ವಿಂಡೋಸ್ ಎಕ್ಸ್‌ಪಿ ಇರುವವರು ಗಮನಿಸಿ!

ಮಾಹಿತಿ@ತಂತ್ರಜ್ಞಾನ: ವಿಜಯ ಕರ್ನಾಟಕ ಅಂಕಣ, ಏಪ್ರಿಲ್ 21, 2014
ಬಹುತೇಕ ಮಂದಿ ತಮ್ಮ ಕಂಪ್ಯೂಟರ್‌ನಲ್ಲಿ ಹೊಂದಿರುವ ವಿಂಡೋಸ್ ಎಕ್ಸ್‌ಪಿ ಎಂಬ ಕಾರ್ಯಾಚರಣಾ ವ್ಯವಸ್ಥೆ (ಆಪರೇಟಿಂಗ್ ಸಿಸ್ಟಂ – OS) ಗೆ ಅದರ ಕಂಪನಿ ಮೈಕ್ರೋಸಾಫ್ಟ್ ನೀಡುತ್ತಿರುವ ಅಪ್‌ಡೇಟ್‌ಗಳ ಬೆಂಬಲವು ಏಪ್ರಿಲ್ 8ಕ್ಕೆ ಸ್ಥಗಿತಗೊಂಡಿದೆ. ಇದರಿಂದ ಎಕ್ಸ್‌ಪಿ ಸಿಸ್ಟಮ್ಮೇ ಕೆಲಸ ಮಾಡುವುದಿಲ್ಲ, ಯಾವಾಗ ಬೇಕಾದರೂ ನಿಲ್ಲಬಹುದು ಎಂಬುದು ತಪ್ಪು ಕಲ್ಪನೆ. ಕಾಲಕಾಲಕ್ಕೆ ವಿಭಿನ್ನ ರೀತಿಯ ವೈರಸ್‌ಗಳು, ಮಾಲ್‌ವೇರ್‌ಗಳು, ಸ್ಪೈ‌ವೇರ್‌ಗಳೆಂಬ ನಮ್ಮ ಮಾಹಿತಿ ಕದಿಯುವ ತಂತ್ರಾಂಶಗಳು ಸಿಸ್ಟಂಗೆ ಸೋಕದಂತೆ ತಡೆಯುವ ವ್ಯವಸ್ಥೆಯನ್ನು ಮೈಕ್ರೋಸಾಫ್ಟ್ ಇದುವರೆಗೆ ‘ಅಪ್‌ಡೇಟ್’ಗಳ ರೂಪದಲ್ಲಿ ತನ್ನ ಗ್ರಾಹಕರಿಗೆ ನೀಡುತ್ತಿತ್ತು. ಅಂತಹಾ ಆಧುನಿಕ ತಂತ್ರಜ್ಞಾನದ ಭದ್ರತೆ ಇನ್ನು ಮುಂದೆ ವಿಂಡೋಸ್ ಎಕ್ಸ್‌ಪಿಗೆ ಇರುವುದಿಲ್ಲ. ಹಾಗಾಗಿ, ವಿಂಡೋಸ್ ಎಕ್ಸ್‌ಪಿ ಸಿಸ್ಟಂಗಳನ್ನು ಹೊಂದಿರುವವರು ಏನು ಮಾಡಬೇಕು? ಇಂಥವರಿಗಾಗಿ ಮುಖ್ಯವಾಗಿ ಮೂರು ಆಯ್ಕೆಗಳಿವೆ.

1. ಇರುವ ಸಿಸ್ಟಮ್ಮನ್ನೇ ವಿಂಡೋಸ್ 8.1ಕ್ಕೆ ಅಪ್‌ಗ್ರೇಡ್ ಮಾಡಿಕೊಳ್ಳುವುದು.

