ಹ್ಯಾಕರ್‌ಗಳಿಂದ ರಕ್ಷಿಸಿಕೊಳ್ಳಲು ಮೇಲ್, ಫೋನ್, ಬ್ರೌಸರ್ ಸುರಕ್ಷಿತವಾಗಿಟ್ಟುಕೊಳ್ಳಿ

ಭಾರತದಲ್ಲಿ ಗೂಗಲ್ ಸೇವೆ ಬಳಸದಿರುವ ವ್ಯಕ್ತಿಯೇ ಇಲ್ಲ ಎನ್ನಬಹುದೇನೋ. ಜಿಮೇಲ್ ಇಮೇಲ್, ಹ್ಯಾಂಗೌಟ್ಸ್, ಕ್ರೋಮ್ ಬ್ರೌಸರ್, ಮೊಬೈಲ್ ಆಪರೇಟಿಂಗ್ ಸಿಸ್ಟಂ (ಆಂಡ್ರಾಯ್ಡ್), ಗೂಗಲ್ ಮ್ಯಾಪ್, ಗೂಗಲ್ ಕ್ಯಾಲೆಂಡರ್, ಸರ್ಚ್ ಎಂಜಿನ್… ಹೀಗೆ ಕಂಪ್ಯೂಟರಲ್ಲಿ ತೊಡಗಿಕೊಂಡವರಿಗೆ ಪ್ರತಿಯೊಂದು ಕೂಡ ಅತ್ಯುಪಯುಕ್ತ ವ್ಯವಸ್ಥೆಗಳನ್ನು ಅಮೆರಿಕದ ತಂತ್ರಜ್ಞಾನ ದಿಗ್ಗಜ ಸಂಸ್ಥೆಯಾಗಿರುವ ಗೂಗಲ್ ಒದಗಿಸಿದೆ. ಜನ ಸಾಮಾನ್ಯರಿಗೆ ಹತ್ತಿರವಾಗುತ್ತಲೇ, ಆನ್‌ಲೈನ್ ಚಟುವಟಿಕೆಯ ವೇಳೆ ಸುರಕ್ಷಿತವಾಗಿರುವುದರ ಬಗ್ಗೆಯೂ ಅದು ಮಾಹಿತಿ ನೀಡುತ್ತದೆ. ಇದಕ್ಕಾಗಿಯೇ ಗೂಗಲ್ ಟಿಪ್ಸ್ ಎಂಬ ಜಾಲ ತಾಣವನ್ನೂ ತೆರೆದಿದೆ. ಸದಾ ಕಾಲ ಸ್ಮಾರ್ಟ್‌ಫೋನ್ ಮೂಲಕ ಆನ್‌ಲೈನ್ ಸಂಪರ್ಕದಲ್ಲೇ ಇರುವುದರಿಂದ, ನಮ್ಮ ಸೂಕ್ಷ್ಮ ಮಾಹಿತಿಯ ಬಗ್ಗೆ ಸುರಕ್ಷಿತವಾಗಿರುವುದು ನಮ್ಮ ಕೈಯಲ್ಲೇ ಇದೆ. ಹ್ಯಾಕರ್‌ಗಳಿಂದ ರಕ್ಷಿಸಿಕೊಳ್ಳಲು ನಾವು-ನೀವು ಮಾಡಬಹುದಾದ ಕೆಲವು ಪ್ರಮುಖ ಮತ್ತು ಸುಲಭ ಸಲಹೆಗಳು ಇಲ್ಲಿವೆ.

ಬ್ರೌಸರ್: ಕಂಪ್ಯೂಟರಿನಲ್ಲಿ ಅಥವಾ ಮೊಬೈಲ್‌ನಲ್ಲಿ ಯಾವುದೇ ಬ್ರೌಸರ್‌ಗೆ ಆಯಾ ಸಂಸ್ಥೆಗಳು ಒದಗಿಸುವ ಅಪ್‌ಡೇಟ್‌ಗಳನ್ನು ತಪ್ಪದೇ ಇನ್‌ಸ್ಟಾಲ್ ಮಾಡಿಕೊಳ್ಳಿ. ಹೊಸ ವೈರಸ್/ಮಾಲ್‌ವೇರ್ ಬೆದರಿಕೆಗಳು ಬಂದಾಗ ಅವುಗಳನ್ನು ಎದುರಿಸಲು  ಮೈಕ್ರೋಸಾಫ್ಟ್‌ನ ಇಂಟರ್ನೆಟ್ ಎಕ್ಸ್‌ಪ್ಲೋರರ್, ಮೋಝಿಲ್ಲಾದ ಫೈರ್‌ಫಾಕ್ಸ್, ಒಪೆರಾ, ಆ್ಯಪಲ್‌ನ ಸಫಾರಿ ಇತ್ಯಾದಿಗಳು ಕಾಲ ಕಾಲಕ್ಕೆ ಅಪ್‌ಡೇಟ್‌ಗಳನ್ನು ಬಳಕೆದಾರರಿಗೆ ಒದಗಿಸುತ್ತಲೇ ಇರುತ್ತವೆ. ಅಪ್‌ಡೇಟ್ ಮಾಡಿಕೊಳ್ಳದಿದ್ದರೆ ಮಾಹಿತಿ ಕದ್ದು, ವಂಚನೆ ಎಸಗುವ ಹ್ಯಾಕರ್‌ಗಳ ಕೆಲಸ ಸುಲಭವಾಗುತ್ತದೆ.

ಆಂಡ್ರಾಯ್ಡ್: ನಿಮ್ಮ ಸ್ಮಾರ್ಟ್‌ಫೋನ್‌ನ ಸ್ಕ್ರೀನ್ ಯಾವತ್ತೂ ಪಾಸ್‌ವರ್ಡ್, ಪಿನ್ ಅಥವಾ ಸ್ಕ್ರೀನ್‌ನಲ್ಲಿ ಗೆರೆ ಎಳೆಯುವ ‘ಪ್ಯಾಟರ್ನ್’ ಮೂಲಕ ಇಲ್ಲವೇ ನಿಮ್ಮ ಮುಖ ನೋಡಿದರಷ್ಟೇ ಅನ್‌ಲಾಕ್ ಆಗುವಂತೆ ನೋಡಿಕೊಳ್ಳಿ. ಯಾಕೆಂದರೆ, ಅದರೊಳಗಿರುವ ನಿಮ್ಮ ಸೂಕ್ಷ್ಮ ಮಾಹಿತಿಯನ್ನು ಬೇರೆಯವರು ನೋಡಬಹುದು ಅಥವಾ ಪಾಸ್‌ವರ್ಡ್ ಬದಲಾಯಿಸಲೂಬಹುದು. ಈ ಮೂಲಕ ನಿಮ್ಮ ಫೋನನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಬಹುದು.

ಆಂಡ್ರಾಯ್ಡ್ ಡಿವೈಸ್ ಮ್ಯಾನೇಜರ್: ರಿಮೋಟ್ ಆಗಿ ನಿಮ್ಮ ಸ್ಮಾರ್ಟ್ ಸಾಧನವನ್ನು ಪತ್ತೆ ಮಾಡಬಲ್ಲ, ರಿಂಗ್ ಮಾಡಬಲ್ಲ ಹಾಗೂ ತುರ್ತು ಸಂದರ್ಭಗಳಲ್ಲಿ ಅದರಲ್ಲಿನ ಎಲ್ಲ ಮಾಹಿತಿಯನ್ನು ಅಳಿಸಿಹಾಕಬಲ್ಲ ಸಾಮರ್ಥ್ಯ ಆಂಡ್ರಾಯ್ಡ್ ಡಿವೈಸ್ ಮ್ಯಾನೇಜರ್ ಎಂಬ (www.google.com/android/devicemanager) ತಾಣದಲ್ಲಿದೆ. ಇದನ್ನು ಫೋನ್‌ನಲ್ಲಿ ಮೊದಲೇ ಎನೇಬಲ್ ಮಾಡಿಕೊಳ್ಳಿ. (ಗೂಗಲ್ ಸೆಟ್ಟಿಂಗ್ಸ್ > ಸೆಕ್ಯುರಿಟಿ > ಆಂಡ್ರಾಯ್ಡ್ ಡಿವೈಸ್ ಮ್ಯಾನೇಜರ್ ಎಂಬಲ್ಲಿ Remotely Locate this device ಮತ್ತು Allow Remote lock and erase ಎಂಬುದನ್ನು ಆನ್ ಮಾಡಿಕೊಳ್ಳಿ).

ಗೂಗಲ್ ಖಾತೆಗೆ 2 ಹಂತದ ಭದ್ರತೆ: ನಿಮ್ಮ ಖಾತೆಗೆ ಯಾರಾದರೂ ಮಾಮೂಲಿ ಸ್ಥಳದ ಹೊರತಾಗಿ ಬೇರೆಡೆ ಇರುವ ಅಪರಿಚಿತ ಕಂಪ್ಯೂಟರ್‌ನಿಂದ ಲಾಗಿನ್ ಆಗದಂತೆ ತಡೆಯುವ ನಿಟ್ಟಿನಲ್ಲಿ ಎರಡು ಹಂತದ ದೃಢೀಕರಣ ವ್ಯವಸ್ಥೆಯನ್ನು ಆನ್ ಮಾಡಿಕೊಳ್ಳಿ. (ಜಿಮೇಲ್ ಲಾಗಿನ್ ಆಗಿ, ನಿಮ್ಮ ಫೋಟೋ ಇರುವ ಜಾಗ ಕ್ಲಿಕ್ ಮಾಡಿದರೆ, Accounts ಅಂತ ಕ್ಲಿಕ್ ಮಾಡಿ. ನಂತರ Signing in ಎಂದಿರುವಲ್ಲಿ 2-step Verification ಆನ್ ಮಾಡಿಕೊಳ್ಳಿ.) ಪ್ರತಿ ಬಾರಿ ಲಾಗಿನ್ ಆಗುವ ಮುನ್ನ ನಿಮ್ಮ ಮೊಬೈಲ್‌ಗೆ ಒಂದು ಪ್ರತ್ಯೇಕ ಕೋಡ್ ಕಳುಹಿಸಲಾಗುತ್ತದೆ. ಅದನ್ನು ಬಳಸಿದಲ್ಲಿ ಮಾತ್ರ ಲಾಗಿನ್ ಆಗಲು ಸಾಧ್ಯವಾಗುವುದರಿಂದ ಹೆಚ್ಚು ಸುರಕ್ಷಿತ.

