ನಿಮ್ಮ ಫೋನ್ ಲಾಲಿಪಾಪ್‌ಗೆ ಅಪ್‌ಗ್ರೇಡ್ ಆಯಿತೇ? ಇದನ್ನು ತಿಳಿದುಕೊಳ್ಳಿ

ಅವಿನಾಶ್ ಬಿ.
ಆಂಡ್ರಾಯ್ಡ್ ಫೋನುಗಳ ಕಾರ್ಯಾಚರಣಾ ವ್ಯವಸ್ಥೆಯ (ಒಎಸ್) ತಾಜಾ ಆವೃತ್ತಿ 5.0 ಅಂದರೆ ಲಾಲಿಪಾಪ್‌ಗೆ ಅಪ್‌ಗ್ರೇಡ್ ಆಗಲು ಹಲವರು ಕಾಯುತ್ತಿದ್ದಾರೆ. ಗೂಗಲ್ ನೆಕ್ಸಸ್ ಸರಣಿಯ ಸಾಧನಗಳ ಬಳಿಕ, ಮೋಟೋರೋಲ ಹಾಗೂ ಉಳಿದ (ಸ್ಯಾಮ್ಸಂಗ್, ಹೆಚ್‌ಟಿಸಿ, ಎಲ್‌ಜಿ, ಸೋನಿ ಇತ್ಯಾದಿ) ಬ್ರ್ಯಾಂಡ್‌ಗಳ ಕಿಟ್‌ಕ್ಯಾಟ್ ಸಾಧನಗಳಿಗೆ ಇದು ಅಪ್‌ಗ್ರೇಡ್ ಆಗಲಿದೆ. ಈಗಾಗಲೇ ಅಪ್‌ಗ್ರೇಡ್ ಆಗಿರುವ ಕೆಲವೇ ಸಾಧನಗಳಲ್ಲಿ ನೆಕ್ಸಸ್ 7 ಟ್ಯಾಬ್ಲೆಟ್ ಒಂದಾಗಿದ್ದು, ನಾನೂ ಅಪ್‌ಗ್ರೇಡ್ ಮಾಡಿಕೊಂಡಿದ್ದೇನೆ. ತಟ್ಟನೇ ಗೋಚರವಾದ ಕೆಲವೊಂದು ವೈಶಿಷ್ಟ್ಯಗಳು ಹಾಗೂ ಬದಲಾಯಿಸಿಕೊಳ್ಳಬಹುದಾದ ಸೆಟ್ಟಿಂಗ್ ಬಗ್ಗೆ ಇಲ್ಲಿ ಕೊಂಚ ಮಾಹಿತಿ ಇದೆ. ನಿಮ್ಮ ಸ್ಮಾರ್ಟ್‌ಫೋನ್‌ಗಳು ಅಪ್‌ಗ್ರೇಡ್ ಆದಾಗ, ನಿಮಗೂ ಉಪಯುಕ್ತವಾಗಬಹುದು.

ಮೊದಲನೆಯದಾಗಿ, ಆಕರ್ಷಕ ನೋಟವಿದೆ. ಸಾಧನದ ಕಾರ್ಯಾಚರಣೆಯ ವೇಗ, ಬ್ಯಾಟರಿ ಚಾರ್ಜ್ ಆಗುವ ವೇಗ ಗಮನ ಸೆಳೆಯುತ್ತದೆ. ಬ್ಯಾಟರಿಯು ಹೆಚ್ಚು ಸಮಯ ಬಾಳಿಕೆ ಬರುತ್ತದೆ. ಚಾರ್ಜ್ ಆಗುತ್ತಿರುವಾಗ, ಚಾರ್ಜ್ ಆಗಲು ಎಷ್ಟು ಸಮಯ ಬೇಕೆಂಬುದು ಲಾಕ್ ಸ್ಕ್ರೀನ್‌ನಲ್ಲೇ ಕಾಣಿಸುತ್ತದೆ. ಪ್ರಮುಖವಾಗಿ ಸೆಟ್ಟಿಂಗ್ಸ್ ಸ್ಕ್ರೀನ್ ಬದಲಾಗಿದೆ. ಜತೆಗೆ, ಈಗಾಗಲೇ ಕಿಟ್‌ಕ್ಯಾಟ್ ಸಾಧನಗಳಲ್ಲಿನ ಐಕಾನ್‌ಗಳ (ವಿಶೇಷವಾಗಿ ಮ್ಯಾಪ್ಸ್, ಜಿಮೇಲ್, ಪ್ಲೇಸ್ಟೋರ್ ಇತ್ಯಾದಿ) ಬಣ್ಣ ಮತ್ತು ವಿನ್ಯಾಸಗಳು ಇತ್ತೀಚೆಗೆ ಬದಲಾಗಿ ಅಪ್‌ಡೇಟ್ ಆಗಿರುವುದು ಹೆಚ್ಚಿನವರ ಗಮನಕ್ಕೆ ಬಂದಿರಬಹುದು. ಇದು ಲಾಲಿಪಾಪ್‌ಗಾಗಿಯೇ ರೂಪುಗೊಂಡ ಬದಲಾವಣೆ.

ನಮಗೆ ಉಪಯುಕ್ತವಾದ ಪ್ರಮುಖ ಮೂರು ಅಂಶಗಳ ಬದಲಾವಣೆಯ ಮಾಹಿತಿ ಇಲ್ಲಿದೆ:
1. ಕನ್ನಡ ಕೀಬೋರ್ಡ್: ಮುಖ್ಯವಾಗಿ ಕನ್ನಡ ಕೀಬೋರ್ಡ್ ಇನ್‌ಬಿಲ್ಟ್ (ಅಂತರ್‌ನಿರ್ಮಿತ) ಆಗಿದೆ. ಎನೇಬಲ್ ಮಾಡಲು, ಸೆಟ್ಟಿಂಗ್ಸ್ > ಲಾಂಗ್ವೇಜ್ & ಇನ್‌ಪುಟ್ ಎಂಬಲ್ಲಿರುವ, ಗೂಗಲ್ ಕೀಬೋರ್ಡ್ ಒತ್ತಿದರೆ, ಅದರ ಸೆಟ್ಟಿಂಗ್ಸ್‌ನಲ್ಲಿ, ಇಂಗ್ಲಿಷ್ ಜತೆಗೆ ಕನ್ನಡ, ತಮಿಳು, ಮಲಯಾಳಂ, ಹಿಂದಿ, ತೆಲುಗು ಮುಂತಾದ ಭಾರತೀಯ ಭಾಷೆಗಳ ಆಯ್ಕೆ ದೊರೆಯುತ್ತದೆ. ಆದರೆ ಕನ್ನಡ ಕೀಬೋರ್ಡ್‌ನಲ್ಲಿ ಒಂದು ಸಮಸ್ಯೆಯಿದೆ. ಸ್ವರಾಕ್ಷರ ‘ಒ’ ಇದೆಯಾದರೂ, ವ್ಯಂಜನಕ್ಕೆ ಹೃಸ್ವ ಸ್ವರ ಸೇರಿಸಲು ಇರುವ ಒ ಅಕ್ಷರ ಭಾಗಕ್ಕೆ ಸೇರಿಸಲು ಕೀ ಇಲ್ಲ. ಹೀಗಾಗಿ ‘ಕೊ’ ಬರೆಯುವ ಬದಲಾಗಿ ದೀರ್ಘ ಸ್ವರವನ್ನು ಸೇರಿಸಿ ‘ಕೋ’ ಅಂತ (ಸಮೀಪದ ಅಕ್ಷರ) ಸದ್ಯಕ್ಕೆ ಬರೆಯಬೇಕಾಗುತ್ತದೆ. ಇದನ್ನು ಗೂಗಲ್ ಗಮನಕ್ಕೆ ತರಲಾಗಿದೆ, ಗಮನಿಸಿ ಸರಿಪಡಿಸುವ ಆಶಾವಾದವಿದೆ.

2. ಫೇಸ್ ಲಾಕ್: ನಮ್ಮ ಮುಖವನ್ನೇ ಅನ್‌ಲಾಕ್ ಪಾಸ್‌ವರ್ಡ್ ಆಗಿ ಹೊಂದಿಸಬಹುದು. ಸೆಟ್ಟಿಂಗ್ಸ್ > ಸೆಕ್ಯುರಿಟಿ > ಸ್ಮಾರ್ಟ್‌ಲಾಕ್ > ಟ್ರಸ್ಟೆಡ್ ಫೇಸ್ ಎಂಬಲ್ಲಿ ಹೋಗಿ ನಿಮ್ಮ ಮುಖವನ್ನು (ಎದುರಿನ ಕ್ಯಾಮೆರಾ ಮೂಲಕ) ದಾಖಲಿಸಿದರೆ, ಈ ಸಾಧನದ ಸ್ಕ್ರೀನ್ ಅನ್‌ಲಾಕ್ ಮಾಡಬೇಕಿದ್ದರೆ, ನಿಮ್ಮ ಮುಖವೇ ಆಗಬೇಕು. ಬೇರೆಯವರಿಗೆ ಅನ್‌ಲಾಕ್ ಮಾಡಲಾಗದು. ಆದರೆ ಇದು ಅಷ್ಟೇನೂ ಸುರಕ್ಷಿತವಲ್ಲ ಯಾಕೆಂದರೆ, ಮುಖವನ್ನು ಕ್ಯಾಮೆರಾಕ್ಕೆ ನಿಖರವಾಗಿ ಗುರುತಿಸುವುದು ಕಷ್ಟ ಮತ್ತು ಕೆಲವರ ಮುಖವು ನಿರ್ದಿಷ್ಟ ಭಾಗದಲ್ಲಿ ಒಂದೇ ರೀತಿಯಾಗಿರಲೂಬಹುದು. ಬೇರೆ ಕಂಪನಿಗಳು (ಮೋಟೋ ಜಿ, ಝೆನ್‌ಫೋನ್, ಗ್ಯಾಲಕ್ಸಿ ಇತ್ಯಾದಿ) ಬದಲಾವಣೆ ಮಾಡಿರುವ ಆಂಡ್ರಾಯ್ಡ್ ಆವೃತ್ತಿಗಳಲ್ಲಿ ಈಗಾಗಲೇ ಫೇಸ್ ಅನ್‌ಲಾಕ್ ತಂತ್ರಜ್ಞಾನವನ್ನು ಅಳವಡಿಸಲಾಗಿದೆ.

3. ಗೂಗಲ್ ನೌ: ಹಿಂದಿನ ಆವೃತ್ತಿಗಳಲ್ಲಿ ಗೂಗಲ್ ನೌ ಎಂಬ, ನಾವು ಹೇಳಿದ್ದನ್ನು ಸರ್ಚ್ ಮಾಡಿ ತೋರಿಸುವ ಧ್ವನಿ ಆಧಾರಿತ ಆಪ್ತ ಸಹಾಯಕವನ್ನು ಸ್ಕ್ರೀನ್ ಅನ್‌ಲಾಕ್ ಮಾಡಿದ ಮೇಲಷ್ಟೇ ತೆರೆಯಬಹುದಾಗಿತ್ತು. ಆದರೆ, ಲಾಲಿಪಾಪ್‌ನಲ್ಲಿ ಒಂದಿಷ್ಟು ಕೆಲಸ ಮಾಡಿದರೆ, ಸ್ಕ್ರೀನ್ ಆಫ್ ಆಗಿರುವಾಗಲೇ, ‘ಓಕೆ ಗೂಗಲ್’ ಅಂತ ಹೇಳಿದರೆ, ನಿಮ್ಮ ಆದೇಶಕ್ಕಾಗಿ ಕಾಯುವ ಮೈಕ್ ಐಕಾನ್ ತೆರೆದುಕೊಂಡು, “ಈಗ ಹೇಳಿ” ಅಂತ ನಿಮ್ಮನ್ನು ಕೇಳುತ್ತದೆ. ಇದನ್ನು ಎನೇಬಲ್ ಮಾಡಲು, ಸೆಟ್ಟಿಂಗ್ಸ್ > ಲ್ಯಾಂಗ್ವೇಜ್ & ಇನ್‌ಪುಟ್ > ವಾಯ್ಸ್ ಇನ್‌ಪುಟ್ > ಎನ್‌ಹ್ಯಾನ್ಸ್‌ಡ್ ಗೂಗಲ್ ಸರ್ವಿಸಸ್ ಎಂಬಲ್ಲಿರುವ ಗಿಯರ್ ಐಕಾನ್ ಒತ್ತಿರಿ. ಅದರಲ್ಲಿ ಭಾಷೆಯನ್ನು English (India) ಅಂತ ಹೊಂದಿಸಿ, ಬಳಿಕ “Ok Google Detection” ಅಂತ ಕ್ಲಿಕ್ ಮಾಡಿ. ಅಲ್ಲಿರುವ When Locked ಎಂಬ ಆಯ್ಕೆಯನ್ನು ಆನ್ ಮಾಡಿದರೆ, ಸ್ಕ್ರೀನ್ ಲಾಕ್ ಆಗಿದ್ದಾಗಲೂ “ಓಕೆ ಗೂಗಲ್” ಅಂತ ಹೇಳಿದರೆ ಸ್ಕ್ರೀನ್ ಓಪನ್ ಆಗುತ್ತದೆ.

ಟೆಕ್ ಟಾನಿಕ್: ಆಂಡ್ರಾಯ್ಡ್‌ನಲ್ಲಿ ಅಡಗಿರುವ ಆಟ
ಆಂಡ್ರಾಯ್ಡ್ ಜೆಲ್ಲಿಬೀನ್, ಕಿಟ್‌ಕ್ಯಾಟ್ ಹಾಗೂ ಲಾಲಿಪಾಪ್ ಕಾರ್ಯಾಚರಣಾ ವ್ಯವಸ್ಥೆ ಇರುವ ಸ್ಮಾರ್ಟ್‌ಫೋನ್‌ಗಳಲ್ಲಿ ಗೌಪ್ಯವಾದ ಗೇಮ್ ಇದೆ ಎಂಬುದು ಹೆಚ್ಚಿನವರಿಗೆ ಗೊತ್ತಿಲ್ಲ. ಹಲವು ಫೋನ್‌ಗಳಲ್ಲಿ ಪರೀಕ್ಷಿಸಿ ನೋಡಿದೆ. ನೀವೂ ಮಾಡಿ ನೋಡಿ. ಸೆಟ್ಟಿಂಗ್ಸ್‌ನಲ್ಲಿ About Phone (ಅಥವಾ Tablet) ಎಂದಿರುವಲ್ಲಿ ನಾಲ್ಕೈದು ಬಾರಿ ಬೆರಳಿಂದ ತಟ್ಟಿರಿ. ಕಿಟ್‌ಕ್ಯಾಟ್ ಅಥವಾ ಲಾಲಿಪಾಪ್ ಚಿತ್ರ ಕಾಣಿಸುತ್ತದೆ. ಅದನ್ನು ತಟ್ಟಿರಿ ಮತ್ತು ಒಂದು ಮೂರ್ನಾಲ್ಕು ಸೆಕೆಂಡು ಒತ್ತಿಹಿಡಿಯಿರಿ. ಫ್ಲ್ಯಾಪಿಬರ್ಡ್ ಮಾದರಿಯ ಗೇಮ್ ತೆರೆದುಕೊಳ್ಳುತ್ತದೆ! ಸಮಯ ಕಳೆಯಲು ಯಾರ ಕಣ್ಣಿಗೂ ಕಾಣಿಸದಿರುವ ರಹಸ್ಯ ವ್ಯವಸ್ಥೆ. ಎಲ್ಲೆಲ್ಲಾ ಏನೇನು ಅಡಗಿದೆಯೋ! ಇದು ನಿಮಗೆ ಬೋನಸ್ ಮಾಹಿತಿ. (ಜಿಂಜರ್‌ಬ್ರೆಡ್‌ನಲ್ಲಿ ಒಂದು ಚಿತ್ರ ಕಾಣಿಸುತ್ತದೆ.)
ವಿಜಯ ಕರ್ನಾಟಕದಲ್ಲಿ ಮಾಹಿತಿ@ತಂತ್ರಜ್ಞಾನ: ಡಿಸೆಂಬರ್ 08, 2014

ಟ್ರೂಕಾಲರ್‌ನ ಟ್ರೂ ಬಣ್ಣ; ಸ್ವಲ್ಪ ಎಚ್ಚರಿಕೆ ವಹಿಸಿರಣ್ಣ!

ಅವಿನಾಶ್ ಬಿ.
ಸ್ಮಾರ್ಟ್‌ಫೋನ್ ಬಳಸುತ್ತಿರುವ ಹೆಚ್ಚಿನವರಿಗೆ ಟ್ರೂ ಕಾಲರ್ ಗೊತ್ತಿದೆ. ಈ ಆ್ಯಪ್ ಇನ್‌ಸ್ಟಾಲ್ ಮಾಡಿಕೊಂಡರೆ, ಯಾವುದೇ ಫೋನ್‌ನಿಂದ ಕರೆ ಬಂದರೂ, ಅವರ ಹೆಸರು/ಊರು/ಚಿತ್ರಗಳು ನಮ್ಮ ಮೊಬೈಲ್ ಫೋನ್‌ನ ಸ್ಕ್ರೀನ್ ಮೇಲೆ ಕಾಣಿಸುತ್ತದೆ. ಇದೊಂದು ಉಪಯುಕ್ತ ಆ್ಯಪ್ ಅಂತ ನಾವೆಲ್ಲ ಅಂದುಕೊಂಡರೂ ವಿಷಯ ಬೇರೆಯೇ ಇದೆ.

ಮೂಲತಃ ಸ್ಕ್ಯಾಂಡಿನೇವಿಯಾದ ಟ್ರೂಕಾಲರ್, ಜಗತ್ತಿನ ಅತಿದೊಡ್ಡ ಮೊಬೈಲ್ ಫೋನ್ ಸಮುದಾಯ ಅಂತ ಹೇಳಲಡ್ಡಿಯಿಲ್ಲ. ಆಂಡ್ರಾಯ್ಡ್, ಬ್ಲ್ಯಾಕ್‌ಬೆರಿ, ಆ್ಯಪಲ್, ಸಿಂಬಿಯಾನ್, ವಿಂಡೋಸ್… ಹೀಗೆ ಬಹುತೇಕ ಎಲ್ಲ ಸ್ಮಾರ್ಟ್ ಆಪರೇಟಿಂಗ್ ಸಿಸ್ಟಂಗಳಲ್ಲಿಯೂ ಈ ಆ್ಯಪ್ ಕೆಲಸ ಮಾಡುವುದರಿಂದ, ಇದರ ಜಾಗತಿಕ ಬಳಕೆದಾರರ ಸಂಖ್ಯೆ ಕೋಟ್ಯಂತರವಿದೆ.

“ನಿಮ್ಮ ಅತ್ಯಂತ ವ್ಯಕ್ತಿಗತವಾಗಿರುವ ಫೋನ್‌ಗೆ ಅಪರಿಚಿತರ ಕರೆ ಬರುವುದರಿಂದ ನಿಮ್ಮನ್ನು ನೀವು ರಕ್ಷಿಸಿಕೊಳ್ಳಿ, ಅಪರಿಚಿತರಿಂದ ಬರುವ ಕರೆಗಳನ್ನು ಸ್ವೀಕರಿಸಬೇಡಿ” ಅಂತ ಟ್ರೂಕಾಲರ್ ಕಂಪನಿ ಹೇಳಿಕೊಳ್ಳುತ್ತಿದ್ದರೂ, ಅದು ನಿಜವಾಗಿಯೂ ಏನು ಮಾಡುತ್ತಿದೆ ಗೊತ್ತೇ? ಆ್ಯಪ್ ಇನ್‌ಸ್ಟಾಲ್ ಮಾಡಿದ ತಕ್ಷಣ, ಹಿಂದೆ, ಮುಂದೆ ನೋಡದೆ ನೀವು Accept ಅಂತನೋ, Yes ಅಂತನೋ ಬಟನ್ ಒತ್ತಿರುತ್ತೀರಿ. ಆವಾಗ ಅದು ನಮ್ಮ ಮೊಬೈಲ್‌ನಲ್ಲಿ ಸಂಗ್ರಹವಾಗಿರುವ ಸಂಪರ್ಕ ಸಂಖ್ಯೆಗಳ (ಕಾಂಟಾಕ್ಟ್ಸ್) ಪ್ರದೇಶಕ್ಕೆ ಒಳಪ್ರವೇಶಿಸಿಬಿಡುತ್ತದೆ ಮತ್ತು ಯಾವೆಲ್ಲಾ ಸಂಖ್ಯೆಗಳಿವೆಯೋ, ಅವನ್ನೆಲ್ಲಾ ಅನಾಮತ್ತಾಗಿ ಎತ್ತಿಕೊಂಡು, ತನ್ನ ಸರ್ವರ್‌ಗೆ, ತನ್ನ ಸಂಗ್ರಹಾಗಾರಕ್ಕೆ ಕಾಪಿ ಮಾಡಿಕೊಂಡುಬಿಟ್ಟಿರುತ್ತದೆ.