2. ಇರುವ ಎಕ್ಸ್‌ಪಿಯಲ್ಲೇ ಮುಂದುವರಿದು, ಎಚ್ಚರಿಕೆಯಿಂದ ಇಂಟರ್ನೆಟ್ ಬಳಸುವುದು ಅಥವಾ ಇಂಟರ್ನೆಟ್ ತಂಟೆಗೇ ಹೋಗದಿರುವುದು.

3. ಹೊಸ ಕಂಪ್ಯೂಟರ್ ಖರೀದಿಸುವುದು.

ಅಪ್‌ಗ್ರೇಡ್: ಮೊದಲು, ವಿಂಡೋಸ್ 8.1 ಎಂಬ ಮೈಕ್ರೋಸಾಫ್ಟ್‌ನ ಹೊಚ್ಚ ಹೊಸ ಕಾರ್ಯಾಚರಣಾ ವ್ಯವಸ್ಥೆಗೆ ನಿಮ್ಮಲ್ಲಿರುವ ಕಂಪ್ಯೂಟರ್ ಹೊಂದಿಕೊಳ್ಳುತ್ತದೆಯೇ ಎಂದು ನೋಡಲು http://go.microsoft.com/fwlink/p/?LinkId=321548 ಎಂಬಲ್ಲಿಂದ ‘ವಿಂಡೋಸ್ ಅಪ್‌ಗ್ರೇಡ್ ಅಸಿಸ್ಟೆಂಟ್’ ಕಿರು ತಂತ್ರಾಂಶ ಡೌನ್‌ಲೋಡ್ ಮಾಡಿಕೊಂಡು, ರನ್ ಮಾಡಿ. ಆಧುನಿಕ ತಂತ್ರಜ್ಞಾನಕ್ಕೆ ಸೂಕ್ತವಾದ ಹಾರ್ಡ್‌ವೇರ್ ನಿಮ್ಮ ಕಂಪ್ಯೂಟರಲ್ಲಿದೆಯೇ ಎಂಬ ವರದಿಯನ್ನು ಅದು ನಿಮಗೊಪ್ಪಿಸುತ್ತದೆ. ಎಲ್ಲವೂ ಹೊಂದಿಕೆಯಾಗುತ್ತದೆ ಅಂತ ರಿಪೋರ್ಟ್ ಬಂದರೆ, ಅಪ್‌ಗ್ರೇಡ್ ಮಾಡಿಕೊಳ್ಳಬಹುದು. ಈ ಹಿಂದೆ 699 ರೂ.ಗೆ ವಿಂಡೋಸ್ ಅಪ್‌ಗ್ರೇಡ್ ಮಾಡಿಕೊಳ್ಳುವ ಅವಕಾಶದ ಬಗ್ಗೆ ಇದೇ ಅಂಕಣದಲ್ಲಿ ಪ್ರಸ್ತಾಪಿಸಿದಾಗ ಎಷ್ಟು ಮಂದಿ ಪ್ರಯೋಜನ ಪಡೆದುಕೊಂಡಿದ್ದಾರೋ ಗೊತ್ತಿಲ್ಲ. ಉಪಯೋಗಿಸಿಕೊಳ್ಳದಿದ್ದವರು ಬಹುಶಃ ಈಗ ಕೈಕೈ ಹಿಸುಕಿಕೊಳ್ಳಬೇಕಾಗುತ್ತದೆ. ಇದಕ್ಕೆ ಕಾರಣವೆಂದರೆ, ವಿಂಡೋಸ್ 7 ಅಥವಾ ವಿಂಡೋಸ್ 8 ಓಎಸ್ ಖರೀದಿಗೆ ಈಗ ತೆರಬೇಕಾದ ಹಣ ಕನಿಷ್ಠವೆಂದರೆ 4ರಿಂದ 10 ಸಾವಿರ ರೂ.!