ಗೂಗಲ್ ಪ್ಲೇ ಸ್ಟೋರ್‌ಗೂ ಲಾಕ್: ಮಕ್ಕಳು ಅಥವಾ ಬೇರೆಯವರು ನಿಮ್ಮ ಮೊಬೈಲ್ ಮೂಲಕ ಪ್ಲೇ ಸ್ಟೋರ್‌ನಲ್ಲಿ ಅಪರಿಚಿತ ಆ್ಯಪ್ ಖರೀದಿ ಅಥವಾ ಇನ್‌ಸ್ಟಾಲ್ ಮಾಡದಂತೆ, ಪಾಸ್‌ವರ್ಡ್ ಮೂಲಕ ರಕ್ಷಣೆ ಮಾಡಿಕೊಳ್ಳಿ. Play Store ನ ಸೆಟ್ಟಿಂಗ್ಸ್‌ನಲ್ಲಿ, User Controls ನಲ್ಲಿ Require Authentication ಎಂಬುದನ್ನು ಆನ್ ಮಾಡಿಡಿ.

ಪಾಸ್‌ವರ್ಡ್ ಬಗ್ಗೆ ಕಟ್ಟುನಿಟ್ಟು: ಆನ್‌ಲೈನ್‌ನಲ್ಲಿ ಬಹುತೇಕ ಎಲ್ಲಕ್ಕೂ ಇಮೇಲ್ ಖಾತೆಯೇ ಪ್ರಧಾನವಾಗಿರುವುದರಿಂದ, ನಿಮ್ಮ ಇಮೇಲ್ ಹ್ಯಾಕ್ ಮಾಡದಂತಾಗಲು, ಕ್ಲಿಷ್ಟವಾದ, ಬೇರೆಯವರಿಗೆ ಊಹಿಸಲು ಸಾಧ್ಯವಾಗದ ಪಾಸ್‌ವರ್ಡ್ ಬಳಸಿ (ಜನ್ಮದಿನ, ಪತ್ನಿಯ, ಪತಿಯ ಹೆಸರು ಇತ್ಯಾದಿ ಬೇಡ). ಪ್ರತಿಯೊಂದು ಐಡಿಗೆ ಪ್ರತ್ಯೇಕ ಪಾಸ್‌ವರ್ಡ್ ಇಟ್ಟುಕೊಳ್ಳಿ. ಪಾಸ್‌ವರ್ಡ್ ರಿಕವರಿ ಆಯ್ಕೆಗಳನ್ನು (ಬೇರೊಂದು ಇಮೇಲ್, ಸೆಕ್ಯುರಿಟಿ ಪ್ರಶ್ನೆ, ಜನ್ಮ ದಿನ, ಮೊಬೈಲ್ ಸಂಖ್ಯೆ ಇತ್ಯಾದಿ) ಅಪ್‌ಡೇಟ್ ಮಾಡಿಕೊಳ್ಳಿ.
ಟೆಕ್ ಟಾನಿಕ್: ಟೈಪ್ ಅಲ್ಲ ಸ್ವೈಪ್ ಮಾಡಿ ಬರೆಯಿರಿ
ಇತ್ತೀಚಿನ ಸ್ಮಾರ್ಟ್‌ಫೋನ್ ಸಾಧನಗಳಲ್ಲಿ ಸ್ಕ್ರೀನ್ ಮೇಲೆ ಬೆರಳಿನಿಂದ ಗೀಚುವ (ಸ್ವೈಪ್ ಮಾಡುವ) ಮೂಲಕ ಇಂಗ್ಲಿಷನ್ನು ಸುಲಲಿತವಾಗಿ ಟೈಪ್ ಮಾಡಬಹುದೆಂಬುದು ಎಷ್ಟು ಮಂದಿಗೆ ಗೊತ್ತು? ಹೌದು ಇದು ಸಾಧ್ಯ. ಆ್ಯಪಲ್, ಆಂಡ್ರಾಯ್ಡ್ ಮತ್ತು ವಿಂಡೋಸ್‌ನ ಹೊಸ ಆವೃತ್ತಿಯ ಫೋನ್‌ಗಳಲ್ಲಿ, ಅಪ್‌ಡೇಟ್ ಆಗಿರುವ ಕೀಬೋರ್ಡ್ ಇದ್ದರೆ ಇದು ಸಾಧ್ಯ. ಚಿತ್ರದಲ್ಲಿರುವಂತೆ ಸ್ವೈಪ್ ಮಾಡಿದರಾಯಿತು. ಇಂಗ್ಲಿಷ್ ಪದಗಳನ್ನು ಸ್ವೈಪ್ ಮಾಡುವಾಗ ನಿಮ್ಮ ಸಾಧನವೇ ಆ ಪದವನ್ನು ಊಹಿಸುತ್ತದೆ. ಅದರ ಸ್ಪೆಲ್ಲಿಂಗ್‌ಗಳನ್ನು ಜೋಡಿಸುವಂತೆ ಸ್ಕ್ರೀನ್ ಮೇಲೆ ಬೆರಳಿನಿಂದ ಉಜ್ಜಿದರಾಯಿತು. ನೀವು ಅಂದುಕೊಂಡಿದ್ದಕ್ಕಿಂತ ಬೇರೆ ಪದಗಳಿದ್ದರೆ, ಅವುಗಳ ಸಲಹೆಯೂ ಗೋಚರಿಸುತ್ತದೆ ಮತ್ತು ಅವುಗಳಿಂದ ನಮಗೆ ಬೇಕಾದ ಪದವನ್ನು ಆಯ್ಕೆ ಮಾಡಿಕೊಳ್ಳಬಹುದು.
ವಿಜಯ ಕರ್ನಾಟಕ ಅಂಕಣ 109: ಮಾಹಿತಿ@ತಂತ್ರಜ್ಞಾನ: ಅವಿನಾಶ್ ಬಿ

108: ಮೊಬೈಲ್‌ನಲ್ಲಿ ಕಂಪ್ಯೂಟರ್ ಜಾಲಾಡಿ; ಬೇರೆಲ್ಲೋ ಇರುವ ಕಂಪ್ಯೂಟರನ್ನೂ ನಿಯಂತ್ರಿಸಿ

ಕಚೇರಿಯಲ್ಲಿ ಕಂಪ್ಯೂಟರಲ್ಲಿ ಟೈಪ್ ಮಾಡಿಟ್ಟ ಇಮೇಲ್ ಅನ್ನು ಮನೆಯಿಂದಲೇ ಮುಂದುವರಿಸಬೇಕೇ? ದೂರದಲ್ಲೆಲ್ಲೋ ಇರುವ ನಿಮ್ಮ ಡೆಸ್ಕ್‌ಟಾಪ್‌ನಲ್ಲಿರುವ ಫೈಲನ್ನು ನಿಮ್ಮ ಮೊಬೈಲ್ ಮೂಲಕವೇ ಓದಬೇಕೇ? ಸಾಧ್ಯವಿಲ್ಲ ಎಂದುಕೊಂಡಿರಾ? ಇದು ಸಾಧ್ಯ ಮತ್ತು ತೀರಾ ಸುಲಭ ಕೂಡ. ಇಂಟರ್ನೆಟ್ ಸಂಪರ್ಕವಿದ್ದರೆ ಜಗತ್ತೇ ಅಂಗೈಯಲ್ಲಿ ಅಂತ ಹೇಳೋದು ಇದಕ್ಕೇ.

ಟೀಮ್ ವ್ಯೂವರ್ ಎಂಬೊಂದು ಉಚಿತ ತಂತ್ರಾಂಶದ ಮೂಲಕ ಬೆಂಗಳೂರಿನಿಂದ ಕುಳಿತು ಮಂಗಳೂರಿನಲ್ಲಿರುವ ಕಂಪ್ಯೂಟರನ್ನು ನಿಯಂತ್ರಿಸಬಹುದು. ಸಾಫ್ಟ್‌ವೇರ್ ಉದ್ಯೋಗಿಗಳಲ್ಲಿ ಹೆಚ್ಚು ಮನೆಮಾತಾಗಿರುವ ಈ ತಂತ್ರಾಂಶವನ್ನು ಯಾರು ಬೇಕಿದ್ದರೂ ಸುಲಭವಾಗಿ ಉಪಯೋಗಿಸಬಹುದು.

ಮನೆಯಲ್ಲಿ ಕಂಪ್ಯೂಟರ್ ಬಗ್ಗೆ ಹೆಚ್ಚೇನೂ ತಿಳಿಯದ ಹಿರಿಯರು ಅಥವಾ ಮಕ್ಕಳೋ ಅದರಲ್ಲಿ ಕೆಲಸ/ಆಟದಲ್ಲಿ ತೊಡಗಿದ್ದಾಗ ಕಂಪ್ಯೂಟರ್‌ನಲ್ಲಿ ಏನೋ ಸಮಸ್ಯೆ ಬಂತು ಅಂತಿಟ್ಟುಕೊಳ್ಳಿ. ಇಲ್ಲವೇ, ನೀವು ತುಂಬಾ ದೂರದಲ್ಲಿರುವ ನಿಮ್ಮ ಕಚೇರಿಗೆ ಹೋಗಿರುತ್ತೀರಿ, ಮನೆಯ ಕಂಪ್ಯೂಟರಿನಲ್ಲಿರುವ ಒಂದು ಫೈಲ್ ತುರ್ತಾಗಿ ಬೇಕಾಗಿತ್ತು. ಇಂತಹಾ ಪರಿಸ್ಥಿತಿಯಲ್ಲಿ ಒಂದು ಕಂಪ್ಯೂಟರ್‌ನಿಂದ ಮತ್ತೊಂದನ್ನು ರಿಮೋಟ್ ಆಗಿ ಸಂಪರ್ಕಿಸಲು ನೆರವಾಗುತ್ತದೆ ಟೀಂ ವ್ಯೂವರ್. ಅದನ್ನು ಮೊದಲು http://www.teamviewer.com/ ಎಂಬಲ್ಲಿಂದ ಡೌನ್‌ಲೋಡ್ ಮಾಡಿಕೊಂಡು ಇನ್‌ಸ್ಟಾಲ್ ಮಾಡಿಕೊಳ್ಳಿ. ಇದು 10 ಎಂಬಿಯೊಳಗಿನ ಗಾತ್ರದ ಎಕ್ಸಿಕ್ಯೂಟೆಬಲ್ (ಇಎಕ್ಸ್‌ಇ) ಫೈಲ್ ಆಗಿದ್ದು, ಎರಡೂ ಕಂಪ್ಯೂಟರುಗಳಲ್ಲಿ ಇನ್‌ಸ್ಟಾಲ್ ಮಾಡಿಕೊಳ್ಳಬೇಕು.

