ಸಾಫ್ಟ್‌ವೇರ್ ಇಲ್ಲದೆಯೇ ಪಿಡಿಎಫ್!

ವಿಜಯ ಕರ್ನಾಟಕ ಅಂಕಣ ಮಾಹಿತಿ@ತಂತ್ರಜ್ಞಾನ: ಡಿಸೆಂಬರ್ 02, 2013

ಯಾವುದೇ ಲೇಖನ, ಡಾಕ್ಯುಮೆಂಟ್‌ಗಳು, ಮಹತ್ವದ ದಾಖಲೆಗಳು, ಆನ್‌ಲೈನ್ ಬಿಲ್‌ಗಳು, ಆನ್‌ಲೈನ್ ರಶೀದಿಗಳೆಲ್ಲವನ್ನೂ ಸುರಕ್ಷಿತವಾಗಿ ಇರಿಸಿಕೊಳ್ಳುವ ಒಂದು ಫಾರ್ಮ್ಯಾಟ್ ಎಂದರೆ ಪಿಡಿಎಫ್ (ಪೋರ್ಟೆಬಲ್ ಡಾಕ್ಯುಮೆಂಟ್ ಫಾರ್ಮ್ಯಾಟ್). ಪ್ರಕಟವಾಗಿರುವ ಬಹುಮುಖ್ಯ ಲೇಖನಗಳನ್ನು ಕಾಯ್ದಿಟ್ಟುಕೊಳ್ಳಲು, ಆನ್‌ಲೈನ್‌ನಲ್ಲಿ ಅಥವಾ ನಿಮ್ಮ ಸ್ಮಾರ್ಟ್‌ಫೋನ್‌ಗಳಲ್ಲಿ ಪುಸ್ತಕಗಳನ್ನು ಓದಲು ಕೂಡ ಪಿಡಿಎಫ್ ನಮೂನೆಯು ನೆರವಾಗುತ್ತದೆ.

ಅಡೋಬಿ ಕಂಪನಿಯು ಪಿಡಿಎಫ್‌ಗೆ ಪ್ರಸಿದ್ಧಿ ಪಡೆದಿದೆ. ಅದರ ಪಿಡಿಎಫ್ ರೀಡರ್ ತಂತ್ರಾಂಶ ಉಚಿತವಾಗಿ ಲಭ್ಯವಿದೆ, ಆದರೆ ಪಿಡಿಎಫ್ ರೈಟರ್ (ಯಾವುದೇ ದಾಖಲೆಯನ್ನು ಪಿಡಿಎಫ್‌ಗೆ ಪರಿವರ್ತಿಸುವ ತಂತ್ರಾಂಶ) ಮಾತ್ರ ಉಚಿತವಲ್ಲ. ಆದರೂ ಕೂಡ ದುಬಾರಿ ವೆಚ್ಚದ ಸಾಫ್ಟ್‌ವೇರ್‌ಗಳನ್ನು ಖರೀದಿಸದೆಯೇ ಯಾವುದೇ ಡಾಕ್ಯುಮೆಂಟ್‌ಗಳನ್ನು ಉಚಿತವಾಗಿ ಪಿಡಿಎಫ್ ಮಾಡಿಕೊಳ್ಳಬಹುದು. Free PDF converter ಅಂತ ಅಂತರ್ಜಾಲದಲ್ಲಿ ಸರ್ಚ್ ಮಾಡಿದರೆ (ಗೂಗಲ್ ಅಥವಾ ಬಿಂಗ್ ಸರ್ಚ್ ಎಂಜಿನ್‌ಗಳ ಮೂಲಕ) ಸಾಕಷ್ಟು ಉಚಿತ ತಂತ್ರಾಂಶಗಳ ಪಟ್ಟಿಯೇ ಕಂಡುಬರುತ್ತದೆ. ಅವುಗಳಲ್ಲಿ doPDF.com ನಲ್ಲಿ ದೊರೆಯುವ ತಂತ್ರಾಂಶದ ಬಗ್ಗೆ ಈ ಹಿಂದೆ ತಿಳಿಸಿದ್ದೆ. ಇದಲ್ಲದೆ, ಆನ್‌ಲೈನ್‌ನಲ್ಲೇ ಪಿಡಿಎಫ್ ಮಾಡಬಲ್ಲ ಸಾಕಷ್ಟು ವ್ಯವಸ್ಥೆಗಳಿದ್ದರೂ, ಅದಕ್ಕಾಗಿ ನೀವು ಸೇವೆ ಒದಗಿಸುವ ತಾಣಗಳಿಗೆ ಹೋಗಬೇಕಾಗುತ್ತದೆ.