ಕೆಲವೊಮ್ಮೆ ನಮ್ಮ ಲ್ಯಾಂಡ್‌ಲೈನ್ ಫೋನ್ ನಂಬರುಗಳನ್ನು ಸ್ನೇಹಿತರು, ಕಚೇರಿ ಅಥವಾ ಬಂಧುಗಳ ಹೆಸರಿಗೆ ಬೇರೆಯವರು ಸೇವ್ ಮಾಡಿಕೊಂಡಿರುತ್ತಾರೆ. ಈ ರೀತಿ ಸೇವ್ ಆಗಿರುವ ಮೊಬೈಲ್‌ನಲ್ಲಿ ಟ್ರೂಕಾಲರ್ ಆ್ಯಪ್ ಅಳವಡಿಸಿದರೆ, ಎಲ್ಲ ಮಾಹಿತಿಯೂ ಅದರ ಸರ್ವರ್‌ಗೆ ಅಪ್‌ಡೇಟ್ ಆಗುತ್ತದೆ. ನಮ್ಮ ಸ್ನೇಹಿತರ, ಬಂಧುಗಳ ಸಂಖ್ಯೆಯನ್ನೆಲ್ಲಾ ಈ ಆ್ಯಪ್‌ಗೆ ನಾವೇ ಧಾರೆಯೆರೆದುಬಿಟ್ಟಿರುತ್ತೇವೆ.

ಪ್ರೈವೆಸಿಗೆ ಧಕ್ಕೆ ಎಂಬ ಕಾರಣಕ್ಕೆ ವರ್ಷಗಳ ಹಿಂದೆ ಅದನ್ನು ಯುನೈಟೆಡ್ ಕಿಂಗ್‌ಡಂನಲ್ಲಿ ನಿಷೇಧಿಸಲಾಗಿತ್ತು. ನಮ್ಮಲ್ಲೇ ಹೇಳುವುದಾದರೆ, ನೀವು ನಿಮ್ಮ ಕಚೇರಿ ಲ್ಯಾಂಡ್‌ಲೈನ್ ಫೋನ್‌ನಿಂದ ಯಾರಿಗೋ ಅಗತ್ಯ ಉದ್ದೇಶಕ್ಕಾಗಿ ಕರೆ ಮಾಡಿರುತ್ತೀರಿ. ಅವರು, ಆ ಸಂಖ್ಯೆಯನ್ನು ನಿಮ್ಮ ಹೆಸರಿಗೆ ಸೇವ್ ಮಾಡಿಕೊಂಡಿರುತ್ತಾರೆ. ಕಚೇರಿಯ ಈ ಸಂಖ್ಯೆಯಿಂದ ಯಾರೇ ಆದರೂ ಟ್ರೂಕಾಲರ್ ಅಳವಡಿಸಿಕೊಂಡಿರುವ ಯಾರಿಗೇ ಫೋನ್ ಮಾಡಿದರೂ, ನಿಮ್ಮ ಹೆಸರೇ ಕಾಣಿಸುತ್ತದೆ. ಬೇಕಿದ್ದರೆ http://www.truecaller.com ನಲ್ಲಿ ಚೆಕ್ ಮಾಡಿ ನೋಡಿ. ಕೆಲವೊಮ್ಮೆ ತಪ್ಪುಗಳಿರುವ ಸಾಧ್ಯತೆಗಳೂ ಇವೆ.

ನಿಮ್ಮ ಕಚೇರಿಯ ಅಥವಾ ಸ್ನೇಹಿತರ ಮನೆಯ ಫೋನ್ ಸಂಖ್ಯೆಗೆ ಅದು ನಿಮ್ಮ ಹೆಸರನ್ನು ತೋರಿಸುತ್ತದೆ ಎಂದಾದರೆ, ಅಥವಾ ನಮ್ಮ ಹೆಸರು ಅವರ ಡೇಟಾಬೇಸ್‌ನಲ್ಲಿ ಇರುವುದು ಬೇಡ ಅಂತಾದರೆ ನೀವದನ್ನು ತೆಗೆದುಹಾಕಬಹುದು. http://www.truecaller.com/unlist ಎಂಬಲ್ಲಿಗೆ ಹೋಗಿ, ಲಾಗಿನ್ ಆಗಿ (ಯಾವುದೇ ಕಾಂಟಾಕ್ಟ್ ವಿವರಗಳು ಸಿಂಕ್ ಆಗಿಲ್ಲದ, ಜಾಸ್ತಿ ಬಳಸದೇ ಇರುವ ಇಮೇಲ್ ಐಡಿಯಿಂದ ಆದರೆ ಉತ್ತಮ), ಫೋನ್ ಸಂಖ್ಯೆಯನ್ನು ದಾಖಲಿಸಿ. (+91 ಎಂಬ ಕೋಡ್ ಮೊದಲು ಹಾಕಿದ ನಂತರ, ನಿಮ್ಮ ಮೊಬೈಲ್ ನಂಬರ್ ದಾಖಲಿಸಿ. ಲ್ಯಾಂಡ್‌ಲೈನ್ ಆಗಿದ್ದರೆ, ದೇಶದ ಕೋಡ್ +91, ನಂತರ ನಿಮ್ಮ ಪ್ರದೇಶದ ಎಸ್‌ಟಿಡಿ ಕೋಡ್ ದಾಖಲಿಸಬೇಕಾಗುತ್ತದೆ. ಉದಾಹರಣೆಗೆ, ಬೆಂಗಳೂರಿನ ಕೋಡ್ 080 ಇದ್ದರೆ, +9180 ಅಂತ ದಾಖಲಿಸಿದ ನಂತರ ಲ್ಯಾಂಡ್‌ಲೈನ್ ಸಂಖ್ಯೆ ನಮೂದಿಸಬೇಕು). ಸೂಕ್ತ ಕಾರಣಗಳನ್ನು ಟಿಕ್ ಗುರುತು ಮಾಡಿ, ಅಲ್ಲೇ ಕಾಣಿಸುವ ವೆರಿಫಿಕೇಶನ್ ಕೋಡ್ ದಾಖಲಿಸಿ Submit ಬಟನ್ ಒತ್ತಿದರೆ, ಒಂದೆರಡು ದಿನದಲ್ಲಿ ನಿಮ್ಮ ಹೆಸರು ಮಾಯವಾಗುತ್ತದೆ.

ವಾಸ್ತವವಾಗಿ, ಈಗಿನ ಸ್ಮಾರ್ಟ್‌ಫೋನ್ ಯುಗದಲ್ಲಿ ನಾವು ನಿಮ್ಮ ಇಮೇಲ್ ಐಡಿ ಹಾಗೂ ಫೇಸ್‌ಬುಕ್ ಐಡಿ ಜತೆಗೆ ನಮ್ಮ ಸಂಪರ್ಕ ಸಂಖ್ಯೆಗಳನ್ನು ಅಪ್‌ಡೇಟ್ ಮಾಡಿಕೊಂಡಿರುತ್ತೇವೆ. ಅವುಗಳ ಪ್ರೊಫೈಲ್ ಚಿತ್ರಗಳು ಕೂಡ ಟ್ರೂಕಾಲರ್ ಸರ್ವರ್‌ಗೆ ಸಿಂಕ್ರನೈಸ್ ಆಗುತ್ತದೆ. ಇದು ಕೂಡ ಒಂದು ರೀತಿಯಲ್ಲಿ ಕ್ರೌಡ್ ಸೋರ್ಸಿಂಗ್ ಇದ್ದಂತೆ. ಆದರೆ ಈ ರೀತಿ ಪುನಃ ಯಾರಾದರೂ ನಮ್ಮ ಹೆಸರನ್ನು ಸೇರಿಸಿಕೊಳ್ಳದಂತೆ ಮಾಡುವುದು ನಮ್ಮ ಕೈಯಲ್ಲಿರುವುದಿಲ್ಲವಾದುದರಿಂದ, ಟ್ರೂಕಾಲರ್ ಬಳಸಬೇಡಿ ಅಂತ ತಿಳಿಹೇಳಬಹುದಷ್ಟೆ. ಯಾಕೆಂದರೆ, ನಿಮ್ಮ ಅನುಮತಿಯಿಲ್ಲದೆ ಯಾರು ಬೇಕಾದರೂ ಟ್ರೂಕಾಲರ್ ಡೇಟಾಬೇಸ್‌ಗೆ ನಿಮ್ಮ ಸಂಖ್ಯೆ, ಹೆಸರನ್ನು ಸೇರಿಸಬಹುದು ಅದೇ ರೀತಿ ತೆಗೆದುಹಾಕಲೂಬಹುದಾಗಿದೆ. ಎಲ್ಲಿದೆ ನಮ್ಮ ಪ್ರೈವೆಸಿ?
ಟೆಕ್ ಟಾನಿಕ್: ಕನ್ನಡಿಯಾಗಿ ಸ್ಮಾರ್ಟ್‌ಫೋನ್
ಸ್ಮಾರ್ಟ್ ಮೊಬೈಲ್ ಫೋನ್ ಇದ್ದರೆ ಟಾರ್ಚ್ ಆಗಿ, ರೇಡಿಯೋ ಆಗಿ, ಕ್ಯಾಮೆರಾ ಆಗಿಯೂ ಅದನ್ನು ಬಳಸಬಹುದು. ಆದರೆ, ವೀಡಿಯೋ ಚಾಟಿಂಗ್‌ಗೆ ಅವಕಾಶ ಮಾಡಿಕೊಡಲೆಂದು, ಮತ್ತು ಇತ್ತೀಚೆಗೆ ಸೆಲ್ಫೀಗಳಿಗಾಗಿ (ಸ್ವಯಂ ಫೋಟೋ ತೆಗೆದುಕೊಳ್ಳುವುದು) ಎರಡೆರಡು ಕ್ಯಾಮೆರಾಗಳು ಇರುವ ಸ್ಮಾರ್ಟ್‌ಫೋನ್‌ಗಳಿಂದ ಮತ್ತೊಂದು ಪ್ರಯೋಜನವೂ ಇದೆ. ಅದೆಂದರೆ, ಅಗತ್ಯಬಿದ್ದರೆ, ಎದುರುಭಾಗದ ಕ್ಯಾಮೆರಾವನ್ನು ಕನ್ನಡಿಗೆ ಪರ್ಯಾಯವಾಗಿಯೂ ಉಪಯೋಗಿಸಬಹುದು. ಮೊಬೈಲನ್ನು ಕನ್ನಡಿಯಂತೆ ಉಪಯೋಗಿಸಲು ಆಂಡ್ರಾಯ್ಡ್‌ನಲ್ಲಿ ಕೆಲವು ಆ್ಯಪ್‌ಗಳಿದ್ದರೂ (Mirror ಅಂತ ಗೂಗಲ್‌ಪ್ಲೇ ಸ್ಟೋರ್‌ನಲ್ಲಿ ಸರ್ಚ್ ಮಾಡಿ), ಅವುಗಳೂ ಉಪಯೋಗಿಸುವುದು ಫ್ರಂಟ್ ಕ್ಯಾಮೆರಾವನ್ನೇ. ಹೀಗಾಗಿ ನೀವಿದನ್ನು ಪ್ರಯೋಗಿಸಿನೋಡಬಹುದು.
ವಿಜಯ ಕರ್ನಾಟಕದಲ್ಲಿ ಅಂಕಣ ಮಾಹಿತಿ@ತಂತ್ರಜ್ಞಾನ ಅಂಕಣ: ನವೆಂಬರ್ 24, 2014

ಆಂಡ್ರಾಯ್ಡ್‌ನಿಂದ ವಿಂಡೋಸ್ ಫೋನ್‌ಗೆ ಸಂಪರ್ಕಗಳ ವರ್ಗಾವಣೆ ಹೇಗೆ?

ವಿಜಯ ಕರ್ನಾಟಕ ಮಾಹಿತಿ@ತಂತ್ರಜ್ಞಾನ ಅಂಕಣ -102: ನವೆಂಬರ್ 17, 2014
ಆಂಡ್ರಾಯ್ಡ್ ಫೋನ್ ಬಳಸುತ್ತಿರುವ ಕೆಲವರಿಗೆ ಮೈಕ್ರೋಸಾಫ್ಟ್ ವಿಂಡೋಸ್ ಫೋನ್‌ನಲ್ಲಿನ ವೈಶಿಷ್ಟ್ಯಗಳಿಂದಾಗಿ ಮತ್ತು ಕಂಪ್ಯೂಟರ್, ಲ್ಯಾಪ್‌ಟಾಪ್ ಜತೆಗೆ ಸಿಂಕ್ರನೈಸ್ ಮಾಡುವ ಅವಕಾಶವಿರುವುದರಿಂದಾಗಿ ಅದು ಇಷ್ಟವಾಗಿರಬಹುದು. ಆಂಡ್ರಾಯ್ಡ್‌ನಿಂದ ವಿಂಡೋಸ್ ಫೋನ್‌‌ಗೆ ಬದಲಾಯಿಸುವಾಗ ಮುಖ್ಯವಾಗಿ ತೊಡಕಾಗುವುದು ಸಂಪರ್ಕ ವಿವರಗಳನ್ನು (ಕಾಂಟ್ಯಾಕ್ಟ್) ವರ್ಗಾಯಿಸುವುದು. ಹೊಸ ವಿಂಡೋಸ್ ಫೋನ್‌ಗೆ ಒಂದೊಂದೇ ಸಂಖ್ಯೆಯನ್ನು ಪುನಃ ಫೀಡ್ ಮಾಡುವುದು ತೀರಾ ಕಷ್ಟ. ಸುಲಭವಾಗಿ ಸಂಪರ್ಕ ಸಂಖ್ಯೆಗಳನ್ನು ಹೇಗೆ ವರ್ಗಾಯಿಸಬಹುದೆಂಬ ಮಾಹಿತಿ ಇಲ್ಲಿದೆ.

ಆಂಡ್ರಾಯ್ಡ್ ಫೋನ್‌ಗಳಿಗೆ ಗೂಗಲ್ ಖಾತೆ ಹೇಗೆ ಅತ್ಯಗತ್ಯವೋ, ವಿಂಡೋಸ್ ಫೋನ್ ತೆಗೆದುಕೊಂಡವರಿಗೆ ಮೈಕ್ರೋಸಾಫ್ಟ್‌ನ ಇಮೇಲ್ ಖಾತೆ (ಲೈವ್, ಔಟ್‌ಲುಕ್, ಹಾಟ್‌ಮೇಲ್) ಅಷ್ಟೇ ಅಗತ್ಯ. ವಿಂಡೋಸ್ ಸ್ಟೋರ್‌ನಿಂದ ಯಾವುದೇ ಆ್ಯಪ್ ಇನ್‌ಸ್ಟಾಲ್ ಮಾಡಿಕೊಳ್ಳಬೇಕಿದ್ದರೆ ಬೇಕಾಗುತ್ತದೆ. ಇಲ್ಲದಿದ್ದರೆ Live.com ಮೂಲಕ ಹೊಸ ಮೇಲ್ ಐಡಿ ರಚಿಸಿಕೊಳ್ಳಬಹುದು.

ಫೋನ್ ಬದಲಿಸುವ ಮುನ್ನ, ಆಂಡ್ರಾಯ್ಡ್ ಸ್ಮಾರ್ಟ್‌ಫೋನ್ ಸಂಪರ್ಕಗಳನ್ನು ಜಿಮೇಲ್ ಖಾತೆಯ ಜತೆ ಸಿಂಕ್ರನೈಜ್ ಮಾಡಿರಬೇಕು. ಇದಕ್ಕೆ ಇಂಟರ್ನೆಟ್ ಆನ್ ಆಗಿರಬೇಕು. ಎಲ್ಲ ಆಂಡ್ರಾಯ್ಡ್ ಫೋನ್‌ಗಳಲ್ಲಿರುವ People ಎಂಬ ಆ್ಯಪ್‌ನಲ್ಲಿ, Accounts ಎಂಬಲ್ಲಿ, Sync ಎಂಬ ಆಯ್ಕೆ ದೊರೆಯುತ್ತದೆ. ನಿಮ್ಮ ಪ್ರಧಾನ ಜಿಮೇಲ್ ಐಡಿ ಆಯ್ಕೆ ಮಾಡಿಕೊಂಡು ಅದರಲ್ಲಿ Contacts ಆಯ್ಕೆ ಮಾಡಿದಾಗ, ಕೆಲವು ನಿಮಿಷಗಳಲ್ಲಿ ಸಂಪರ್ಕ ಸಂಖ್ಯೆಗಳು ಜಿಮೇಲ್ ಖಾತೆಯ ಜತೆಗೆ ಸಿಂಕ್ರನೈಸ್ ಆಗುತ್ತದೆ. ಹಳೆಯ ಆವೃತ್ತಿಗಳಲ್ಲಿ, ಮುಖ್ಯ ಮೆನುವಿನ Settings ನಲ್ಲಿ Accounts & Sync ಕ್ಲಿಕ್ ಮಾಡಿ. ಜಿಮೇಲ್ ಐಡಿ ಕ್ಲಿಕ್ ಮಾಡಿ, Sync Contacts ಆಯ್ದುಕೊಳ್ಳಿ. ಸ್ವಲ್ಪ ಹೊತ್ತಿನಲ್ಲಿ ಸಂಪರ್ಕ ಸಂಖ್ಯೆಗಳು ಜಿಮೇಲ್‌ಗೆ ಅಪ್‌ಡೇಟ್ ಆಗುತ್ತವೆ.

ಹೊಸ ವಿಂಡೋಸ್ 8.1 ಕಾರ್ಯಾಚರಣಾ ವ್ಯವಸ್ಥೆಯಿರುವ ಫೋನ್‌ಗಳಲ್ಲಿ ಸಂಪರ್ಕ ವಿವರಗಳನ್ನು ಆಮದು ಮಾಡಿಕೊಳ್ಳುವುದು ತೀರಾ ಸುಲಭ. ಅದೇ ಫೋನ್‌ನಲ್ಲಿ ಸೆಟ್ಟಿಂಗ್ಸ್‌ನಲ್ಲಿ email+Accounts ಅಂತ ಇರುವಲ್ಲಿ ಗೂಗಲ್ ಖಾತೆ ಸೇರಿಸಿದರೆ ಸಾಕು. ಸಂಪರ್ಕ ಸಂಖ್ಯೆಗಳು ಸ್ವಯಂಚಾಲಿತವಾಗಿ ಸಿಂಕ್ರನೈಸ್ ಆಗಿಬಿಡುತ್ತದೆ. ಬಳಿಕ People ಆ್ಯಪ್‌ನ ಸೆಟ್ಟಿಂಗ್‌ಗೆ ಹೋಗಿ, Display Preference ನಲ್ಲಿ ಯಾವ ಖಾತೆಯ ಸಂಪರ್ಕ ವಿವರಗಳನ್ನು ತೋರಿಸಬೇಕೆಂಬುದನ್ನು ಆಯ್ಕೆ ಮಾಡಿಕೊಳ್ಳಬಹುದು.

ಮತ್ತೊಂದು ಆಯ್ಕೆಯೆಂದರೆ, ನಿಮ್ಮ ವಿಂಡೋಸ್ ಫೋನ್‌ನಲ್ಲಿಯೂ People ಎಂಬ ಆ್ಯಪ್‌ನಲ್ಲಿ add contacts ಆಯ್ಕೆ ಮಾಡಿಕೊಂಡು, ಮೈಕ್ರೋಸಾಫ್ಟ್ ಖಾತೆಗೆ ಲಾಗಿನ್ ಆಗುವ ಮೂಲಕ ನೇರವಾಗಿ ಈ ಮೇಲಿನ ಹಂತವನ್ನೂ ಮಾಡಬಹುದು. ಮೈಕ್ರೋಸಾಫ್ಟ್ ಖಾತೆಗೆ ಲಾಗಿನ್ ಆಗುವಾಗಲೇ, ನಿಮಗೆ Import Contacts from ಎಂಬ ಆಯ್ಕೆ ದೊರೆಯುತ್ತದೆ.