ಮನೆ ಮತ್ತು ಕಚೇರಿ ಎರಡೂ ಕಂಪ್ಯೂಟರುಗಳಲ್ಲಿ ಟೀಂ ವ್ಯೂವರ್ ಇರಬೇಕು ಮತ್ತು ಇಂಟರ್ನೆಟ್ ಸಂಪರ್ಕ ಆನ್ ಇರಬೇಕು ಎಂಬುದು ನೆನಪಿನಲ್ಲಿರಲಿ. ಟೀಂ ವ್ಯೂವರ್ ಓಪನ್ ಆಗಿ, ಒಂದು ಕೆಲವು ಸೆಕೆಂಡು ಕಾಯಬೇಕಾಗುತ್ತದೆ. ಆರಂಭದಲ್ಲಿ ಟೀಂ ವ್ಯೂವರ್ ವಿಂಡೋದ ಕೆಳ ಭಾಗದಲ್ಲಿ ಕೆಂಪು ಬಟನ್ ಜತೆಗೆ ‘Not ready, check your internet connection’ ಅಂತ ಬರುತ್ತದೆ. ನಂತರ ಇಂಟರ್ನೆಟ್ ಸಂಪರ್ಕವಾದಾಗ Ready to Connect (Secure Connection) ಅಂತ ಹಸಿರು ಬಟನ್ ಜತೆಗೆ ಮಾಹಿತಿ ಡಿಸ್‌ಪ್ಲೇ ಆಗುತ್ತದೆ.

ಆ ವಿಂಡೋದಲ್ಲೇ ನಿಮ್ಮ ಟೀಂ ವ್ಯೂವರ್ (ಅಥವಾ ಕಂಪ್ಯೂಟರ್‌ನ) ಐಡಿ ಮತ್ತು ತಾತ್ಕಾಲಿಕ ಪಾಸ್‌ವರ್ಡ್ ಪ್ರದರ್ಶನವಾಗುತ್ತದೆ. ಐಡಿ ಯಾವಾಗಲೂ ಒಂದೇ ರೀತಿಯಾಗಿರುತ್ತದೆ, ಆದರೆ ಪಾಸ್‌ವರ್ಡ್ ಪ್ರತಿ ಬಾರಿ ಟೀಂ ವ್ಯೂವರ್ ಓಪನ್ ಮಾಡಿದಾಗಲೂ ಬದಲಾಗುತ್ತದೆ. ನೀವೇ ಸ್ವಂತ ಪಾಸ್‌ವರ್ಡ್ ರಚಿಸಿಕೊಳ್ಳುವುದಕ್ಕೂ ಆ ವಿಂಡೋದಲ್ಲೇ ಅವಕಾಶವಿದೆ. ಮನೆಯಲ್ಲಿರುವವರು ಈ ಕಂಪ್ಯೂಟರಿನ ಐಡಿ ಮತ್ತು ಪಾಸ್‌ವರ್ಡನ್ನು ನಿಮಗೆ ತಿಳಿಸಬೇಕಾಗುತ್ತದೆ.

ಇನ್ನು ನೀವು ಕಚೇರಿಯಲ್ಲಿ ನಿಮ್ಮ ಲ್ಯಾಪ್‌ಟಾಪ್ ಅಥವಾ ಡೆಸ್ಕ್‌ಟಾಪ್‌ನಲ್ಲಿ ಟೀಂ ವ್ಯೂವರ್ ಪ್ರಾರಂಭಿಸಿ, ಬಲಭಾಗದಲ್ಲಿರುವ Control Remote Computer ಎಂಬ ಶೀರ್ಷಿಕೆ ಇರುವಲ್ಲಿ, Partner ID ಎಂದಿರುವಲ್ಲಿ, ಮನೆಯಲ್ಲಿರುವವರು ಕೊಟ್ಟ ಐಡಿ ನಮೂದಿಸಿ. ಪಾಸ್‌ವರ್ಡ್ ಕೇಳಿದಾಗ ಅದನ್ನೂ ಒತ್ತಿಬಿಡಿ. ಅಷ್ಟೆ. ಮನೆಯಲ್ಲಿರುವವರಿಗಾದ ಕಂಪ್ಯೂಟರ್ ಸಮಸ್ಯೆಯನ್ನು ಕುಳಿತಲ್ಲಿಂದಲೇ ಏನಾಗಿದೆ ಅಂತ ತಿಳಿದುಕೊಂಡು ನೀವು ಬಗೆಹರಿಸಬಹುದು. ಇಲ್ಲವೆಂದಾದರೆ, ಆ ಕಂಪ್ಯೂಟರಿನಲ್ಲಿ ನಿಮಗೆ ಬೇಕಾಗಿರುವ ಫೈಲನ್ನು ಕಚೇರಿಯಿಂದಲೇ ಓಪನ್ ಮಾಡಿ ನಿಮ್ಮ ಕಂಪ್ಯೂಟರಿಗೆ ಸೇವ್ ಮಾಡಿಕೊಳ್ಳಬಹುದು.

ನಿಮಗೆ ತಿಳಿಯದ ಸಮಸ್ಯೆಯಾದರೆ ಮತ್ತು ತುರ್ತಾಗಿ ಪರಿಹಾರವಾಗಬೇಕಿದ್ದರೆ, ಟೆಕ್ ನಿಪುಣ ಸ್ನೇಹಿತರ ಮೂಲಕ ಕಂಪ್ಯೂಟರ್ ದುರಸ್ತಿ ಮಾಡಿಸಿಕೊಳ್ಳಲು ಈ ತಂತ್ರಾಂಶ ಬಳಸಬಹುದು. ಫೋನ್ ಮೂಲಕ ಹೇಳುವುದು ಅವರಿಗೆ ಅರ್ಥವಾಗಲಾರದು, ನೇರವಾಗಿ ನೋಡಿದರಷ್ಟೇ ಸಮಸ್ಯೆ ಅರಿತುಕೊಳ್ಳುವ ಸಾಧ್ಯತೆಗಳು ಹೆಚ್ಚಿರುವುದರಿಂದ ಟೀಮ್ ವ್ಯೂವರ್ ನೆರವಿಗೆ ಬರುತ್ತದೆ.

ಅಲ್ಲದೆ, ಕಚೇರಿಯಲ್ಲಿರುವ ಕಂಪ್ಯೂಟರಿನಲ್ಲಿ ಯಾವುದೋ ಫೈಲ್ ಬರೆದಿಟ್ಟಿದ್ದೀರಿ, ನೀವೆಲ್ಲೋ ಹೊರ ಊರಿಗೆ ಹೋಗಿರುತ್ತೀರಿ. ಆದರೆ ಅದನ್ನು ತುರ್ತಾಗಿ ಇಮೇಲ್ ಮಾಡಬೇಕಿದೆ ಎಂದಾದಾಗ ಕೂಡ, ಯಾರಿಗಾದರೂ ಕಚೇರಿಯ ಕಂಪ್ಯೂಟರ್ ಆನ್ ಮಾಡಲು ಹೇಳಿದರೆ, ನಿಮ್ಮದೇ ಲಾಗಿನ್ ಪಾಸ್‌ವರ್ಡ್ ಬಳಸಿ ಟೀಂ ವ್ಯೂವರ್ ಮೂಲಕ ಮನೆಯಲ್ಲಿ ಕೆಲಸ ಮಾಡಬಹುದು.

ಹೊಸ ವರ್ಷದ ಬೋನಸ್ ಏನು ಗೊತ್ತೇ? ನಿಮ್ಮ ಆಂಡ್ರಾಯ್ಡ್, ಐಫೋನ್, ವಿಂಡೋಸ್, ಬ್ಲ್ಯಾಕ್‌ಬೆರಿ ಸ್ಮಾರ್ಟ್‌ಫೋನ್‌ಗಳಿಗೂ ಟೀಂ ವ್ಯೂವರ್ ಆ್ಯಪ್ ಲಭ್ಯವಿದ್ದು, ಅದನ್ನು ಸ್ಮಾರ್ಟ್‌ಫೋನ್‌ನಲ್ಲಿ ಇನ್‌ಸ್ಟಾಲ್ ಮಾಡಿಕೊಂಡು, ರಿಮೋಟ್ ಆಗಿ ಮೊಬೈಲ್‌ನಿಂದಲೇ ಯಾವುದೇ ಕಂಪ್ಯೂಟರುಗಳಲ್ಲಿ ಕೆಲಸ ಮಾಡಬಹುದು. ಮೊಬೈಲ್ ಸ್ಕ್ರೀನ್ ಕಿರಿದಾಗಿರುವುದರಿಂದ ಮತ್ತು ಬಳಕೆ ಕೊಂಚ ಕ್ಲಿಷ್ಟಕರವಾಗಿರುವುದರಿಂದಾಗಿ ತುರ್ತು ಕೆಲಸಗಳನ್ನು ಮಾತ್ರ ಮೊಬೈಲ್ ಮೂಲಕ ಮಾಡಬಹುದು. ಟ್ಯಾಬ್ಲೆಟ್‌ನಲ್ಲಿ ಹೆಚ್ಚು ಸುಲಭವಾಗಿ ಕಾರ್ಯ ನಿರ್ವಹಿಸಬಹುದು.

ಟೆಕ್ ಟಾನಿಕ್: ಬ್ರೌಸರ್ ವೇಗವಾಗಿಸಲು
ಯಾವುದಾದರೊಂದು ಬ್ರೌಸರ್‌ನಲ್ಲಿ ನೀವು ಹಲವಾರು ಟ್ಯಾಬ್‌ಗಳನ್ನು ತೆರೆದು ಇಂಟರ್ನೆಟ್‌ನ ವಿಭಿನ್ನ ವೆಬ್‌ಸೈಟುಗಳ ಪುಟಗಳನ್ನು ನೋಡುತ್ತೀರಿ. ವೆಬ್ ಪುಟಗಳೆಲ್ಲವೂ ಸ್ಥಳೀಯ ಡಿಸ್ಕ್‌ಗೆ ತಾತ್ಕಾಲಿಕ ಫೈಲ್‌ಗಳ ರೂಪದಲ್ಲಿ (cache – ಟೆಂಪರರಿ ಇಂಟರ್ನೆಟ್ ಫೈಲುಗಳು) ಡೌನ್‌ಲೋಡ್ ಆಗಿರುತ್ತವೆ. ಈ ಫೈಲುಗಳ ಸಂಖ್ಯೆ ಹೆಚ್ಚಾದಾಗ ಬ್ರೌಸಿಂಗ್ ಸ್ಲೋ ಆಗುತ್ತದೆ. ಇದನ್ನು ನಿವಾರಿಸಲು ಬೇರೆಲ್ಲಾ ಬ್ರೌಸರುಗಳನ್ನು ಮುಚ್ಚಿ, ಖಾಲಿ ಬ್ರೌಸರೊಂದನ್ನು ತೆರೆದು ಶಿಫ್ಟ್, ಕಂಟ್ರೋಲ್ ಮತ್ತು ಡಿಲೀಟ್ ಬಟನ್ ಒತ್ತಿ. ಮೊದಲ ಡ್ರಾಪ್‌ಡೌನ್ ಮೆನುವಿನಲ್ಲಿ the beginning of time ಅಂತ ಇರಲಿ. ಅದರ ಕೆಳಗೆ ಹಲವಾರು ಆಯ್ಕೆಗಳು ಕಂಡುಬರುತ್ತವೆ. ಬೇಕಾಗಿರುವುದಕ್ಕೆ ಟಿಕ್ ಮಾರ್ಕ್ ಹಾಕಿ, Clear Browsing Data ಕ್ಲಿಕ್ ಮಾಡಿಬಿಡಿ.