ಈಗ, ನಾನಿಲ್ಲಿ ಹೇಳಹೊರಟಿರುವುದು, ನಿಮ್ಮ ಸಿಸ್ಟಂನಲ್ಲಿ ಯಾವುದೇ ಬೇರೆ ಸಾಫ್ಟ್‌ವೇರ್‌ಗಳನ್ನು ಇನ್‌ಸ್ಟಾಲ್ ಮಾಡಿಕೊಳ್ಳದೆಯೇ ಪಿಡಿಎಫ್ ಮಾಡಬಹುದಾದ ಒಂದು ವಿಧಾನದ ಬಗ್ಗೆ. ಇಷ್ಟೇ ಅಲ್ಲ, ನಿಮಗೆ ಯಾವುದಾದರೂ ಮಹತ್ವದ ಇಮೇಲ್ ಬಂದಿದ್ದರೆ, ಅದನ್ನು ಭದ್ರವಾಗಿ ಪಿಡಿಎಫ್ ರೂಪದಲ್ಲಿ ಕಾಯ್ದಿಟ್ಟುಕೊಳ್ಳಬೇಕೆಂದು ನೀವು ಬಯಸಿದರೆ, ಅದಕ್ಕೂ ಅನುಕೂಲವಾದ ಒಂದು ವ್ಯವಸ್ಥೆ ಇದೆ. ಅದುವೇ pdfconvert.me.

ಇದು ಹೇಗೆ ಕೆಲಸ ಮಾಡುತ್ತದೆ?
ಇಮೇಲ್ ಅನ್ನು ಪಿಡಿಎಫ್ ಆಗಿ ಪರಿವರ್ತಿಸಲು ಹೆಚ್ಚೇನೂ ಕೆಲಸವಿರುವುದಿಲ್ಲ. ನಿಮಗೆ ಬಂದಿರುವ ಇಮೇಲ್ ಅನ್ನು pdfconvert@pdfconvert.me ಎಂಬ ಮೇಲ್ ವಿಳಾಸಕ್ಕೆ ಫಾರ್ವರ್ಡ್ ಮಾಡಿಬಿಡಿ. ಅಷ್ಟೆ. ಒಂದೆರಡು ನಿಮಿಷಗಳಲ್ಲಿ ಆ ಇಮೇಲ್‌ನ ಪ್ರತಿಯು ಪಿಡಿಎಫ್ ರೂಪದಲ್ಲಿ ಪ್ರತ್ಯುತ್ತರದ ಇಮೇಲ್‌ಗೆ ಅಟ್ಯಾಚ್‌ಮೆಂಟ್ ಆಗಿ ನಿಮ್ಮ ಇನ್‌ಬಾಕ್ಸ್‌ಗೆ ಬಂದು ಬೀಳುತ್ತದೆ.

ನಿಮ್ಮಲ್ಲಿ ಯಾವುದೇ ಎಂಎಸ್ ವರ್ಡ್, ಎಕ್ಸೆಲ್ ಅಥವಾ ಪವರ್‌ಪಾಯಿಂಟ್ ದಾಖಲೆಗಳಿದ್ದರೂ ಕೂಡ, ಅದನ್ನೂ ಸುಲಭವಾಗಿ ಪಿಡಿಎಫ್ ರೂಪಕ್ಕೆ ಪರಿವರ್ತಿಸಿಕೊಳ್ಳಬಹುದು. ಅದಕ್ಕೆ ನೀವು ಈ ಅಟ್ಯಾಚ್‌ಮೆಂಟ್‌ಗಳನ್ನು ಕಳುಹಿಸಬೇಕಾಗಿರುವುದು attachconvert@pdfconvert.me ಎಂಬ ಇಮೇಲ್ ವಿಳಾಸಕ್ಕೆ. ಕಳುಹಿಸಿದ ತಕ್ಷಣ, ಅವುಗಳ ಪಿಡಿಎಫ್ ರೂಪಗಳು ಅಟ್ಯಾಚ್‌ಮೆಂಟ್ ಆಗಿ ನಿಮಗೆ ಮರಳಿ ಬರುತ್ತವೆ. ಆದರೆ ಗಮನಿಸಿ; ಹಲವು ಫೈಲ್‌ಗಳಿವೆ ಎಂದುಕೊಂಡು ಒಂದೇ ಬಾರಿ ಮೇಲ್‌ಗೆ ಅಟ್ಯಾಚ್ ಮಾಡಿ ಕಳುಹಿಸಬೇಡಿ. ಹಾಗೆ ಮಾಡಿದರೆ ನಿಮಗೆ ವಾಪಸ್ ಬರೋದು ಮೊದಲನೇ ಫೈಲ್‌ನ ಪಿಡಿಎಫ್ ಮಾತ್ರ.

