇವ್ ಮಾಡಲು ಸಾಧ್ಯ. ಗೂಗಲ್ ಡ್ರೈವ್‌ಗೆ ಸೇವ್ ಮಾಡಬೇಕಿದ್ದರೆ ಅಥವಾ ಡಿಜಿಟಲ್ ಸಹಿ ಹಾಕಬೇಕಿದ್ದರೆ ತಿಂಗಳಿಗೆ ಸುಮಾರು 5 ಡಾಲರ್ ಪಾವತಿಸಬೇಕಾಗುತ್ತದೆ. ಗೂಗಲ್ ಕ್ರೋಮ್ ಆ್ಯಪ್ ಸ್ಟೋರ್‌ನಲ್ಲಿ Notable PDF ಅಂತ ಸರ್ಚ್ ಮಾಡಿದರೆ ಅದರ ಲಿಂಕ್ ಸಿಗುತ್ತದೆ.

ಇಂಟರ್ನೆಟ್ ಇಲ್ಲದೆ ಗೂಗಲ್ ಮೇಲ್ ಉಪಯೋಗಿಸುವುದು

ವಿಜಯ ಕರ್ನಾಟಕ ಅಂಕಣ ಮಾಹಿತಿ@ತಂತ್ರಜ್ಞಾನ 91- ಸೆಪ್ಟೆಂಬರ್ 1, 2014
ಎಲ್ಲಾದರೂ ದೂರ ಅಂದರೆ ಇಂಟರ್ನೆಟ್ ಸಂಪರ್ಕವಿಲ್ಲದ ರಿಮೋಟ್ ಪ್ರದೇಶಕ್ಕೆ ಹೋಗಿರುತ್ತೀರಿ ಅಥವಾ ವಿಮಾನದಲ್ಲೋ, ರೈಲಿನಲ್ಲೋ ಪ್ರಯಾಣಿಸುತ್ತಿರುವಾಗ, ಪ್ರಯಾಣದ ಸಮಯವನ್ನು ಸದುಪಯೋಗ ಮಾಡಿಕೊಳ್ಳಬೇಕೆಂಬ ಕಾರಣಕ್ಕೆ, ಲ್ಯಾಪ್‌ಟಾಪ್ ಮೂಲಕ ಜಿಮೇಲ್‌ನಲ್ಲಿರುವ ಇಮೇಲ್‌ಗಳನ್ನು ಚೆಕ್ ಮಾಡಬೇಕು, ಅದರಲ್ಲಿನ ವಿವರಗಳನ್ನು ಓದಬೇಕು ಎಂದು ಅನ್ನಿಸುತ್ತಿದೆ. ಆದರೆ ಇಂಟರ್ನೆಟ್ ಇಲ್ಲದ ಚಿಂತೆ. ಹೀಗಿರುವಾಗ ಏನು ಮಾಡಬಹುದು? ಇಂಥವರಿಗಾಗಿಯೇ ಗೂಗಲ್‌ನ ಜಿಮೇಲ್ ತಂಡವು ಒಂದು ಆಯ್ಕೆಯನ್ನು ಒದಗಿಸಿದೆ. ಅದೇ ಆಫ್‌ಲೈನ್ ಜಿಮೇಲ್.

ಇದರ ಮೂಲಕ, ಇಂಟರ್ನೆಟ್ ಸಂಪರ್ಕವಿಲ್ಲದಿದ್ದರೂ ಕೂಡ ಈಗಾಗಲೇ ಇರುವ ಮೇಲ್‌ಗಳನ್ನು ಓದಬಹುದು ಮತ್ತು ಹೊಸದಾಗಿ ಮೇಲ್ ಬರೆಯಬೇಕಿದ್ದರೆ ಕಂಪೋಸ್ ಮಾಡಬಹುದು. ಇಂಟರ್ನೆಟ್ ಸಂಪರ್ಕ ನಿಧಾನವಾಗಿದ್ದರೂ ಕೂಡ ಆಫ್‌ಲೈನ್ ಜಿಮೇಲ್ ಉಪಯೋಗಕ್ಕೆ ಬರುತ್ತದೆ. ಮತ್ತೆ ಸಂಪರ್ಕ ದೊರೆತಾಗ, ನೀವು ಕಳುಹಿಸಿದ ಮೇಲ್‌ಗಳು ರವಾನೆಯಾಗುತ್ತವೆ.

ಇಂಟರ್ನೆಟ್ ಸಂಪರ್ಕವಿದ್ದರೆ ಆನ್‌ಲೈನ್ ಅಂತ ಅರ್ಥ. ಆಫ್‌ಲೈನ್‌ನಲ್ಲಿ ಇಮೇಲ್‌ಗಳನ್ನು ನೋಡಲು ಈಗಾಗಲೇ ಸಾಕಷ್ಟು ಥರ್ಡ್ ಪಾರ್ಟಿ ತಂತ್ರಾಂಶಗಳಿವೆ. ಉದಾಹರಣೆಗೆ, ಔಟ್‌ಲುಕ್, ಥಂಡರ್‌ಬರ್ಡ್ ಇತ್ಯಾದಿ ಇಮೇಲ್ ಪ್ರೋಗ್ರಾಂಗಳನ್ನು ಇನ್‌ಸ್ಟಾಲ್ ಮಾಡಿಕೊಳ್ಳಬೇಕಾಗುತ್ತದೆ. ಅದಿಲ್ಲದೆಯೇ, ಬರೇ ಒಂದು ಬ್ರೌಸರ್ ಪ್ಲಗ್-ಇನ್ (ಅಂದರೆ ಕಿರು ತಂತ್ರಾಂಶ) ಬಳಸಿದರೆ ಆಫ್‌ಲೈನ್ ಜಿಮೇಲ್ ಉಪಯೋಗಿಸಬಹುದಾಗಿದೆ.

ಅದಕ್ಕೆ ನೀವು ಮಾಡಬೇಕಾಗಿರುವುದಿಷ್ಟೆ. ಇಂಟರ್ನೆಟ್ ಸಂಪರ್ಕವಿರಲಿ. ಬಳಿಕ ಗೂಗಲ್ ಕ್ರೋಮ್ ಬ್ರೌಸರ್ ತೆರೆಯಿರಿ. ಅದರಲ್ಲಿ ಕೆಳ ಭಾಗದಲ್ಲಿ ಬಲ ಮೂಲೆಯಲ್ಲಿ ವೆಬ್ ಸ್ಟೋರ್ ಎಂದು ಬರೆದಿರುವುದನ್ನು ಕ್ಲಿಕ್ ಮಾಡಿ. ಆಗ ನಿಮಗೆ ವೈವಿಧ್ಯಮಯ ಆ್ಯಪ್‌ಗಳಿರುವ ಪುಟ ಗೋಚರಿಸುತ್ತದೆ. ಅಲ್ಲಿರುವ ಸರ್ಚ್ ಬಾರ್‌ನಲ್ಲಿ Gmail Offline ಅಂತ ಸರ್ಚ್ ಮಾಡಿ. ಅಲ್ಲಿ ನಿಮಗೆ ಅದರ ಆ್ಯಪ್ ದೊರೆಯುತ್ತದೆ. ನಿಮ್ಮ ಬ್ರೌಸರ್‌ಗೆ ಅಳವಡಿಸಿಕೊಳ್ಳಲು ಇರುವ ಬಟನ್ ಕ್ಲಿಕ್ ಮಾಡಿ. ಆ್ಯಪ್ ಸಿಗದೇ ಇದ್ದರೆ, http://bit.ly/GmailOfflline ಎಂಬಲ್ಲಿ ಹೋಗಿ. ಇನ್‌ಸ್ಟಾಲ್ ಮಾಡಿಕೊಳ್ಳಿ. ನಂತರ ಕ್ರೋಮ್ ಬ್ರೌಸರ್ ಓಪನ್ ಮಾಡಿ. ಒಂದೋ ಎಡ ಮೇಲ್ಭಾಗದ ಮೂಲೆಯಲ್ಲಿರುವ Apps ಎಂಬ ಬಣ್ಣಬಣ್ಣದ ಚೌಕಗಳಿರುವ ಬಟನ್ ಕ್ಲಿಕ್ ಮಾಡಿ ಅಥವಾ ಅಡ್ರೆಸ್ ಬಾರ್‌ನಲ್ಲಿ chrome://apps/ ಎಂಬ ಯುಆರ್‌ಎಲ್ ಟೈಪ್ ಮಾಡಿ ಎಂಟರ್ ಕೊಡಿ. ಆಗ ನಿಮಗೆ ಕ್ರೋಮ್ ಬ್ರೌಸರ್‌ನಲ್ಲಿ ಇನ್‌ಸ್ಟಾಲ್ ಆಗಿರುವ ಎಲ್ಲ ಆ್ಯಪ್‌ಗಳು, ಪ್ಲಗಿನ್‌ಗಳ ಬಟನ್‌ಗಳು ಗೋಚರಿಸುತ್ತವೆ. ಅಲ್ಲೇ Gmail Offline ಅಂತ ಇರೋದನ್ನು ಕ್ಲಿಕ್ ಮಾಡಿ. ಲಾಗಿನ್ ಆಗಿ. ನಿಮ್ಮ ಹಳೆಯ ಮೇಲ್‌ಗಳೆಲ್ಲವೂ ಒಂದು ಬಾರಿ ನಿಮ್ಮ ಕಂಪ್ಯೂಟರಿಗೆ ಡೌನ್‌ಲೋಡ್ ಆಗುತ್ತವೆ. ಪದೇ ಪದೇ ಹಳೆಯದೆಲ್ಲವೂ ಡೌನ್‌ಲೋಡ್ ಆಗುವುದಿಲ್ಲ.