ವಿಜಯ ಕರ್ನಾಟಕದಲ್ಲಿ ಮಾಹಿತಿ@ತಂತ್ರಜ್ಞಾನ ಅಂಕಣ: ಅವಿನಾಶ್ ಬಿ.

ಆಕರ್ಷಣೆ ಕಳೆದುಕೊಳ್ಳುತ್ತಿದೆ ಫೇಸ್‌ಬುಕ್…

ನಗರದ ಆ ಮೂಲೆಯಲ್ಲಿ….
ರಸ್ತೆ ಬದಿ ನಡೆದಾಡುತ್ತಿರುವಾಗ, ಬಸ್ ನಿಲ್ದಾಣದಲ್ಲಿ ಕಾಯುತ್ತಿರುವಾಗ, ಟ್ರಾಫಿಕ್ ಸಿಗ್ನಲ್‌ನಲ್ಲಿ ಬೈಕು ನಿಲ್ಲಿಸಲೇಬೇಕಾದಾಗ… ಕುದಿ ಹೃದಯದ ಹದಿ ಹರೆಯದ ಮಂದಿಯ ಎರಡೂ ಕಿವಿಗಳಲ್ಲಿ ಉದ್ದನೆಯ ದಾರ ನೇತಾಡುತ್ತಿರುತ್ತದೆ; ಜತೆಗೇ ತಲೆಯೂ ಸಣ್ಣಗೆ ಆಡುತ್ತಿದ್ದರೆ, ಕೈಯಲ್ಲಿರುವ ಮೊಬೈಲ್ ಸ್ಕ್ರೀನ್‌ನ ಮೇಲೆ ಎರಡೂ ಕರಗಳ ಹೆಬ್ಬೆರಳುಗಳು ಅತ್ತಿಂದಿತ್ತ ಸರಿದಾಡುತ್ತಿರುತ್ತವೆ; ಮಂದಹಾಸ, ನಗು, ಕೋಪ, ಬೇಸರ, ತುಂಟತನ… ಇತ್ಯಾದಿ ಕ್ಷಣಕ್ಷಣಕ್ಕೂ ಗೋಚರಿಸುವ ನವರಸ ಮುಖಭಾವಗಳು… ಅವರ ಕೈಯಲ್ಲಿರುವುದು ಹಳೆಯ ಫೀಚರ್ ಫೋನ್ ಆಗಿದ್ದರಂತೂ ಅದರ ಕೀಪ್ಯಾಡ್‌ನ ಸಂಖ್ಯೆ/ಅಕ್ಷರಗಳೇ ಗೋಚರಿಸದಷ್ಟು ಮಾಸಿ ಹೋಗಿರುತ್ತವೆ. “ಅಯ್ಯೋ, ಏನಾಯಿತೇ ನಿನ್ನ ಉಗುರಿಗೆ? ಸವೆದೇ ಹೋಗಿವೆಯಲ್ಲ” ಎಂಬ ಮಾತನ್ನು ನಾವು ಆಗೀಗ್ಗೆ ತಮಾಷೆಗಾಗಿಯಾದರೂ ಕೇಳಿರುತ್ತೇವೆ.

ಹೀಗೆ ಬನ್ನಿ….

ಇದು ಭ್ರಮಾಧೀನ ಲೋಕವಲ್ಲ, ಕ್ಷಿಪ್ರ ಸಂದೇಶ ಯುಗದ ವಾಸ್ತವಿಕ ಜಗತ್ತು.

ಇತ್ತ ಮತ್ತೊಂದು ಕಡೆಯಲ್ಲಿ….
ದೊಡ್ಡ ಕಂಪ್ಯೂಟರ್ ಪರದೆಯಲ್ಲಿ, ಗುಡ್ ಮಾರ್ನಿಂಗ್ ಎಂದೋ, ಗುಡ್ ನೈಟ್ ಎಂದೋ… ಮಾಡಿದ ಪೋಸ್ಟ್‌ಗಳಿಗೆ ಒಂದೊಂದು ‘ಲೈಕ್’ ಬಿದ್ದಾಗಲೂ ಮನಸ್ಸಿಗೊಂದಿಷ್ಟು ಪುಳಕ, ಒಂದೊಂದು ಕಾಮೆಂಟಿಗೂ ಲೈಕ್ ಮಾಡಿ ಅವರಿಗೆ ಕೃತಜ್ಞತೆ ಸಲ್ಲಿಸುವ ಆವುಟ; ಇನ್ನೊಂದೆಡೆ, ಆಪ್ತ ಬಂಧುವೋ, ಸ್ನೇಹಿತರೋ “ಈಗಷ್ಟೇ ಹೃದಯಾಘಾತದಿಂದ ನಿಧನರಾದರು” ಅಂತ ಬೇಸರದಿಂದಲೇ ಹಾಕಿದ ಪೋಸ್ಟಿಗೂ ಒಂದಷ್ಟು ‘ಲೈಕ್’ ಮುದ್ರೆ (ಇದರ ಹಿಂದೆ ಗಮನ ಸೆಳೆಯುವ ಮತ್ತು ಸಾಂತ್ವನ ನೀಡುವ ಮನಸ್ಸೂ ಇದ್ದಿರಬಹುದು) – ಜತೆಗೆ ನಮ್ಮ ಟೈಮ್‌ಲೈನ್‌ನಲ್ಲಿ ಬೇಕು-ಬೇಡವಾದ ಪೋಸ್ಟುಗಳೆಲ್ಲವೂ ಭರಪೂರ ಪ್ರವಹಿಸುವ ಅವಾಸ್ತವಿಕ ಮತ್ತು ಒಂದು ರೀತಿಯಲ್ಲಿ ಭ್ರಾಮಕ ಸ್ವರ್ಗ…

ಇವೆರಡರಲ್ಲಿ, ದಿನದಿಂದ ದಿನಕ್ಕೆ ಗೋಜಲಾಗತೊಡಗುತ್ತಿರುವ ಸಾಮಾಜಿಕ ಜಾಲತಾಣಗಳನ್ನು ಹೊಸ ಪೀಳಿಗೆಯ ಮಂದಿ ಡಿಸ್‌ಲೈಕ್ ಮಾಡುತ್ತಿದ್ದಾರೆ! ವಾಸ್ತವ ಮಿತ್ರರೊಂದಿಗೆ ಮನದ ತುಮುಲಗಳನ್ನು ಸುಲಭವಾಗಿ ಹಂಚಿಕೊಳ್ಳಬಲ್ಲ, ಪ್ರಮುಖ ಸಂದೇಶಗಳನ್ನು ಕ್ಷಿಪ್ರವಾಗಿ ರವಾನಿಸಬಲ್ಲ, ಸರಳ ಇಮೋಟಿಕಾನ್‌ಗಳ ಮೂಲಕ ಭಾವನೆಗಳನ್ನು ವ್ಯಕ್ತಪಡಿಸಬಲ್ಲ, ತ್ವರಿತವಾಗಿ ಫೋಟೋ, ವೀಡಿಯೋ, ಆಡಿಯೋ ಹಂಚಿಕೊಳ್ಳಲು ಸಾಧ್ಯವಾಗುವ, ಸ್ಪ್ಯಾಮ್ ಹಾವಳಿ ಇಲ್ಲದ, ಗೊತ್ತಿಲ್ಲದ ಅಪರಿಚಿತರ ನೆರಳೂ ಸೋಕದ ವಾಟ್ಸಾಪ್, ಹೈಕ್, ಲೈನ್, ವಿಚಾಟ್ ಮುಂತಾದ ಸಂದೇಶವಾಹಕ ಸೇವೆಗಳಿಗೆ ಥಂಬ್ಸ್ ಅಪ್ ಹೇಳುತ್ತಿದ್ದಾರೆ! ಇದು ಈಗಿನ ಟ್ರೆಂಡ್…..

ನೀರು ನಿಂತಲ್ಲಿ ರೋಗಬಾಧೆ ಇರುತ್ತದೆ. ತಂತ್ರಜ್ಞಾನ ನಿಂತ ನೀರಾಗಿದ್ದರಂತೂ ಜಗತ್ತು ಈ ಪರಿ ಬೆಳೆಯುತ್ತಿರಲಿಲ್ಲ. ಬದಲಾವಣೆ ಸಹಜ ಮತ್ತು ಅನಿವಾರ್ಯ. ಪ್ರಕೃತಿ ಸಹಜವಾದ ಈ ಮೂಲಮಂತ್ರಗಳ ತಳಹದಿಯೊಂದಿಗೆ ಸಾಮಾಜಿಕ ಜಾಲತಾಣಗಳ ಪೋಷಕವರ್ಗವೆಂದು ಪ್ರತಿಪಾದಿತವಾಗಿದ್ದ ಯುವ ಸಮೂಹ, ಈಗ ನಿಧಾನವಾಗಿ ಮೆಸೇಜಿಂಗ್ ಕಿರು ತಂತ್ರಾಂಶಗಳತ್ತ ಹೊರಳುತ್ತಿದೆ ಮತ್ತು ಭವಿಷ್ಯದ ಆನ್‌ಲೈನ್ ಪ್ರಜೆಗಳು ಇವರೇ ಆಗಿರುವುದರಿಂದ, ವೆಬ್ ಆಧಾರಿತ ಸಾಮಾಜಿಕ ಮಾಧ್ಯಮಗಳು ಹಿಂದೆ ಸರಿಯುತ್ತಿವೆ.