ಇನ್ನೂ ಒಂದು ಅನುಕೂಲವಿದೆ. ಯಾವುದಾದರೂ ವೆಬ್ ತಾಣದಲ್ಲಿ ಒಂದು ಪುಟ ನಿಮಗೆ ಆಸಕ್ತಿ ಮೂಡಿತು ಅಂತಿಟ್ಟುಕೊಳ್ಳಿ. ಅದನ್ನು ತಕ್ಷಣಕ್ಕೆ ಓದಲು ಸಮಯವಿಲ್ಲ, ಸಮಯವಾದಾಗ ಇಂಟರ್ನೆಟ್ ಸಂಪರ್ಕವಿಲ್ಲದೆಯೇ ಆರಾಮವಾಗಿ ಓದಬೇಕೆಂದುಕೊಳ್ಳುತ್ತೀರಿ. ಹಾಗಿದ್ದರೆ, ಆ ಪುಟದ ವಿಳಾಸವನ್ನು (ಯುಆರ್‌ಎಲ್) ಇಮೇಲ್‌ನ ಸಂದೇಶ ಭಾಗದಲ್ಲಿ ಪೇಸ್ಟ್ ಮಾಡಿ webconvert@pdfconvert.me ಎಂಬ ಇಮೇಲ್ ವಿಳಾಸಕ್ಕೆ ಕಳುಹಿಸಿ. ಕೆಲವೇ ಕ್ಷಣಗಳಲ್ಲಿ ಆ ಪುಟದ ಪಿಡಿಎಫ್ ನಿಮ್ಮ ಇನ್‌ಬಾಕ್ಸ್‌ನಲ್ಲಿರುತ್ತದೆ. ಕೆಲವೊಂದು ಕಡೆ ಇಂಟರ್ನೆಟ್‌ಗೆ ಫಿಲ್ಟರ್ ಅಥವಾ ಕೆಲವು ಸೈಟುಗಳನ್ನು ಬ್ಲಾಕ್ ಮಾಡಿರುವ ಸಂದರ್ಭದಲ್ಲಿ, ಆ ಪುಟದಲ್ಲಿ ಲಭ್ಯವಿರುವ ಪೂರ್ತಿ ಮಾಹಿತಿಯನ್ನು ನೋಡಲು ಇದು ಅನುಕೂಲ.

pdfconvert.me ಗೆ ನೀವು ಕಳುಹಿಸುವ ಇಮೇಲ್ ಗೌಪ್ಯವಾಗಿರುತ್ತದೆಯೇ? ಈ ಸೈಟಿನ ಷರತ್ತುಗಳು ಮತ್ತು ನಿಯಮಗಳ ಪುಟದಲ್ಲಿ ಇದನ್ನು ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದ್ದು, ರೂಪ ಪರಿವರ್ತನೆ (ಪಠ್ಯದಿಂದ ಪಿಡಿಎಫ್) ಸಂದರ್ಭದಲ್ಲಿ ಮಾತ್ರವೇ ಅವರ ಸರ್ವರ್‌ನಲ್ಲಿ ನಿಮ್ಮ ಇಮೇಲ್ ಸ್ಟೋರ್ ಆಗಿರುತ್ತದೆ.