ಇಷ್ಟಾದರೆ ಆಯಿತು. ಇಂಟರ್ನೆಟ್ ಸಂಪರ್ಕವಿಲ್ಲದಿದ್ದರೂ ಕೂಡ ನೀವು ಆಫ್‌ಲೈನ್ ಜಿಮೇಲ್ ಓಪನ್ ಮಾಡಿಕೊಂಡು, ಬೇಕಾದ ಕೆಲಸಗಳನ್ನು ಮಾಡಬಹುದು. ಮತ್ತೆ ಆನ್‌ಲೈನ್ ಆದಾಗ, ಅಂದರೆ ಇಂಟರ್ನೆಟ್ ಸಂಪರ್ಕ ದೊರೆತಾಗ, ಈ ಫೋಲ್ಡರ್‌ನಲ್ಲಿರುವ ಎಲ್ಲ ಮೇಲ್‌ಗಳೂ ಸಿಂಕ್ರನೈಸ್ ಆಗುತ್ತವೆ. ಆಫ್‌ಲೈನ್ ಜಿಮೇಲ್‌ನಲ್ಲಿ, ಒಂದು ವಾರ ಅಥವಾ ಒಂದು ತಿಂಗಳ ಮೇಲ್‌ಗಳು ಮಾತ್ರ ಲಭ್ಯವಾಗಲಿ ಅಂತ ಆಯ್ಕೆ ಮಾಡಿಕೊಳ್ಳಲೂಬಹುದು. ಸೆಟ್ಟಿಂಗ್ಸ್ ಬಟನ್ ಕ್ಲಿಕ್ ಮಾಡಿದರೆ, Download mails from past week, 2 weeks, month ಅನ್ನುವ ಆಯ್ಕೆಗಳಿವೆ. ಈ ರೀತಿ ಮಾಡುವುದರಿಂದ, ಡೇಟಾ ವೆಚ್ಚವನ್ನೂ, ಕಂಪ್ಯೂಟರಿನಲ್ಲಿರುವ ಮೆಮೊರಿ ಸ್ಪೇಸ್ ಅನ್ನೂ ಉಳಿಸಬಹುದಾಗಿದೆ.

ಆದರೆ ನೆನಪಿಟ್ಟುಕೊಳ್ಳಲೇಬೇಕಾದ ವಿಷಯ ಎಂದರೆ, ನಿಮ್ಮ ಸ್ವಂತ ಕಂಪ್ಯೂಟರ್ ಅಥವಾ ಲ್ಯಾಪ್‌ಟಾಪ್ ಆಗಿದ್ದರೆ ಮಾತ್ರ ಆಫ್‌ಲೈನ್ ಜಿಮೇಲ್ ಬಳಸಿ. ಬೇರೆಯವರ ಕಂಪ್ಯೂಟರ್/ಲ್ಯಾಪ್‌ಟಾಪಲ್ಲಿ ಬಳಸಬೇಡಿ. ಯಾಕೆಂದರೆ, ಈ ಸಂದೇಶಗಳು ಡೌನ್‌ಲೋಡ್ ಆಗುವುದು ಆಯಾ ಕಂಪ್ಯೂಟರುಗಳಿಗೆ. ಹೀಗಾಗಿ, ಬೇರೆಯವರು ಈ ಕಂಪ್ಯೂಟರ್ ಬಳಸುತ್ತಾರೆಂದಾದರೆ, ಅವರು ನಿಮ್ಮ ಇಮೇಲ್ ಸಂದೇಶಗಳನ್ನು ಓದುವ ಸಾಧ್ಯತೆ ಇರುತ್ತದೆ. ಹಾಗಾಗದಂತೆ ನೋಡಿಕೊಳ್ಳಿ.

ಟೆಕ್ ಟಾನಿಕ್
ಕ್ಲೋಸ್ ಮಾಡಿದ ಬ್ರೌಸರ್ ತೆರೆಯಲು
ಹೆಚ್ಚಿನವರು ಇಂಟರ್ನೆಟ್ ಜಾಲಾಡಲು ವೇಗವಾಗಿ ಕಾರ್ಯಾಚರಿಸುತ್ತದೆ ಎಂಬ ಕಾರಣಕ್ಕೆ ಗೂಗಲ್‌ನ ಕ್ರೋಮ್ ಅಥವಾ ಫೈರ್‌ಫಾಕ್ಸ್ ಬ್ರೌಸರನ್ನು ಇನ್‌ಸ್ಟಾಲ್ ಮಾಡಿಕೊಂಡು ಬಳಸುತ್ತಾರೆ. ಏಕ ಕಾಲಕ್ಕೆ ಹಲವು ವೆಬ್ ಪುಟಗಳನ್ನು ತೆರೆದಿಡಲು ಇಲ್ಲಿರುವ ಟ್ಯಾಬ್‌ಗಳು ನೆರವಾಗುತ್ತವೆ. ಆದರೆ, ಆಕಸ್ಮಿಕವಾಗಿ ಒಂದು ಟ್ಯಾಬ್ ಅನ್ನು ಕ್ಲೋಸ್ ಮಾಡಿದರೆ, ಅದರಲ್ಲಿ ನೋಡಲು ಏನೋ ಬಾಕಿಯಾಗಿದೆ ಎಂದುಕೊಂಡರೆ ಆ ವೆಬ್ ಪುಟವನ್ನು ಮರಳಿ ನೋಡುವುದು ಹೇಗೆ? ಕಂಟ್ರೋಲ್ ಶಿಫ್ಟ್ ಟಿ (Ctrl+Shift+t) ಅಂತ ಒತ್ತಿದರೆ, ಕೊನೆಯದಾಗಿ ಕ್ಲೋಸ್ ಮಾಡಿದ ಟ್ಯಾಬ್‌ನಲ್ಲಿದ್ದ ವೆಬ್ ಪುಟ ಪುನಃ ತೆರೆದುಕೊಳ್ಳುತ್ತದೆ. ಮತ್ತೊಂದು ಸಲ ಕಂಟ್ರೋಲ್ ಶಿಫ್ಟ್ ಟಿ ಒತ್ತಿದರೆ, ಅದಕ್ಕೂ ಹಿಂದೆ ಕ್ಲೋಸ್ ಮಾಡಿದ್ದ ವೆಬ್ ಪುಟ ಓಪನ್ ಆಗುತ್ತದೆ. ಈ ಕಮಾಂಡ್ ಉಪಯೋಗಿಸದಿದ್ದರೆ, ಹಿಸ್ಟರಿ ಎಂಬಲ್ಲಿ ಹೋಗಿ, ಈಗಷ್ಟೇ ಕ್ಲೋಸ್ ಮಾಡಿದ ಟ್ಯಾಬ್ ಯಾವುದು ಅಂತೆಲ್ಲಾ ಹುಡುಕಬಹುದು. ಆದರೆ ಇದಕ್ಕೆ ತಗುಲುವ ಸಮಯವು ಈ ಶಾರ್ಟ್‌ಕಟ್ ಮೂಲಕ ಉಳಿತಾಯವಾಗುತ್ತದೆ.