ತೀರಾ ಹಳೆಯ ಆವೃತ್ತಿಯ ವಿಂಡೋಸ್ (7 ಅಥವಾ 7.5) ಫೋನುಗಳಲ್ಲಾದರೆ ಸ್ವಲ್ಪ ಹೆಚ್ಚುವರಿ ಕೆಲಸ ಇರುತ್ತದೆ. ಕಂಪ್ಯೂಟರಿನಲ್ಲಿ ನಿಮ್ಮ ಜಿಮೇಲ್ ಖಾತೆಗೆ ಲಾಗಿನ್ ಆಗಿ. ಅಲ್ಲಿ ಎಡಭಾಗದಲ್ಲಿ Gmail ಬಟನ್ ಕ್ಲಿಕ್ ಮಾಡಿದಾಗ, ಕಾಣಿಸಿಕೊಳ್ಳುವ ಡ್ರಾಪ್‌ಡೌನ್ ಮೆನುವಿನಲ್ಲಿ Contacts ಎಂಬಲ್ಲಿ ಎಲ್ಲ ಸಂಪರ್ಕ ಸಂಖ್ಯೆಗಳು ಹಾಗೂ ಇಮೇಲ್ ಐಡಿ ಕಾಣಿಸಿಕೊಳ್ಳುತ್ತವೆ. ಪ್ರತಿಯೊಬ್ಬರ ಸಂಪರ್ಕ ವಿವರಗಳನ್ನೂ ಇಲ್ಲೇ ತಿದ್ದುಪಡಿ ಮಾಡಿಕೊಳ್ಳಬಹುದು. ನಂತರ ಮೇಲ್ಭಾಗದ More ಬಟನ್ ಕ್ಲಿಕ್ ಮಾಡಿದಾಗ ಕಾಣಿಸುವ ಡ್ರಾಪ್‌ಡೌನ್ ಮೆನುವಿನಿಂದ Export ಎಂಬುದನ್ನು ಆಯ್ಕೆ ಮಾಡಿಕೊಳ್ಳಿ. All Contacts ಎಂಬ ರೇಡಿಯೋ ಬಟನ್ ಕ್ಲಿಕ್ ಆಗಿರುವಂತೆ ನೋಡಿಕೊಳ್ಳಿ. Which export format ಎಂದಿರುವಲ್ಲಿ, Google CSV format ಅಂತ ಆಯ್ಕೆ ಮಾಡಿದ ಬಳಿಕ Export ಬಟನ್ ಕ್ಲಿಕ್ ಮಾಡಿ. ಒಂದು ಸಿಎಸ್‌ವಿ ಫಾರ್ಮ್ಯಾಟ್‌ನ ಫೈಲ್ (Google.csv) ಕಂಪ್ಯೂಟರಿಗೆ ಡೌನ್‌ಲೋಡ್ ಆಗುತ್ತದೆ.

ಲಾಗೌಟ್ ಆಗಿ, ಬಳಿಕ live.com ಎಂಬಲ್ಲಿ ಮೈಕ್ರೋಸಾಫ್ಟ್ ಇಮೇಲ್ ಐಡಿ ಮೂಲಕ ಲಾಗಿನ್ ಆಗಿ. ಮೇಲ್ಭಾಗದ ಎಡ ಮೂಲೆಯಲ್ಲಿರುವ ಮೆನು ಬಟನ್ ಮತ್ತು ಅದರಲ್ಲಿ People ಕ್ಲಿಕ್ ಮಾಡಿ. Add People to your contact list ಎಂದಿರುವಲ್ಲಿ ಕೆಳಭಾಗದಲ್ಲಿ Start import ಕ್ಲಿಕ್ ಮಾಡಿ. ಆಗ ಕಾಣಿಸುವ ಹಲವು ಆಯ್ಕೆಗಳಿಂದ Google ಆಯ್ಕೆ ಮಾಡಿ, Choose file ಬಟನ್ ಒತ್ತಿ, ನೀವು ಸೇವ್ ಮಾಡಿಕೊಂಡಿರುವ google.csv ಫೈಲ್ ಕ್ಲಿಕ್ ಮಾಡಿದರೆ, ಸಂಪರ್ಕಗಳು ಸಿಂಕ್ ಆಗುತ್ತವೆ.

ಟೆಕ್ ಟಾನಿಕ್: ಬಿಎಸ್ಸೆನ್ನೆಲ್ ಪೋರ್ಟಲ್
ಕರ್ನಾಟಕದಲ್ಲಿರುವ ತನ್ನ ಬಳಕೆದಾರರಿಗಾಗಿ ಬಿಎಸ್ಸೆನ್ನೆಲ್ ಹೊಸ ವೆಬ್ ಪೋರ್ಟಲ್ ಒಂದನ್ನು ತೆರೆದಿದೆ. ಅದರಲ್ಲಿ ಹೆಸರು ನೋಂದಾಯಿಸಿಕೊಂಡರೆ, ಇಂಟರ್ನೆಟ್ ಮೂಲಕವೇ ನಮ್ಮ ಬಿಎಸ್ಸೆನ್ನೆಲ್ ಸಿಮ್ ಕಾರ್ಡಿಗೆ ರೀಚಾರ್ಜ್ ಮಾಡಿಸಿಕೊಳ್ಳಬಹುದು, ವ್ಯಾಲಿಡಿಟಿ, ಎಷ್ಟು ಉಚಿತ ಕರೆ, ಎಸ್ಸೆಮ್ಮೆಸ್, ಡೇಟಾ ಬಾಕಿ ಇದೆ ಅಂತೆಲ್ಲಾ ತಿಳಿದುಕೊಳ್ಳಬಹುದು. http://gsmprepaid.genext.bsnl.co.in/

ಇದೇನು ಲ್ಯಾಪ್‌ಟಾಪ್? ಅಲ್ಲಲ್ಲ ವಿಂಡೋಸ್ ಟ್ಯಾಬ್ಲೆಟ್ 2-ಇನ್-1: NotionInk Cain

ವಿಜಯ ಕರ್ನಾಟಕ ಮಾಹಿತಿ@ತಂತ್ರಜ್ಞಾನ ಅಂಕಣ 101: ನವೆಂಬರ್ 10, 2014
ಲ್ಯಾಪ್‌ಟಾಪ್ ದೊಡ್ಡದಾಯಿತು, ಒಯ್ಯುವುದು ಕಷ್ಟ; ಸ್ಮಾರ್ಟ್‌ಫೋನ್ ತೀರಾ ಚಿಕ್ಕದಾಯಿತು. ಟ್ಯಾಬ್ಲೆಟ್ ತೆಗೆದುಕೊಂಡರೆ, ಅದರಲ್ಲಿ ನುಡಿ, ಬರಹ ಅಲ್ಲದೆ ಯುನಿಕೋಡ್‌ನಲ್ಲಿ ಕೂಡ ನಮ್ಮ ಕನ್ನಡವನ್ನು ಪಡಿಮೂಡಿಸುವುದು ಹೇಗೆಂಬ ಚಿಂತೆ. ಇದಕ್ಕಾಗಿ ಟ್ಯಾಬ್ಲೆಟ್‌ನಷ್ಟೇ ಗಾತ್ರದ ಪುಟ್ಟ ಕಂಪ್ಯೂಟರ್ ನಮ್ಮ ಬಳಿ ಇದ್ದಿದ್ದರೆ? ಎಂದು ಯೋಚಿಸಿದ್ದೀರಾದರೆ, ಟು-ಇನ್-ಒನ್ ಸಾಧನವೊಂದು ಇಲ್ಲಿದೆ. ಬೆಂಗಳೂರಿನ ನೋಶನ್ ಇಂಕ್ ಡಿಸೈನ್ ಲ್ಯಾಬ್ಸ್, ಇಂಟೆಲ್ ಹಾಗೂ ಮೈಕ್ರೋಸಾಫ್ಟ್ ಜತೆಗೆ ಸೇರಿಕೊಂಡು ವಿನ್ಯಾಸಪಡಿಸಿರುವ ಈ ಸಾಧನದ ಹೆಸರು ಕೇಯ್ನ್ (Cain).

ಮೈಕ್ರೋಸಾಫ್ಟ್ ಮತ್ತು ನೋಶನ್ ಇಂಕ್ ಆಹ್ವಾನದ ಮೇರೆಗೆ ಈ 2-ಇನ್-1 ಸಾಧನವನ್ನು ಪ್ರಯೋಗಕ್ಕೊಳಪಡಿಸುವ ಅವಕಾಶ ವಿಜಯ ಕರ್ನಾಟಕಕ್ಕೆ ಸಿಕ್ಕಿತ್ತು. ಅದು ಹೇಗಿದೆ?

ನೋಟ: ಥಟ್ಟನೇ ನೋಡಿದರೆ, ಒಂದು ನೋಟ್ ಪುಸ್ತಕದಂತಿದೆ, ತೆರೆದರೆ ಪುಟ್ಟ ಲ್ಯಾಪ್‌ಟಾಪ್, ಟಚ್ ಸ್ಕ್ರೀನ್ ಇರುವ ಭಾಗ ಬೇರ್ಪಡಿಸಿದರೆ ಟ್ಯಾಬ್ಲೆಟ್! ಟಚ್ ಪ್ಯಾಡ್ ಇರುವ ಮ್ಯಾಗ್ನೆಟಿಕ್ ಕೀಬೋರ್ಡ್ ಪ್ರತ್ಯೇಕವಾಗಿಸಿದಾಗ ಸ್ಕ್ರೀನ್‌ನಲ್ಲೇ ಟಚ್ ಕೀಬೋರ್ಡ್ ಸಕ್ರಿಯವಾಗುತ್ತದೆ. ಇದರ ಜತೆಗೆ ವೈರ್‌ಲೆಸ್ ಮೌಸ್ ನೀಡಲಾಗಿದೆ. ಮೈಕ್ರೋಸಾಫ್ಟ್‌ನ ನವನವೀನ ವಿಂಡೋಸ್ 8.1 ಕಾರ್ಯಾಚರಣಾ ವ್ಯವಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದು ಮುಂಬರುವ ವಿಂಡೋಸ್ 10ಕ್ಕೂ ಉಚಿತವಾಗಿ ಅಪ್‌ಗ್ರೇಡ್ ಆಗಲಿದೆ.

ಏನೆಲ್ಲಾ ಇದೆ
10.1 ಇಂಚಿನ ಐಪಿಎಸ್ ಎಲ್‌ಸಿಡಿ ಟಚ್ ಸ್ಕ್ರೀನ್, 1280×800 ರೆಸೊಲ್ಯುಶನ್, ಇಂಟೆಲ್ ಆಟಮ್ 1.33 ಗಿಗಾಹರ್ಟ್ಜ್ ಕ್ವಾಡ್‌ಕೋರ್ ಪ್ರೊಸೆಸರ್, 2 ಜಿಬಿ ಡಿಡಿಆರ್3 RAM, 32 ಜಿಬಿ ಆಂತರಿಕ ಮೆಮೊರಿ (ROM), 64 ಜಿಬಿ ವರೆಗೆ ವಿಸ್ತರಿಸಲು ಸಾಧ್ಯವಿರುವ ಮೆಮೊರಿ ಕಾರ್ಡ್ ಸ್ಲಾಟ್, ಯುಎಸ್‌ಬಿ 3.0 ಪೋರ್ಟ್ (3ಜಿ ಇಂಟರ್ನೆಟ್ ಡಾಂಗಲ್, ಪ್ರಿಂಟರ್ ಸಂಪರ್ಕಿಸಬಹುದು ಮತ್ತು ಬೇಕಿದ್ದರೆ ಯುಎಸ್‌ಬಿ ಕೀಬೋರ್ಡ್ ಜೋಡಿಸಿ, ದೊಡ್ಡ ಕೀಬೋರ್ಡ್‌ನಲ್ಲಿ ಟೈಪಿಂಗ್ ಮಾಡುವ ಆನಂದ ಪಡೆಯಬಹುದು), ಮಿನಿ ಹೆಚ್‌ಡಿಎಂಐ ಪೋರ್ಟ್, ಮೈಕ್ರೋ ಯುಎಸ್‌ಬಿ ಪೋರ್ಟ್ (ಚಾರ್ಜರ್, ಒಟಿಜಿ ಸಂಪರ್ಕಿಸಬಹುದು), 3.5 ಮಿಮೀ ಹೆಡ್‌ಫೋನ್ ಸಾಕೆಟ್, ಮೈಕ್, 2 ಮೆಗಾಪಿಕ್ಸೆಲ್‍ನ ಎರಡು ಕ್ಯಾಮೆರಾಗಳಿವೆ. ವೈಫೈ, ಬ್ಲೂಟೂತ್ 4.0, ಇಂಟೆಲ್ ಹೆಚ್‌ಡಿ ಗ್ರಾಫಿಕ್ಸ್, ತೂಕ 635 ಗ್ರಾಂ. ಬ್ಯಾಟರಿ ಸಾಮರ್ಥ್ಯ 7900 mAh (ಆರೇಳು ಗಂಟೆ ಕೆಲಸ ಮಾಡಬಹುದು).

ಇಮೇಲ್, ಇಂಟರ್ನೆಟ್ ಬ್ರೌಸಿಂಗ್, ಹಾಡು ಕೇಳುವುದು, ವೀಡಿಯೋ ವೀಕ್ಷಣೆ, ಸ್ಕೈಪ್ ಕರೆ ಮುಂತಾದ ದಿನ ಬಳಕೆಯ ಸಾಮಾನ್ಯ ಕಂಪ್ಯೂಟಿಂಗ್ ಕೆಲಸ ಕಾರ್ಯಗಳನ್ನು ಇದರಲ್ಲಿ ಮಾಡಿ ನೋಡಿದಾಗ, ಯಾವುದೇ ಅಡ್ಡಿಯಾಗಿಲ್ಲ. ಬೇರೆ ಆಂಡ್ರಾಯ್ಡ್ ಟ್ಯಾಬ್ಲೆಟ್ ಅಥವಾ ಐಪ್ಯಾಡ್‌ಗಿಂತ ಇದು ಹೇಗೆ ಭಿನ್ನವೆಂದರೆ, ವಿಂಡೋಸ್ ಕಂಪ್ಯೂಟರಿಗೆ ಅಳವಡಿಸಬಹುದಾದ ಯಾವುದೇ ತಂತ್ರಾಂಶವನ್ನು ಕೇಯ್ನ್‌ನಲ್ಲಿ ಅಳವಡಿಸಿಕೊಳ್ಳಬಹುದು. ಮೊಬೈಲ್‌ನಲ್ಲೇ 5 ಮೆಗಾಪಿಕ್ಸೆಲ್ ಕ್ಯಾಮೆರಾ ಲಭ್ಯವಿರುವಾಗ ಇದರ ಕ್ಯಾಮೆರಾ ರೆಸೊಲ್ಯುಶನ್ ಹೆಚ್ಚಿಸಿದ್ದರೆ, ಅಂತೆಯೇ, 32 ಜಿಬಿಗಿಂತ ಜಾಸ್ತಿ ಸ್ಟೋರೇಜ್ ಇದ್ದಿದ್ದರೆ ಉತ್ತಮ. ಅಲ್ಲದೆ, ಲ್ಯಾಪ್‌ಟಾಪ್‌ನಂತೆ ಬಳಸಲು ಕೀಬೋರ್ಡ್ ಫ್ಲ್ಯಾಪ್ ಅನ್ನು ಮಡಚಿಟ್ಟಾಗ, ಅದರ ಸ್ಕ್ರೀನ್‌ಗೆ ಹೊಂದಿಕೊಳ್ಳುವಂತೆ ನಮ್ಮ ಕುರ್ಚಿಯ ಮಟ್ಟವನ್ನು ತಗ್ಗಿಸಿಕೊಳ್ಳಬೇಕಾಗುತ್ತದೆ. ಆದರೂ ಇದು ಬೆಲೆಗೆ ತಕ್ಕ ಮೌಲ್ಯ ಅಂತ ಹೇಳಲಡ್ಡಿಯಿಲ್ಲ.

ಅಲ್ಟ್ರಾಸ್ಟಿಕ್ 3G ಅಡಾಪ್ಟರ್ ಹಾಕಲು ಸ್ಲಾಟ್ ಇರುವುದರಿಂದ, ಇಂಟರ್ನೆಟ್ ಡಾಂಗಲ್ ಬಳಸುವ ಬದಲಾಗಿ ಒಳಗೆ ಸಿಮ್ ಕಾರ್ಡ್ ಸೇರಿಸಬಹುದು. ಸ್ನ್ಯಾಪ್‌ಡೀಲ್ ಡಾಟ್ ಕಾಮ್‌ನಲ್ಲಿ ಮಾತ್ರ ಇದು ಲಭ್ಯವಿದ್ದು, ಈಗಿನ ಬೆಲೆ 19499 ರೂ; ಮೊದಲ ವರ್ಷ 1 ಟಿಬಿ ಕ್ಲೌಡ್ ಸ್ಟೋರೇಜ್ ಉಚಿತ, ಬಳಿಕ 30 ಜಿಬಿ. 1 ವರ್ಷ ಸ್ವ್ಯಾಪ್ ವಾರಂಟಿ (ಕಸ್ಟಮರ್ ಕೇರ್‌ಗೆ ಫೋನ್ ಮಾಡಿದರೆ ಅವರು ಬೇರೆ ಸಾಧನ ಕಳುಹಿಸಿ, ನಿಮ್ಮ ಸಾಧನವನ್ನು ಒಯ್ಯುತ್ತಾರೆ). ಸ್ಟೋರೇಜ್ ಕಡಿಮೆಯಾಯಿತು ಎನ್ನುವವರು 500ಜಿಬಿ ಅಥವಾ 1 ಟಿಬಿ ಬಾಹ್ಯ ಹಾರ್ಡ್ ಡ್ರೈವ್ ಅನ್ನು (ಈಗ 4- 5 ಸಾವಿರ ರೂ. ಆಸುಪಾಸು) ವೈಫೈ ಅಥವಾ ಯುಎಸ್‌ಬಿ ಮೂಲಕ ಸಂಪರ್ಕಿಸಬಹುದು.

“ಭಾರತದಲ್ಲೇ ಪರಿಕಲ್ಪನೆ, ವಿನ್ಯಾಸಗೊಳಿಸಿ, ಚೀನಾದಲ್ಲಿ ಉತ್ಪಾದಿಸಲಾಗುತ್ತಿದೆ. ಬಳಿಕ ಅದರ ಗುಣಮಟ್ಟ ಪರೀಕ್ಷೆಗೊಳಪಡಿಸಲಾಗುತ್ತದೆ. ಇದನ್ನು ಮೇಡ್ ಇನ್ ಇಂಡಿಯಾ ಅಂತ ಹೇಳಲು ಅಡ್ಡಿಯಿಲ್ಲ” ಎನ್ನುತ್ತಾರೆ ನೋಶನ್ಇಂಕ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ರೋಹನ್ ಶ್ರಾವಣ್.

ಇದರ ಪ್ರತಿಸ್ಫರ್ಧಿಗಳು: ಡೆಲ್ ವೆನ್ಯೂ ಪ್ರೋ 8, ಐ-ಬಾಲ್ ಸ್ಲೈಡ್ ಡಬ್ಲ್ಯುಕ್ಯೂ149, ಅಸುಸ್ ಟ್ರಾನ್ಸ್‌ಫಾರ್ಮರ್ ಟಿ100, ಕ್ರೋಮಾ 1177.