ಆದರೆ, ಇದರಲ್ಲಿ ಪರೀಕ್ಷಿಸಿ ನೋಡಿದಾಗ, ಈ ಪಿಡಿಎಫ್ ವ್ಯವಸ್ಥೆಯು ಯೂನಿಕೋಡ್ ಅಕ್ಷರಶೈಲಿಯಾಗಲೀ, ನುಡಿ, ಬರಹ, ಶ್ರೀಲಿಪಿಯಲ್ಲಿ ಬರೆದಿರುವ ದಾಖಲೆಗಳನ್ನು ಬೆಂಬಲಿಸುವುದಿಲ್ಲವೆಂಬುದು ತಿಳಿಯಿತು. ಅಂದರೆ, ಪಿಡಿಎಫ್‌ನಲ್ಲಿ ಅಕ್ಷರಗಳು ಜಂಕ್ ರೂಪದಲ್ಲಿ ಕಾಣಿಸುತ್ತದೆ. ಹೀಗಾಗಿ, ಕನ್ನಡದ ದಾಖಲೆಗಳನ್ನು ಪಿಡಿಎಫ್ ಮಾಡಲು doPDF ತಂತ್ರಾಂಶವನ್ನೇ ಬಳಸಬಹುದು.

ನಿಮ್ಮ ಮೊಬೈಲ್ ಫೋನ್‌ಗಳಲ್ಲಿ ಇಮೇಲ್ ಬಳಸುತ್ತಿದ್ದರೂ ಕೂಡ, ಈ ರೀತಿಯ ಇಮೇಲ್ ಮೂಲಕ ಪಿಡಿಎಫ್ ತರಿಸಿಕೊಳ್ಳುವ ವ್ಯವಸ್ಥೆಯ ಅನುಕೂಲ ಪಡೆದುಕೊಳ್ಳಬಹುದು. ಅದಲ್ಲದಿದ್ದರೆ, ಕಂಪ್ಯೂಟರಿನಂತೆಯೇ ಪಿಡಿಎಫ್ ಕನ್ವರ್ಟರ್ ಆ್ಯಪ್‌ಗಳು ಆಯಾ ಆ್ಯಪ್ ಸ್ಟೋರ್‌ಗಳಲ್ಲಿಯೂ ಸಿಗುತ್ತವೆ.

ನಿಮ್ಮ ಡಾಕ್ಯುಮೆಂಟ್‌ಗಳನ್ನು ಉಚಿತವಾಗಿ ಪಿಡಿಎಫ್‌ಗೆ ಪರಿವರ್ತಿಸಿ

ಮಾಹಿತಿ@ತಂತ್ರಜ್ಞಾನ – 34 (ಮೇ 13, 2013ರ ವಿಜಯ ಕರ್ನಾಟಕ ಅಂಕಣ)

ಹೊಸದಾಗಿ ಲ್ಯಾಪ್‌ಟಾಪ್ ಅಥವಾ ಡೆಸ್ಕ್‌ಟಾಪ್ ಕಂಪ್ಯೂಟರ್ ಕೊಂಡಾಗ ಅದರಲ್ಲಿ ಸೀಮಿತ ಸಾಫ್ಟ್‌ವೇರ್‌ಗಳಷ್ಟೇ ಇರುತ್ತವೆ. ನಮಗೆ ಬೇಕಾದ ತಂತ್ರಾಂಶಗಳನ್ನು ನಾವೇ ಅಳವಡಿಸಿಕೊಳ್ಳಬೇಕಾಗುತ್ತದೆ. ಕೆಲವು ತಂತ್ರಾಂಶಗಳಿಗೆ ಹಣ ಪಾವತಿಸಬೇಕಾಗುತ್ತದೆಯಾದರೆ, ಹೆಚ್ಚಿನವು ಆನ್‌ಲೈನ್‌ನಲ್ಲಿ ಉಚಿತವಾಗಿಯೇ ದೊರೆಯುತ್ತವೆ. ಅಂಥವುಗಳಲ್ಲಿ, ಡಿಜಿಟಲ್ ಯುಗದಲ್ಲಿ ನಮ್ಮ ಎಲ್ಲ ದಾಖಲೆಗಳನ್ನು, ಬರಹಗಳನ್ನು ಅಚ್ಚುಕಟ್ಟಾಗಿ ಕಾಯ್ದಿಡಲು ಮತ್ತು ಎಲ್ಲಿಬೇಕೆಂದರಲ್ಲಿ ಅದನ್ನು ನೋಡಲು ಅನುಕೂಲ ಮಾಡಿಕೊಡುವ ಉಚಿತ ತಂತ್ರಾಂಶದ ಬಗ್ಗೆ ಇಲ್ಲಿದೆ ಮಾಹಿತಿ.