ಒಂದು ಫೋನ್‌ನಿಂದ ಮತ್ತೊಂದಕ್ಕೆ ಕಾಂಟಾಕ್ಟ್ಸ್ ವರ್ಗಾಯಿಸಲು

ವಿಜಯ ಕರ್ನಾಟಕ ಮಾಹಿತಿ@ತಂತ್ರಜ್ಞಾನ ಅಂಕಣ -90 ಆಗಸ್ಟ್ 25, 2014
ಸ್ಮಾರ್ಟ್‌ಫೋನ್ ಬದಲಾಯಿಸುವಾಗ ಹಳೆಯ ಫೋನ್‌ನಲ್ಲಿರುವ ಕಾಂಟಾಕ್ಟ್‌ಗಳನ್ನು (ಸ್ನೇಹಿತರ ಸಂಪರ್ಕ ಸಂಖ್ಯೆ) ಹೊಸ ಫೋನ್‌ಗೆ ವರ್ಗಾಯಿಸುವುದೇ ಸಮಸ್ಯೆ. ಆದರೆ, ಇಂಟರ್ನೆಟ್ ಸಂಪರ್ಕ ಇದ್ದರೆ ಇದು ತೀರಾ ಸುಲಭ ಎಂಬುದು ಹೆಚ್ಚಿನವರಿಗೆ ತಿಳಿದಿರಲಾರದು. ಹೇಗೆಂಬುದು ತಿಳಿಯದವರಿಗಾಗಿ ಮಾಹಿತಿ ಇಲ್ಲಿದೆ.

ಈ ಅಂಕಣದಲ್ಲಿ ಆಂಡ್ರಾಯ್ಡ್ ಕಾರ್ಯಾಚರಣಾ ವ್ಯವಸ್ಥೆಯ ಫೋನ್‌ಗಳು ಹಾಗೂ ಜಿಮೇಲ್ ಐಡಿಯನ್ನು ಉದಾಹರಣೆಯಾಗಿ ತೆಗೆದುಕೊಳ್ಳಲಾಗಿದೆ. ಐಫೋನ್, ವಿಂಡೋಸ್ ಫೋನ್, ಬ್ಲ್ಯಾಕ್‌ಬೆರಿ ಫೋನ್‌ಗಳಿಗೂ ಇದು ಒಂದಿಷ್ಟು ಸಣ್ಣಪುಟ್ಟ ಬದಲಾವಣೆಗಳೊಂದಿಗೆ ಅನ್ವಯವಾಗಬಹುದು.

ಗೂಗಲ್ ಸರ್ವರ್‌ನಲ್ಲಿ: ಆಂಡ್ರಾಯ್ಡ್ ಸ್ಮಾರ್ಟ್‌ಫೋನ್‌ಗಳಲ್ಲಿ ಗಮನಿಸಬೇಕಾದ ಸಂಗತಿಯೆಂದರೆ, ಅದರಲ್ಲಿ ಗೂಗಲ್ ಐಡಿ (ಜಿಮೇಲ್) ಮೂಲಕ ಹೇಗೂ ಲಾಗಿನ್ ಆಗಬೇಕಾಗುತ್ತದೆ ಮತ್ತು ಎಲ್ಲ ಸಂಪರ್ಕಗಳೂ ಆನ್‌ಲೈನ್‌ನಲ್ಲಿ ಅಂದರೆ ಗೂಗಲ್ ಸರ್ವರ್‌ನಲ್ಲಿ ಬ್ಯಾಕಪ್ (ನಕಲು ಪ್ರತಿಗಳು) ಇರಿಸುವ ವ್ಯವಸ್ಥೆ ಇದೆ. ಈ ರೀತಿ ಆನ್‌ಲೈನ್‌ನಲ್ಲಿ ಮಾಹಿತಿಯನ್ನು ಕಾಯ್ದಿಡಲು, ಸೆಟ್ಟಿಂಗ್ಸ್ ಮೆನುವಿಗೆ ಹೋಗಿ, Backup & Restore ಎಂಬಲ್ಲಿ Back up My data ಕ್ಲಿಕ್ ಮಾಡಿ. ನಿಮ್ಮ ಸಂಪರ್ಕ ಸಂಖ್ಯೆಗಳಷ್ಟೇ ಅಲ್ಲದೆ, ಎಲ್ಲ ಆ್ಯಪ್‌ಗಳ ಬ್ಯಾಕಪ್ ಕೂಡ ಗೂಗಲ್ ಸರ್ವರ್‌ನಲ್ಲಿ ಉಳಿಯುತ್ತದೆ.

ಮೆಮೊರಿ ಕಾರ್ಡ್‌ನಲ್ಲಿ: ಸಂಪರ್ಕ ಸಂಖ್ಯೆಗಳನ್ನು ಸೇವ್ ಮಾಡಿಡುವ ಮತ್ತೊಂದು ವಿಧಾನವೆಂದರೆ, ಕಾಂಟ್ಯಾಕ್ಟ್ಸ್ ಆಯ್ಕೆ ಮಾಡಿಕೊಂಡು, ಅದರಲ್ಲಿನ Option ಮೆನು (ಹೊಸ ಫೋನ್‌ಗಳಲ್ಲಿ ಚುಕ್ಕಿಗಳನ್ನು [….] ತೋರಿಸಲಾಗುತ್ತದೆ) ಕ್ಲಿಕ್ ಮಾಡಿದ ಬಳಿಕ, Export/Import ಆಯ್ಕೆ ಇರುತ್ತದೆ. SD ಕಾರ್ಡ್‌ಗೆ Export ಮಾಡುವುದನ್ನು ಕ್ಲಿಕ್ ಮಾಡಿದಲ್ಲಿ, ನಿಮ್ಮ ಮೆಮೊರಿ ಕಾರ್ಡ್‌ನಲ್ಲಿ ಎಲ್ಲ ಸಂಪರ್ಕಗಳೂ ಉಳಿಕೆಯಾಗುತ್ತವೆ. ಹೊಸ ಫೋನ್ ಬಂದಾಗ, ಅದಕ್ಕೆ ಈ ಮೆಮೊರಿ ಕಾರ್ಡ್ ಸೇರಿಸಿ, ಕಾಂಟ್ಯಾಕ್ಟ್ಸ್‌ನ Option ಮೆನುವಿಗೆ ಹೋಗಿ, Import from SD Card ಅಂತ ಮಾಡಿದರೆ, ಎಲ್ಲ ಸಂಪರ್ಕ ಸಂಖ್ಯೆಗಳೂ ಹೊಸ ಫೋನ್‌ನಲ್ಲಿ ಸೇವ್ ಆಗುತ್ತವೆ.

ಕಂಪ್ಯೂಟರ್ ಮೂಲಕ: ಆಂಡ್ರಾಯ್ಡ್ ಅಲ್ಲದೆ ಬೇರೆ ಫೋನ್ ಅಂದರೆ ನೋಕಿಯಾ, ವಿಂಡೋಸ್ ಫೋನ್, ಆ್ಯಪಲ್ ಫೋನ್ ಬಳಸುತ್ತಿರುವರು ಕೂಡ ತಮ್ಮ ಸಂಪರ್ಕ ಸಂಖ್ಯೆಗಳನ್ನು ಆಂಡ್ರಾಯ್ಡ್‌ಗೆ ವರ್ಗಾಯಿಸಬಹುದು. ಆಯಾ ಫೋನ್‌ಗಳಲ್ಲಿ ಜಿಮೇಲ್ ಬಳಸುತ್ತಿದ್ದರೆ ಸಂಪರ್ಕ ಸಂಖ್ಯೆಗಳನ್ನು ಅದಕ್ಕೆ ಸಿಂಕ್ (ಸಿಂಕ್ರನೈಜ್) ಮಾಡಿಕೊಳ್ಳುವ ಅವಕಾಶ ಇದೆ.