ಎರಡನೇ ಸಾಧ್ಯತೆ, ಎಕ್ಸ್‌ಪಿಯನ್ನೇ ಬಳಸುವುದು. ಇದಕ್ಕಾಗಿ ಕೆಲವೊಂದು ಕ್ರಮಗಳನ್ನು ಅನುಸರಿಸಬೇಕಾಗುತ್ತದೆ. ಕಾರ್ಯಾಚರಣೆ ವ್ಯವಸ್ಥೆ ಎಕ್ಸ್‌ಪಿ ಆಗಿದ್ದರೂ, ಇಂಟರ್ನೆಟ್ ಜಾಲಾಡಲು ಮೈಕ್ರೋಸಾಫ್ಟ್‌ನ ‘ಇಂಟರ್ನೆಟ್ ಎಕ್ಸ್‌ಪ್ಲೋರರ್’ ಬಳಸಬಾರದು. ಒಂದು ಅತ್ಯುತ್ತಮ, ವಿಶ್ವಾಸಾರ್ಹ ಆ್ಯಂಟಿ ವೈರಸ್ ತಂತ್ರಾಂಶವೊಂದನ್ನು ಇನ್‌ಸ್ಟಾಲ್ ಮಾಡಿಕೊಳ್ಳಬೇಕು. ಬಳಿಕ, ಇಂಟರ್ನೆಟ್ ಎಕ್ಸ್‌ಪ್ಲೋರರ್ ಬದಲು ಮೊಝಿಲ್ಲಾ ಫೈರ್‌ಫಾಕ್ಸ್ ಅಥವಾ ಗೂಗಲ್‌ನ ಕ್ರೋಮ್ ಬ್ರೌಸರ್ ಅಳವಡಿಸಿಕೊಂಡು, ಅದರ ಮೂಲಕವೇ ಇಂಟರ್ನೆಟ್‌ನಲ್ಲಿ ಜಾಲಾಡಬೇಕು. ಇಂಟರ್ನೆಟ್ ಬಳಸದೇ ಇದ್ದರೆ ಹಾಗೂ ಅದಕ್ಕೆ ಬೇರಾವುದೇ ಬಾಹ್ಯ ಸಾಧನಗಳು (ಪೆನ್ ಡ್ರೈವ್, ಕ್ಯಾಮರಾ, ಮೊಬೈಲ್) ಇತ್ಯಾದಿಗಳನ್ನು ಸಂಪರ್ಕಿಸದೇ ಇದ್ದರೆ, ಎಕ್ಸ್‌ಪಿಯನ್ನು ಮುಂದುವರಿಸಬಹುದು. ಆದರೆ, ಹೆಚ್ಚಿನ ಹೊಸ ತಂತ್ರಾಂಶಗಳನ್ನು ಈಗ ಹೊಚ್ಚ ಹೊಸ ವಿಂಡೋಸ್ ಆವೃತ್ತಿಗಳಿಗಾಗಿಯೇ ರೂಪಿಸಲಾಗುತ್ತಿರುವುದರಿಂದ, ಎಕ್ಸ್‌ಪಿಯಲ್ಲಿ ಅವುಗಳು ಕೆಲಸ ಮಾಡದಿರುವ ಸಾಧ್ಯತೆಯೂ ಇದೆ.

ಮೂರನೇ ಸಾಧ್ಯತೆ ಎಂದರೆ, ಹೊಸ ವಿಂಡೋಸ್ 8 ಸಿಸ್ಟಂ ಖರೀದಿಸುವುದು. ಇದರ ಬಗ್ಗೆ ಹೆಚ್ಚೇನೂ ಹೇಳಬೇಕಾಗಿಲ್ಲ.