PDF (ಪೋರ್ಟೆಬಲ್ ಡಾಕ್ಯುಮೆಂಟ್ ಫಾರ್ಮ್ಯಾಟ್) ಎಂಬ ಪದವನ್ನು ಕೇಳಿದ್ದೀರಿ. ಅಂದರೆ ನಿಮ್ಮ ಡಾಕ್ಯುಮೆಂಟ್‌ಗಳನ್ನು ಪೋರ್ಟೆಬಲ್ (ಎಲ್ಲಿ ಬೇಕಾದಲ್ಲಿಗೆ ಒಯ್ಯಲು ಅನುಕೂಲವಾಗಿಸುವ) ರೂಪಕ್ಕೆ ಪರಿವರ್ತಿಸುವುದು. ಯಾವುದೇ ಲೇಖನವೋ, ಕೋಷ್ಟಕಗಳೋ, ಬೇಕಾದಾಗ ಪ್ರಿಂಟ್ ತೆಗೆದುಕೊಳ್ಳಲು ಅನುಕೂಲವಾಗುವಂತೆ ಸ್ಕ್ಯಾನ್ ಮಾಡಿಟ್ಟಿರುವ ನಿಮ್ಮ ಪ್ಯಾನ್ ಕಾರ್ಡ್, ಎಲೆಕ್ಷನ್ ಐಡಿ, ಡ್ರೈವಿಂಗ್ ಲೈಸೆನ್ಸ್ ಅಥವಾ ಚಿತ್ರಗಳನ್ನು ಪಿಡಿಎಫ್ ರೂಪಕ್ಕೆ ಪರಿವರ್ತಿಸಿಟ್ಟರೆ ಅದರ ಗುಣಮಟ್ಟವೂ ಚೆನ್ನಾಗಿರುತ್ತದೆ.

ಮೈಕ್ರೋಸಾಫ್ಟ್‌ನ ವರ್ಡ್, ಎಕ್ಸೆಲ್, ವರ್ಡ್‌ಪ್ಯಾಡ್, ಪವರ್‌ಪಾಯಿಂಟ್, ನೋಟ್‌ಪ್ಯಾಡ್ ಮುಂತಾದವುಗಳನ್ನು ಒಳಗೊಂಡ ‘ಮೈಕ್ರೋಸಾಫ್ಟ್ ಆಫೀಸ್’ ಎಂಬ ಪಠ್ಯ ಪರಿಷ್ಕರಣಾ ತಂತ್ರಾಂಶದಲ್ಲಿ ನೀವು ಲೇಖನವನ್ನೋ ಅಥವಾ ಯಾವುದೇ ಕೋಷ್ಟಕವನ್ನೋ ಸಿದ್ಧಪಡಿಸಿಟ್ಟುಕೊಳ್ಳುತ್ತೀರಿ ಇಲ್ಲವೇ ಇನ್ಯಾವುದೇ ದಾಖಲೆಯನ್ನು ಸಿದ್ಧಪಡಿಸಿರುತ್ತೀರಿ. ‘ಆಫೀಸ್’ ತಂತ್ರಾಂಶಕ್ಕೆ ಹಣ ಪಾವತಿಸಬೇಕಾಗುತ್ತದೆಯಾದುದರಿಂದ ಎಲ್ಲ ಕಂಪ್ಯೂಟರುಗಳಲ್ಲಿ ಇದು ಇರುವ ಬಗ್ಗೆ ಖಚಿತತೆ ಇರುವುದಿಲ್ಲ. ಅದು ಇಲ್ಲದಿರುವ ಕಂಪ್ಯೂಟರುಗಳಲ್ಲಿ ನಿಮ್ಮ ಡಾಕ್ಯುಮೆಂಟ್‌ಗಳನ್ನು ಓದಲು ನೆರವಿಗೆ ಬರುವುದು ಪಿಡಿಎಫ್. ಮಾತ್ರವಲ್ಲ, ಕಥೆ, ಕಾದಂಬರಿಗಳು, ಯಾವುದೇ ಸಾಹಿತ್ಯ ಪುಸ್ತಕಗಳು ಈಗ ಆನ್‌ಲೈನ್‌ನಲ್ಲಿ ಲಭ್ಯವಾಗುತ್ತಿರುವುದು ಕೂಡ ಈ ಪಿಡಿಎಫ್ ರೂಪದಲ್ಲಿಯೇ. ನೀವು ಪ್ರಯಾಣದಲ್ಲಿರುವಾಗ ಕಥೆ, ಕಾದಂಬರಿಗಳನ್ನು ಓದಲು ಪಿಡಿಎಫ್‌ನಿಂದ ಅನುಕೂಲ. ನಿಮ್ಮ ಸ್ಮಾರ್ಟ್‌ಫೋನ್‌ಗಳಲ್ಲಿಯೂ ಈ ಡಿಜಿಟಲೈಸ್ಡ್ ಪುಸ್ತಕವನ್ನು ಓದಿಕೊಳ್ಳಬಹುದು.