ಕಿರಿದೇ ಹಿರಿದಾಗುತ್ತಿದೆ
ಕಳೆದರ್ಧ ದಶಕದಲ್ಲಿ ಮಾಹಿತಿ ತಂತ್ರಜ್ಞಾನ ರಂಗದಲ್ಲಿ ನಡೆದ ಕ್ಷಿಪ್ರಕ್ರಾಂತಿಯು ಜಗತ್ತನ್ನು ಕಂಪ್ಯೂಟರಿನ ದೊಡ್ಡ ಪರದೆಯಿಂದ ಸ್ಮಾರ್ಟ್‌ಫೋನ್‌ನ ಅಂಗೈಯಗಲಕ್ಕೆ ಇಳಿಸಿದೆ. ಫೇಸ್‌ಬುಕ್, ಟ್ವಿಟರ್ ಜಾಲತಾಣಗಳೀಗ ಆ್ಯಪ್‌ಗಳೆಂದು ಮುದ್ದಾಗಿ ಕರೆಯಬಲ್ಲ ಕಿರು ತಂತ್ರಾಂಶಗಳ ರೂಪದಲ್ಲಿ ಸ್ಮಾರ್ಟ್‌ಫೋನ್‌ನೊಳಗೆ ಬಂದು ಕುಳಿತಿವೆ. ಇದುವರೆಗೆ ಯುವ ಮನಸ್ಸುಗಳ ಆಟದಂಗಳವಾಗಿದ್ದ ಫೇಸ್‌ಬುಕ್, ಡೆಲೀಷಿಯಸ್, ಕೋರಾ, ಫ್ಲಿಕರ್, ಬ್ಲಾಗ್, ಗೂಗಲ್ ಪ್ಲಸ್, ಹೈಫೈವ್, ಐಬಿಬೋ, ಇನ್‌ಸ್ಟಾಗ್ರಾಂ, ಟ್ವಿಟರ್, ಲಿಂಕ್ಡ್ಇನ್, ನಿಂಗ್, ಪಿನ್‌ಟರೆಸ್ಟ್, ಸ್ಪೇಸಸ್, ಟಂಬ್ಲರ್, ವಾಕ್ಸ್, ಯಾಮರ್, ಲೈವ್‌ಜರ್ನಲ್ ಮುಂತಾದ ತಾಣಗಳು, ಜನಮಾನಸದಿಂದ ಮರೆಯಾಗಿ ಹೋಗಿರುವ ಓರ್ಕುಟ್ ಸಾಲಿಗೆ ಸೇರುತ್ತಿವೆಯೇ?

ಕಳೆದ ದಶಕದ ಉತ್ತರಾರ್ಧವನ್ನೇ ಗಮನಿಸಿ ನೋಡಿ. ಬ್ಲಾಗ್‌ಗಳೆಂಬ ವೆಬ್ ಲಾಗ್‌ಗಳ ಮೂಲಕವಾಗಿ ಸ್ನೇಹ ಸೇತುವನ್ನು ರಚಿಸುತ್ತಿದ್ದವರದೆಷ್ಟು ಮಂದಿ! ಬ್ಲಾಗ್ ಬರೆಯುವುದು, ನನಗೂ ಒಂದು ವೆಬ್ ಸೈಟ್ ಇದೆ ಎಂದು ಹೆಮ್ಮೆ ಪಟ್ಟುಕೊಳ್ಳುತ್ತಿದ್ದ ದಿನಗಳವು. ಬೇರೊಬ್ಬರ ಬ್ಲಾಗಿಗೆ ಇಣುಕಿ, ಇಷ್ಟವಾದರೆ ಒಂದು ಕಾಮೆಂಟ್ ಚಿಟುಕುವುದು, ಕುಟುಕುವುದು, ವಿರೋಧಿಸುವುದು, ಚರ್ಚಿಸುವುದು, ಉಭಯ ಕುಶಲೋಪರಿ… ಹೀಗೆ ಬ್ಲಾಗುಗಳಲ್ಲೇ ಸಂಬಂಧದ ಬೆಸುಗೆಯಾಗುತ್ತಿತ್ತು. ಆ ಕಾಲದಲ್ಲಿ, ಸರಿಸುಮಾರು 11 ವರ್ಷಗಳ ಹಿಂದೆ, 2004ರ ಫೆಬ್ರವರಿ ತಿಂಗಳಲ್ಲಿ, ಮಾರ್ಕ್ ಜುಕರ್‌ಬರ್ಗ್ ತನ್ನ ಹಾರ್ವರ್ಡ್ ವಿಶ್ವವಿದ್ಯಾನಿಲಯದ ಕಾಲೇಜು ಸಹಪಾಠಿಗಳಾದ ಆ್ಯಂಡ್ರ್ಯೂ ಮೆಕಲಮ್, ಎಡ್ವರ್ಡೋ ಸವೆರಿನ್, ಕ್ರಿಸ್ ಹ್ಯೂಸ್ ಹಾಗೂ ಡಸ್ಟಿನ್ ಮಾಸ್ಕೊವಿಜ್ ಜತೆಗೆ ಸೇರಿಕೊಂಡು, ಕಾಲೇಜಿನವರಿಗಾಗಿ ಹಚ್ಚಿದ ಕಿಡಿಯೊಂದು ಈ ಪರಿ ಜಾಗತಿಕವಾಗಿ 135 ಕೋಟಿ ಮಾಸಿಕ ಸಕ್ರಿಯ ಬಳಕೆದಾರರೊಂದಿಗೆ ಅಗಾಧವಾಗಿ ಬೆಳೆಯುತ್ತದೆಂದು ಯಾರೂ ಪರಿಭಾವಿಸಿರಲಿಲ್ಲ. ಇಂದು ಬಲುದೊಡ್ಡ ಕಂಪನಿಯಾಗಿ ಬೆಳೆದ ಫೇಸ್‌ಬುಕ್‌ನಲ್ಲಿ ಕೆಲಸ ಮಾಡುತ್ತಿರುವವರ ಸಂಖ್ಯೆ ಎಂಟೂವರೆ ಸಾವಿರ; ಅದರ ಆಸ್ತಿಯ ಮೌಲ್ಯ 1790 ಕೋಟಿ ಡಾಲರ್; ಭಾರತದಲ್ಲಿ ಇರುವ ಮಾಸಿಕ ಸಕ್ರಿಯ ಬಳಕೆದಾರರ ಸಂಖ್ಯೆ 11.20 ಕೋಟಿ; ಇದರಲ್ಲಿ ಪ್ರತಿ ದಿನ ಬಳಸುತ್ತಿರುವ ಭಾರತೀಯರ ಸರಾಸರಿ ಸಂಖ್ಯೆ ಸುಮಾರು ಅರ್ಧದಷ್ಟು, ಅಂದರೆ 5 ಕೋಟಿಯಷ್ಟು ಮಾತ್ರ.

ಸ್ವಲ್ಪವೇ ಹಿಂದೆ ಕಣ್ಣು ಹಾಯಿಸಿದರೆ, ಹುಟ್ಟುಹಬ್ಬದ ದಿನದಂದು ರಾಶಿ ರಾಶಿ ಶುಭಾಶಯಗಳ ಕಾಮೆಂಟ್ ನೋಡಿ ಬೀಗಿದವರು ನಾವು ನೀವು. ಈ ವರ್ಷ ಸಾಮಾನ್ಯ ಪ್ರೊಫೈಲ್ ಒಂದಕ್ಕೆ ಬಿದ್ದಿರುವ ಶುಭಾಶಯಗಳ ಪ್ರಮಾಣ ನೋಡಿದರೆ, ಜನರಿಗೆ ಸಮಯವಿಲ್ಲವೆಂಬೋದು ಗೊತ್ತಾಗುತ್ತದೆ. ಫೇಸ್‌ಬುಕ್ ತಾಣವನ್ನೇ ಅವಲೋಕಿಸಿದರೆ, ಕೆಲವೊಂದಿಷ್ಟು ಅಪವಾದಗಳ ಹೊರತಾಗಿ, ನಮ್ಮ ಸ್ನೇಹಿತ ವರ್ಗದಲ್ಲಿಯೇ ಅಪ್‌ಡೇಟ್‌ಗಳು ಕಡಿಮೆಯಾಗತೊಡಗಿವೆ ಎಂಬುದು ಗಮನಕ್ಕೆ ಬರುತ್ತದೆ. ಅದರಲ್ಲಿನ ಪ್ರೈವೆಸಿ ವಿಚಾರಗಳು, ಅನವಶ್ಯಕ ಕಾಲೆಳೆದಾಟ, ಗುಡ್-ಮಾರ್ನಿಂಗ್-ಗುಡ್ ನೈಟ್‌ಗಷ್ಟೇ ಸೀಮಿತವಾದ ಪೋಸ್ಟುಗಳನ್ನು ನೋಡಿ ಬೇಸತ್ತವರು, ತಮಗೆ ಆತ್ಮೀಯರೆನ್ನಿಸಿಕೊಂಡವರನ್ನು ಕರೆದುಕೊಂಡು ವಾಟ್ಸಾಪ್, ಲೈನ್, ಹೈಕ್, ಟೆಲಿಗ್ರಾಂ, ವೈಬರ್, ವಿಚಾಟ್, ಗೂಗಲ್ ಹ್ಯಾಂಗೌಟ್ಸ್, ಸ್ಕೈಪ್, ಎಫ್‌ಬಿ ಮೆಸೆಂಜರ್ ಮುಂತಾದ ಸಂದೇಶವಾಹಕ ಆ್ಯಪ್‌ಗಳತ್ತ ಮುಖ ಮಾಡುತ್ತಿದ್ದಾರೆ.

ಈ ಅಂಶವು ನಮ್ಮ ಗಮನಕ್ಕೆ ಮಾತ್ರವೇ ಬಂದಿರುವುದಲ್ಲ. ಸ್ವತಃ ಫೇಸ್‌ಬುಕ್ ಸಂಸ್ಥಾಪಕ ಮಾರ್ಕ್ ಜುಕರ್‌ಬರ್ಗ್ ಸಂಸ್ಥೆಯ ಕಳೆದ ವರ್ಷದ ಮಹಾಸಭೆಯಲ್ಲಿ. ವಿಶೇಷವಾಗಿ ಹದಿಹರೆಯದ ಬಳಕೆದಾರರ ಸಂಖ್ಯೆ ಕುಸಿಯುತ್ತಿರುವುದರ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದರು. ಅಮೆರಿಕ ಮಾರುಕಟ್ಟೆಯಲ್ಲಿ ಫೇಸ್‌ಬುಕ್ ಶೇರು ಬೆಲೆಗಳು ಕುಸಿತವಾಗಿ ‘ಇಲ್ಲಿ ಎಲ್ಲವೂ ಸರಿ ಇಲ್ಲ’ ಎಂಬ ಸಂದೇಶವೂ ಬಂದಿದೆ. ಫೇಸ್‌ಬುಕ್ ಉದ್ಯೋಗಿಗಳ ಕುಸಿಯುತ್ತಿರುವ ಮನಸ್ಥೈರ್ಯ ವರ್ಧಿಸಲೆಂದೇ ಇತ್ತೀಚೆಗೊಂದು ಸಭೆ ನಡೆದಿತ್ತು ಎಂಬುದನ್ನು ವಾಲ್ ಸ್ಟ್ರೀಟ್ ಜರ್ನಲ್ ಈಗಾಗಲೇ ಜಗಜ್ಜಾಹೀರು ಮಾಡಿದೆ.