ಟೆಕ್ ಟಾನಿಕ್: ಹೆಚ್ಚು ವಿಕಿರಣ ಸೂಸುತ್ತದೆಯೇ?
ಹೆಸರುವಾಸಿ ಬ್ರ್ಯಾಂಡ್‌ಗಳ ಸ್ಮಾರ್ಟ್‌ಫೋನ್‌ಗಳನ್ನು ಕೊಂಡರೆ ತೊಂದರೆಯಿರುವುದಿಲ್ಲ. ಆದರೆ ಸ್ಥಳೀಯ, ವಿಶೇಷವಾಗಿ ಚೈನೀಸ್, ಕೊರಿಯನ್ ಕಳಪೆ ಗುಣಮಟ್ಟದ ಫೋನ್‌ಗಳನ್ನು ಬಳಸಿದರೆ, ಇದರಿಂದ ಹೊರಸೂಸುವ ರೇಡಿಯೇಶನ್‌ಗಳು ಆರೋಗ್ಯಕ್ಕೆ ಅಪಾಯಕಾರಿ ಮತ್ತು ಕ್ಯಾನ್ಸರ್‌ಗೂ ಕಾರಣವಾಗಬಹುದು. ಅಂತಾರಾಷ್ಟ್ರೀಯ ಮಾನದಂಡದ ಪ್ರಕಾರ ಈ SAR (Specific Absorption Rate) ಮೌಲ್ಯವು 1.6 Watts/kg ಇದ್ದರೆ ಆರೋಗ್ಯಕ್ಕೆ ಅಪಾಯವಿಲ್ಲ. ಇದಕ್ಕಿಂತ ಹೆಚ್ಚಿದ್ದರೆ ತೊಂದರೆ. ನಿಮ್ಮ ಫೋನ್‌ನ ಎಸ್ಎಆರ್ ಮೌಲ್ಯವು ಮಾನದಂಡಕ್ಕೆ ಬದ್ಧವಾಗಿದೆಯೇ ಎಂದು ತಿಳಿದುಕೊಳ್ಳಬೇಕಿದ್ದರೆ, *#07# ಅಂತ ಟೈಪ್ ಮಾಡಿ ನೋಡಿ. ವಿವರಗಳ ಸಮೇತ ಮಾಹಿತಿ ದೊರೆಯುತ್ತದೆ.

100: ಕಂಪ್ಯೂಟರ್ ವೇಗವಾಗಿಸಲು ಸುಲಭ ಕಾರ್ಯತಂತ್ರಗಳು

ವಿಜಯ ಕರ್ನಾಟಕ ಅಂಕಣ ಮಾಹಿತಿ@ತಂತ್ರಜ್ಞಾನ-100: ನವೆಂಬರ್ 3, 2014
ಕಂಪ್ಯೂಟರ್‌ನಲ್ಲೇನಾದರೂ ಸಮಸ್ಯೆ ಬಂದರೆ ದುರಸ್ತಿಗಾಗಿ ಒಯ್ಯುವ ಮುನ್ನ ನಾವೇ ಮಾಡಬಹುದಾದ ಕೆಲವೊಂದು ಮೂಲಭೂತ ಪರಿಹಾರ ಕ್ರಮಗಳ ಬಗ್ಗೆ ಕಳೆದ ವಾರ ಹೇಳಿದ್ದೆ. ಈ ಬಾರಿ, ಕಂಪ್ಯೂಟರ್‌ನ ವೇಗ ಹೆಚ್ಚಿಸಲು ಮತ್ತೊಂದಿಷ್ಟು ಸಲಹೆಗಳಿವೆ. ಇದು ಕೊಂಚ ಮಟ್ಟಿಗೆ ಸರಳ ಅಲ್ಲ ಅನ್ನಿಸುವುದರಿಂದ ನಿಮ್ಮ ಸ್ನೇಹಿತ ವರ್ಗದಲ್ಲಿರುವ ಕಂಪ್ಯೂಟರ್ ತಜ್ಞರ ನೆರವು ಬೇಕಾಗಬಹುದು.

ಮೊದಲನೆಯದಾಗಿ ಕಂಪ್ಯೂಟರಿನಲ್ಲಿ ಇರುವ RAM ಎಷ್ಟಿದೆ ಎಂಬುದನ್ನು ತಿಳಿದುಕೊಳ್ಳಿ. ಹಳೆಯ ಕಂಪ್ಯೂಟರುಗಳಲ್ಲಾದರೆ 512 ಎಂಬಿ ಅಥವಾ 1 ಜಿಬಿ ಇರಬಹುದು. ಆದರೆ, ತೀರಾ ಇತ್ತೀಚಿನ ಆವಶ್ಯಕತೆಯೆಂದರೆ ಕನಿಷ್ಠ 2ರಿಂದ 4 GB ಯಷ್ಟು RAM. ನಿಮ್ಮ ಡೆಸ್ಕ್‌ಟಾಪ್ ಕಂಪ್ಯೂಟರಿನಲ್ಲಿ ಅಷ್ಟಿಲ್ಲ ಎಂದಾದರೆ ಚಿಂತಿಸಬೇಕಾಗಿಲ್ಲ. ಅದರ RAM ಹೆಚ್ಚಿಸಬಹುದು. ಮಾರುಕಟ್ಟೆಯಲ್ಲಿ ಸಿಗುವ RAM ಬೆಲೆ ಹೆಚ್ಚೇನೂ ಇರುವುದಿಲ್ಲ. ನಿಮ್ಮ ಕಂಪ್ಯೂಟರಿನ ಕಾರ್ಯಾಚರಣಾ ವ್ಯವಸ್ಥೆಗೆ (ವಿಂಡೋಸ್ ಎಕ್ಸ್‌ಪಿ, ವಿಂಡೋಸ್ 7, ವಿಂಡೋಸ್ 8, ಮ್ಯಾಕ್, ಉಬುಂಟು ಇತ್ಯಾದಿ ಆಪರೇಟಿಂಗ್ ಸಿಸ್ಟಂ) ಎಷ್ಟು RAM ಬೇಕೆಂದು ಸೂಚಿಸಿರುತ್ತಾರೋ, ಅದಕ್ಕಿಂತ ಕನಿಷ್ಠ ದುಪ್ಪಟ್ಟು RAM ಅಳವಡಿಸಿಕೊಂಡರೆ, ಕಂಪ್ಯೂಟರು ಚೆನ್ನಾಗಿ ಕೆಲಸ ಮಾಡಬಲ್ಲುದು. ಲ್ಯಾಪ್‌ಟಾಪ್‌ಗಳಲ್ಲಿ RAM ಸುಲಭವಾಗಿ ಹೆಚ್ಚಿಸುವ ಅನುಕೂಲಗಳು ಇಲ್ಲ.

ಇನ್ನೊಂದು ಸಂಗತಿಯಿದೆ. ತೀರಾ ಹೆಚ್ಚು ಪ್ರೋಗ್ರಾಂಗಳನ್ನು ಇನ್‌ಸ್ಟಾಲ್ ಮಾಡಿಕೊಂಡಿದ್ದರೆ, ಕಂಪ್ಯೂಟರ್ ಖಂಡಿತವಾಗಿಯೂ ಸುಸ್ತಾದಂತೆ ವರ್ತಿಸಬಹುದು. ವಿಭಿನ್ನ ತಂತ್ರಾಂಶಗಳನ್ನು ಅಳವಡಿಸಿಕೊಂಡರೆ ಪರವಾಗಿಲ್ಲ, ಅವುಗಳು ರನ್ ಆಗುತ್ತಾ ಇದ್ದರೆ RAM ಬಳಸಿಕೊಳ್ಳುತ್ತಾ ಇರುತ್ತವೆ, ಡಿಸ್ಕ್ ಸ್ಪೇಸ್ ಬಳಸುತ್ತವೆ ಹಾಗೂ ನೆಟ್ವರ್ಕನ್ನೂ ಬಳಸುತ್ತಿರುತ್ತವೆ. ಇವೆಲ್ಲವೂ ಬ್ಯಾಕ್‌ಗ್ರೌಂಡ್‌ನಲ್ಲಿ ರನ್ ಆಗುತ್ತಿದ್ದರೆ ಕಂಪ್ಯೂಟರ್ ಸಹಜವಾಗಿ ಸ್ಲೋ ಆಗುತ್ತದೆ. ಇತ್ತೀಚೆಗೆ, ಯಾವುದಾದರೂ ವೆಬ್‌ಸೈಟಿಂದ ಏನನ್ನಾದರೂ ಡೌನ್‌ಲೋಡ್ ಮಾಡುವಾಗಲೋ, ಅಥವಾ ತಂತ್ರಾಂಶವನ್ನೇ ಡೌನ್‌ಲೋಡ್ ಮಾಡಿ ಅಳವಡಿಸಿಕೊಳ್ಳುವಾಗಲೋ, ಅದರ ಜತೆಗೇ ಬೇರೆ ಸಾಫ್ಟ್‌ವೇರ್‌ಗಳನ್ನೂ ಅಳವಡಿಸಿ ಬಲವಂತವಾಗಿ ಕಳುಹಿಸಲಾಗುತ್ತದೆ. ಇನ್‌ಸ್ಟಾಲ್ ಮಾಡುವಾಗ ಪ್ರತಿಯೊಂದು ಸಂದೇಶವನ್ನೂ ಓದದಿದ್ದರೆ, ಬ್ರೌಸರುಗಳಿಗೆ ಟೂಲ್‌ಬಾರ್, ಸರ್ಚ್ ಎಂಜಿನ್ ಮುಂತಾದ ಅನಗತ್ಯ ತಂತ್ರಾಂಶಗಳೂ ಸೇರಿಕೊಂಡುಬಿಡುತ್ತವೆ. ಇವೆಲ್ಲವೂ ಸೇರಿಕೊಂಡು, ಬ್ಯಾಕ್‌ಗ್ರೌಂಡ್‌ನಲ್ಲಿ ರನ್ ಆಗುತ್ತಾ ನಿಮ್ಮ ಕಂಪ್ಯೂಟರನ್ನು ನಿಧಾನವಾಗಿಸಬಹುದು. ಈ ಬಗ್ಗೆ ತೀರಾ ಎಚ್ಚರ ವಹಿಸಬೇಕಾಗುತ್ತದೆ. ಸರಿಯಾಗಿ ಓದಿ, ವಿಶೇಷವಾಗಿ ಹೆಚ್ಚುವರಿ ತಂತ್ರಾಂಶ ಇನ್‌ಸ್ಟಾಲ್ ಮಾಡಿಕೊಳ್ಳಬೇಕೇ ಬೇಡವೇ ಎಂಬ ಸಂದೇಶವನ್ನು ಓದಿದ ಬಳಿಕವೇ ಚೆಕ್ ಗುರುತು ಮಾಡಬೇಕು.

ಮತ್ತೊಂದು ಗಮನಿಸಬೇಕಾದ ಅಂಶವೆಂದರೆ, ಕಂಪ್ಯೂಟರ್ ಆನ್ ಆಗುವಾಗ ಸ್ವಯಂಚಾಲಿತವಾಗಿ ಕೆಲವೊಂದು ಸಾಫ್ಟ್‌ವೇರ್ ಕೂಡ ರನ್ ಆಗಲಾರಂಭಿಸುತ್ತವೆ. ಇದರಿಂದಾಗಿ ಬೂಟಿಂಗ್ ಸಮಯ ವಿಳಂಬವಾಗುತ್ತದೆ. ಏನೆಲ್ಲಾ ರನ್ ಆಗುತ್ತಿದೆ ಎಂಬುದನ್ನು ನೋಡಬಹುದಾದ ಒಂದು ಪ್ರಮುಖ ಸ್ಥಳವೆಂದರೆ, ಬಲಭಾಗದ ಕೆಳಮೂಲೆಯ ಸಿಸ್ಟಂ ಟ್ರೇಯಲ್ಲಿರುವ ಐಕಾನ್‌ಗಳು. ಪ್ರತಿಯೊಂದಕ್ಕೂ ರೈಟ್-ಕ್ಲಿಕ್ ಮಾಡಿ, Options ಕ್ಲಿಕ್ ಮಾಡಿ, ಆಫ್ ಮಾಡುವ ಆಯ್ಕೆ ದೊರೆಯುತ್ತದೆ. ಸ್ವಲ್ಪ ಹೆಚ್ಚು ತಿಳಿದಿದ್ದರೆ, ಸ್ಟಾರ್ಟ್ ಬಟನ್ ಕ್ಲಿಕ್ ಮಾಡಿ, Run ಎಂಬ ಬಾಕ್ಸ್‌ನಲ್ಲಿ (ಅಥವಾ ವಿಂಡೋಸ್ ಬಟನ್ + R) MSConfig ಅಂತ ಟೈಪ್ ಮಾಡಿ ಎಂಟರ್ ಕೊಡಿ. ಅಲ್ಲಿ Startup ಎಂಬ ಟ್ಯಾಬ್ ನೋಡಿದಾಗ ಕಾಣಿಸುವ ಪಟ್ಟಿಯಿಂದ ನಮಗೆ ಬೇಡವಾದ (ಗೊತ್ತಿದ್ದರೆ ಮಾತ್ರ) ಪ್ರೋಗ್ರಾಂಗಳನ್ನು ಅನ್‌ಚೆಕ್ ಮಾಡಬಹುದು. ಅಲ್ಲಿ ಡಿಸೇಬಲ್ ಮಾಡಿದರೆ, ತಂತ್ರಾಂಶವೇನೂ ಡಿಲೀಟ್ ಆಗುವುದಿಲ್ಲ. ನೆನಪಿಡಿ, ಸಿಸ್ಟಂ ಸರಿಯಾಗಿ ಕೆಲಸ ಮಾಡಬೇಕಿದ್ದರೆ ಕೆಲವೊಂದು ತಂತ್ರಾಂಶಗಳು ರನ್ ಆಗುತ್ತಿರಬೇಕಾಗುತ್ತದೆ. ಹೀಗಾಗಿ ಎಚ್ಚರಿಕೆಯಿಂದ ತಜ್ಞ ಸ್ನೇಹಿತರ ಸಲಹೆ ಪಡೆದೇ ಇದನ್ನು ಮಾಡಿ. ಎಲ್ಲ ಆದ ಮೇಲೆ ರೀಸ್ಟಾರ್ಟ್ ಮಾಡಬೇಕಾಗುತ್ತದೆ.

ಇನ್ನೊಂದಿಷ್ಟು ಸಲಹೆಗಳು ಇಲ್ಲಿವೆ. ಏಕಕಾಲದಲ್ಲಿ ಹಲವು ಸಾಫ್ಟ್‌ವೇರ್‌ಗಳನ್ನು ರನ್ ಮಾಡುವುದು ಕೂಡ ಕಂಪ್ಯೂಟರಿನ ವಿಳಂಬ ಗತಿಗೆ ಕಾರಣವಾಗಬಹುದು. ಒಂದು ಸಮಯದಲ್ಲಿ ಒಂದೇ ಕೆಲಸ ಮಾಡಿ, ಹೆಚ್ಚು ಬ್ರೌಸರ್ ಟ್ಯಾಬ್‌ಗಳಿದ್ದರೆ ಕ್ಲೋಸ್ ಮಾಡಿ, ಓಪನ್ ಆಗಿರುವ ಡಾಕ್ಯುಮೆಂಟುಗಳ ಸಂಖ್ಯೆ ಕಡಿಮೆ ಮಾಡಿ; 2-3 ದಿನಕ್ಕೊಮ್ಮೆ ಬ್ರೌಸರ್ ಕ್ಯಾಶ್ (cache) ಕ್ಲಿಯರ್ ಮಾಡುತ್ತಾ ಇರಿ, 2-3 ತಿಂಗಳಿಗೊಮ್ಮೆ ಹಾರ್ಡ್ ಡಿಸ್ಕನ್ನು ಡೀಫ್ರ್ಯಾಗ್ಮೆಂಟ್ ಮಾಡುತ್ತಾ ಇರಿ; ಹಾಗೂ ನಿಮ್ಮ ಡೆಸ್ಕ್‌ಟಾಪ್‌ಗೆ ಸಾಕಷ್ಟು ಜಾಸ್ತಿ ಭಾರವಿರುವ ಚಿತ್ರಗಳ ಬದಲಾಗಿ, ಸೀದಾ ಸಾದಾ ಬ್ಯಾಕ್‌ಗ್ರೌಂಡ್ ಚಿತ್ರ ಹಾಕಿಕೊಳ್ಳಿ, ಇಲ್ಲದೇ ಇದ್ದರೆ ಮತ್ತೂ ಒಳ್ಳೆಯದು ಮತ್ತು ಒಳ್ಳೆಯ ಆ್ಯಂಟಿ ವೈರಸ್ ಮೂಲಕ ಸ್ಕ್ಯಾನ್ ಮಾಡುತ್ತಿರಿ. ನಿಮ್ಮ ಸಿಸ್ಟಂನ ಆ ವೇಗ ನೋಡಿ ಆವಾಗ!

ಟೆಕ್-ಟಾನಿಕ್: ಕ್ಯಾಪಿಟಲ್ -ಸ್ಮಾಲ್ ಪರಿವರ್ತನೆ
ಎಂಎಸ್ ವರ್ಡ್ ಡಾಕ್ಯುಮೆಂಟ್‌ನಲ್ಲಿ ಏನಾದರೂ ಇಂಗ್ಲಿಷಿನಲ್ಲಿ ಟೈಪ್ ಮಾಡಿರುತ್ತೀರಿ. ಅದೀಗ ಕ್ಯಾಪಿಟಲ್ ಅಕ್ಷರ (ದೊಡ್ಡಕ್ಷರ)ದಲ್ಲಿ ಮೂಡಿ ಬಂದಿದೆ ಎಂದಿಟ್ಟುಕೊಳ್ಳೋಣ. ಅಥವಾ ನೀವು ಟೈಪ್ ಮಾಡಿದ ವಾಕ್ಯದ ಅಕ್ಷರಗಳೆಲ್ಲವನ್ನೂ ಸಣ್ಣಕ್ಷರಗಳಿಗೆ ಪರಿವರ್ತಿಸಬೇಕೆಂದು ನೀವು ಇಚ್ಛಿಸುತ್ತೀರಿ. ಇಲ್ಲವೇ, ವಾಕ್ಯ ರೂಪದಲ್ಲಿ (ಮೊದಲ ಅಕ್ಷರ ಕ್ಯಾಪಿಟಲ್) ಇರಬೇಕೆಂದು ನೀವು ಬಯಸಿದರೆ, ಎಂಎಸ್ ವರ್ಡ್‌ನಲ್ಲಿ ಸುಲಭ ಮಾರ್ಗವೊಂದಿದೆ. ಕಂಟ್ರೋಲ್ ಎ (Ctrl+A) ಮಾಡಿದರೆ, ಎಲ್ಲವೂ ಸೆಲೆಕ್ಟ್ ಆಗುತ್ತದೆ, ನಂತರ ಶಿಫ್ಟ್ + ಎಫ್3 ಕೀಲಿ ಒಮ್ಮೆ ಒತ್ತಿದರೆ, ದೊಡ್ಡಕ್ಷರಕ್ಕೂ, ಮತ್ತೊಮ್ಮೆ ಒತ್ತಿದರೆ ಸಣ್ಣಕ್ಷರಕ್ಕೂ, ಪುನಃ ಒತ್ತಿದರೆ ವಾಕ್ಯಾಕ್ಷರ ರೂಪಕ್ಕೆ ಇಂಗ್ಲಿಷ್ ಪಠ್ಯವು ಪರಿವರ್ತನೆಯಾಗುತ್ತದೆ.

ನೋಕಿಯಾ ಬ್ರ್ಯಾಂಡ್ ತೆರೆಮರೆಗೆ…. ಒಂದು ಹಿನ್ನೋಟ

ಟೆಕ್-Know ಲೇಖನ: ನವೆಂಬರ್ 3, ವಿಜಯ ಕರ್ನಾಟಕ : ನೆಟ್ಟಿಗ
ನೋಕಿಯಾ ಫೋನ್‌ಗಳಿಗೂ ಭಾರತಕ್ಕೂ ತಾದಾತ್ಮ್ಯ ನಂಟು. ಹಳ್ಳಿ ಹಳ್ಳಿಗೂ ನೋಕಿಯಾ ಚಿರಪರಿಚಿತ. ಫಿನ್ಲೆಂಡ್ ಎಂಬ ಪುಟ್ಟ ದೇಶದಿಂದ ಜಗತ್ತಿನಾದ್ಯಂತ ತನ್ನ ಸುಂದರ, ಸುದೃಢ ಮೊಬೈಲ್ ಫೋನ್‌ಗಳ ಮೂಲಕ ಕನಸುಗಳನ್ನು ಬೆಸೆದ, ಅತ್ಯುತ್ತಮ ಬ್ಯಾಟರಿ ಸಾಮರ್ಥ್ಯಕ್ಕಾಗಿ ಈಗಲೂ ಜನ ಮಾನಸದಲ್ಲಿ ಸ್ಥಾನ ಪಡೆದಿರುವ ನೋಕಿಯಾ, ಈಗ 730 ಶತಕೋಟಿ ಡಾಲರ್ ವಹಿವಾಟಿನ ಮೂಲಕ ಮೈಕ್ರೋಸಾಫ್ಟ್ ತೆಕ್ಕೆಯೊಳಗೆ ಸೇರಿಕೊಂಡಿದೆ. ಭಾರತದಲ್ಲಿ ಫೋನ್‌ಗಳು ತಯಾರಾಗುತ್ತಿರುವ ಚೆನ್ನೈಯ ಅದರ ಘಟಕವನ್ನೂ ಮುಚ್ಚಲಾಗುತ್ತಿದೆ. ನೋಕಿಯಾ ಎಂಬ ಬ್ರ್ಯಾಂಡ್ ಈಗ ಕಾಲನ ಮರೆಗೆ ಸರಿಯುತ್ತಿದೆ. ನಮ್ಮ ಬದುಕನ್ನು ಅರಳಿಸಿದ, ನಮ್ಮ ಕೈಯಲ್ಲಿ, ನಮ್ಮ ಬಂಧುಗಳು-ಸ್ನೇಹಿತರ ಕೈಯಲ್ಲಿ ರಾರಾಜಿಸುತ್ತಿದ್ದ ಫೋನುಗಳನ್ನು ಕಂಡು ನಿಬ್ಬೆರಗಾಗಿದ್ದವರು ನಾವು. ಇಂಥಹಾ ನೋಕಿಯಾ ಫೋನ್‌ಗಳ ಸಂದುಹೋದ, ಅತ್ಯಂತ ಸುಂದರ, ಅನನ್ಯ, ವೈಭವದ ಸಾಧನಗಳ ಮೇಲೊಂದು ಹಿನ್ನೋಟ ಇಲ್ಲಿದೆ.