ನಮ್ಮ ಹಲವಾರು ಹಳೆಯ ಸಾಹಿತ್ಯ ರತ್ನಗಳೆಲ್ಲವೂ ಈಗ ಡಿಜಿಟಲೈಸ್ ಆಗಿಬಿಟ್ಟಿವೆ, ಅಂದರೆ ಪಿಡಿಎಫ್ ರೂಪದಲ್ಲಿ ಲಭ್ಯವಿವೆ. ಈಗಿನ ಯುನಿಕೋಡ್ ಅಕ್ಷರ ತಂತ್ರಾಂಶವು ಬೆಳಕಿಗೆ ಬರುವ ಮುನ್ನ ನಾವೆಲ್ಲರೂ ಬರಹ, ನುಡಿ, ಯುನಿಕೋಡ್, ಶ್ರೀಲಿಪಿಯೇ ಮೊದಲಾದ ಹಲವಾರು ಫಾಂಟ್ ವ್ಯವಸ್ಥೆಗಳನ್ನು ಬಳಸಿ ಲೇಖನಗಳನ್ನು ಸಿದ್ಧಪಡಿಸಿಟ್ಟುಕೊಳ್ಳುತ್ತಿದ್ದೆವು. ಪಿಡಿಎಫ್ ರೂಪಕ್ಕೆ ಪರಿವರ್ತಿಸಿಬಿಟ್ಟರೆ ಯಾವುದೇ ಕಂಪ್ಯೂಟರ್‌ನಲ್ಲಿ ಆಯಾ ಫಾಂಟ್‌ಗಳನ್ನು ಅಥವಾ ಫಾಂಟ್ ತಂತ್ರಾಂಶವನ್ನು ಇನ್‌ಸ್ಟಾಲ್ ಮಾಡಿಕೊಳ್ಳದೆಯೇ ಈ ಲೇಖನಗಳೆಲ್ಲವನ್ನೂ ಓದಬಹುದಾಗಿದೆ.

ಪಿಡಿಎಫ್‌ಗೆ ಸಂಬಂಧಿಸಿದಂತೆ ಅತ್ಯಂತ ಹೆಚ್ಚು ಪ್ರಸಿದ್ಧಿ ಪಡೆದಿರುವುದು ಅಡೋಬಿ (Adobe) ಕಂಪನಿಯ ತಂತ್ರಾಂಶಗಳು. ಮುಖ್ಯವಾಗಿ ಈ ತಂತ್ರಾಂಶದಲ್ಲಿ ಎರಡು ವಿಧ, ಒಂದನೆಯದು ಪಿಡಿಎಫ್ ರೀಡರ್ ಹಾಗೂ ಎರಡನೆಯದು ಪಿಡಿಎಫ್ ಎಡಿಟರ್/ರೈಟರ್. ಮೊದಲನೆಯದನ್ನು ಅಡೋಬಿ ಕಂಪನಿಯು ಉಚಿತವಾಗಿ ದೊರಕಿಸಿಕೊಟ್ಟಿದೆ. ಆದರೆ ಇದರಲ್ಲಿ ಪಿಡಿಎಫ್ ಮಾಡುವ ವ್ಯವಸ್ಥೆಯಿರುವುದಿಲ್ಲ. ಎರಡನೆಯದರಲ್ಲಿ, ಪಿಡಿಎಫ್ ಡಾಕ್ಯುಮೆಂಟನ್ನು ತಿದ್ದುಪಡಿ ಮಾಡುವ, ಅಡಿಗೆರೆ ಹಾಕುವ, ಬಣ್ಣ ಹಚ್ಚುವ, ಕಾಮೆಂಟ್ ಮಾಡುವ, ನಿರ್ದಿಷ್ಟ ಪದ ಅಥವಾ ಪ್ಯಾರಾ ಒಂದನ್ನು ಹೈಲೈಟ್ ಮಾಡುವ ಎಲ್ಲ ಅವಕಾಶಗಳೂ ಇರುತ್ತವೆ ಮತ್ತು ಯಾವುದೇ ಡಾಕ್ಯುಮೆಂಟನ್ನು ಪಿಡಿಎಫ್ ಆಗಿಯೂ ಪರಿವರ್ತಿಸಬಹುದಾಗಿರುವುದರಿಂದ ಇದಕ್ಕೆ ಹಣ ಪಾವತಿಸಬೇಕಾಗುತ್ತದೆ.