ಟೀನೇಜರ್‌ಗಳು ಹಿಂದಿನಷ್ಟು ಉಮೇದಿನಿಂದ ಸಾಮಾಜಿಕ ಜಾಲದಲ್ಲಿ ಸಕ್ರಿಯರಾಗಿಲ್ಲ ಎಂಬುದಕ್ಕೂ, ಫೇಸ್‌ಬುಕ್ ವ್ಯಕ್ತಪಡಿಸಿರುವ ಕಳವಳಕ್ಕೂ, ಈಗಿನ ವಿದ್ಯಮಾನಕ್ಕೂ ಸಾಕಷ್ಟು ತಾಳೆಯಾಗುತ್ತದೆ.

ಅಮೆರಿಕದ ಫ್ರ್ಯಾಂಕ್ ಎನ್ ಮ್ಯಾಗಿಡ್ ಅಸೋಸಿಯೇಟ್ಸ್ ನಡೆಸಿದ ಸಮೀಕ್ಷೆಯಲ್ಲಿ ಕಂಡುಬಂದಿರುವುದೂ ಇದೇ. ಕಳೆದ ವರ್ಷ ಅಮೆರಿಕದ ಶೇ.94ರಷ್ಟು ಟೀನೇಜರ್‌ಗಳು ಫೇಸ್‌ಬುಕ್ ಬಳಸುತ್ತಿದ್ದರೆ, ಈ ವರ್ಷ ಇದೇ ಹದಿಹರೆಯದವರ ಪ್ರಮಾಣ ಶೇ.88 ಮಾತ್ರ. ಅಂತೆಯೇ ಎಲ್ಲ ವಯಸ್ಸಿನವರನ್ನೂ ಸೇರಿಸಿದರೆ, ಎರಡು ವರ್ಷಗಳ ಹಿಂದೆ ಶೇ.93 ಮಂದಿ ಫೇಸ್‌ಬುಕ್‌ಗೆ ಲಾಗಿನ್ ಆಗುತ್ತಿದ್ದರೆ, ಈ ವರ್ಷ ಇದರ ಪ್ರಮಾಣ ಶೇ.90ಕ್ಕೆ ಇಳಿದಿದೆ.

ಪ್ರಸ್ತುತ ಫೇಸ್‌ಬುಕ್‌ನಲ್ಲಿ ಸಕ್ರಿಯರಾಗಿರುವವರಲ್ಲಿ ಅಪ್ಪ, ಅಮ್ಮ, ಆಂಟಿ, ಅಂಕಲ್, ಅಜ್ಜಿ, ತಾತ ಎಲ್ಲರೂ ಸೇರಿದ್ದಾರೆ. ನಾವೇನು ಮಾಡುತ್ತಿದ್ದೇವೆಂಬುದು ನಮ್ಮ ಶಿಕ್ಷಕರಿಗೋ, ನಮ್ಮ ಬಾಸ್‌ಗೋ… ಹೀಗೆ ಇಡೀ ಜಗತ್ತಿಗೇ ತಿಳಿಯುತ್ತದೆ ಎಂಬ ಆತಂಕವೂ ಯುವಜನರನ್ನು ಈ ಜಾಲತಾಣಗಳಿಂದ ವಿಮುಖರನ್ನಾಗಿಸಿರಬಹುದು.

ಹದಿಹರೆಯದ ಪ್ರೇಮ ಸಂಭಾಷಣೆಯಿಂದಾಗಿಯೇ ಸಾಕಷ್ಟು ದುಡ್ಡು ಮಾಡುತ್ತಿದ್ದ ಮೊಬೈಲ್ ಸೇವಾ ಕಂಪನಿಗಳಿಗೆ ಬಲುದೊಡ್ಡ ಹೊಡೆತ ಬಿದ್ದಿದ್ದು ಐದು ವರ್ಷಗಳ ಹಿಂದೆ ಚಾಲ್ತಿಗೆ ಬಂದಿದ್ದ ಈ ಮೊಬೈಲ್ ಟೆಕ್ಸ್ಟ್ ಮೆಸೇಜಿಂಗ್ ಟೂಲ್‌ಗಳಿಂದ. ಇನ್‌ಸ್ಟಾಲ್ ಮಾಡಿಕೊಂಡು ಇಂಟರ್ನೆಟ್ ಪ್ಯಾಕ್ ಹಾಕಿಸಿಕೊಂಡುಬಿಟ್ಟರೆ, ಅನಿಯಮಿತವಾಗಿ ಸಂದೇಶಗಳನ್ನು, ಫೋಟೋ-ವೀಡಿಯೋಗಳನ್ನು ಹಂಚಿಕೊಳ್ಳಬಹುದಷ್ಟೇ ಅಲ್ಲದೆ, ಬೇರೆ ಇಂಟರ್ನೆಟ್ ತಾಣಗಳಲ್ಲಿಯೂ ಆನ್‌ಲೈನ್ ವಿಹಾರ ಮಾಡಬಹುದಾಗಿದೆ. ಎಸ್ಸೆಮ್ಮೆಸ್ ಸಂದೇಶಗಳು ಕೇವಲ ಅಧಿಕೃತವಾದ ಸಂವಹನಕ್ಕಷ್ಟೇ ಸೀಮಿತವಾಗುತ್ತಿರುವುದು ಕಹಿ ಸತ್ಯ.

ಫೇಸ್‌ಬುಕ್‌ನಿಂದ ವಿಮುಖವಾದ ಮನಸ್ಸುಗಳು ಈ ಚಾಟಿಂಗ್ ಆ್ಯಪ್‌ಗಳಲ್ಲಿ ಸಾಕಷ್ಟು ಗ್ರೂಪ್‌ಗಳನ್ನು ಕಟ್ಟಿಕೊಂಡವು. ಕ್ಲಾಸ್‌ಮೇಟ್ಸ್ ಅಂತ ಒಂದು ಗ್ರೂಪ್, ಟೀನ್ ಅಡ್ಡಾ ಅಂತ ತುಂಟತನ ಮತ್ತು ಪೋಲಿ ಸಂದೇಶಗಳನ್ನು ಹಂಚಿಕೊಳ್ಳುವುದಕ್ಕಾಗಿಯೇ ಇರುವ ಗ್ರೂಪ್, ಕ್ಲೋಸ್ ಫ್ರೆಂಡ್ಸ್ ಅಂತ ಮತ್ತೊಂದು ಗ್ರೂಪ್, ಕಲೆ-ಸಂಸ್ಕೃತಿ ಮುಂತಾದವುಗಳಲ್ಲಿ ಆಸಕ್ತಿಯಿದ್ದರೆ ಅದಕ್ಕಾಗಿಯೇ ಮತ್ತೊಂದು ಗ್ರೂಪ್…. ಹೀಗೆ, ಸೀಮಿತ ವಿಷಯಗಳಿಗೆ ಸಂಬಂಧಿಸಿದ ಪ್ರತ್ಯೇಕ ಬಳಗ ಕಟ್ಟಿಕೊಂಡು ಪ್ರತಿ ದಿನ ಪ್ರತಿ ಕ್ಷಣ ಸಂವಹನ ನಡೆಸುವುದು ಸಾಧ್ಯ. ಫೇಸ್‌ಬುಕ್‌ನಲ್ಲಿರುವಂತೆ ನಾವು ಲೈಕ್ ಮಾಡಿದವರೆಲ್ಲರ ಚಟುವಟಿಕೆಗಳು ನಮ್ಮ ನ್ಯೂಸ್‌ಫೀಡ್‌ನಲ್ಲಿ ಬರುವುದು, ಪದೇ ಪದೇ ಅನವಶ್ಯ ನೋಟಿಫಿಕೇಶನ್ ಬರುವುದು… ಈ ತ್ರಾಸ ಇರುವುದಿಲ್ಲ. ಪ್ರೈವೆಸಿಯೂ ಇದೆ. ಇಂಟರ್ನೆಟ್ ದರ ಮತ್ತು ಕೈಗೆಟಕುವಷ್ಟು ಅಗ್ಗವಾಗಿಬಿಟ್ಟಿರುವ ಹ್ಯಾಂಡ್‌ಸೆಟ್‌ಗಳು ಕೂಡ ಈ ಟೆಕ್ಟ್ಸ್ ಮೆಸೇಜಿಂಗ್ ಆ್ಯಪ್‌ಗಳ ಜನಪ್ರಿಯತೆಗೆ ಪೂರಕ ವಾತಾವರಣ ಕಲ್ಪಿಸಿದ್ದು ಸುಳ್ಳಲ್ಲ.

ಫೇಸ್‌ಬುಕ್‌ನಲ್ಲಿ ಒಂದರ್ಧ ಗಂಟೆ ಜಾಲಾಡಿಬಿಟ್ಟರೆ, ಅದು ನಮ್ಮ ಬ್ಯಾಟರಿಯನ್ನಷ್ಟೇ ಕ್ಷಿಪ್ರಗತಿಯಲ್ಲಿ ಹೀರಿಕೊಳ್ಳುವುದಲ್ಲ, ಬದಲಾಗಿ, ನ್ಯೂಸ್‌ಫೀಡ್ ಸ್ಕ್ರಾಲ್ ಮಾಡುತ್ತಿದ್ದಂತೆ ಲೋಡ್ ಆಗುತ್ತಲೇ ಇರುವ ಫೋಟೋಗಳಿಂದಾಗಿ ಡೇಟಾ ಪ್ಯಾಕ್ ಕೂಡ (ಅನಿಯಮಿತ ಇಲ್ಲದಿದ್ದರೆ) ಬೇಗನೇ ಖಾಲಿಯಾಗಿಬಿಡುತ್ತದೆ. ಆದರೆ, ಮೆಸೇಜಿಂಗ್ ಸೇವೆಗಳಿಗೆ ಹಾಗಲ್ಲ, ಬೇಕಾಗಿರುವುದನ್ನು ಮಾತ್ರವೇ ಡೌನ್‌ಲೋಡ್ ಮಾಡಿಕೊಳ್ಳುವ ಆಯ್ಕೆ ಇದೆ. 2ಜಿ ಸಂಪರ್ಕದಲ್ಲೂ ಸಿಗ್ನಲ್ ದುರ್ಬಲ ಎಂಬ ಅಡ್ಡಿಯಿಲ್ಲದೆ ಸುಲಲಿತವಾಗಿ, ಕ್ಷಿಪ್ರವಾಗಿ ಇವು ಕಾರ್ಯನಿರ್ವಹಿಸುತ್ತವೆ; ಜಾಹೀರಾತುಗಳ ಕಿರಿಕಿರಿಯೂ ಇರುವುದಿಲ್ಲ.