ಸಿಂಕ್ರನೈಜ್ ಆದಮೇಲೆ, ಕಂಪ್ಯೂಟರಿನಲ್ಲಿ ಜಿಮೇಲ್‌ಗೆ ಲಾಗಿನ್ ಆಗಿ. ಚಿತ್ರದಲ್ಲಿರುವಂತೆ, ಎಡ ಮೇಲ್ಭಾಗದಲ್ಲಿ Google ಲೋಗೋದ ಕೆಳಗೆ Gmail ಎಂಬುದನ್ನು ಕ್ಲಿಕ್ ಮಾಡಿದಾಗ, Contacts ಮತ್ತು Task ಎಂಬ ಆಯ್ಕೆಗಳು ಕಾಣಿಸುತ್ತವೆ. Contacts ಕ್ಲಿಕ್ ಮಾಡಿ. ಸ್ವಲ್ಪ ಬಲಭಾಗದಲ್ಲಿ ನೋಡಿದರೆ More ಎಂಬ ಆಯ್ಕೆ ಇರುತ್ತದೆ. ಅದನ್ನು ಕ್ಲಿಕ್ ಮಾಡಿದರೆ, import ಮಾಡುವ, export ಮಾಡುವ, ಒಂದೇ ರೀತಿಯ ಸಂಪರ್ಕಗಳನ್ನು ವಿಲೀನ ಮಾಡುವ ಆಯ್ಕೆಗಳಿರುತ್ತವೆ. ಇಲ್ಲಿಂದಲೇ ಎಲ್ಲ ಸಂಪರ್ಕಗಳನ್ನೂ ಎಡಿಟ್ ಕೂಡ ಮಾಡಬಹುದು.

ಎಕ್ಸೆಲ್ ರೂಪದಲ್ಲಿ ಅಂದರೆ .csv ಫಾರ್ಮ್ಯಾಟ್‌ನಲ್ಲಿ ನಿಮ್ಮ ಕಂಪ್ಯೂಟರಿಗೆ ಸಂಪರ್ಕಗಳನ್ನು Export ಮಾಡಿಕೊಳ್ಳಿ. ಸಂಪರ್ಕ ಸಂಖ್ಯೆಗಳನ್ನು google csv ಅಥವಾ outlook CSV ಇಲ್ಲವೇ vCard ರೂಪಗಳಿಗೆ (ಆಯಾ ಫೋನ್‌ಗಳು ಯಾವುವನ್ನು ಬೆಂಬಲಿಸುತ್ತವೆ ಎಂಬುದನ್ನು ನೋಡಿಕೊಂಡು) export ಮಾಡುವ ಆಯ್ಕೆ ಲಭ್ಯವಿರುತ್ತದೆ. ಯುಎಸ್‌ಬಿ ಕೇಬಲ್ ಮೂಲಕ ಕಂಪ್ಯೂಟರಿಗೆ ಮೊಬೈಲನ್ನು ಸಂಪರ್ಕಿಸಿ, ಅದರ ಮೆಮೊರಿ ಕಾರ್ಡ್‌ಗೆ ಈ ಫೈಲನ್ನು ವರ್ಗಾಯಿಸಿ. ನಂತರ ನಿಮ್ಮ ಮೊಬೈಲ್‌ನ ಕಾಂಟ್ಯಾಕ್ಟ್ಸ್ ವಿಭಾಗಕ್ಕೆ ಹೋಗಿ, options ನೋಡಿದರೆ, Import/Export ಎಂದಿರುವಲ್ಲಿ, Import from SD Card ಎಂದು ಸೆಲೆಕ್ಟ್ ಮಾಡಿದರೆ ಎಲ್ಲ ಸಂಪರ್ಕಗಳು ಈ ಫೋನ್‌ಗೆ ಕಾಪಿ ಆಗುತ್ತವೆ.

ಏನೋ ಸಮಸ್ಯೆ ಬಂದು ನಿಮ್ಮ ಫೋನನ್ನು ಪೂರ್ತಿಯಾಗಿ ರೀಸೆಟ್ (ಫ್ಯಾಕ್ಟರಿ ಡೇಟಾ ರೀಸೆಟ್) ಮಾಡಬೇಕಾಗಿ ಬರಬಹುದು. ಹಾಗಾದಾಗ, ಎಲ್ಲ ಮಾಹಿತಿಗಳೂ ಡಿಲೀಟ್ ಆಗಿಬಿಡುತ್ತವೆ. ರೀಸೆಟ್ ಮಾಡಿದ ಮೇಲೆ ಇಲ್ಲವೇ ಫೋನ್ ಕಳೆದು ಹೋದರೆ ಅಥವಾ ಹೊಸ ಫೋನ್ ಕೊಳ್ಳಬೇಕೆಂದಿದ್ದರೆ, ಪುನಃ ಅದೇ ಗೂಗಲ್ ಖಾತೆಗೆ ಲಾಗಿನ್ ಆದಾಗ, ಇಲ್ಲಿ ಎಲ್ಲ ಮಾಹಿತಿಯನ್ನು ಪುನಃ ಪಡೆಯುವ (ರೀಸ್ಟೋರ್ ಮಾಡುವ) ಆಯ್ಕೆ ಇರುತ್ತದೆ. ಹೊಸ ಫೋನ್‌ನಲ್ಲಿ ಲಾಗಿನ್ ಆದ ಮೇಲೆ, ಸೆಟ್ಟಿಂಗ್ಸ್‌ನಲ್ಲಿರುವ ಬ್ಯಾಕಪ್ ಮತ್ತು ರೀಸೆಟ್ ಎಂಬಲ್ಲಿಗೆ ಹೋಗಿ, “ರೀಸ್ಟೋರ್” ಬಟನ್ ಕ್ಲಿಕ್ ಮಾಡಿದರಾಯಿತು. ಎಲ್ಲ ಸಂಪರ್ಕಗಳೂ ಬಂದುಬಿಡುತ್ತವೆ.

ಟೆಕ್ ಟಾನಿಕ್
ಯೂಟ್ಯೂಬ್‌ನಿಂದ ಜಿಫ್ ಪರಿವರ್ತಿಸಿ
ಯೂಟ್ಯೂಬ್ ವೀಡಿಯೋಗಳನ್ನು ಹೆಚ್ಚಿನವರು ನೋಡುತ್ತೀರಿ. ಈ ವೀಡಿಯೋಗಳ ಕೆಲವು ತುಣುಕುಗಳನ್ನು ನಮ್ಮ ವೆಬ್‌ಸೈಟ್‌ಗಳಲ್ಲಿ ಅಥವಾ ಬ್ಲಾಗ್‌ಗಳಲ್ಲಿ ಅಳವಡಿಸಲು, ಕಡಿಮೆ ತೂಕವಿರುವ ಚಲಿಸುವ ಚಿತ್ರಗಳ ರೂಪಕ್ಕೆ ಅಂದರೆ .GIF (ಜಿಫ್) ಫಾರ್ಮ್ಯಾಟ್‌ಗೆ ಪರಿವರ್ತಿಸುವಂತಾದರೆ? ಇದನ್ನು ಮಾಡುವುದು ತೀರಾ ಸುಲಭ. ಯಾವುದೇ ಯೂಟ್ಯೂಬ್ ವೀಡಿಯೋ ಆಯ್ಕೆ ಮಾಡಿ. ಅದರ ಯುಆರ್‌ಎಲ್ (ವಿಳಾಸ)ದಲ್ಲಿ www. ನಂತರ ಹಾಗೂ youtube ಎಂದು ಆರಂಭವಾಗುವ ಮುನ್ನ gif ಅಂತ ಸೇರಿಸಿ, ಎಂಟರ್ ಕೊಡಿ. ಅಷ್ಟೆ. ವೀಡಿಯೋದ ಯಾವುದೇ ಭಾಗದಿಂದ ಆರಂಭವಾಗಿ ಗರಿಷ್ಠ 10 ಸೆಕೆಂಡುಗಳ ಜಿಫ್ ಚಿತ್ರವನ್ನು ಪಡೆಯಬಹುದು. ಇದಲ್ಲವಾದರೆ, https://gifyoutube.com/ ಎಂಬಲ್ಲಿ ಯೂಟ್ಯೂಬ್ ಯುಆರ್‌ಎಲ್ ಕಾಪಿ ಪೇಸ್ಟ್ ಮಾಡಿದರೆ ಜಿಫ್ ರೂಪದ ಚಿತ್ರ ದೊರೆಯುತ್ತದೆ.