ನಮಗೆ ಬೇಕಾಗಿರುವುದು ಲೇಖನಗಳು, ಡಾಕ್ಯುಮೆಂಟ್‌ಗಳನ್ನು ಪಿಡಿಎಫ್ ರೂಪದಲ್ಲಿ ಪರಿವರ್ತಿಸಿ ಸೇಫಾಗಿ ಇರಿಸಿಕೊಳ್ಳಲು ಅನುಕೂಲ ಮಾಡಿಕೊಡುವ ಒಂದು ಉಚಿತ ತಂತ್ರಾಂಶ. ಸಾಕಷ್ಟು ತಂತ್ರಾಂಶಗಳು ಲಭ್ಯವಿದ್ದರೂ, ಹೆಚ್ಚು ಆಪ್ತವಾಗಿದ್ದು ಡೂಪಿಡಿಎಫ್ (dopdf.com). ಈ ತಂತ್ರಾಂಶವನ್ನು ಅದರ ವೆಬ್‌ಸೈಟಿನಿಂದ ಉಚಿತವಾಗಿ ಡೌನ್‌ಲೋಡ್ ಮಾಡಿಕೊಂಡು ಇನ್‌ಸ್ಟಾಲ್ ಮಾಡಿಕೊಳ್ಳಿ.

ಬಳಿಕ ನಿಮ್ಮ ಯಾವುದೇ ಲೇಖನ ಅಥವಾ ಚಿತ್ರವನ್ನು ಓಪನ್ ಮಾಡಿ, ಅದನ್ನು ಪ್ರಿಂಟ್ ಮಾಡಲು (Fle > Print… ಅಥವಾ Ctrl+P ಒತ್ತಿದರೆ ಸಾಕು) ಹೋದಾಗ, ಪ್ರಿಂಟರ್ ಆಯ್ಕೆ ಮಾಡುವ ವಿಂಡೋ ಕಾಣಿಸುತ್ತದೆ. ಅದರ ಡ್ರಾಪ್‌ಡೌನ್ ಮೆನುವಿನಲ್ಲಿ doPDF ಎಂಬುದನ್ನು ಆಯ್ದುಕೊಂಡು ಓಕೆ ಒತ್ತಿ. ಮತ್ತೊಂದು ವಿಂಡೋ ತೆರೆದುಕೊಳ್ಳುತ್ತದೆ. ಅಲ್ಲಿ ನಿಮ್ಮ ಪಿಡಿಎಫ್ ಡಾಕ್ಯುಮೆಂಟನ್ನು ಎಲ್ಲಿ ಸೇವ್ ಮಾಡಬೇಕೆಂದು ಕೇಳಲಾಗುತ್ತದೆ. ಸೂಕ್ತ ಸ್ಥಳವನ್ನು ಆಯ್ಕೆ ಮಾಡಿ ಓಕೆ ಒತ್ತಿಬಿಟ್ಟರೆ, ನಿಮಗೆ ಬೇಕಾದ ಪಿಡಿಎಫ್ ಡಾಕ್ಯುಮೆಂಟ್ ರೆಡಿ. ಯಾವುದೇ ಫೋಟೋಗಳನ್ನು ಕೂಡ ಪಿಡಿಎಫ್ ರೂಪದಲ್ಲಿ ಪರಿವರ್ತಿಸಿಟ್ಟುಕೊಳ್ಳಬಹುದು ಎಂಬುದನ್ನು ನೆನಪಿಡಿ.