ಮೆಸೇಜಿಂಗ್ ಆ್ಯಪ್‌ಗಳು ವಾಸ್ತವ ಬದುಕಿಗೆ ಹತ್ತಿರವಾಗಿದ್ದರೆ, ಫೇಸ್‌ಬುಕ್ ಅವಾಸ್ತವಿಕ ಜಗತ್ತಿನ ಪ್ರತಿನಿಧಿಯಷ್ಟೆ. ನಮಗೆ ಏನೇನೂ ಗೊತ್ತಿಲ್ಲದವರೊಂದಿಗೆ ಹರಟುವುದಕ್ಕಿಂತ ಗೊತ್ತಿರುವವರ ಜತೆಗೆ ನೇರ ಸಂಭಾಷಣೆ ನಡೆಸುವುದರಲ್ಲಿ ಅರ್ಥವಿದೆ ಮತ್ತು ಸುರಕ್ಷಿತ ಎಂಬುದು ಯುವಜನರಿಗೂ ಅನ್ನಿಸತೊಡಗಿದೆ.

ಸ್ವತಃ ಫೇಸ್‌ಬುಕ್ಕೇ ಕೆಲವು ತಿಂಗಳ ಹಿಂದೆ ವಾಟ್ಸಾಪ್ ಅನ್ನು ಖರೀದಿಸಿಬಿಟ್ಟಿತು ಅಂದರೆ ಮೆಸೇಜಿಂಗ್ ಆ್ಯಪ್‌ಗಳ ಜನಪ್ರಿಯತೆಗೆ ಇದಕ್ಕಿಂತ ಬೇರೆ ಸಾಕ್ಷಿ ಬೇಕೇ? ಇದೇ ಕಾರಣಕ್ಕೆ, ಮೈಕ್ರೋಸಾಫ್ಟ್ (ಸ್ಕೈಪ್), ಗೂಗಲ್ (ಹ್ಯಾಂಗೌಟ್), ಬ್ಲ್ಯಾಕ್‌ಬೆರಿ (ಬಿಬಿ ಮೆಸೆಂಜರ್), ಆ್ಯಪಲ್ (ಐ-ಮೆಸೇಜ್) ಜತೆಗೆ, ಫೇಸ್‌ಬುಕ್ ಕೂಡ ಪ್ರತ್ಯೇಕವಾದ ಮೆಸೆಂಜರ್ ಆ್ಯಪ್‌ಗಳನ್ನು ರೂಪಿಸಿ, ಅದರ ಬೆಳವಣಿಗೆಗೆ ಹೆಚ್ಚು ಒತ್ತು ನೀಡುತ್ತಿವೆ.

ಇಷ್ಟಾಗಿಯೂ ಬದಲಾವಣೆಯೇ ಜಗದ ನಿಯಮ. ಈ ಮೆಸೇಜಿಂಗ್ ಆ್ಯಪ್‌ಗಳ ಜಾಗದಲ್ಲಿ ಹೊಸತನದ ನಿರೀಕ್ಷೆಯಲ್ಲಿ, ನವೀನ ತಂತ್ರಜ್ಞಾನವನ್ನು ಅಪ್ಪಿ-ಒಪ್ಪಿಕೊಳ್ಳಲು ಕಾತರಿಸುತ್ತಿದೆ ಯುವ ಜಗತ್ತು.

ಆ್ಯಪ್ ಅನುಕೂಲಗಳು
* ಗೊತ್ತಿರುವವರನ್ನು ಮಾತ್ರವೇ ಸ್ನೇಹಿತರಾಗಿಸಿಕೊಳ್ಳಬಹುದು. ಮೊಬೈಲ್ ಸಂಖ್ಯೆ ಇರಲೇಬೇಕಲ್ಲ!
* ಕ್ಷಿಪ್ರ ಸಂದೇಶ ರವಾನೆ, ಸಿಗ್ನಲ್ ವೀಕ್ ಎಂಬ ಕಿರಿಕಿರಿ ಇರುವುದಿಲ್ಲ
* ಇವು ಕೇವಲ ಟೆಕ್ಸ್ಟ್ ಕಳುಹಿಸುವ ಆ್ಯಪ್‌ಗಳಾಗಿ ಉಳಿದಿಲ್ಲ; ವೀಡಿಯೋ, ಫೋಟೋ, ಧ್ವನಿ ಸಂದೇಶವೂ ಕ್ಷಿಪ್ರ ರವಾನೆ
* ಸ್ಪ್ಯಾಮ್ ಇಲ್ಲ, ಪರಿಚಯವಿಲ್ಲದವರು ಹಾಯ್ ಹಲೋ!, ಊಟವಾಯಿತಾ? ತಿಂಡಿಯಾಯಿತಾ? ಕೇಳುವುದಿಲ್ಲ
* ಗೊತ್ತಿದ್ದೂ, ಗೊತ್ತಿಲ್ಲದೆಯೂ, ಕ್ಯಾಂಡಿ ಕ್ರಶ್ ಆಟಕ್ಕೋ, ಇನ್ಯಾವುದೋ ಆಟಕ್ಕೋ ಕರೆಯುವ ಫಜೀತಿ ಇಲ್ಲ
* ನಮ್ಮ ಅಕೌಂಟ್ ಹ್ಯಾಕ್ ಮಾಡಿ, ನಮ್ಮ ಪರವಾಗಿ ಅಸಭ್ಯ, ಅಶ್ಲೀಲ ಸಂದೇಶ ರವಾನಿಸುವ ಆತಂಕವಿಲ್ಲ.

[ವಿಜಯ ನೆಕ್ಸ್ಟ್ ವಾರ ಪತ್ರಿಕೆಯಲ್ಲಿ ಪ್ರಕಟವಾದ ಲೇಖನ]
http://vijayanextepaper.com/Details.aspx?id=4443&boxid=61211171
http://vijayanextepaper.com/Details.aspx?id=4445&boxid=61253125

ಫ್ಯಾಬ್ಲೆಟ್/ಟ್ಯಾಬ್ಲೆಟ್‌ಗೆ ಅನುಕೂಲವಿರುವ ಕನ್ನಡ ಕೀಬೋರ್ಡ್

ಸ್ಮಾರ್ಟ್‌ಫೋನ್‌ನಲ್ಲಿ ಎಸ್ಎಂಎಸ್ ಸಂದೇಶ, ಇಮೇಲ್, ಚಾಟಿಂಗ್ ಇತ್ಯಾದಿಗಳಿಗಾಗಿ ಕನ್ನಡದಲ್ಲೇ ಸಂವಹನ ನಡೆಸಲು ಅನುಕೂಲ ಮಾಡಿಕೊಡುವ ಸಾಕಷ್ಟು ಕೀಬೋರ್ಡ್ (ಕೀಲಿಮಣೆ) ಕಿರುತಂತ್ರಾಂಶಗಳಿವೆ. ಅತ್ಯಾಧುನಿಕ ಆಂಡ್ರಾಯ್ಡ್ ಫೋನ್‌ಗಳಿಗೆ ಸ್ವತಃ ಗೂಗಲ್ ತನ್ನ ಕೀಬೋರ್ಡ್‌ನಲ್ಲಿ ಕನ್ನಡ ಸೇರಿದಂತೆ ಭಾರತೀಯ ಭಾಷೆಗಳ ಟೈಪಿಂಗ್‌ಗೆ ಅವಕಾಶ ಮಾಡಿಕೊಟ್ಟಿದೆ. ಅದನ್ನು ನಾವು ಎನೇಬಲ್ ಮಾಡಿಕೊಳ್ಳುವುದು ಹೇಗೆಂದು ಈ ಹಿಂದೆಯೇ ತಿಳಿಸಿದ್ದೆ. ಅಂತೆಯೇ, ಸರಕಾರ ಇತ್ತೀಚೆಗೆ ಬಿಡುಗಡೆ ಮಾಡಿದ ಕನ್ನಡ ಕೀ ಹಾಗೂ ಇತರ ಕನ್ನಡ ತಂತ್ರಾಂಶ ನಿಪುಣರು ಸಿದ್ಧಪಡಿಸಿ ಉಚಿತವಾಗಿಯೇ ಜನರಿಗೆ ಒದಗಿಸಿರುವ ಜಸ್ಟ್ ಕನ್ನಡ, ಎನಿಸಾಫ್ಟ್, ಪಾಣಿನಿ, ಮಲ್ಟಿಲಿಂಗ್ ಕೀಬೋರ್ಡ್, ಪದ ಕನ್ನಡ, ಇಂಡಿಕ್ ಕೀಬೋರ್ಡ್, ಅಕ್ಷರ ಕನ್ನಡ, ಈಝೀಟೈಪ್ ಕನ್ನಡ, ಸ್ವಿಫ್ಟ್‌ಕೀ, ಟೈಪ್ ಕನ್ನಡ ಮುಂತಾಗಿ ಅಸಂಖ್ಯ ಕೀಲಿಮಣೆಗಳಿವೆ. ಇವುಗಳ ಸಾಲಿಗೆ ಹೊಸ ಸೇರ್ಪಡೆ ಸ್ವರ ಚಕ್ರ. ಇದನ್ನು ಸಿದ್ಧಪಡಿಸಿರುವುದು ಐಐಟಿ ಬಾಂಬೇ ತಂಡ. ಬಳಕೆಗೆ ಸುಲಭವಾಗಿರುವ ಜಸ್ಟ್ ಕನ್ನಡ ಮತ್ತು ಪದ ಕೀಲಿಮಣೆಗಳ ಬಗ್ಗೆ ಹಿಂದೆ ಉಲ್ಲೇಖಿಸಿದ್ದೆ. ಈ ಸ್ವರಚಕ್ರ ಕೀಬೋರ್ಡ್ ಇವೆಲ್ಲವುಗಳಿಗಿಂತ ಭಿನ್ನವಾಗಿದೆ.