12 ವರ್ಷಗಳಿಂದ ನಮ್ಮೊಡನಿದ್ದ ಎಕ್ಸ್‌ಪಿ ಕಾರ್ಯಾಚರಣೆ ವ್ಯವಸ್ಥೆ ನಿಧಾನವಾಗಿ ತೆರೆಮರೆಗೆ ಸರಿಯುತ್ತಿರುವುದಕ್ಕೆ ಪ್ರಮುಖ ಕಾರಣವೆಂದರೆ, ತಂತ್ರಜ್ಞಾನದಲ್ಲಿ ಆಗುತ್ತಿರುವ ನವೀನ ಬದಲಾವಣೆಗಳು. ಹೊಸ ತಂತ್ರಾಂಶಗಳು ಹಳೆಯ ಎಕ್ಸ್‌ಪಿ ಕಾರ್ಯಾಚರಣಾ ವ್ಯವಸ್ಥೆಯಲ್ಲಿ ಕೆಲಸ ಮಾಡದಿರುವ ಸಾಧ್ಯತೆಗಳೂ ಇವೆ.

ಒಂದು ಆಶಾದಾಯಕ ಮಾತಿದೆ. ವಿಂಡೋಸ್ 8ರ ಬೇಸಿಕ್ ಕಾರ್ಯಾಚರಣಾ ವ್ಯವಸ್ಥೆಯನ್ನು ಉಚಿತವಾಗಿಯೇ ಆ ಕಂಪನಿಯು ಒದಗಿಸುವ ಸಾಧ್ಯತೆಗಳಿವೆ. ಆದರೆ, ಇದು ಓಎಸ್ ಅನ್ನು ಎಲ್ಲರಿಗೂ ಉಚಿತವಾಗಿ ನೀಡುತ್ತದೆಯೋ, ಅಥವಾ ಹೊಸ ಕಂಪ್ಯೂಟರ್ ಖರೀದಿಸುವವರಿಗೆ ಮಾತ್ರ ಈ ಕೊಡುಗೆಯೋ, ಸ್ಪಷ್ಟವಾಗಿಲ್ಲ. ಮಾರುಕಟ್ಟೆಯಲ್ಲಿ ತನ್ನ ಅಸ್ತಿತ್ವವನ್ನು ಉಳಿಸಿಕೊಳ್ಳಲು, ಜನರು ವಿಂಡೋಸ್ ಬದಲು, ಆ್ಯಪಲ್ ಕಂಪನಿಯ ಮ್ಯಾಕ್ ಹಾಗೂ ಉಚಿತವಾಗಿಯೇ ಲಭ್ಯವಿರುವ ಉಬುಂಟು (http://www.ubuntu.com/) ಕಾರ್ಯಾಚರಣಾ ವ್ಯವಸ್ಥೆಗಳತ್ತ ಮುಖ ಮಾಡದಂತಿರಲು ಮೈಕ್ರೋಸಾಫ್ಟ್ ಈ ಕ್ರಮಕ್ಕೆ ಮುಂದಾಗುತ್ತಿದೆ ಎನ್ನಲಾಗುತ್ತಿದೆ. ಈ ಊಹಾಪೋಹ ಎಷ್ಟು ನಿಜ ಎಂಬುದಕ್ಕಾಗಿ ಸ್ವಲ್ಪ ದಿನ ಕಾದು ನೋಡಬೇಕು.

ವಿಂಡೋಸ್-8 ಕೇವಲ 699 ರೂ.ಗೆ ಅಪ್‌ಗ್ರೇಡ್: ಜ.31ವರೆಗೆ ಮಾತ್ರ

ಜನ ಸಾಮಾನ್ಯರಿಗಾಗಿ ಮಾಹಿತಿ@ತಂತ್ರಜ್ಞಾನ- ವಿ.ಕ.ಅಂಕಣ-20 (ಜನವರಿ 14, 2013)