ನೋಕಿಯಾ 1011
1992ರಲ್ಲಿ ಜಿಎಸ್ಎಂ ನೆಟ್‌ವರ್ಕ್‌ನಲ್ಲಿ ಕೆಲಸ ಮಾಡಿದ ನೋಕಿಯಾದ ಮೊದಲ ಫೋನ್.

ನೋಕಿಯಾ 2110
ನೋಕಿಯಾ ಬ್ರ್ಯಾಂಡ್‌ನ ಪ್ರಖ್ಯಾತ ರಿಂಗ್‌ಟೋನ್ ಜತೆಗೆ ಬಂದ ಪ್ರಪ್ರಥಮ ಫೋನ್.

ನೋಕಿಯಾ 6110
90ರ ದಶಕದ ಕೊನೆಯ ಭಾಗದಲ್ಲಿ ಭಾರತದಲ್ಲಿ ಅತ್ಯಂತ ಹೆಚ್ಚು ಪ್ರಸಿದ್ಧಿ ಪಡೆದಿದ್ದು ಇದು.

ನೋಕಿಯಾ 8110
1996ರಲ್ಲಿ ನೋಕಿಯಾದಿಂದ ಪ್ರಥಮವಾಗಿ ಉದ್ಯಮ ವಲಯಕ್ಕಾಗಿ ತಯಾರಾದ ಸ್ಲೈಡರ್ ಫೋನ್.

ಕಮ್ಯುನಿಕೇಟರ್ 9000
1996ರಲ್ಲಿ ಮಾರುಕಟ್ಟೆಗಿಳಿದ ಪೂರ್ಣಪ್ರಮಾಣದ ಕ್ವೆರ್ಟಿ (QWERTY) ಕೀಬೋರ್ಡ್, 24 MHz ಪ್ರೊಸೆಸರ್, 4.5 ಇಂಚು ಸ್ಕ್ರೀನ್ ಇರುವ ಅದ್ಭುತ ಫೋನ್.

ನೋಕಿಯಾ 8210
1999ರಲ್ಲಿ ಮೊದಲ ಬಾರಿ ಆಂತರಿಕ ಆಂಟೆನಾ ಕಾಣಿಸಿಕೊಂಡಿದ್ದು ಇದರಲ್ಲಿ. ತೂಕ ಕೇವಲ 79 ಗ್ರಾಂ. ಇನ್‌ಫ್ರಾರೆಡ್ ಪೋರ್ಟ್, ‘ಸ್ನೇಕ್’ (ಹಾವು ಜೋಡಿಸುವ) ಗೇಮ್ ಇದ್ದ ಫೋನ್ ಇದು.

ನೋಕಿಯಾ 3310
6110 ಮಾಡೆಲ್ ಬಳಿಕ, ಜಗತ್ತಿನಲ್ಲಿ ಅತೀ ಹೆಚ್ಚು ಜನರು ಇಷ್ಟಪಟ್ಟಿದ್ದ ಫೋನ್ ಇದು.12.50 ಕೋಟಿ ಸೆಟ್‌ಗಳು ಮಾರಾಟವಾಗಿವೆ.

ನೋಕಿಯಾ 7650
‘ಸಿಂಬಿಯಾನ್’ ಕಾರ್ಯಾಚರಣಾ ವ್ಯವಸ್ಥೆ ಜತೆಗೆ ಮೊತ್ತ ಮೊದಲು ಕಾಣಿಸಿಕೊಂಡ ಫೋನ್, ನೋಕಿಯಾದ ಪ್ರಥಮ ಕ್ಯಾಮೆರಾ ಫೋನ್.

ನೋಕಿಯಾ 6800
QWERTY ಕೀಬೋರ್ಡನ್ನು ಹೀಗೂ ಬಳಸಬಹುದು. ಕ್ಯಾಂಡಿಬಾರ್ ಶೈಲಿಯ ‘ಬಟರ್‌ಫ್ಲೈ’ ಫೋನ್ ಇದು.

ನೋಕಿಯಾ ಎನ್-ಗೇಜ್
ಗೇಮ್ಸ್ ಆಡುವ ಗ್ಯಾಜೆಟ್‌ಗಳ ಕಾಲದಲ್ಲಿ, ನಿಂಟೆಂಡೋ ಕಂಪನಿಗೆ ಸಡ್ಡು ಹೊಡೆದ ನೋಕಿಯಾ ಸಾಧನವಿದು. ಮೈಕ್ರೋಫೋನ್ ಮತ್ತು ಇಯರ್‌ಪೀಸ್ ಕೂಡ ಇದೆ.

ನೋಕಿಯಾ 7600
21ನೇ ಶತಮಾನದ ಆರಂಭದಲ್ಲಿ ಬಂದ, ನೋಕಿಯಾದ ಪ್ರಥಮ 3ಜಿ ಸಾಧನ. 2003ರಲ್ಲಿ ಆಕರ್ಷಕ ವಿನ್ಯಾಸದಿಂದ ಗಮನ ಸೆಳೆಯಿತು.

ನೋಕಿಯಾ 7610
2004ರಲ್ಲಿ ಸುಧಾರಿತ ರೂಪವಾಗಿ ಬಂದ ಈ ಫೋನನ್ನು, ಒಂದು ಕೈಯ ಹೆಬ್ಬೆರಳಿನಲ್ಲಿಯೇ ಟೈಪ್, ಡಯಲ್ ಮಾಡುವುದಕ್ಕಾಗಿ ರೂಪಿಸಲಾಗಿದೆ.

ನೋಕಿಯಾ 7280
ಪ್ರಯೋಗಕ್ಕೆ ಎಂದೂ ಹಿಂಜರಿಯದ ನೋಕಿಯಾ, ಕೀಬೋರ್ಡ್ ಇಲ್ಲದ ‘ಲಿಪ್‌ಸ್ಟಿಕ್’ ಫೋನನ್ನು 2004ರಲ್ಲಿ ಮಾರುಕಟ್ಟೆಗೆ ಬಿಟ್ಟಿತ್ತು.

ನೋಕಿಯಾ 7710
2004ರಲ್ಲಿ ಬಂದ ನೋಕಿಯಾದ ಮೊದಲ ಟಚ್ ಸ್ಕ್ರೀನ್ ಫೋನ್. ಕೀಬೋರ್ಡ್ ಇಲ್ಲದಿರುವುದರಿಂದಾಗಿ ಜನರು ಇದರತ್ತ ಒಲವು ತೋರಲಿಲ್ಲ.

ನೋಕಿಯಾ 9300
ಬಿಸಿನೆಸ್ ಜಗತ್ತಿಗಾಗಿ 2005ರಲ್ಲಿ ‘ಕಮ್ಯುನಿಕೇಟರ್’ನ ಸುಧಾರಿತ ಆವೃತ್ತಿಯನ್ನು ನೋಕಿಯಾ ಮಾರುಕಟ್ಟೆಗೆ ಬಿಟ್ಟಿತು.

ನೋಕಿಯಾ 770 ಇಂಟರ್ನೆಟ್ ಟ್ಯಾಬ್ಲೆಟ್
2005ರಲ್ಲೇ ನೋಕಿಯಾದ ಈ ಇಂಟರ್ನೆಟ್ ಟ್ಯಾಬ್ಲೆಟ್ ಹೆಚ್ಚಿನ ಗಮನ ಸೆಳೆದಿತ್ತು. ಮೇಮೋ (Maemo) [ನಂತರ ಇದು MeeGo ಎಂದು ಮರುನಾಮಕರಣಗೊಂಡ] ಆಪರೇಟಿಂಗ್ ಸಿಸ್ಟಂ ಇದರಲ್ಲಿತ್ತು.

ನೋಕಿಯಾ ಎನ್-93
2006ರಲ್ಲಿ ಬಿಡುಗಡೆಯಾದ, ನೋಕಿಯಾದ ಪ್ರಯೋಗಗಳಿಗೆ ಸಾಕ್ಷಿಯಾಗಬಲ್ಲ ಕ್ಯಾಮೆರಾ ಫೋನ್ ಇದು. ಕಾರ್ಲ್ ಝೇಯಿಸ್ ಲೆನ್ಸ್ ಇದರ ವಿಶೇಷತೆ. ಆಲ್-ಇನ್-ಒನ್ ಸ್ಮಾರ್ಟ್‌ಫೋನ್ ಮತ್ತು ಕ್ಯಾಮ್‌ಕಾರ್ಡರ್.

ನೋಕಿಯಾ ಎನ್-95
2007ರಲ್ಲಿ ಐಫೋನ್‌ಗೆ ಪ್ರತಿಯಾಗಿ ಮಾರುಕಟ್ಟೆಗೆ ಬಂದಿದ್ದ ಈ ಸ್ಮಾರ್ಟ್‌ಫೋನ್, ಸಿಂಬಿಯಾನ್ ಆಪರೇಟಿಂಗ್ ಸಿಸ್ಟಂ ಮೂಲಕ ಕೆಲಸ ಮಾಡುತ್ತಿತ್ತು.

ನೋಕಿಯಾ ಎನ್-97
ಐಫೋನ್ ಮಾದರಿಯಲ್ಲೇ ದೊಡ್ಡ ಸ್ಕ್ರೀನ್ ಹೊಂದಿದ್ದ ಇದರಲ್ಲಿ ಕ್ವೆರ್ಟಿ ಕೀಬೋರ್ಡ್ ಕೂಡ ಇತ್ತು. ಟಚ್ ಸ್ಕ್ರೀನ್ ಆಕರ್ಷಕವಾಗಿತ್ತು.

ನೋಕಿಯಾ ಇ-71
ಐಫೋನ್ ಬಳಿಕ ಬ್ಲ್ಯಾಕ್‌ಬೆರಿಗೆ ಸವಾಲೊಡ್ಡಲು ನಿರ್ಮಾಣಗೊಂಡ ಇ-71 ಫೋನ್.

ನೋಕಿಯಾ ಎಕ್ಸ್-7
ಸಿಂಬಿಯಾನ್ 3 (‘ಆನ್ನಾ’ ಹಾಗೂ ನಂತರ ‘ಬೆಲ್ಲೆ’ ಎಂದು ಹೆಸರಿಸಲಾಯಿತು) ಆಪರೇಟಿಂಗ್ ಸಿಸ್ಟಂನಲ್ಲಿ ಬಂದ ಮೊದಲ ಎಕ್ಸ್-ಸರಣಿಯ ಫೋನ್ ಇದು.

ನೋಕಿಯಾ ಎನ್9
ಐಫೋನ್, ಆಂಡ್ರಾಯ್ಡ್ ಫೋನ್‌ಗಳಿಗೆ ಸಡ್ಡು ಹೊಡೆಯಲು ನೋಕಿಯಾ ಪರಿಚಯಿಸಿದ ಈ ಫೋನ್, 2011ರಲ್ಲಿ ಮೀಗೋ ಹರ್ಮಟನ್ ಒಎಸ್ ಜತೆಗೆ ಬಂದಿತ್ತು.

ನೋಕಿಯಾ 808 ಪ್ಯೂರ್‌ವ್ಯೂ
ಇದು ನೋಕಿಯಾದ ಕೊನೆಯ ಸಿಂಬಿಯಾನ್ ಫೋನ್ ಮತ್ತು 41 ಮೆಗಾಪಿಕ್ಸೆಲ್ ಕ್ಯಾಮೆರಾ ಜತೆಗೆ ನೋಕಿಯಾದ ಮೈಲಿಗಲ್ಲು ಕೂಡ ಆಗಿದೆ.

ನೋಕಿಯಾ ಲುಮಿಯಾ 800
ಆಧುನಿಕ ಫೋನ್. 2011ರ ನವೆಂಬರ್‌ನಲ್ಲಿ ಲುಮಿಯಾ 800 ಬಿಡುಗಡೆಯಾಯಿತು. ನೋಕಿಯಾ ಲುಮಿಯಾ ಬದಲಾಗಿ ಈಗ ಮೈಕ್ರೋಸಾಫ್ಟ್ ಲುಮಿಯಾ ಎಂಬ ಹೆಸರಿನಿಂದ ಮಾರುಕಟ್ಟೆಯಲ್ಲಿದೆ.
* ನೆಟ್ಟಿಗ

ಕಂಪ್ಯೂಟರನ್ನು ದುರಸ್ತಿಗೆ ಒಯ್ಯುವ ಮುನ್ನ ಇವನ್ನೊಮ್ಮೆ ಟ್ರೈ ಮಾಡಿ…

ವಿಜಯ ಕರ್ನಾಟಕ ಮಾಹಿತಿ@ತಂತ್ರಜ್ಞಾನ ಅಂಕಣ-99: 27 ಅಕ್ಟೋಬರ್ 2014
ಕಂಪ್ಯೂಟರು ಸಿಕ್ಕಾಪಟ್ಟೆ ಸ್ಲೋ ಆಗಿದೆ, ವೆಬ್ ಬ್ರೌಸ್ ಮಾಡುವುದಕ್ಕೇ ಆಗುತ್ತಿಲ್ಲ, ಒಂದು ಪೇಜ್ ಓಪನ್ ಆಗಬೇಕಿದ್ದರೆ ಅರ್ಧ ಗಂಟೆ ಬೇಕು ಎಂಬೆಲ್ಲಾ ಹತಾಶೆಯ ಮಾತುಗಳನ್ನು ನಾವು ನೀವೆಲ್ಲ ಕೇಳಿದ್ದೇವೆ. ಕಂಪ್ಯೂಟರ್ ತಜ್ಞರನ್ನು ಕರೆಸುವ ಮುನ್ನ, ಕೆಲವು ಸಮಸ್ಯೆಗಳನ್ನು ಪರಿಹರಿಸುವ ನಿಟ್ಟಿನಲ್ಲಿ ನಾವೇ ಮಾಡಿ ನೋಡಬಹುದಾದ ಒಂದಿಷ್ಟು ಸುಲಭೋಪಾಯಗಳು ಇಲ್ಲಿವೆ.

ಕಂಪ್ಯೂಟರಲ್ಲಿನ ಸಮಸ್ಯೆ ಹೇಳಿಕೊಂಡಾಗ ನಮ್ಮ ಕಚೇರಿಯಲ್ಲಿರುವ ಸಿಸ್ಟಂ ತಜ್ಞರು, “ರೀಸ್ಟಾರ್ಟ್ ಮಾಡಿ, ಸರಿ ಹೋಗುತ್ತದೆ” ಎನ್ನುವುದನ್ನು ಕೇಳಿಸಿಕೊಂಡಿರಬಹುದು. ನಾವೆಲ್ಲಾ ಇದನ್ನು ಕೇಳಿ ನಕ್ಕಿದ್ದೇವಾದರೂ, ಇದು ಜೋಕಂತೂ ಅಲ್ಲ. ರೀಸ್ಟಾರ್ಟ್ ಮಾಡಿದ ಬಳಿಕ ಅದೆಷ್ಟೋ ಪ್ರೋಗ್ರಾಂಗಳು ಸರಿಯಾಗಿ ಕೆಲಸ ಮಾಡುತ್ತಿದ್ದುದು ನನ್ನ ಅನುಭವಕ್ಕೂ ಬಂದಿದೆ. ಶಟ್‍ಡೌನ್ ಮಾಡಿ, ಪುನಃ ಆನ್ ಮಾಡಿದಾಗ ಅದರ ಮೆಮೊರಿಯೆಲ್ಲವೂ ಕ್ಲಿಯರ್ ಆಗಿ ಎಲ್ಲ ಪ್ರಕ್ರಿಯೆಗಳೂ ಹೊಸದಾಗಿ ಆರಂಭವಾಗುವುದರಿಂದ ಇದು ಕಂಪ್ಯೂಟರಿಗೆ ಒಂದು ರೀತಿಯಲ್ಲಿ ಪುನಶ್ಚೇತನ ನೀಡಿದಂತೆ. ಹೀಗಾಗಿ ಸಮಸ್ಯೆ ಸರಿಹೋಗಲೂಬಹುದು. ರೀಸ್ಟಾರ್ಟ್ ಮಾಡಲೂ ಆಗುತ್ತಿಲ್ಲ, ಹ್ಯಾಂಗ್ ಆಗಿಬಿಟ್ಟಿದೆ ಎಂದಾದರೆ ಪವರ್ ಬಟನ್ ಆಫ್ ಮಾಡಿ. ಆದರೆ ಪದೇ ಪದೇ ನೇರವಾಗಿ ಸ್ವಿಚ್ ಆಫ್ ಮಾಡುವುದರಿಂದ ಸಿಸ್ಟಂಗೆ ಸಮಸ್ಯೆಯಾಗುತ್ತದೆ ಎಂಬುದು ನೆನಪಿರಲಿ.

ಇಂಟರ್ನೆಟ್ ಸ್ಲೋ ಅಂತ ದೂರಿದಾಗ ಕಂಪ್ಯೂಟರ್ ಪರಿಣತರು ಹೇಳುವ ಇನ್ನೊಂದು ಮಾತು, ‘ಬ್ರೌಸರ್ ಕ್ಯಾಶ್/ಕುಕೀಸ್ ಕ್ಲಿಯರ್ ಮಾಡಿ’ ಅಂತ. ಈ ಕ್ಯಾಶ್ (cache) ಎಂದರೇನು? ನಾವು ಇಂಟರ್ನೆಟ್ ಜಾಲಾಡುತ್ತಿರುವಾಗ, ಆಯಾ ಪುಟಗಳನ್ನು ತೋರಿಸುವ ಸಲುವಾಗಿ ಅವುಗಳಲ್ಲಿರುವ ಎಲ್ಲ ಫೋಟೋ, ಟೆಕ್ಸ್ಟ್, ವೀಡಿಯೋ ಇತ್ಯಾದಿಗಳನ್ನು ಬ್ರೌಸರ್ ನಮ್ಮ ಲೋಕಲ್ ಹಾರ್ಡ್ ಡ್ರೈವ್‌ನ ತಾತ್ಕಾಲಿಕ ಪೋಲ್ಡರ್ ಒಂದಕ್ಕೆ ಡೌನ್‌ಲೋಡ್ ಮಾಡಿಕೊಂಡಿರುತ್ತದೆ. ಅಂತೆಯೇ ನಮ್ಮ ಲಾಗಿನ್ ಹೆಸರು, ಪಾಸ್ವರ್ಡ್, ಇತ್ತೀಚೆಗೆ ಭೇಟಿ ಕೊಟ್ಟ ವೆಬ್‌ಸೈಟುಗಳ ವಿಳಾಸಗಳು ಕೂಡ ಬ್ರೌಸರಿನಲ್ಲಿ ಸೇವ್ ಆಗಿರುತ್ತವೆ. ಇವೆಲ್ಲ ನಮ್ಮ ಹಾರ್ಡ್ ಡ್ರೈವ್‌ನ ಸ್ಥಳವನ್ನು ಆವರಿಸಿಕೊಳ್ಳುತ್ತವೆ. ಅವುಗಳನ್ನು ನಿವಾರಿಸಿದರೆ, ಕಸ ಗುಡಿಸಿದಂತೆ; ವೆಬ್ ಜಾಲಾಟ ವೇಗವಾಗುತ್ತದೆ.