ಜಿಮೇಲ್‌ನಲ್ಲೇ ಬೇರೆ ಇಮೇಲ್ ಐಡಿ ಮೂಲಕ ಮೇಲ್ ಕಳುಹಿಸಿ

ವಿಜಯ ಕರ್ನಾಟಕ ಮಾಹಿತಿ@ತಂತ್ರಜ್ಞಾನ ಅಂಕಣ -89 ಆಗಸ್ಟ್ 18, 2014
ಮಾಹಿತಿಯ ಅಬ್ಬರದ ಯುಗದಲ್ಲಿ ಒಂದೇ ಒಂದು ಇಮೇಲ್ ಖಾತೆ ಮಾತ್ರ ಹೊಂದಿದ್ದರೆ ಸಾಕಾಗುವುದಿಲ್ಲ. ಹಲವರು ಔಟ್‌ಲುಕ್, ಯಾಹೂ, ರಿಡಿಫ್ ಮುಂತಾದವುಗಳಲ್ಲಿ ಇಮೇಲ್ ಖಾತೆಗಳನ್ನು ಹೊಂದಿರುತ್ತಾರೆ. ಅಲ್ಲದೆ, ನಮ್ಮದೇ ಆದ ಆಫೀಸ್ ಇಮೇಲ್ ಕೂಡ ಜತೆಗಿರುತ್ತದೆ. ಪ್ರತಿಯೊಂದು ಇಮೇಲ್ ಖಾತೆಗೂ ಕಂಪ್ಯೂಟರಿನಲ್ಲಿ ಪ್ರತ್ಯೇಕವಾಗಿ ಲಾಗಿನ್ ಆಗುವುದು ಕಷ್ಟವಾಗಿದ್ದರೆ, ಸ್ಮಾರ್ಟ್‌ಫೋನ್‌ನಲ್ಲಿ ಪ್ರತ್ಯೇಕ ಅಪ್ಲಿಕೇಶನ್‌ಗಳನ್ನು ಸ್ಥಾಪಿಸಿಕೊಳ್ಳಬೇಕಾಗುತ್ತದೆ. ಹೀಗಿರುವಾಗ, ಒಂದು ಜಿಮೇಲ್ ಖಾತೆ ಹೊಂದಿದ್ದರೆ, ಹಲವಾರು ಖಾತೆಗಳನ್ನು ಅದರಿಂದಲೇ ನಿಭಾಯಿಸಬಹುದು. ಅಂದರೆ, ಜಿಮೇಲ್ ಖಾತೆಗೆ ಲಾಗಿನ್ ಆದರೆ, ಬೇರೆ ಯಾವುದೇ ಖಾತೆಗಳ ಮೂಲಕ ಇಮೇಲ್ ಕಳುಹಿಸಬಹುದು ಎಂಬುದು ನಿಮಗೆ ಗೊತ್ತೇ?

ಇದರಲ್ಲಿ ಒಂದಿಷ್ಟು ಸುಲಭವಾದ ಕಸರತ್ತು ಮಾಡಬೇಕಾಗುತ್ತದೆ ಮತ್ತು ಒಂದು ಬಾರಿ ಇದಕ್ಕಾಗಿ ಸಮಯ ವ್ಯಯಿಸಿದರೆ ಸಾಕಾಗುತ್ತದೆ. ಬಳಿಕ ಎಲ್ಲ ಮೇಲ್‌ಗಳನ್ನೂ ಜಿಮೇಲ್ ಖಾತೆಯಿಂದಲೇ ಕಳುಹಿಸಬಹುದು. ಅಂದರೆ ನೀವು ಜಿಮೇಲ್ ಮೂಲಕವಾಗಿ ಉತ್ತರಿಸಿದರೂ, ಅದು ಆಯಾ ಇಮೇಲ್ ಐಡಿಗಳ (ಯಾಹೂ, ಕಚೇರಿ ಮೇಲ್, ಔಟ್‌ಲುಕ್ ಇತ್ಯಾದಿ) ಮೂಲಕವೇ ಸಂಬಂಧಪಟ್ಟವರಿಗೆ ತಲುಪುತ್ತದೆ. ಇಲ್ಲವಾದರೆ, ಪ್ರತ್ಯೇಕ ಆ್ಯಪ್‌ಗಳನ್ನು ತೆರೆದುಕೊಂಡು, ಮತ್ತು ಹಲವಾರು ವಿಂಡೋಗಳನ್ನು ತೆರೆದಿಟ್ಟುಕೊಂಡು ಒಂದೊಂದಾಗಿ ಮೇಲ್ ಕಳುಹಿಸಬೇಕಾಗುತ್ತದೆ.

ಜಿಮೇಲ್ ಖಾತೆಯೊಳಗಿನಿಂದಲೇ ನಿಮ್ಮ ಎಲ್ಲ ಇಮೇಲ್ ವಿಳಾಸಗಳ ಮೂಲಕವಾಗಿ ಮೇಲ್ ಕಳುಹಿಸಬೇಕಿದ್ದರೆ ಅದರಲ್ಲಿಯೇ ಒಂದು ಆಯ್ಕೆ ಇದೆ. ಅಂದರೆ, ನೀವು ಜಿಮೇಲ್ ಖಾತೆಯಿಂದ ಇಮೇಲ್ ಕಳುಹಿಸಿದರೂ, ಅದು ನಿಮ್ಮ ಬೇರೆ ಮೇಲ್ ಸರ್ವರ್ ಮೂಲಕವೇ ಕಳುಹಿಸಿದ್ದೆಂಬಂತೆ ಬೇರೆಯವರಿಗೆ ಕಾಣಿಸುತ್ತದೆ. ಇದಕ್ಕಾಗಿ ಕಂಪ್ಯೂಟರಿನಲ್ಲಿ ಜಿಮೇಲ್‌ಗೆ ಲಾಗಿನ್ ಆಗಿ, ಬಲ ಮೇಲ್ಭಾಗದಲ್ಲಿ ಕಾಣಿಸುವ ಗಿಯರ್ ಐಕಾನ್ ಕ್ಲಿಕ್ ಮಾಡಿ, ಸೆಟ್ಟಿಂಗ್ಸ್ ಆಯ್ಕೆ ಮಾಡಿಕೊಳ್ಳಿ. ಅದರಲ್ಲಿ ಹಲವಾರು ಟ್ಯಾಬ್‌ಗಳಿರುತ್ತವೆ. General, Labels, Inbox ಆದಮೇಲೆ ಕಾಣಿಸುವ Accounts and Import ಎಂಬ ಟ್ಯಾಬ್ ಆಯ್ಕೆ ಮಾಡಿಕೊಳ್ಳಿ.