ಕಂಪ್ಯೂಟರುಗಳಲ್ಲಿ ವಿಂಡೋಸ್ ಆಪರೇಟಿಂಗ್ ಸಿಸ್ಟಂ (ಕಾರ್ಯಾಚರಣಾ ವ್ಯವಸ್ಥೆ)ಗಳು ಕಾಲದಿಂದ ಕಾಲಕ್ಕೆ ಆಧುನೀಕರಣವಾಗುತ್ತಲೇ ಇವೆ. ವಿಂಡೋಸ್‌ನಲ್ಲಿ ಸದ್ಯಕ್ಕೆ ಕನ್ನಡ ಕಾಣಿಸುವ ಎಕ್ಸ್‌ಪಿ, ವಿಸ್ತಾ ಮತ್ತು ನಂತರದ ವಿಂಡೋಸ್ 7 ಆವೃತ್ತಿಗಳನ್ನು ಹೆಚ್ಚಿನವರು ಬಳಸುತ್ತಿದ್ದರೆ, ಈ ಸಾಲಿಗೆ ಹೊಸ ಸೇರ್ಪಡೆ ವಿಂಡೋಸ್ 8. ಇದು ಸ್ಮಾರ್ಟ್‌ಫೋನ್ ಮೊಬೈಲ್‌ನಂತೆಯೇ ‘ಟಚ್’ಸ್ಕ್ರೀನ್ ಆಯ್ಕೆಯೊಂದಿಗೆ ಆಧುನಿಕ ತಂತ್ರಜ್ಞಾನದಿಂದ ಕೂಡಿದೆ. ಇದಕ್ಕೆ ಅಪ್‌ಗ್ರೇಡ್ ಮಾಡಿಕೊಳ್ಳಲು ಒಂದು ಲಾಭದಾಯಕ ಅವಕಾಶವಿಲ್ಲಿದೆ…

ಮಾರುಕಟ್ಟೆಯಲ್ಲಿ ಅಂದಾಜು 10-12 ಸಾವಿರ ರೂ. ಬೆಲೆ ಬಾಳುವ ವಿಂಡೋಸ್ 8 ರ ಪ್ರೋ ಆವೃತ್ತಿಯನ್ನು ಕೇವಲ 699 ರೂ. ತೆತ್ತು ನಿಮ್ಮದಾಗಿಸಿಕೊಳ್ಳಬಹುದು. ಜನವರಿ 31ರೊಳಗೆ ಆನ್‌ಲೈನ್ ಮೂಲಕ ನೋಂದಾಯಿಸಿಕೊಂಡರೆ ಇದು ಸಾಧ್ಯ. ಇದನ್ನು ಪಡೆಯಲು ಏನು ಮಾಡಬೇಕೆಂಬ ಮಾಹಿತಿ ಇಲ್ಲಿದೆ.

* ನಿಮ್ಮ ಕಂಪ್ಯೂಟರು ವಿಂಡೋಸ್ 7 ಕಾರ್ಯಾಚರಣೆ ವ್ಯವಸ್ಥೆಯಲ್ಲಿರಬೇಕು (ವಿಂಡೋಸ್ 7 ಹೋಂ ಬೇಸಿಕ್, ಹೋಂ ಪ್ರೀಮಿಯಮ್, ಪ್ರೊಫೆಶನಲ್ ಅಥವಾ ಅಲ್ಟಿಮೇಟ್ ಆವೃತ್ತಿ) ವಿಂಡೋಸ್ 7 ಸ್ಟಾರ್ಟರ್ ಆವೃತ್ತಿ ಆಗುವುದಿಲ್ಲ.

* ಅದನ್ನು ನೀವು ಕಳೆದ ವರ್ಷದ (2012) ಜೂನ್ 2ರ ಬಳಿಕ ಖರೀದಿಸಿರಬೇಕು.

* ಇದು ಲೈಸೆನ್ಸ್ ಇರುವ ಪ್ರತಿಯಾಗಿರಬೇಕು (ಪೈರೇಟೆಡ್ ಕಾಪಿಗಳಿಗೆ ಅವಕಾಶವಿಲ್ಲ). ನೋಂದಾಯಿಸುವಾಗ ಅದರ ಪ್ರಾಡಕ್ಟ್ ಕೀ ನಮೂದಿಸುವ ಅಗತ್ಯವಿರುತ್ತದೆ.