ಇನ್ನು, ನಮ್ಮ ಪಿಸಿಗಳಲ್ಲಿ ನಾವು ಹೆಚ್ಚು ನಿರ್ಲಕ್ಷ್ಯ ವಹಿಸುವುದೆಂದರೆ, ಆ್ಯಂಟಿ ಮಾಲ್‌ವೇರ್ (ಅಥವಾ ಆ್ಯಂಟಿ ವೈರಸ್) ತಂತ್ರಾಂಶದ ಬಗ್ಗೆ. ಹ್ಯಾಂಗ್ ಆಗುವುದು, ವಿಂಡೋ ದಿಢೀರನೇ ಮುಚ್ಚುವುದು, ಕೆಲಸ ಮಾಡುತ್ತಿದ್ದ ಫೈಲ್ ಕ್ಲೋಸ್ ಆಗುವುದು, ಕಂಪ್ಯೂಟರ್ ಕೆಲಸ ನಿಧಾನವಾಗುವುದು… ಮುಂತಾದ ಪ್ರಕ್ರಿಯೆಗಳೆಲ್ಲವೂ ವೈರಸ್ ಎಂಬ ಹಾನಿಕಾರಕ ತಂತ್ರಾಂಶದ ಬಾಧೆಯ ಪರಿಣಾಮ ಆಗಿರಲೂಬಹುದು. ವಾರಕ್ಕೊಮ್ಮೆಯಾದರೂ ಒಳ್ಳೆಯ ಆ್ಯಂಟಿ ವೈರಸ್ ತಂತ್ರಾಂಶದ ಮೂಲಕ ಕಂಪ್ಯೂಟರನ್ನು ಸ್ಕ್ಯಾನ್ ಮಾಡುತ್ತಿರಬೇಕು. ಕೆಲವು ಸಮಸ್ಯೆಗಳನ್ನು ಸರಿಪಡಿಸುವ ವ್ಯವಸ್ಥೆಯೂ ಈ ತಂತ್ರಾಂಶದಲ್ಲಿರುತ್ತದೆ. ಅಲ್ಲದೆ, ನಿರ್ದಿಷ್ಟ ದಿನದಂದು ಸ್ವಯಂಚಾಲಿತವಾಗಿ ಸ್ಕ್ಯಾನ್ ಮಾಡುವಂತೆ ಶೆಡ್ಯೂಲ್ ಮಾಡುವ ವ್ಯವಸ್ಥೆಯೂ ಇಲ್ಲಿರುತ್ತದೆ.

ಇನ್ನೊಂದು ವಿಷಯ. ನಿಮ್ಮ ಕಂಪ್ಯೂಟರ್‌ನ ಯಾವುದೇ ಪ್ರೋಗ್ರಾಂ ಸರಿಯಾಗಿ ಕೆಲಸ ಮಾಡುತ್ತಿಲ್ಲವೆಂದಾದರೆ, ನಿರ್ದಿಷ್ಟ ಸಾಫ್ಟ್‌ವೇರ್‌ನಲ್ಲಿ ಸಮಸ್ಯೆಯಿದ್ದರೂ ಕೂಡ, ಇಡೀ ಕಂಪ್ಯೂಟರೇ ಕೆಟ್ಟುಹೋಗಿದೆ ಎಂಬ ಭಾವನೆ ಮೂಡಿಸಬಹುದು. ಅದರ ಎಕ್ಸಿಕ್ಯೂಟೆಬಲ್ ಫೈಲ್ (exe ಫೈಲ್) ಇದೆ ಎಂಬುದನ್ನು ಖಾತ್ರಿ ಮಾಡಿಕೊಂಡು, ಪ್ರೋಗ್ರಾಮನ್ನು ಅನ್‌ಇನ್‌ಸ್ಟಾಲ್ ಮಾಡಿ, ಪುನಃ ಇನ್‌ಸ್ಟಾಲ್ ಮಾಡುವ ಪ್ರಯತ್ನ ಮಾಡಿ. ಆದರೆ, ಅನ್‌ಇನ್‌ಸ್ಟಾಲ್ ಬಳಿಕ ಕಂಪ್ಯೂಟರ್ ರೀಸ್ಟಾರ್ಟ್ ಮಾಡಿದ ನಂತರವಷ್ಟೇ ಹೊಸದಾಗಿ ಪ್ರೋಗ್ರಾಂ ಇನ್‌ಸ್ಟಾಲ್ ಮಾಡಿ. ಹಳೆಯ ತಾತ್ಕಾಲಿಕ ಫೈಲುಗಳ ನಿರ್ಮೂಲನೆಗೆ ಈ ಹಂತ ಅನುಸರಿಬೇಕಾಗುತ್ತದೆ.

ಇಷ್ಟೆಲ್ಲ ಮಾಡಿಯೂ ನಿಮ್ಮ ಕಂಪ್ಯೂಟರ್ ಅಥವಾ ಅದರ ಯಾವುದೇ ಪ್ರೋಗ್ರಾಂ ಸರಿಯಾಗಿ ಕೆಲಸ ಮಾಡುತ್ತಿಲ್ಲವೆಂದಾದರೆ ಮಾತ್ರ, ದುರಸ್ತಿಗೆ ಒಯ್ಯಿರಿ.

ನೆನಪಿಡಿ, ಯಾವತ್ತೂ ಯಾವುದೇ ಫೈಲುಗಳನ್ನು ನಿಮ್ಮ ಕಂಪ್ಯೂಟರಿನ ‘ಸಿ’ ಡ್ರೈವ್‌ನಲ್ಲಿ (ಡೆಸ್ಕ್‌ಟಾಪ್, ಮೈ ಡಾಕ್ಯುಮೆಂಟ್ಸ್, ಮೈ ಫೋಟೋಸ್, ಮೈ ವೀಡಿಯೋಸ್, ಮೈ ಮ್ಯೂಸಿಕ್ ಮುಂತಾದ ಫೋಲ್ಡರುಗಳು) ಉಳಿಸಬೇಡಿ. ಡಿ (ಅಥವಾ ಇ, ಎಫ್… ನಿಮ್ಮ ಸಿಸ್ಟಂನಲ್ಲಿರುವ ಪಾರ್ಟಿಷನ್‌ಗಳಿಗೆ ತಕ್ಕಂತೆ) ಡ್ರೈವ್‌ಗಳಲ್ಲಿ ಫೈಲುಗಳನ್ನು ಸೇವ್ ಮಾಡಿಡಿ. ಯಾಕೆಂದರೆ, ಇಡೀ ಆಪರೇಟಿಂಗ್ ಸಿಸ್ಟಂ ರೀ-ಇನ್‌ಸ್ಟಾಲ್ ಮಾಡಬೇಕಾಗಿ ಬಂದಲ್ಲಿ, ಸಿ ಡ್ರೈವ್‌ನಲ್ಲಿರುವ ಯಾವುದೇ ಫೈಲುಗಳು ನಿಮಗೆ ಸಿಗಲಾರವು.

ಟೆಕ್ ಟಾನಿಕ್: ಲ್ಯಾಪ್‌ಟಾಪ್ ಶಟ್‌ಡೌನ್ ಅನಗತ್ಯ
ದಿನಂಪ್ರತಿ ಲ್ಯಾಪ್‌ಟಾಪ್ ಬಳಸುತ್ತಿರುವವರಿಗೊಂದು ಸಲಹೆ. ಮನೆಯಲ್ಲಿಯೂ ಕಚೇರಿಯಲ್ಲಿಯೂ ಲ್ಯಾಪ್‌ಟಾಪ್ ಮತ್ತೆ ಮತ್ತೆ ಬಳಸಬೇಕಾಗಿದ್ದರೆ, ಕೆಲಸ ಮುಗಿದ ಬಳಿಕ ಅದನ್ನು ನೀವು ಶಟ್‌ಡೌನ್ ಮಾಡಲೇಬೇಕೆಂದಿಲ್ಲ ಎಂಬುದು ಗೊತ್ತೇ? ತುಂಬಾ ಬ್ರೌಸರುಗಳನ್ನು ಓಪನ್ ಮಾಡಿದ್ದರೆ, ಇವನ್ನು ನಾಳೆ ಸರಿಯಾಗಿ ನೋಡೋಣ ಎಂದುಕೊಂಡರೆ, ಅವೆಲ್ಲವನ್ನೂ ತೆರೆದೇ ಇಟ್ಟಿರಬಹುದು. ಲ್ಯಾಪ್‌ಟಾಪ್ ಆನ್ ಇರುವಂತೆಯೇ ಅದರ ಸ್ಕ್ರೀನ್ ಭಾಗವನ್ನು ಮುಚ್ಚಿಬಿಟ್ಟರಾಯಿತು. ಸ್ವಯಂಚಾಲಿತವಾಗಿ ಅದು ಸ್ಲೀಪ್ ಮೋಡ್‌ಗೆ ಹೊರಟುಹೋಗುತ್ತದೆ. ನಿಮಗೆ ಮತ್ತೆ ಬೇಕಾದಾಗ, ಲಿಡ್ ಓಪನ್ ಮಾಡಿ ಸಿಸ್ಟಂಗೆ ಲಾಗಿನ್ ಆದರೆ ಸಾಕು. ಹೆಚ್ಚೇನೂ ಬ್ಯಾಟರಿ ಖರ್ಚಾಗುವುದಿಲ್ಲ. ಆದರೆ ಸಿಸ್ಟಂನ ಕ್ಷಮತೆಯ ದೃಷ್ಟಿಯಿಂದ ವಾರಕ್ಕೊಮ್ಮೆಯಾದರೂ ಶಟ್‌ಡೌನ್ ಮಾಡಬೇಕೆಂಬುದು ನೆನಪಿನಲ್ಲಿರಲಿ.

ಮೊಬೈಲ್‌ನಲ್ಲಿ ಸಂದೇಶ ಕಳುಹಿಸಲು ಗೂಗಲ್ ಕನ್ನಡ ಕೀಬೋರ್ಡ್

ವಿಜಯ ಕರ್ನಾಟಕ ಸಂಡೇ ಸಮಾಚಾರ ಅಕ್ಟೋಬರ್ 19, 2014

ಬೆಂಗಳೂರು: ಮೊಬೈಲ್ ಫೋನ್‌ಗಳಲ್ಲಿ ಕನ್ನಡ ಟೈಪ್ ಮಾಡುವುದು ಮಾತೃ ಭಾಷಾ ಪ್ರಿಯರ ಬಹುಕಾಲದ ಬಯಕೆ. ಆಂಡ್ರಾಯ್ಡ್ ಬಳಕೆದಾರರು ಕೆಲವರು ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ ಲಭ್ಯವಿರುವ ಹಲವಾರು ಕೀಬೋರ್ಡ್ ಅಪ್ಲಿಕೇಶನ್‌ಗಳನ್ನು (ಆ್ಯಪ್) ತಮ್ಮ ಸ್ಮಾರ್ಟ್‌ಫೋನ್‌ಗಳಲ್ಲಿ ಇನ್‌ಸ್ಟಾಲ್ ಮಾಡಿಕೊಂಡು ಮಾತೃಭಾಷೆಯಲ್ಲಿ ಸಂವಹನ ನಡೆಸುವ ಹೆಬ್ಬಯಕೆಯನ್ನು ತಣಿಸಿಕೊಂಡರೆ, ಗೊತ್ತಿಲ್ಲದಿದ್ದವರು ಕನ್ನಡದಲ್ಲೇ ಸಂದೇಶ ಬಂದಿರುವುದನ್ನು ನೋಡಿಯಷ್ಟೇ ಆನಂದಿಸುತ್ತಿದ್ದರು. ಭಾಷಾ ಬಳಕೆದಾರರ ಈ ತ್ರಾಸದ ಬಗ್ಗೆ ಕೊನೆಗೂ ಕಣ್ಣು ಬಿಟ್ಟು, ಪ್ರಾದೇಶಿಕ ಭಾಷೆಗಳ ಮಹತ್ವವನ್ನು ಅರಿತುಕೊಂಡಿರುವ ಗೂಗಲ್, ಆಂಡ್ರಾಯ್ಡ್ ಮೊಬೈಲ್ ಫೋನ್‌ಗಳಲ್ಲಿ ಡೀಫಾಲ್ಟ್ ಆಗಿ (ಅಳವಡಿಸಿಯೇ) ಬರುವ ಕೀಬೋರ್ಡ್ ಆ್ಯಪ್‌ಗೆ ಮತ್ತಷ್ಟು ಸುಧಾರಣೆ ತಂದು, ಕನ್ನಡವನ್ನೂ ಅಳವಡಿಸಿದೆ.

ಇದುವರೆಗೆ ಗೂಗಲ್ ಕೀಬೋರ್ಡ್‌ನಲ್ಲಿ ಹಿಂದಿ ಮತ್ತು ಹಲವು ವಿದೇಶೀ ಭಾಷೆಗಳ ಕೀಬೋರ್ಡ್‌ಗಳಿದ್ದವಷ್ಟೆ. ಈಗ ಬರಲಿರುವ 3.2 ಆವೃತ್ತಿಯ ಕೀಬೋರ್ಡ್‌ನಲ್ಲಿ, ಹೊಸದಾಗಿ ಕನ್ನಡ, ತಮಿಳು, ತೆಲುಗು, ಮಲಯಾಳಂ, ಬಂಗಾಳಿ, ಮರಾಠಿ, ತೆಲುಗು ಭಾಷೆಗಳನ್ನೂ ಸೇರಿಸಲಾಗಿದೆ. ಇದನ್ನು ಪ್ರತ್ಯೇಕವಾಗಿ ಡೌನ್‌ಲೋಡ್ ಮಾಡಿಕೊಳ್ಳಬೇಕಿಲ್ಲ. ಇಂಟರ್ನೆಟ್ ಸಂಪರ್ಕವಿದ್ದಾಗ, ಕೀಬೋರ್ಡ್‌ನ ಹೊಸ ಆವೃತ್ತಿಯನ್ನು ಅಪ್‌ಡೇಟ್ ಮಾಡಿಕೊಳ್ಳುವಂತೆ ನಿಮ್ಮ ಸ್ಮಾರ್ಟ್‌ಫೋನೇ ಕೇಳುತ್ತದೆ. ಆದರೆ, ಭಾರತೀಯ ಬಳಕೆದಾರರಿಗಿನ್ನೂ ಬಿಡುಗಡೆಯಾಗಬೇಕಷ್ಟೆ. ಬೇರೆ ರಾಷ್ಟ್ರಗಳ ಭಾಷೆಗಳ ಕೀಬೋರ್ಡುಗಳನ್ನೂ ಅಳವಡಿಸಲಾಗಿದ್ದು, ಭಾರತದ ಬಳಕೆದಾರರಿಗೆ ನಿಧಾನವಾಗಿ ಅಪ್‌ಡೇಟ್ ಆಗಲಿದೆ. ಅಪ್‌ಡೇಟ್ ಯಾವಾಗ ಬರುತ್ತದೆಯೆಂದು ಕಾದು ನೋಡಿ. ಕಾಯುವುದು ಇಷ್ಟವಿಲ್ಲವೇ? ಹೀಗೆ ಮಾಡಿ: “http://bit.ly/VKGoogle” ಲಿಂಕ್ ಕ್ಲಿಕ್ ಮಾಡಿ, Download ಎಂದು ಬರೆದಿರುವ ಲಿಂಕ್ ಕ್ಲಿಕ್ ಮಾಡಿ ಕೀಬೋರ್ಡ್‌ನ ಎಪಿಕೆ ಫೈಲನ್ನು ಡೌನ್‌ಲೋಡ್ ಮಾಡಿಕೊಳ್ಳಿ. ತೀರಾ ಸುಲಭದ ಕೆಲಸವಿದು.

ಹೇಗೆ ಇನ್‌ಸ್ಟಾಲ್ ಮಾಡಿಕೊಳ್ಳುವುದು:
ಸುಮಾರು 19 ಎಂಬಿ ಗಾತ್ರದ APK (ಅಪ್ಲಿಕೇಶನ್ ಪ್ಯಾಕೇಜ್) ಫೈಲ್ ನಿಮ್ಮ ಸಾಧನಕ್ಕೆ ಡೌನ್‌ಲೋಡ್ ಆಗುತ್ತದೆ. ಬಳಿಕ Settings > Security > Unknown Sources ಎಂಬಲ್ಲಿರುವ ಚೆಕ್ ಬಾಕ್ಸ್‌ಗೆ ಟಿಕ್ ಗುರುತು ಹಾಕಿ (ಇದು ಗೂಗಲ್ ಪ್ಲೇ ಸ್ಟೋರ್ ಹೊರತಾಗಿ ಅಪರಿಚಿತ ಮೂಲಗಳಿಂದ ಆ್ಯಪ್ ಇನ್‌ಸ್ಟಾಲ್ ಮಾಡಿಕೊಳ್ಳಲು, ಅಪ್ಪಿ ತಪ್ಪಿ ಬೇರೆ ಮೂಲದಿಂದ ಇನ್‌ಸ್ಟಾಲ್ ಮಾಡಿಕೊಳ್ಳದಂತೆ ಭದ್ರತೆಗಾಗಿ ಇರುವ ಆಯ್ಕೆ). ಇನ್‌ಸ್ಟಾಲ್ ಮಾಡಿದ ಬಳಿಕ ಇದರ ಚೆಕ್ ಗುರುತು ತೆಗೆಯಲು ಮರೆಯಬೇಡಿ.

ಇದಾದ ನಂತರ, ನಿಮ್ಮಲ್ಲಿರುವ ಡೌನ್‌ಲೋಡ್ ಫೋಲ್ಡರ್‌ನಲ್ಲಿರುವ ಎಪಿಕೆ ಫೈಲನ್ನು ಕ್ಲಿಕ್ ಮಾಡಿದಾಗ, ಅದು ನಿಮ್ಮ ಕೀಬೋರ್ಡ್‌ಗೆ ಅಪ್‌ಡೇಟ್ ಮಾಡಬೇಕೇ ಎಂದು ಅನುಮತಿ ಕೇಳುತ್ತದೆ. ಅನುಮತಿ ಕೊಟ್ಟ ತಕ್ಷಣ ಇನ್‌ಸ್ಟಾಲ್ ಆಗುತ್ತದೆ.

ಇನ್‌ಸ್ಟಾಲ್ ಮಾಡಿದ ಬಳಿಕ ಕನ್ನಡ ಕೀಬೋರ್ಡ್ ಹೀಗೆ ಸಕ್ರಿಯಗೊಳಿಸಿ:
Settings > Langugage & Input ಎಂಬಲ್ಲಿಗೆ ಹೋಗಿ. ಅಲ್ಲಿ ಕಾಣಿಸುವ ಆಯ್ಕೆಗಳಲ್ಲಿ Default ಎಂಬಲ್ಲಿ, English (India) – Google keyboard ಎಂದಿರುತ್ತದೆ (ಇಲ್ಲದಿದ್ದರೆ ಅದನ್ನೇ ಆಯ್ಕೆ ಮಾಡಿಕೊಳ್ಳಿ). ಬಳಿಕ ಅದರ ಬಲಭಾಗದಲ್ಲಿರುವ ಸೆಟ್ಟಿಂಗ್ಸ್ ಬಟನ್ ಮೇಲೆ ಬೆರಳಿನಿಂದ ಒತ್ತಿ. ಮೇಲ್ಭಾಗದಲ್ಲಿ Languages ಎಂದಿರುತ್ತದೆ. ಅದನ್ನು ಪ್ರೆಸ್ ಮಾಡಿ. ಅಲ್ಲಿ English ಎಂಬ ಬಾಕ್ಸ್‌ಗೆ ಟಿಕ್ ಗುರುತು ಇರುತ್ತದೆ. ಅದೂ ಇರಲಿ, ಕೆಳಗೆ ಕನ್ನಡ ಎಂಬುದನ್ನು ಹುಡುಕಿ, ಅದರೆದುರಿಗಿರುವ ಚೆಕ್ ಬಾಕ್ಸ್‌ಗೂ ಟಿಕ್ ಗುರುತು ಹಾಕಿ. ಅಷ್ಟೆ, ವಾಪಸ್ ಬಂದರೆ ಆಯಿತು.