ಕೆಳಗೆ ನೋಡಿದರೆ, Send mail as ಎಂಬ ವಿಭಾಗ ಕಾಣಿಸುತ್ತದೆ. ಅದರಲ್ಲಿ, Add another email address you own ಎಂಬ ಆಯ್ಕೆ ಲಭ್ಯವಾಗುತ್ತದೆ. ಅದನ್ನು ಕ್ಲಿಕ್ ಮಾಡಿ. ಅಲ್ಲಿ ನಿಮ್ಮ ಇಮೇಲ್ ಐಡಿ ದಾಖಲಿಸಿ. ಮುಂದಿನ ಹಂತಕ್ಕೆ ಹೋಗಿ. ನಿಮ್ಮ ಹೆಸರು ನಮೂದಿಸಬೇಕಾಗುತ್ತದೆ. ನಿಮ್ಮ ಇಮೇಲ್ ವಿಳಾಸವೂ ಇರುತ್ತದೆ. ಆದರೆ, ಈ ವಿಳಾಸವನ್ನು ಆಲಿಯಾಸ್ ವಿಳಾಸ ಎಂದು ಪರಿಗಣಿಸಲಾಗುತ್ತದೆ. ಸಾಮಾನ್ಯವಾಗಿ ಯಾಹೂ, ರಿಡಿಫ್, ಔಟ್‌ಲುಕ್ ಮುಂತಾದ ಇಮೇಲ್ ಪ್ರೊವೈಡರ್‌ಗಳಲ್ಲಿರುವ ಖಾತೆಗಳನ್ನು ಜಿಮೇಲ್ ತಾನಾಗಿಯೇ ಕಾನ್ಫಿಗರ್ ಮಾಡಿಕೊಳ್ಳುತ್ತದೆ. ನೀವು ಆ ಅನ್ಯ ಇಮೇಲ್ ಖಾತೆಯ ಪಾಸ್‌ವರ್ಡ್ ದಾಖಲಿಸಬೇಕಾಗುತ್ತದೆ. ಮುಂದಿನ ಹಂತಗಳನ್ನು ನಿಧಾನವಾಗಿ ಓದಿಯೇ ಕ್ಲಿಕ್ ಮಾಡುತ್ತಾ ಹೋಗಿ. Add Account ಅಂತ ಕ್ಲಿಕ್ ಮಾಡಬೇಕು. ಆಗ, ನಿಮ್ಮ ಅನ್ಯ ಇಮೇಲ್ ಖಾತೆಗೊಂದು ದೃಢೀಕರಣ ಇಮೇಲ್ ಕಳುಹಿಸಲಾಗುತ್ತದೆ. ಅದನ್ನು ತೆರೆದು, ಲಿಂಕ್ ಕ್ಲಿಕ್ ಮಾಡಬಹುದು ಅಥವಾ ಅದರಲ್ಲಿರುವ ಕೋಡ್ ಅನ್ನು ಇಲ್ಲಿನ ಸೆಟ್ಟಿಂಗ್‌ನಲ್ಲಿ ನಮೂದಿಸಿದರೂ ಸಾಕಾಗುತ್ತದೆ. ಇದು ಯಾಕೆಂದರೆ, ನೀವು ನಮೂದಿಸಿರುವ ಇಮೇಲ್ ಖಾತೆಯು ನಿಜವಾಗಿಯೂ ನಿಮ್ಮದೇ ಒಡೆತನದಲ್ಲಿದೆ ಎಂಬುದನ್ನು ಗೂಗಲ್ ಖಚಿತಪಡಿಸಿಕೊಳ್ಳಲು. ಇದು ಕೆಲವೊಮ್ಮೆ Spam ಫೋಲ್ಡರ್‌ನಲ್ಲೂ ಇರುವ ಸಾಧ್ಯತೆಗಳಿವೆ. ಸರಿಯಾಗಿ ನೋಡಿಕೊಳ್ಳಿ.

ಈಗ ಸೆಟಪ್ ಪೂರ್ಣಗೊಂಡಿತು. ಇನ್ನು ಜಿಮೇಲ್ ಒಳಗಿನಿಂದಲೇ ನೀವು ನಿಮ್ಮ ಮತ್ತೊಂದು ಇಮೇಲ್ ವಿಳಾಸವನ್ನು ಆಯ್ದುಕೊಂಡು, ಅದರ ಪರವಾಗಿ ಇಮೇಲ್ ಕಳುಹಿಸಬಹುದಾಗಿದೆ.

ಆದರೆ ನೆನಪಿಡಿ, ನೀವು ಜಿಮೇಲ್ ಮೂಲಕ ಕಳುಹಿಸುವ ಇಮೇಲ್, ನಿಮ್ಮ ಬೇರೆ ಖಾತೆಯಲ್ಲಿ ಸಿಂಕ್ರನೈಜ್ ಆಗಿರುವುದಿಲ್ಲ. ಅತ್ಯಂತ ಅಗತ್ಯ ಬಿದ್ದಾಗ, ನಿಮ್ಮ ಅನ್ಯ ಮೇಲ್ ಖಾತೆಯಿಂದ ಸಂದೇಶ ಕಳುಹಿಸಲು ಈ ವ್ಯವಸ್ಥೆಯನ್ನು ಬಳಸಬಹುದು.

ಈ ರೀತಿ ಕಂಪ್ಯೂಟರ್ ಬ್ರೌಸರ್‌ನಲ್ಲಿ ಒಮ್ಮೆ ಸೆಟ್ಟಿಂಗ್ ಮಾಡಿಕೊಂಡರೆ, ಸ್ಮಾರ್ಟ್‌ಫೋನ್‌ಗಳಲ್ಲಿ ಕೂಡ ಮೇಲ್ ಕಳುಹಿಸುವಾಗ, ಯಾವ ಮೇಲ್ ಐಡಿಯಿಂದ ಕಳುಹಿಸಬೇಕು ಎಂದು ಆಯ್ಕೆ ಮಾಡುವ ಅವಕಾಶ ದೊರೆಯುತ್ತದೆ.

ಟೆಕ್-ಟಾನಿಕ್
ಆ್ಯಪ್‌ಗಳನ್ನು ಗುಂಪುಗೂಡಿಸಿ

ಆಂಡ್ರಾಯ್ಡ್‌ನ ಇತ್ತೀಚಿನ ಆವೃತ್ತಿಯ ಸ್ಮಾರ್ಟ್‌ಫೋನ್‌ಗಳಲ್ಲಿ ಹೋಂ ಸ್ಕ್ರೀನ್‌ನಲ್ಲಿ ಆ್ಯಪ್‌ಗಳ ಸಂಖ್ಯೆ ಕಡಿಮೆ ಮಾಡಿ, ಬ್ಯಾಕ್‌ಗ್ರೌಂಡ್ ಚಿತ್ರ ಚೆನ್ನಾಗಿ ಕಾಣಿಸುವಂತೆ ಮಾಡಬಹುದು. ಸಂಬಂಧಿತ ಆ್ಯಪ್‌ಗಳನ್ನು ಗುಂಪುಗೂಡಿಸುವ ಮೂಲಕ ಇದು ಸಾಧ್ಯ. ಉದಾಹರಣೆಗೆ, ಎಲ್ಲ ಇಮೇಲ್ ಆ್ಯಪ್‌ಗಳು ಅಥವಾ ಮೆಸೇಜಿಂಗ್ ಆ್ಯಪ್‌ಗಳನ್ನು ಗುಂಪು ಮಾಡಿ, ಅದಕ್ಕೆ ಇಮೇಲ್ ಅಥವಾ ಮೆಸೇಜ್ ಅಂತ ಹೆಸರಿಡಬಹುದು. ಇದನ್ನು ಮಾಡಲು, ನಿಮಗೆ ಅಗತ್ಯವಿರುವ ಎಲ್ಲ ಆ್ಯಪ್‌ಗಳನ್ನು ಹೋಂ ಸ್ಕ್ರೀನ್‌ಗೆ ತನ್ನಿ. ಅಲ್ಲಿ ಒಂದೇ ರೀತಿಯ ಆ್ಯಪ್‌ಗಳನ್ನು ಡ್ರ್ಯಾಗ್ ಮಾಡಿ, ಒಂದರ ಮೇಲೊಂದರಂತೆ ಎಳೆದು ಬಿಡಿ. ಅವುಗಳು ಎಲ್ಲವೂ ಒಂದೇ ಆ್ಯಪ್‌ನ ಜಾಗದಲ್ಲಷ್ಟೇ ಗುಂಪಾಗಿರುತ್ತವೆ. ಆ ಗುಂಪಿನ ಹೆಸರು ಟಚ್ ಮಾಡಿದರೆ, ಅದನ್ನು ನಿಮಗೆ ಬೇಕಾದಂತೆ ಬದಲಿಸಲು ಅವಕಾಶ ಲಭ್ಯವಾಗುತ್ತದೆ.