* ಈ ತಿಂಗಳ 31ರವರೆಗೆ ಮಾತ್ರ ಈ ಕೊಡುಗೆ ಲಭ್ಯವಿರುತ್ತದೆ. ಅಷ್ಟರೊಳಗೆ ಖರೀದಿಸಿ ಅದನ್ನು ವಿಂಡೋಸ್ ವೆಬ್‌ಸೈಟಲ್ಲಿ (https://windowsupgradeoffer.com/en-IN/Registration) ನೋಂದಾಯಿಸಿಕೊಳ್ಳಬೇಕು (ಹೆಸರು, ಖರೀದಿಸಿದ ಮಳಿಗೆ, ನಿಮ್ಮ ಇಮೇಲ್ ವಿಳಾಸ, ಫೋನ್ ನಂಬರ್ ಮುಂತಾದ ಬಿಲ್ಲಿಂಗ್ ವಿವರಗಳು, ವಿಳಾಸ ಮತ್ತು ವಿಂಡೋಸ್ 7ರ ಪ್ರಾಡಕ್ಟ್ ಕೀ ಎಲ್ಲವನ್ನೂ ನಮೂದಿಸಬೇಕಾಗುತ್ತದೆ). ಬಳಿಕ ಡೌನ್‌ಲೋಡ್ ಮಾಡಿಕೊಳ್ಳಲು 2013ರ ಫೆಬ್ರವರಿ 28ರವರೆಗೆ ಸಮಯವಿದೆ.

* ನೋಂದಾಯಿಸಿದ ಬಳಿಕ ನಿಮ್ಮ ಇಮೇಲ್ ವಿಳಾಸಕ್ಕೊಂದು ಪ್ರೊಮೋ ಕೋಡ್ ಕಳುಹಿಸಲಾಗುತ್ತದೆ. ವೆಬ್‌ಸೈಟಿನಲ್ಲೇ ವಿಂಡೋಸ್ 8 ಖರೀದಿಸುವಾಗ ಆ ಕೋಡ್ ನಮೂದಿಸಿದ ಬಳಿಕವಷ್ಟೇ ಈ ಕೊಡುಗೆ (699 ರೂ.) ನಿಮಗೆ ಕಾಣಿಸುತ್ತದೆ.

* ಕಳೆದ ಜೂನ್‌ಗಿಂತ ಹಿಂದೆ ಖರೀದಿಸಿದ ವಿಂಡೋಸ್ 7, ಎಕ್ಸ್‌ಪಿ, ವಿಸ್ಟಾ ಮುಂತಾದ ಆಪರೇಟಿಂಗ್ ಸಿಸ್ಟಂಗಳನ್ನು ವಿಂಡೋಸ್ 8ಕ್ಕೆ ಅಪ್‌ಗ್ರೇಡ್ ಮಾಡಿಕೊಳ್ಳಲು ನೀಡಬೇಕಾಗಿರುವ ಮೊತ್ತ ಸುಮಾರು 1999 ರೂ.

* ಇಂಟರ್ನೆಟ್ ಸಂಪರ್ಕವಿದ್ದರೆ, ಮನೆಯಲ್ಲೇ ವಿಂಡೋಸ್ 8ಕ್ಕೆ ಅಪ್‌ಗ್ರೇಡ್ ಮಾಡಿಸಿಕೊಳ್ಳಬಹುದು (ಸುಮಾರು 2 ಜಿಬಿಯಷ್ಟು ತಂತ್ರಾಂಶ ಡೌನ್‌ಲೋಡ್ ಆಗುತ್ತದೆ.) ಡಿವಿಡಿಯಲ್ಲಿ ಬೇಕೆಂದರೆ ಹೆಚ್ಚುವರಿಯಾಗಿ 1060 ರೂ. ಹಾಗೂ ಸಾಗಾಟ ವೆಚ್ಚ 280 ರೂ. ಪಾವತಿಸಬೇಕಾಗುತ್ತದೆ.