ಈಗ ಯಾವುದೇ ಸಂದೇಶ (ಎಸ್‌ಎಂಎಸ್, ಫೇಸ್‌ಬುಕ್ ಸಂದೇಶ) ಬರೆಯಲು ಹೊರಟಾಗ, ಕೀಬೋರ್ಡ್ ಕಾಣಿಸುತ್ತದೆಯಲ್ಲವೇ? ಅದರಲ್ಲಿ ಸ್ಪೇಸ್ ಬಾರ್‌ನ ಎಡಭಾಗದಲ್ಲಿ ಭೂಗೋಳದ ಚಿತ್ರದ ಕೀಯನ್ನು ಸ್ಪರ್ಶಿಸಿದರೆ ಕನ್ನಡ, ಅದನ್ನೇ ಮತ್ತೊಮ್ಮೆ ಒತ್ತಿದರೆ ಇಂಗ್ಲಿಷ್‌ನಲ್ಲಿ ಟೈಪ್ ಮಾಡಬಹುದು. ಇದು ಇನ್‌ಸ್ಕ್ರಿಪ್ಟ್ ಎಂಬ ಕೀಬೋರ್ಡ್ ಶೈಲಿಯಲ್ಲಿ ಟೈಪ್ ಮಾಡುವವರಿಗೆ ತುಂಬಾ ಅನುಕೂಲ. ಉಳಿದವರಿಗೂ ಕಲಿತುಕೊಳ್ಳಲು ಸುಲಭ. ಒಂದೇ ಸ್ಕ್ರೀನ್‌ನಲ್ಲಿ ಎಲ್ಲ ಸ್ವರದ ಗುಣಿತಾಕ್ಷರಗಳು, ವ್ಯಂಜನಾಕ್ಷರಗಳು ಕಾಣಿಸುತ್ತವೆ. ಮಹಾಪ್ರಾಣಾಕ್ಷರಗಳು ಮತ್ತು ಸ್ವರಾಕ್ಷರಗಳು ಬೇಕಿದ್ದರೆ, ಆಯಾ ಕೀಲಿಯನ್ನು ಒತ್ತಿ ಹಿಡಿದುಕೊಂಡಾಗ ಅದಕ್ಕೆ ಸಂಬಂಧವಿರುವ ಉಳಿದ ಅಕ್ಷರಗಳೂ ಗೋಚರಿಸುತ್ತವೆ. ಅದೇ ರೀತಿ ಮೇಲಿನ ಸಾಲಿನ ಅಕ್ಷರಗಳಲ್ಲಿ ಕನ್ನಡ ಅಂಕಿಗಳನ್ನೂ ಮೂಡಿಸಬಹುದು. ಟ್ರೈ ಮಾಡಿ ನೋಡಿ. ಇನ್ನು (ಆಂಡ್ರಾಯ್ಡ್) ಮೊಬೈಲ್‌ಗಳಲ್ಲಿ ಕನ್ನಡದಲ್ಲಿ ಟೈಪ್ ಮಾಡಲಾಗುವುದಿಲ್ಲ ಅಂತ ಹೇಳೋ ಹಾಗೆ ಇಲ್ಲ!

ಟ್ವೀಟ್‌ನಿಂದಲೇ ಸಂಗೀತ ಕೇಳಿ
ಕಿರು ಸಾಮಾಜಿಕ ಜಾಲತಾಣ ಟ್ವಿಟರ್‌ನಲ್ಲಿ ಆಡಿಯೋ ಫೈಲ್‌ಗಳನ್ನು ಸಾಕಷ್ಟು ಮಂದಿ ಸಂಗೀತಗಾರರು, ಸುದ್ದಿ ತಾಣಗಳು ಮತ್ತು ಕೆಲವು ರೇಡಿಯೋ ವಾಹಿನಿಗಳು ಹಂಚಿಕೊಳ್ಳುತ್ತಿರುತ್ತವೆ. ಸ್ಮಾರ್ಟ್‌ಫೋನ್‌ಗಳಲ್ಲಿ ಈ ರೀತಿಯ ಪಾಡ್‌ಕಾಸ್ಟ್‌ಗಳು, ಸಂಗೀತ, ಭಾಷಣ ಇತ್ಯಾದಿಗಳನ್ನು ಇದುವರೆಗೆ, ಟ್ವಿಟರ್ ಆ್ಯಪ್‌ನಿಂದ ಹೊರಬಂದು, ಸಿಸ್ಟಂನ ಆಡಿಯೋ ಪ್ಲೇಯರ್ ಆಯ್ಕೆ ಮಾಡುವ ಮೂಲಕ ಕೇಳಬೇಕಾಗುತ್ತಿತ್ತು. ಈಗ ಟ್ವಿಟರ್ ಆಡಿಯೋ ಕಾರ್ಡ್ ಎಂಬ ಹೊಸ ವ್ಯವಸ್ಥೆಯ ಮೂಲಕ, ನಿಮ್ಮ ಟ್ವಿಟರ್ ಫೀಡ್‌ನಿಂದಲೇ ಆಡಿಯೋ ಫೈಲುಗಳನ್ನು ಒಂದು ಸಲ ಬೆರಳಿನಿಂದ ತಟ್ಟುವ ಮೂಲಕ ಆಲಿಸಬಹುದಾಗಿದೆ. ಪ್ರಸ್ತುತ ಇದು ಆಂಡ್ರಾಯ್ಡ್ ಹಾಗೂ ಆ್ಯಪಲ್ ಸಾಧನಗಳ ಟ್ವಿಟರ್‌ನ ಅಧಿಕೃತ ಆ್ಯಪ್ ಮೂಲಕ ಲಭ್ಯವಿದೆ.

ಫಾಲೋ ಮಾಡದಿದ್ರೂ ಟ್ವೀಟ್ಸ್
ಇನ್ನೂ ಒಂದು ಸುದ್ದಿಯಿದೆ. ಟ್ವಿಟರ್‌ನಲ್ಲಿ ನೀವು ಫಾಲೋ ಮಾಡದೇ ಇರುವವರ ಟ್ವೀಟ್‌ಗಳೂ ನಿಮ್ಮ ಟೈಮ್‌ಲೈನ್‌ನಲ್ಲಿ ಕಾಣಿಸಿಕೊಳ್ಳಬಲ್ಲವು. ನಿಮ್ಮ ಸ್ನೇಹಿತರ ಟ್ವೀಟ್ಸ್, ನೀವು ಫೇವರಿಟ್ ಅಥವಾ ರೀಟ್ವೀಟ್ ಮಾಡಿದ ಟ್ವೀಟ್‌ಗಳು, ನಿಮ್ಮ ಚಟುವಟಿಕೆ ಆಧರಿಸಿ, ಆ ವಿಷಯಕ್ಕೆ ಸಂಬಂಧಿಸಿದ ಟ್ವೀಟ್‌ಗಳನ್ನು ಸ್ವತಃ ಟ್ವಿಟರ್ ಹುಡುಕಿ, ನಮ್ಮ ಟೈಮ್‌ಲೈನ್‌ನಲ್ಲಿ ತೋರಿಸುತ್ತದೆ. ಎಲ್ಲರನ್ನೂ ಫಾಲೋ ಮಾಡಬೇಕಿಲ್ಲ, ನಮ್ಮ ಆಸಕ್ತಿ ಆಧರಿಸಿದ ಟ್ವೀಟ್‌ಗಳು ನಮ್ಮ ಟೈಮ್‌ಲೈನ್‌ನಲ್ಲಿನ್ನು ಕಾಣಿಸಿಕೊಳ್ಳಲಿವೆ. ಈ ಕುರಿತು ಟ್ವಿಟರ್ ತನ್ನ ಬ್ಲಾಗ್‌ನಲ್ಲಿ ಮಾಹಿತಿ ನೀಡಿದೆ.

ಆಂಡ್ರಾಯ್ಡ್ 5 ಲಾಲಿಪಾಪ್‌ನ 5 ವಿಶೇಷತೆಗಳು

‘’ಟೆಕ್ನೋ’ ವಿಶೇಷ
#ನೆಟ್ಟಿಗ

ಆಂಡ್ರಾಯ್ಡ್‌ನ ಅಲಿಖಿತ ಸಂಪ್ರದಾಯದಂತೆ ಇಂಗ್ಲಿಷ್ ಅಕ್ಷರಾನುಕ್ರಮಣಿಕೆ ಪ್ರಕಾರ ‘L’ನಿಂದ ಆರಂಭವಾಗಬೇಕಿದ್ದ ಹೊಚ್ಚ ಹೊಸ 5.0 ಆವೃತ್ತಿಯ ಹೆಸರು ಕೊನೆಗೂ ಭಾರತೀಯರಿಗೂ ಇಷ್ಟವಾಗಿರುವ ‘ಲಾಲಿಪಾಪ್’ ಎಂದು ಘೋಷಣೆಯಾಗಿದೆ. ಇತ್ತೀಚಿನ 4.4.4 ಆವೃತ್ತಿಯಾಗಿರುವ ಕಿಟ್‌ಕ್ಯಾಟ್ ಕಾರ್ಯಾಚರಣಾ ವ್ಯವಸ್ಥೆಗೂ, ಲಾಲಿಪಾಪ್‌ಗೂ ಅತ್ಯಂತ ಪ್ರಮುಖವಾದ ವ್ಯತ್ಯಾಸಗಳೇನು ಎಂಬುದನ್ನು ತಿಳಿದುಕೊಳ್ಳೋಣ.

ಮೊದಲ ನೋಟ…
1. ಕಾರ್ಯಾಚರಣಾ ವ್ಯವಸ್ಥೆ (ಒಎಸ್) ತಕ್ಷಣಕ್ಕೆ ನೋಡುವಾಗಲೇ ಸಾಕಷ್ಟು ಬದಲಾವಣೆಗಳು ಕಾಣಿಸುತ್ತವೆ. ಹಲವು ತಿಂಗಳುಗಳಿಂದ ‘ಮೆಟೀರಿಯಲ್ ವಿನ್ಯಾಸ’ದ ಮೇಲೆ ಕೆಲಸ ಮಾಡಿದ್ದ ಗೂಗಲ್, ಲಾಲಿಪಾಪ್ ಮೂಲಕ ಅದನ್ನು ಹೊರಬಿಟ್ಟಿದೆ. ಸ್ಪಷ್ಟವಾದ, ಬೋಲ್ಡ್ ಗೆರೆಗಳು ಮತ್ತು ಬಣ್ಣಗಳು ವಿನೋದಮಯವಾದ ಆನಿಮೇಶನ್‌ಗಳೊಂದಿಗೆ ಗಮನ ಸೆಳೆಯುತ್ತವೆ. ಆ್ಯಪ್ ಐಕಾನ್‌ಗಳು, ಫಾಂಟ್‌ಗಳು, ಹೊಸ ನ್ಯಾವಿಗೇಶನ್ ಬಟನ್‌ಗಳು, ನೋಟಿಫಿಕೇಶನ್ ಬಾರ್‌ನಲ್ಲಿರುವ ಐಕಾನ್‌ಗಳು – ಇವನ್ನೆಲ್ಲಾ ನೋಡಿದರೆ ಬದಲಾವಣೆಗಳು ಗೋಚರಿಸುತ್ತವೆ. ಕಣ್ಣಿಗೆ ಕಾಣದಿರುವ ಬದಲಾವಣೆಯೆಂದರೆ, ಧ್ವನಿ ಆಧಾರಿತ “ಓಕೆ ಗೂಗಲ್” ಎಂಬ ಆದೇಶವನ್ನು ನೀವು ಸ್ಕ್ರೀನ್ ಲಾಕ್ ಇರುವಾಗಲೂ ನೀಡಬಹುದು.

ನೋಟಿಫಿಕೇಶನ್‌ಗಳು
2. ಯಾವುದೇ ಸಂದೇಶ ಬಂದಾಗ ಧುತ್ತನೇ ಕಾಣಿಸಿಕೊಳ್ಳುವ ನೋಟಿಫಿಕೇಶನ್‌ಗಳಲ್ಲಿ ಮಹತ್ವದ ಬದಲಾವಣೆಯಿದೆ. ಸ್ಕ್ರೀನ್ ಲಾಕ್ ಆಗಿರುವಾಗಲೇ ನಿಮ್ಮ ಮೊಬೈಲ್‌ಗೆ ಬಂದ ಸೂಚನೆಗಳನ್ನು, ಸಂದೇಶಗಳನ್ನು ನೋಡಬಹುದು ಮಾತ್ರವಲ್ಲದೆ, ಲಾಕ್ ಸ್ಕ್ರೀನ್‌ನಿಂದಲೇ ಅವುಗಳಿಗೆ ಪ್ರತಿಕ್ರಿಯೆ ನೀಡಬಹುದು. ಅನ್‌ಲಾಕ್ ಇರುವಾಗ, ನೀವೇನಾದರೂ ಕೆಲಸ ಮಾಡುತ್ತಿದ್ದರೆ, ಈ ನೋಟಿಫಿಕೇಶನ್‌ಗಳು ನಿಮ್ಮ ಕೆಲಸಕ್ಕೆ ತೊಂದರೆ ಮಾಡದೆ ಮೇಲ್ಭಾಗದಲ್ಲಿ ಕಾಣಿಸಿಕೊಳ್ಳುತ್ತವೆ. ಉದಾ. ಗೇಮ್ ಆಡುತ್ತಿದ್ದರೆ, ಕರೆಯನ್ನು ಅಲ್ಲಿಂದಲೇ ರಿಜೆಕ್ಟ್ ಮಾಡಬಹುದು ಅಥವಾ ಎಸ್ಎಂಎಸ್‌ಗೆ ಉತ್ತರಿಸಬಹುದು. ಅದೇ ರೀತಿ, ಐಒಎಸ್‌ನಲ್ಲಿರುವಂತೆ, ನಿರ್ದಿಷ್ಟ ಸಮಯಕ್ಕೆ Do not Disturb ಎಂದು ನಿಮಗೆ ಬೇಕಾದ ಆ್ಯಪ್‌ಗಳಿಗೆ ಮಾತ್ರವೇ ಹೊಂದಿಸುವ ಆಯ್ಕೆಯೂ ಇದೆ.

ಸಂಪರ್ಕ
3. ಸಂಪರ್ಕ ವ್ಯವಸ್ಥೆ ಬಗ್ಗೆ ಗೂಗಲ್ ಹೆಚ್ಚಿನ ಗಮನ ಹರಿಸಿದೆ. ಆಂಡ್ರಾಯ್ಡ್ ಟಿವಿಯ ಬೆಂಬಲವನ್ನು ಲಾಲಿಪಾಪ್‌ನಲ್ಲೇ ಅಳವಡಿಸಲಾಗಿದ್ದು, ಸ್ಮಾರ್ಟ್‌ವಾಚ್ ಧ್ವನಿ ಕಮಾಂಡ್‌ಗಳು, ಫೋನ್ ಸನ್ನೆಗಳ ಮೂಲಕ ಸುಲಭವಾಗಿ ದೊಡ್ಡ ಪರದೆಯಲ್ಲಿಯೂ ನ್ಯಾವಿಗೇಟ್ ಮಾಡಬಹುದಾಗಿದೆ. ಟ್ಯಾಬ್ಲೆಟ್, ಸ್ಮಾರ್ಟ್‌ಫೋನ್, ಟಿವಿ, ಸ್ಮಾರ್ಟ್‌ವಾಚ್‌ಗಳೇ ಮುಂತಾದ ವಿಭಿನ್ನ ಸಾಧನಗಳಲ್ಲಿ ನಿಮ್ಮ ಆಂಡ್ರಾಯ್ಡ್ ಅನುಭವ ಏಕರೀತಿಯದ್ದಾಗಿರುತ್ತದೆ. ಬ್ಲೂಟೂತ್ ಹಾಗೂ ವೈಫೈ ಮೂಲಕ ಸಂಪರ್ಕ ಮಾಡುವ ವ್ಯವಸ್ಥೆಯನ್ನೂ ಸುಲಭಗೊಳಿಸಲಾಗಿದೆ. ಉದಾಹರಣೆಗೆ, ನಿಜವಾಗಿಯೂ ಒಂದು ಒಳ್ಳೆಯ ಸಿಗ್ನಲ್ ಇರುವ ವೈಫೈ ಸಂಪರ್ಕವಿದೆ ಎಂದಾದರೆ ಮಾತ್ರವೇ ವೈಫೈ ನೆಟ್‌ವರ್ಕ್‌ಗೆ ಕನೆಕ್ಟ್ ಆಗುತ್ತದೆ.

ಭದ್ರತೆ
4. ಭದ್ರತೆಯ ದೃಷ್ಟಿಯಿಂದ ಲಾಲಿಪಾಪ್‌ನಲ್ಲಿ ಸಾಕಷ್ಟು ಬದಲಾವಣೆಗಳನ್ನು ಮಾಡಲಾಗಿದೆ. ಉದಾಹರಣೆಗೆ, “ಸುರಕ್ಷಿತ ವಲಯಗಳು” ಎಂದು ಜಿಪಿಎಸ್ ಆಧರಿಸಿ ನೀವು ಭೌಗೋಳಿಕವಾಗಿ ಕೆಲವೊಂದು ಪ್ರದೇಶವನ್ನು ಹೊಂದಿಸಿಟ್ಟುಕೊಂಡರೆ, ಅಲ್ಲಿ ಅನ್‌ಲಾಕ್ ಮಾಡಬೇಕಿದ್ದರೆ ನಿಮಗೆ ಪಿನ್ ಅಗತ್ಯವಿರುವುದಿಲ್ಲ. ಆಂಡ್ರಾಯ್ಡ್ ವೇರ್ ಸ್ಮಾರ್ಟ್‌ವಾಚು, ಇಯರ್‌ಫೋನ್ ಮುಂತಾದ ನಿರ್ದಿಷ್ಟ ಬ್ಲೂಟೂತ್ ಸಾಧನಗಳಿಗೂ ನೀವಿದನ್ನು ಹೊಂದಿಸಬಹುದು. ಇದಲ್ಲದೆ, ನೋಟಿಫಿಕೇಶನ್‌ಗಳು ಧುತ್ತನೇ ಕಾಣಿಸಿಕೊಳ್ಳುವಾಗ, ಆ ಸಂದೇಶದಲ್ಲಿ ಸೂಕ್ಷ್ಮ, ರಹಸ್ಯ ಮಾಹಿತಿಯಿರುತ್ತದೆ ಎಂದೇನಾದರೂ ನಿಮ್ಮ ಗಮನಕ್ಕೆ ಬಂದರೆ, ಅಂತಹಾ ಸೂಚನೆಗಳನ್ನು ಮರೆ ಮಾಡುವ ವ್ಯವಸ್ಥೆ ಇರುತ್ತದೆ. ಮಾಲ್‌ವೇರ್‌ಗಳಿಗೆ ತುತ್ತಾಗದಂತಿರಲು SELinux ತಂತ್ರಜ್ಞಾನವನ್ನು ಬಳಸಲಾಗಿದೆ. ಇದಲ್ಲದೆ, ಕಂಪ್ಯೂಟರಲ್ಲಿರುವಂತೆ ಲಾಗಿನ್ ಮಾಡಲು ಪ್ರತ್ಯೇಕ ಯೂಸರ್ ಪ್ರೊಫೈಲ್ ರಚಿಸುವ ಅವಕಾಶವಿದೆ. ಇದರಿಂದ ನಿಮ್ಮ ಫೋನನ್ನು ತಾತ್ಕಾಲಿಕ ಬಳಕೆಗೆ ಬೇರೆಯವರಿಗೂ ನೀಡಬಹುದು. ಕುಟುಂಬಿಕರೊಂದಿಗೆ ಯಾವುದೇ ಗ್ಯಾಲರಿಯನ್ನು ಹಂಚಿಕೊಳ್ಳಲು ಇದು ಅನುಕೂಲ.