2ಜಿಯಲ್ಲೂ ಉಚಿತ ಕರೆ ಮಾಡಲು ಬಂದಿದೆ ‘ನಾನು’

ಮಾಹಿತಿ@ತಂತ್ರಜ್ಞಾನ ಅಂಕಣ – 88, ವಿಜಯ ಕರ್ನಾಟಕ, ಆಗಸ್ಟ್ 11, 2014

ವಾಟ್ಸ್ಆ್ಯಪ್, ಫೇಸ್‌ಬುಕ್ ಮೆಸೆಂಜರ್, ಲೈನ್, ಸ್ಕೈಪ್, ವಿ-ಚಾಟ್, ಲೈನ್, ಟೆಲಿಗ್ರಾಂ ಮುಂತಾದ ಉಚಿತವಾಗಿ ಸಂದೇಶ ಕಳುಹಿಸಬಹುದಾದ ಹಾಗೂ ಕರೆ ಮಾಡಬಹುದಾದ ಆ್ಯಪ್‌ಗಳಿಗೆ ಸೇವಾ ತೆರಿಗೆ ವಿಧಿಸಬೇಕು ಎಂದು ಟೆಲಿಕಾಂ ನಿಯಂತ್ರಣ ಪ್ರಾಧಿಕಾರವು ಕಳೆದ ವಾರ ಸರಕಾರಕ್ಕೆ ಶಿಫಾರಸು ಮಾಡಿದೆ. ಈ ಉಚಿತ ಆ್ಯಪ್‌ಗಳ ಭರಾಟೆಯಲ್ಲಿ ಟೆಲಿಕಾಂ ಸೇವಾ ಪೂರೈಕೆದಾರರಿಗೆ ಎಸ್ಎಂಎಸ್ ಆದಾಯ ಕುಸಿತವಾದದ್ದಂತೂ ಸತ್ಯ. ವೈಬರ್‌ನಂತಹಾ ಕೆಲವು ಆ್ಯಪ್‌ಗಳಂತೂ ಅಂತಾರಾಷ್ಟ್ರೀಯ ಕರೆಗಳನ್ನೂ ಉಚಿತವಾಗಿ ಮಾಡಲು (3ಜಿ ಇಂಟರ್ನೆಟ್ ಸಂಪರ್ಕ ಅತ್ಯಗತ್ಯ) ಅವಕಾಶ ಮಾಡಿಕೊಡುವುದರಿಂದ ಟೆಲಿಕಾಂ ಕಂಪನಿಗಳ ಆದಾಯಕ್ಕೆ ಬಲುದೊಡ್ಡ ಹೊಡೆತ ಬಿದ್ದಿದೆ. ಆದರೆ, ಕರೆ ಮಾಡಲು ಅವಕಾಶ ಮಾಡಿಕೊಡುವ ವೈಬರ್, ಸ್ಕೈಪ್ ಮುಂತಾದ ಆ್ಯಪ್‌ಗಳಿಗೆ 3ಜಿ ಇಂಟರ್ನೆಟ್ ಸಂಪರ್ಕ ಬೇಕಾಗುತ್ತದೆ. ನಮ್ಮಲ್ಲಿ ಹೆಚ್ಚಿನೆಡೆ ಸಿಗ್ನಲ್ ಸಮಸ್ಯೆಯಿರುವುದರಿಂದ ಯಾವಾಗಲೂ 3ಜಿ ಸಂಪರ್ಕ ಸಿಗುವುದು ಕಷ್ಟ. ಹೀಗಾಗಿ 2ಜಿ ನೆಟ್‌ವರ್ಕೇ ಗತಿ.

ಈ ರೀತಿ 2ಜಿ ಸಂಪರ್ಕದಲ್ಲಿ ಕೂಡ ಕರೆಗಳನ್ನು ಮಾಡಲು ಅವಕಾಶ ಮಾಡಿಕೊಡುವ ಹೊಸದೊಂದು ಆ್ಯಪ್ ಬಂದಿದೆ. ಇದರ ಹೆಸರು ‘ನಾನು’ (nanu). ಬೇರೆಯವರು nanu ಆ್ಯಪ್ ಹೊಂದಿರದಿದ್ದರೆ ಕೂಡ ಮಾತ್ರವೇ ಅಲ್ಲದೆ ಯಾವುದೇ ಲ್ಯಾಂಡ್‌ಲೈನ್ ಫೋನ್‌ಗೂ ಈ ಆ್ಯಪ್ ಮೂಲಕ ಉಚಿತವಾಗಿ ಕರೆ ಮಾಡಬಹುದು. ಇದು ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ ಲಭ್ಯವಿದೆ. ಇಂಟರ್ನೆಟ್ ಸಂಪರ್ಕವಿದ್ದರೆ ಸಾಕು. ನಿಮ್ಮ ಸ್ನೇಹಿತರ ಫೋನ್‌ನಲ್ಲಿಯೂ ಇಂಟರ್ನೆಟ್ ಸಂಪರ್ಕ ಹಾಗೂ nanu ಆ್ಯಪ್ ಇದ್ದರೆ, ಅವರೊಂದಿಗೆ ಎಷ್ಟು ಬೇಕಾದರೂ ಮಾತನಾಡಬಹುದು. ಸದ್ಯಕ್ಕೆ nanu ಆ್ಯಪ್ ಇಲ್ಲದವರೊಂದಿಗೆ ಮಾತನಾಡಲು ಮಿತಿ ಹೇರಲಾಗಿದೆ. ಅಂದರೆ 15 ನಿಮಿಷ ಮಾತ್ರ ಮಾತನಾಡಬಹುದು. ಬಳಕೆದಾರರ ಸಂಖ್ಯೆ ಹೆಚ್ಚಾದಂತೆ nanu ಇಲ್ಲದವರಿಗೆ ಉಚಿತವಾಗಿ ಕರೆ ಮಾಡುವ ಅವಕಾಶವನ್ನು ಹೆಚ್ಚಿಸುವುದಾಗಿ ಸಿಂಗಾಪುರ ಮೂಲದ ಜೆಂಟೇ ಕಮ್ಯುನಿಕೇಶನ್ಸ್ ಸಂಸ್ಥೆ ಹೇಳಿಕೊಂಡಿದೆ.

2ಜಿ ನೆಟ್‌ವರ್ಕ್‌ನಲ್ಲಿಯೂ ಸ್ಪಷ್ಟ ಕರೆಗಳನ್ನು ಮಾಡಲು ಈ ಆ್ಯಪ್ ರೂಪಿಸಲಾಗಿದೆ. ರೋಮಿಂಗ್‌ನಲ್ಲಿರುವಾಗ (ನಿಮ್ಮ ರಾಜ್ಯ ಬಿಟ್ಟು ಬೇರೆ ರಾಜ್ಯಕ್ಕೆ ಹೋಗುವಾಗ) ಇದು ಹೆಚ್ಚು ಅನುಕೂಲ. ಬೇರೆಲ್ಲಾ ಇಂಟರ್ನೆಟ್ ಕರೆ ಮಾಡುವ ಆ್ಯಪ್‌ಗಳಂತೆಯೇ ‘ನಾನು’ ಮೂಲಕ ಕರೆ ಮಾಡಿದರೆ ಕೂಡ ರೋಮಿಂಗ್ ಚಾರ್ಜ್ ಅನ್ವಯವಾಗುವುದಿಲ್ಲ. ಯಾಕೆಂದರೆ ಈ ಕರೆ ಟೆಲಿಕಾಂ ಆಪರೇಟರ್ ಮೂಲಕ ಹೋಗುವುದಿಲ್ಲ, ಬದಲಾಗಿ ಇಂಟರ್ನೆಟ್ ಮೂಲಕವಾಗಿ ಕರೆ ಮಾಡಲಾಗುತ್ತದೆ.