* ನಿಮ್ಮ ಕಂಪ್ಯೂಟರ್ (ಡೆಸ್ಕ್‌ಟಾಪ್ ಅಥವಾ ಲ್ಯಾಪ್‌ಟಾಪ್) ಕನಿಷ್ಠ 1 ಗಿಗಾಹರ್ಟ್ಸ್ ಪ್ರೊಸೆಸರ್, 1 ಜಿಬಿ ರಾಂ, 16 ಜಿಬಿ ಹಾರ್ಡ್ ಡಿಸ್ಕ್ ಸ್ಪೇಸ್, ಗ್ರಾಫಿಕ್ಸ್ ಕಾರ್ಡ್ ಮುಂತಾದ ತಂತ್ರಾಂಶಗಳನ್ನು ಹೊಂದಿರಬೇಕು. ಟಚ್ ಸ್ಕ್ರೀನ್‌ನ ಅನುಭವ ನಿಮಗೆ ಅಗತ್ಯವೆಂದಾದರೆ, ಅದಕ್ಕೆ ತಕ್ಕನಾಗಿ ಮಾನಿಟರ್ ಬದಲಾಯಿಸಿಕೊಳ್ಳಬೇಕು.

ನಿಮ್ಮ ಕಂಪ್ಯೂಟರಲ್ಲಿ ಈಗಿರುವ ಫೈಲುಗಳು, ಪ್ರೋಗ್ರಾಂಗಳು ವಿಂಡೋಸ್ 8ದಲ್ಲಿ ಹೊಂದುತ್ತದೆಯೇ ಅಂತ ತಿಳಿದುಕೊಳ್ಳಲು http://windows.microsoft.com/en-IN/windows-8/upgrade-to-windows-8 ಎಂಬಲ್ಲಿರುವ ಒಂದು ಅಪ್‌ಗ್ರೇಡ್ ಅಸಿಸ್ಟೆಂಟ್ ಎಂಬ ಫೈಲ್ ಡೌನ್‌ಲೋಡ್ ಮಾಡಿಕೊಂಡು ರನ್ ಮಾಡಿದರೆ, ಅದು ನಿಮ್ಮ ಕಂಪ್ಯೂಟರನ್ನು ಶೋಧಿಸಿ ಎಲ್ಲ ವಿವರಗಳನ್ನು ಒಪ್ಪಿಸುತ್ತದೆ ಮತ್ತು ಅದರ ಮೂಲಕವೇ ನೀವು ವಿಂಡೋಸ್ 8 ಖರೀದಿ ಮಾಡಿ ಡೌನ್‌ಲೋಡ್ ಮಾಡಿಕೊಳ್ಳಬಹುದು. ಇನ್‌ಸ್ಟಾಲ್ ಮಾಡಿಕೊಳ್ಳುವಾಗ, ನಿಮ್ಮ ಫೈಲುಗಳು/ಪ್ರೋಗ್ರಾಂಗಳನ್ನು ಹಾಗೆಯೇ ಉಳಿಸಿಕೊಳ್ಳುವ ವ್ಯವಸ್ಥೆಯೂ ಇದೆ.

ಮೈಕ್ರೋಸಾಫ್ಟ್ ಕಂಪನಿಯು ವಿಂಡೋಸ್ ಎಕ್ಸ್‌ಪಿಗೆ ಶೀಘ್ರದಲ್ಲೇ ತನ್ನ ಬೆಂಬಲವನ್ನು ನಿಲ್ಲಿಸಲಿದೆ ಎಂಬ ಸುದ್ದಿಯ ಹಿನ್ನೆಲೆಯಲ್ಲಿ 10-12 ಸಾವಿರ ಬೆಲೆ ಬಾಳುವ ವಿಂಡೋಸ್ 8ರ ಪ್ರೋ ಆವೃತ್ತಿಯು ಕೇವಲ 699 ರೂ.ಗೆ ಸಿಗುತ್ತದೆಯೆಂದಾದರೆ ಇದು ಖಂಡಿತಾ ಲಾಭದಾಯಕವೇ.