ಕಾರ್ಯಕ್ಷಮತೆ
5. ಲಾಲಿಪಾಪ್‌ನ ಅತ್ಯುತ್ತಮ ಕಾರ್ಯನಿರ್ವಹಣೆಗಾಗಿ ಗೂಗಲ್ ಸಾಕಷ್ಟು ಶ್ರಮ ವಹಿಸಿದೆ. ಸದ್ಯೋಭವಿಷ್ಯದಲ್ಲಿ ಬರಲಿರುವ 64-ಬಿಟ್ ಸ್ಮಾರ್ಟ್‌ಫೋನ್‌ಗಳಿಗೂ ಹೊಂದುವಂತೆ ಲಾಲಿಪಾಪ್ ಆಪರೇಟಿಂಗ್ ಸಿಸ್ಟಂ ಅನ್ನು ಅಭಿವೃದ್ಧಿಪಡಿಸಲಾಗಿದ್ದು, ಸಾಕಷ್ಟು ವೇಗದ ಕಾರ್ಯಾಚರಣೆಯಿದೆ. ಅಂದರೆ, ಈ ಫೋನ್‌ಗಳಲ್ಲಿ ಹೆಚ್ಚಿನ RAM ಅಗತ್ಯವಿರುತ್ತದೆ. ಹೀಗಾಗಿ ಭವಿಷ್ಯದ ಹ್ಯಾಂಡ್‌ಸೆಟ್‌ಗಳಿಗೆ ಪೂರಕವಾಗಿದೆ ಈ ಲಾಲಿಪಾಪ್. ಅಲ್ಲದೆ, ಕಿಟ್‌ಕ್ಯಾಟ್‌ನಷ್ಟು ಪ್ರಮಾಣದಲ್ಲಿ ಬ್ಯಾಟರಿಯನ್ನು ಲಾಲಿಪಾಪ್ ಹೀರಿಕೊಳ್ಳುವುದಿಲ್ಲ ಎಂದು ಹೇಳಿದೆ ಗೂಗಲ್. ಮಲ್ಟಿಟಾಸ್ಕಿಂಗ್ (ಏಕಕಾಲದಲ್ಲಿ ಹಲವು ಆ್ಯಪ್‌ಗಳಲ್ಲಿ, ಸ್ಕ್ರೀನ್‌ಗಳಲ್ಲಿ ಕೆಲಸ ಮಾಡುವುದು) ಸುಲಭ ಮತ್ತು ಶೀಘ್ರವಾಗಲಿದೆ.

• * ಕಿಟ್‌ಕ್ಯಾಟ್ ಹೋಲಿಸಿದರೆ 90 ನಿಮಿಷ ಬ್ಯಾಟರಿ ಬಾಳಿಕೆ ಹೆಚ್ಚಿಸುವ ಬ್ಯಾಟರಿ ಸೇವಿಂಗ್ ಆಯ್ಕೆ
  * ಕನ್ನಡ, ತಮಿಳು, ಮಲಯಾಳಂ, ತೆಲುಗು, ಹಿಂದಿ, ಬಂಗಾಳಿ, ಮರಾಠಿ ಸಹಿತ ದೇಶ ವಿದೇಶದ ಒಟ್ಟು 68 ಭಾಷೆಗಳಲ್ಲಿ ಲಾಲಿಪಾಪ್ ಲಭ್ಯ
  * ಬ್ಯಾಟರಿ ಚಾರ್ಜಿಂಗ್ ಶೀಘ್ರ ಆಗಲಿದೆ
  * ಎನ್ಕ್ರಿಪ್ಷನ್ ಸ್ವಯಂಚಾಲಿತವಾಗಿ ಆನ್ ಇರುತ್ತದೆ. ಇದರಿಂದ ಹೆಚ್ಚಿನ ಸುರಕ್ಷತೆ ಸಾಧ್ಯ
  * ಹಲವು ಬಳಕೆದಾರರಿಗೆ ಪ್ರತ್ಯೇಕ ಲಾಗಿನ್ ವ್ಯವಸ್ಥೆ
  * ಫ್ಲ್ಯಾಶ್‌ಲೈಟ್, ಹಾಟ್‌ಸ್ಪಾಟ್, ಸ್ಕ್ರೀನ್ ರೊಟೇಶನ್ ಇತ್ಯಾದಿಗೆ ಕೈಗೆ ಸುಲಭವಾಗಿ ಎಟುಕುವ ನಿಯಂತ್ರಣ ಬಟನ್‌ಗಳು
  * ಆಂಡ್ರಾಯ್ಡ್ ಟಿವಿಗೆ, ಆಂಡ್ರಾಯ್ಡ್ ಸ್ಮಾರ್ಟ್‌ವಾಚ್‌ಗೆ ಸೂಕ್ತ ಬೆಂಬಲ

ಫೋನ್ ವಿನಿಮಯಕ್ಕೆ ಕೊಡುವ ಮುನ್ನ ಎಲ್ಲ ಫೈಲುಗಳನ್ನು ಅಳಿಸಿ

ಮಾಹಿತಿ@ತಂತ್ರಜ್ಞಾನ – 98: ವಿಜಯ ಕರ್ನಾಟಕ ಸೋಮವಾರ ಅಕ್ಟೋಬರ್ 20, 2014

ಹಬ್ಬದ ಸೀಸನ್. ಸಾಕಷ್ಟು ಕೊಡುಗೆಗಳಿಂದ ಆಕರ್ಷಿತರಾಗಿ ಫೋನ್ ಬದಲಾಯಿಸುವ, ವಿನಿಮಯ ಮಾಡುವ, ಹಳೆಯದನ್ನು ಮಾರಿ ಹೊಸತು ತೆಗೆದುಕೊಳ್ಳುವ ಪ್ರಕ್ರಿಯೆಗೆ ಕೆಲವರು ಚಾಲನೆ ನೀಡಿರಬಹುದು. ಆದರೆ ಹಳೆಯ ಫೋನ್‌ನಲ್ಲಿದ್ದ, ನಮಗೆ ಗೊತ್ತಾಗದಂತೆ ಉಳಿದುಕೊಳ್ಳಬಹುದಾದ ಫೈಲ್, ಡಾಕ್ಯುಮೆಂಟ್, ಫೋಟೋ, ವೀಡಿಯೋ ಹಾಗೂ ಲಾಗಿನ್ ಐಡಿ, ಪಾಸ್‌ವರ್ಡ್ ಮುಂತಾದ ಇತರ ಯಾವುದೇ ಸೂಕ್ಷ್ಮ ಮಾಹಿತಿಗಳು ಅದರಲ್ಲೇ ಉಳಿದುಕೊಂಡಿದ್ದರೆ, ಭವಿಷ್ಯದಲ್ಲಿ ತೊಂದರೆಯಾಗುವ ಸಾಧ್ಯತೆಗಳು ಹೆಚ್ಚು.

ಯಾಕೆಂದರೆ, ಆ ಫೋನನ್ನು ಇನ್ನೊಬ್ಬರು ಬಳಸಿದಾಗ, ನಿಮ್ಮೆಲ್ಲಾ ಫೈಲುಗಳು ಅದರಲ್ಲೇ ಇದ್ದರೆ ಮತ್ತು ಅವರು ನಿಮ್ಮದೇ ಅಕೌಂಟ್ ಮೂಲಕ ಲಾಗಿನ್ ಆದರೆ (ಪಾಸ್‌ವರ್ಡ್ ಸೇವ್ ಆಗಿರುತ್ತದೆ) ಎದುರಿಸಬೇಕಾದ ತೊಂದರೆಗಳು ಸಾಕಷ್ಟು. ಈ ತೊಂದರೆ ತಪ್ಪಿಸಲು, ವಿಂಡೋಸ್ 8 ಫೋನ್‌ಗಳನ್ನು ಗಮನದಲ್ಲಿಟ್ಟುಕೊಂಡು ಈ ಮಾಹಿತಿ ನೀಡಲಾಗುತ್ತಿದೆಯಾದರೂ, ಆಂಡ್ರಾಯ್ಡ್ ಫೋನ್‌ಗಳಿಗೂ ಇದುವೇ ಹೆಚ್ಚೂಕಡಿಮೆ ಅನ್ವಯವಾಗುತ್ತದೆ.

ಮೊದಲು, ವಿಲೇವಾರಿ ಮಾಡುವ ಮುನ್ನ, ಅದರಲ್ಲಿರುವ ನಮ್ಮ ಫೈಲುಗಳನ್ನು ಬ್ಯಾಕ್ಅಪ್ ಇರಿಸಿಕೊಳ್ಳಬೇಕು. ಅದಕ್ಕೆ ಹೀಗೆ ಮಾಡಿ: ಇಂಟರ್ನೆಟ್ ಕನೆಕ್ಷನ್ ಇದ್ದರೆ ಮತ್ತು ನೀವು ಮೈಕ್ರೋಸಾಫ್ಟ್‌ನ (ಹಾಟ್‌ಮೇಲ್, ಲೈವ್, ಔಟ್‌ಲುಕ್ ಮುಂತಾದ) ಖಾತೆ ಹೊಂದಿದ್ದರೆ, ಆನ್‌ಲೈನ್‌ನಲ್ಲಿ ಬ್ಯಾಕಪ್ ಇರಿಸುವ ವ್ಯವಸ್ಥೆ ಇದೆ. ಜತೆಯಲ್ಲೇ ಮೈಕ್ರೋಸಾಫ್ಟ್‌ನವರೇ ಒದಗಿಸಿದ ಒನ್‌ಡ್ರೈವ್ ಎಂಬ ಕ್ಲೌಡ್ ಸ್ಟೋರೇಜ್ ಇದೆ. ಅದರ ಆ್ಯಪ್ ಇನ್‌ಸ್ಟಾಲ್ ಮಾಡಿಕೊಂಡಿಲ್ಲವಾದರೆ, onedrive.com ಗೆ ಹೋಗಿ ಡೌನ್‌ಲೋಡ್ ಮಾಡಿಕೊಳ್ಳಬಹುದು.

ಬ್ಯಾಕ್ಅಪ್ ಇರಿಸುವುದು: Settings > Backup > App list + settings > Backup ಎಂದಿರುವಲ್ಲಿ On ಇರುವಂತೆ ನೋಡಿಕೊಳ್ಳಿ. ಅದೇ ರೀತಿ ಎಸ್‌ಎಂಎಸ್ ಸಂದೇಶಗಳನ್ನು ಮತ್ತು ಫೋಟೋ-ವೀಡಿಯೋಗಳನ್ನು ಕೂಡ ಬ್ಯಾಕಪ್ ಮಾಡಿಕೊಳ್ಳಲು ಪ್ರತ್ಯೇಕ ವಿಭಾಗಗಳು ಅಲ್ಲೇ ಕಾಣಿಸುತ್ತವೆ. Backup Now ಅಂತ ಇರುವಲ್ಲಿ ಒತ್ತಿಬಿಡಿ.

ರೀಸೆಟ್ ಮಾಡುವುದು: ಈಗ ಅದರಲ್ಲಿರುವ ಫೈಲ್‌ಗಳನ್ನು ಡಿಲೀಟ್ ಮಾಡಬೇಕಲ್ಲವೇ? ಮೊದಲು ಫೋನ್‌ನಲ್ಲಿರುವ ಮೆಮೊರಿ ಕಾರ್ಡನ್ನು ತೆಗೆದು ಬೇರೆಡೆ ಇರಿಸಿಕೊಳ್ಳಿ. ಬಳಿಕ ಫೋನ್‌ನಲ್ಲಿ Settings > About > Reset ಎಂಬಲ್ಲಿ ಹೋಗಿ ರೀಸೆಟ್ ಮಾಡಿಬಿಡಿ. ಫೈಲುಗಳೆಲ್ಲಾ ಡಿಲೀಟ್ ಆಗುತ್ತವೆ ಮತ್ತು ನಮ್ಮ ಕಣ್ಣಿಗೆ ಅವುಗಳು ಕಾಣಿಸುವುದಿಲ್ಲ ಅಷ್ಟೆ. ಅವೆಲ್ಲವೂ ಫೋನ್‌ನಲ್ಲೇ ಅಗೋಚರವಾಗಿ ಇರುತ್ತವೆ ಎಂಬುದು ನೆನಪಿರಲಿ. ಹಿಂದೆಯೇ ಹೇಳಿದಂತೆ, ಫೋನ್‌ನಿಂದ ಡಿಲೀಟ್ ಮಾಡುವುದು ಎಂದರೆ, ಅದನ್ನು ಪುನಃ ರಿಕವರ್ ಮಾಡಲಾಗದು ಎಂದೇನಿಲ್ಲ. ಡಿಲೀಟ್ ಮಾಡುವುದೆಂದರೆ, ಹೊಸ ಫೈಲುಗಳು ಓವರ್‌ರೈಟ್ ಆಗಲು ಜಾಗ ಮಾಡಿಕೊಡುವುದು ಎಂದಷ್ಟೇ ಅರ್ಥ.

ರೀಸೆಟ್ ಮಾಡಿದ ಬಳಿಕ, ದೊಡ್ಡ ಗಾತ್ರದ (ಉದಾಹರಣೆಗೆ ಚಲನಚಿತ್ರದ ವೀಡಿಯೋ, ಫೋಟೋ ಇತ್ಯಾದಿ) ಫೈಲುಗಳನ್ನು ನಿಮ್ಮ ಕಂಪ್ಯೂಟರ್‌ನಿಂದ ಇದೇ ಫೋನ್‌ಗೆ ವರ್ಗಾಯಿಸಿಬಿಡಿ. ಅದರ ಇಂಟರ್ನಲ್ ಮೆಮೊರಿ ಭರ್ತಿಯಾಗುವಂತೆ ನೋಡಿಕೊಳ್ಳಿ. ಹೀಗಾದಾಗ, ಫೋನ್‌ನಲ್ಲಿ ಅಗೋಚರ ಸ್ಥಿತಿಯಲ್ಲಿರುವ ನಿಮ್ಮ ವೈಯಕ್ತಿಕ ಫೈಲ್‌ಗಳನ್ನು ಇವುಗಳು ರೀಪ್ಲೇಸ್ ಮಾಡುತ್ತವೆ. ಈ ಮೂಲಕ ನಿಮ್ಮ ಹಿಂದಿನ ಫೈಲುಗಳು ಮತ್ತೆಂದೂ ರೀಕವರ್ ಆಗಲಾರವು. ಒಂದು ಸಲ ಇಂಟರ್ನಲ್ ಮೆಮೊರಿ ಭರ್ತಿಯಾದ ಬಳಿಕ, ಅವೆಲ್ಲಾ ಫೈಲುಗಳನ್ನು ಪುನಃ ಡಿಲೀಟ್ ಮಾಡಿಬಿಡಿ. ಇದೇ ಪ್ರಕ್ರಿಯೆ ಪುನರಾವರ್ತಿಸಿ. ಈ ರೀತಿ ಮಾಡುವುದರಿಂದ ಹಳೆಯ ಫೈಲುಗಳ ಕುರುಹು ಕೂಡ ಉಳಿಯುವುದಿಲ್ಲ, ಯಾರಿಗೂ ರೀಕವರ್ ಮಾಡುವುದು ಸಾಧ್ಯವಾಗುವುದೂ ಇಲ್ಲ.

ಮೈಕ್ರೋ ಎಸ್‌ಡಿ ಕಾರ್ಡನ್ನು (ಅಂದರೆ ಮೆಮೊರಿ ಕಾರ್ಡನ್ನು) ಕೂಡ ನೀವು ಕೊಡುತ್ತಿದ್ದೀರಿ ಎಂದಾದರೆ, ಅದಕ್ಕೂ ಇದೇ ಹಂತಗಳನ್ನು ಪುನರಾವರ್ತಿಸಿ.

ಬ್ಯಾಕಪ್ ಮಾಡಿರುವ ಫೈಲುಗಳನ್ನು ಮರಳಿ ಪಡೆಯುವುದು: ಹೊಸ ಫೋನನ್ನು ಕೊಳ್ಳುತ್ತೀರಿ ಅಥವಾ ಹಳೆಯ ಫೋನ್‌ನಲ್ಲಿ ಸಮಸ್ಯೆ ಬಂದು ಅದನ್ನು ಫ್ಯಾಕ್ಟರಿ ಡೇಟಾ ರೀಸೆಟ್ ಮಾಡಿರುತ್ತೀರಿ. ಮೊದಲೇ ನೀವು ಬ್ಯಾಕಪ್ ಮಾಡಿಟ್ಟುಕೊಂಡಿರುವ ಫೈಲುಗಳನ್ನು, ಈಗ ಮರಳಿ ಫೋನ್‌ಗೆ ಸೇರಿಸಬೇಕಲ್ಲಾ? ಎಲ್ಲ ಫೈಲುಗಳೂ ಒನ್‌ಡ್ರೈವ್‌ನಲ್ಲಿ ಸ್ಟೋರ್ ಆಗಿರುತ್ತವೆ. ಅವುಗಳನ್ನು ಮರಳಿ ಪಡೆಯಲು ಹೀಗೆ ಮಾಡಿ:

ನಿಮ್ಮ ಅದೇ ಮೈಕ್ರೋಸಾಫ್ಟ್ ಖಾತೆಯೊಂದಿಗೆ ಫೋನ್‌ಗೆ ಲಾಗಿನ್ ಆಗಿ. ಸ್ವಲ್ಪ ಹೊತ್ತು ಕಾದಾಗ, ಮೈಕ್ರೋಸಾಫ್ಟ್ ಅಕೌಂಟಿನೊಂದಿಗೆ ಹೊಂದಿಕೊಂಡಿರುವ ಎಲ್ಲ ಮಾಹಿತಿಯನ್ನೂ ಸಿಂಕ್ರನೈಜ್/ರೀಸ್ಟೋರ್ ಮಾಡಬೇಕೇ ಎಂದು ಆ ಫೋನೇ ನಿಮ್ಮನ್ನು ಕೇಳುತ್ತದೆ. ಸೂಚನೆಗಳನ್ನು ಅನುಸರಿಸಿದರೆ, ಕೆಲವೇ ಸಮಯದಲ್ಲಿ ನಿಮ್ಮೆಲ್ಲ ಆ್ಯಪ್‌ಗಳು, ಸೆಟ್ಟಿಂಗ್‌ಗಳು ನಿಮ್ಮ ಫೋನ್‌ನಲ್ಲಿ ಬಂದಿರುತ್ತವೆ.
ಟೆಕ್-ಟಾನಿಕ್: DuckDuckGo
ಇಂಟರ್ನೆಟ್‌ನಲ್ಲಿ ಶೋಧ ನಡೆಸುವುದೆಂದರೆ ಗೂಗಲ್ ಮಾಡುವುದೆಂದೇ ಜನಜನಿತವಾಗಿಬಿಟ್ಟಿದೆ. ಅಂದರೆ ಗೂಗಲ್ ಕಂಪನಿಯೇ ಸರ್ಚ್ ಎಂಜಿನ್ ಒದಗಿಸುತ್ತಿದ್ದು, ಅದನ್ನೇ ಹೆಚ್ಚಿನವರು ಬಳಸುತ್ತಿರುವುದರಿಂದ ಈ ಮಾತು. ಮೈಕ್ರೋಸಾಫ್ಟ್‌ನ Bing ಕೂಡ ಉತ್ತಮ ಸರ್ಚ್ ಆಯ್ಕೆ ನೀಡುತ್ತದೆ. ಆದರೆ DuckDuckGo ಎಂಬ ಸರ್ಚ್ ತಾಣವೂ ಇತ್ತೀಚೆಗೆ ಗಮನ ಸೆಳೆಯುತ್ತಿದೆ. ಗೂಗಲ್‌ನಲ್ಲಿ ನಿರ್ದಿಷ್ಟ ಪದದ ಮೂಲಕ ವಿಷಯ ಹುಡುಕಿದರೆ, ಎಲ್ಲ ಕಡೆ ಒಂದೇ ರೀತಿಯ ಮಾಹಿತಿ ದೊರೆಯುವುದಿಲ್ಲ; ಒಬ್ಬರಿಗೊಂದೊಂದು ರೀತಿಯಲ್ಲಿ, ಅಂದರೆ ಆಯಾ ವ್ಯಕ್ತಿಯು ಏನೆಲ್ಲಾ ಬ್ರೌಸ್ ಮಾಡುತ್ತಾರೆ ಎಂಬುದರ ಆಧಾರದಲ್ಲಿ ಫಲಿತಾಂಶ ದೊರೆಯುತ್ತದೆ. ಅದರಲ್ಲಿ ನಮ್ಮ ಪ್ರೈವೆಸಿಗೆ ಕನ್ನ ಹಾಕಲಾಗುತ್ತಿದೆ ಎಂಬ ಆರೋಪ ಕೇಳಿಬರುತ್ತಿದ್ದರೆ, ಡಕ್‌ಡಕ್‌ಗೋದಲ್ಲಿ ಹಾಗಲ್ಲ. ಎಲ್ಲ ಕಡೆಯೂ ಒಂದೇ ರೀತಿಯ ಫಲಿತಾಂಶವಿರುತ್ತದೆ.