ನೀವು ಕರೆ ಮಾಡಿದಾಗ, ಆ ಕಡೆಯವರು ಉತ್ತರಿಸುವವರೆಗೆ ಅವರ ಕಾಲರ್ ಟ್ಯೂನ್ ಬದಲಾಗಿ ಜಾಹೀರಾತು ಕೇಳಿಸುತ್ತದೆ. ಸ್ಕ್ರೀನ್ ಮೇಲೂ ಜಾಹೀರಾತು ಲಿಂಕ್ ಇರುತ್ತದೆ. ಅದರಿಂದ ಬರುವ ಆದಾಯವೇ ಈ ಕಂಪನಿಗೆ ಲಾಭ. Nanu-Nanu ಕರೆ ಉಚಿತವಾಗಿದ್ದು, nanu ಇಲ್ಲದವರ ಮೊಬೈಲಿಗೆ ಕರೆ ಮಾಡಿದರೆ, ಸದ್ಯಕ್ಕೆ 15 ನಿಮಿಷ ಮಾತ್ರ ಮಾತನಾಡಬಹುದು. ಅದು ಕೂಡ ಈ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳುವ ಮೊದಲ 10 ಲಕ್ಷ ಬಳಕೆದಾರರಿಗೆ ಮಾತ್ರ ಎಂದಿದೆ ಕಂಪನಿ. ಉಚಿತ ಸಂದೇಶ ಸೇವೆಯೂ ಶೀಘ್ರದಲ್ಲೇ ಲಭ್ಯವಾಗಲಿದೆ. ಜಾಸ್ತಿ ಜನ ಇದನ್ನು ಬಳಸಲಾರಂಭಿಸಿದಷ್ಟೂ ಉಚಿತ ಸೇವೆಯನ್ನು ವಿಸ್ತರಿಸಲು ಅನುಕೂಲವಾಗುತ್ತದೆ ಎಂದು ಕಂಪನಿ ಹೇಳಿಕೊಂಡಿದೆ.

ಭಾರತ, ಹಂಗೆರಿ, ಜರ್ಮನಿ, ಐರ್ಲೆಂಡ್, ಇಸ್ರೇಲ್, ಸಿಂಗಾಪುರ, ಸ್ಪೇನ್, ಥಾಯ್ಲೆಂಡ್, ಅಮೆರಿಕ, ಯುಕೆ ಸೇರಿದಂತೆ 41 ದೇಶಗಳಲ್ಲಿ ಉಚಿತ ಕರೆಗೆ nanu ಅವಕಾಶ ಮಾಡಿಕೊಡುತ್ತದೆ. ಪ್ರಸ್ತುತ ಇದು ಆಂಡ್ರಾಯ್ಡ್ ಬಳಕೆದಾರರಿಗೆ ಮಾತ್ರ ಲಭ್ಯವಿದೆ. ಅನ್‌ಲಿಮಿಟೆಡ್ ಡೇಟಾ (ಇಂಟರ್ನೆಟ್) ಪ್ಯಾಕ್ ಇದ್ದವರಿಗೆ ಸಮಸ್ಯೆಯಿಲ್ಲ. ಉಳಿದವರಿಗಾದರೆ, ಹತ್ತು ನಿಮಿಷ ಕರೆ ಮಾಡಿದಿರೆಂದಾದರೆ, 1 ಎಂಬಿ ಡೇಟಾ ಖರ್ಚಾಗುತ್ತದೆ. ಅಂದರೆ 1 ಜಿಬಿ ಡೇಟಾ ಪ್ಲ್ಯಾನ್ ಇದ್ದಲ್ಲಿ, ಬರೇ ‘ನಾನು’ ಉಪಯೋಗಿಸಿದಲ್ಲಿ 10 ಸಾವಿರ ನಿಮಿಷ ಮಾತನಾಡಬಹುದು.

ಪ್ಲೇ ಸ್ಟೋರ್‌ನಲ್ಲಿ nanu ಅಂತ ಹುಡುಕಿ ಇನ್‌ಸ್ಟಾಲ್ ಮಾಡಿಕೊಳ್ಳಿ. ಯಾವುದೇ nanu ಸದಸ್ಯರಿಗೆ ಕರೆ ಮಾಡಬೇಕಿದ್ದರೆ ಪ್ಲಸ್ (+) ಹಾಗೂ ಕೋಡ್ (ಉದಾ: ಭಾರತದಲ್ಲಾದರೆ +91) ಹಾಕಿದ ಮೇಲೆ ಮೊಬೈಲ್ ನಂಬರ್ ಟೈಪ್ ಮಾಡಿ ಕರೆ ಬಟನ್ ಒತ್ತಬೇಕು. ಲ್ಯಾಂಡ್‌ಲೈನ್ ದೂರವಾಣಿಗೆ ಮಾಡಬೇಕಿದ್ದರೆ ಪ್ಲಸ್ (+) ಚಿಹ್ನೆ, ದೇಶದ ಕೋಡ್ (ಭಾರತ 91) ಹಾಗೂ ಏರಿಯಾ ಕೋಡ್ ನಮೂದಿಸಬೇಕು.

ಟೆಕ್ ಟಾನಿಕ್
ಫೇಸ್‌ಬುಕ್ ವೈರಸ್: ನಿಮ್ಮ ಫೇಸ್‌ಬುಕ್ ಪ್ರೊಫೈಲ್‌ನ ಬಣ್ಣ ಬದಲಾಯಿಸಿ ಅಂತ ಕೆಲವೊಂದು ಸೂಚನೆಗಳು ಬರುತ್ತಿರುತ್ತವೆ. ಅದನ್ನು ಕ್ಲಿಕ್ ಮಾಡಲು ನೋಡಿದ್ದೀರಾ? ಅದು ಬೇರೇನೂ ಅಲ್ಲ, ಮಾಲ್‌ವೇರ್! ಹಿಂದಿನಿಂದಲೂ ಈ ವೈರಸ್ ಇತ್ತಾದರೂ, ಅದಕ್ಕೆ ಫೇಸ್‌ಬುಕ್ ಪರಿಹಾರ ಕಲ್ಪಿಸಿತ್ತು. ಆದರೆ ಈಗ, ಮತ್ತೆ ಕಾಣಿಸಿಕೊಂಡಿದೆಯಂತೆ. ಅದು ಟ್ಯುಟೋರಿಯಲ್ ವೀಡಿಯೋ ವೀಕ್ಷಿಸಲು ಪ್ರೇರೇಪಿಸುತ್ತದೆ. ಅದನ್ನು ನೋಡುತ್ತಿರುವಾಗ ನಿಮ್ಮ ಸ್ನೇಹಿತರ ಖಾತೆಗೆ ಸಂಪರ್ಕಿಸುತ್ತದೆ ಈ ವೈರಸ್. ವೀಡಿಯೋ ನೋಡದಿದ್ದರೆ, “ವೈರಸ್ ದಾಳಿ ಆಗಿದೆ, ಈ ಆ್ಯಪ್ ಡೌನ್‌ಲೋಡ್ ಮಾಡಿಕೊಂಡು ಸರಿಪಡಿಸಿಕೊಳ್ಳಿ” ಅಂತ ಹೇಳುವ ಮೂಲಕ ಆ್ಯಪ್ ಡೌನ್‌ಲೋಡ್ ಮಾಡುವಂತೆ ಪ್ರೇರೇಪಿಸುತ್ತದೆ. ಈಗಾಗಲೇ ಅದನ್ನು ಡೌನ್‌ಲೋಡ್ ಮಾಡಿಕೊಂಡಿದ್ದರೆ, ಅನ್‌ಇನ್‌ಸ್ಟಾಲ್ ಮಾಡಿ, ತಕ್ಷಣ ಫೇಸ್‌ಬುಕ್ ಪಾಸ್‌ವರ್ಡ್ ಬದಲಿಸಿ.