ಯುನಿಕೋಡ್ ಬೆಂಬಲಿಸುವ ಯಾವುದೇ ಆಂಡ್ರಾಯ್ಡ್ ಫೋನ್‌ಗಳಿಗೆ ಈ ಆ್ಯಪ್ ಹೊಂದಿಕೊಳ್ಳುತ್ತದೆ. ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ ‘Swarachakra Kannada’ ಅಂತ ಹುಡುಕಿ ಇನ್‌ಸ್ಟಾಲ್ ಮಾಡಿಕೊಂಡ ಬಳಿಕ, ಅದನ್ನು ಡೀಫಾಲ್ಟ್ ಕೀಬೋರ್ಡ್ ಆಗಿ ಹೊಂದಿಸಬೇಕು. ಹೊಂದಿಸುವುದು ಹೇಗೆ ಎಂದು ಈ ಕೀಲಿಮಣೆಯೇ ನಿಮಗೆ ದಾರಿ ತೋರಿಸುತ್ತದೆ. ಹೀಗೆ ಮಾಡಿದರೆ, ಇಂಗ್ಲಿಷ್‌ನಲ್ಲಿ ಟೈಪ್ ಮಾಡುವುದಕ್ಕೆ ಯಾವುದೇ ಸಮಸ್ಯೆಯಾಗುವುದಿಲ್ಲ; ಒಂದು ಬಟನ್ ಪ್ರೆಸ್ ಮಾಡಿದರೆ, ಇಂಗ್ಲಿಷ್ ಅಥವಾ ಕನ್ನಡ ಕೀಬೋರ್ಡ್‌ಗೆ ಬದಲಾಗಬಹುದು. ಬೇರೆ ಬೇರೆ ಭಾಷೆಗಳಿಗೆ ಸ್ವರಚಕ್ರ ಪ್ರತ್ಯೇಕವಾಗಿ ಲಭ್ಯವಿದೆ.

ಇದು ವಿಭಿನ್ನ ಅಂದೆನಲ್ಲ, ಹೇಗೆಂದರೆ, ಇಡೀ ಕೀಲಿಮಣೆಯು ಕನ್ನಡ ವರ್ಣಮಾಲೆಯ ಅನುಕ್ರಮಣಿಕೆಯಲ್ಲಿದೆ. ಇಲ್ಲಿ ಕಗಪ, ಇನ್‌ಸ್ಕ್ರಿಪ್ಟ್, ಫೋನೆಟಿಕ್ (ಟ್ರಾನ್ಸ್‌ಲಿಟರೇಶನ್ – ಲಿಪ್ಯಂತರ) ಹೀಗೆಲ್ಲಾ ವೈವಿಧ್ಯವಿಲ್ಲ. ಸ್ವರಾಕ್ಷರಗಳೆಲ್ಲವೂ ಒಂದೇ ಕೀಲಿಯಲ್ಲಿ ಗುಂಪುಗೂಡಿವೆ. ವ್ಯಂಜನಾಕ್ಷರಗಳು ನಾವು ಕನ್ನಡ ಕಲಿಯಲಾರಂಭಿಸಿದಾಗ ಬಳಪದಲ್ಲಿ ಬರೆದಂತಹಾ ಸ್ಥಾನಗಳಲ್ಲೇ ಇವೆ. ಇದಲ್ಲದೆ, ಒತ್ತಕ್ಷರ, ಮಾತ್ರಾ ಸಂಯೋಜನೆ… ಇವೆಲ್ಲವೂ ಚಕ್ರಾಕಾರದ ಪರದೆಯಲ್ಲಿ ಕಾಣಿಸುವುದರಿಂದಲೇ ಇದಕ್ಕೆ ಸ್ವರಚಕ್ರ ಎಂದು ಹೆಸರಿಸಲಾಗಿದೆ. ಫ್ಯಾಬ್ಲೆಟ್ (ಸ್ಕ್ರೀನ್ ಗಾತ್ರ 5 ರಿಂದ 7 ಇಂಚಿನ ನಡುವೆ ಇರುವವು) ಅಥವಾ ಟ್ಯಾಬ್ಲೆಟ್‌ಗಳಲ್ಲಿ (7 ಇಂಚಿಗಿಂತ ದೊಡ್ಡ ಸ್ಕ್ರೀನ್ ಉಳ್ಳವು) ಸ್ಟೈಲಸ್ ಎಂಬ ಸ್ಮಾರ್ಟ್ ಪೆನ್ ಬಳಸುವವರಿಗೆ ಈ ಕೀಬೋರ್ಡ್ ಹೆಚ್ಚು ಸೂಕ್ತ ಅನಿಸುತ್ತದೆ.

ಕನ್ನಡ ಅಥವಾ ಯಾವುದೇ ಭಾರತೀಯ ಲಿಪಿಯು ಇಂಗ್ಲಿಷ್‌ನಂತಿಲ್ಲದೆ ಸಂಕೀರ್ಣ. ಒಂದು ಅಕ್ಷರವೆಂದರೆ ವ್ಯಂಜನ ಹಾಗೂ ಮಾತ್ರೆಯ (ಸ್ವರಾಕ್ಷರ ಭಾಗ) ಸಂಯೋಗ. ಉದಾಹರಣೆಗೆ, ‘ದೊ’ ಬರೆಯಬೇಕಿದ್ದರೆ ದ + ‘ೊ’ ಬೇಕು. ಈ ಕೀಬೋರ್ಡ್‌ನಲ್ಲಿ ನೀವು ಯಾವುದೇ ಅಕ್ಷರವನ್ನು ಒತ್ತಿಹಿಡಿದುಕೊಂಡಾಗ, ವ್ಯಂಜನ ಮತ್ತು ಮಾತ್ರೆಗಳ ವೈವಿಧ್ಯಮಯ ಸ್ವರ ಸಂಯೋಜನೆಯಿರುವ ಚಕ್ರ ಕಾಣಿಸುತ್ತದೆ. ನಮಗೆ ಬೇಕಾದ ಅಕ್ಷರದತ್ತ ನಮ್ಮ ಕೈಬೆರಳು ಅಥವಾ ಸ್ಟೈಲಸ್ ಅನ್ನು ಸ್ಲೈಡ್ ಮಾಡಿದರಾಯಿತು.

ಸಂಯುಕ್ತಾಕ್ಷರಗಳು ಭಾರತೀಯ ಭಾಷೆಗಳ ಜೀವಾಳ. ಸಂಯುಕ್ತಾಕ್ಷರಗಳ ಸಮೂಹವನ್ನು ಚಕ್ರದಲ್ಲಿ ನೋಡಬೇಕಿದ್ದರೆ, ವ್ಯಂಜನದ ಬಳಿಕ ಹಲಂತ (ಅರ್ಧಸ್ವರ) ಅಕ್ಷರವಾಗಿರುವ ‘್’ ಒತ್ತಿಹಿಡಿದಾಗ, ಎಲ್ಲ ಒತ್ತಕ್ಷರಗಳ ಸಾಧ್ಯತೆಗಳು ಚಕ್ರದಲ್ಲಿ ಗೋಚರಿಸುತ್ತವೆ. ಬೇಕಾಗಿರುವುದನ್ನು ಆಯ್ಕೆ ಮಾಡಿಕೊಳ್ಳಲು ಅದು ಇರುವ ಕಡೆ ಸ್ವೈಪ್ ಮಾಡಿಕೊಂಡರಾಯಿತು.

ಈಗಾಗಲೇ ಬೇರೆ ಕೀಬೋರ್ಡ್ ಬಳಸುತ್ತಿರುವವರಿಗೆ ಇದುವೇ ಶ್ರೇಷ್ಠ ಅಂತನ್ನಿಸದು. ಆದರೆ, ಹೊಸದಾಗಿ ಕನ್ನಡದಲ್ಲಿ ಟೈಪ್ ಮಾಡಲು ಆರಂಭಿಸುವವರಿಗೆ ಸೂಕ್ತ ಇದು. ಈಗಾಗಲೇ ‘ಕಂಗ್ಲಿಷ್’ ಬಳಸುತ್ತಿರುವವರಿಗೆ ಜಸ್ಟ್ ಕನ್ನಡ, ಗೂಗಲ್ ಕೀಬೋರ್ಡ್ ಅಥವಾ ಪದ ಕನ್ನಡ ಅನುಕೂಲಕರ.

ಟೆಕ್ ಟಾನಿಕ್: ಸಮಯ ತಿಳಿಯಲು ಗೂಗಲ್
ಗೂಗಲ್ ಎಂಬ ಹುಡುಕಾಟದ ದೈತ್ಯನಿಂದ ಏನನ್ನು ಬೇಕಾದರೂ ಮಾಹಿತಿ ತಿಳಿಯಬಹುದು. ಅದೇ ರೀತಿ, ಹೊರದೇಶಗಳ ವೆಬ್‌ಸೈಟ್ ಜಾಲಾಡುವಾಗ ಅಥವಾ ಆನ್‌ಲೈನ್ ಮೀಟಿಂಗ್ ಏರ್ಪಡಿಸಿದಾಗ, ಅಲ್ಲಿನ ಸಮಯ ವಲಯದ ಪ್ರಕಾರ ಸಮಯವನ್ನು ನಮೂದಿಸಿರುತ್ತಾರೆ. ಅದನ್ನು ನಮ್ಮ ಭಾರತೀಯ ಕಾಲಮಾನ ಪ್ರಕಾರ ತಿಳಿದುಕೊಳ್ಳುವುದು ಹೇಗೆ? ತೀರಾ ಸುಲಭ. ಗೂಗಲ್ ಸರ್ಚ್ ಬಾಕ್ಸ್‌ನಲ್ಲಿ, ಉದಾಹರಣೆಗೆ, 01 pm est to India time ಅಂತ ಬರೆದರೆ ಸಾಕು, ಪೌರಾತ್ಯದ ಸಮಯವನ್ನು ಭಾರತೀಯ ಕಾಲಮಾನ ಪ್ರಕಾರ ತೋರಿಸುತ್ತದೆ.

ವಿಜಯ ಕರ್ನಾಟಕ ಅಂಕಣ ಡಿಸೆಂಬರ್ 29, 2014: ಮಾಹಿತಿ@ತಂತ್ರಜ್ಞಾನ: ಅವಿನಾಶ್ ಬಿ.

2014: ಸ್ಮಾರ್ಟ್‌ಫೋನ್‌ಗಳದ್ದೇ ಕಾರುಬಾರು

ಹಿನ್ನೋಟ 2014 – ಅವಿನಾಶ್ ಬಿ., ವಿಜಯ ಕರ್ನಾಟಕ
————-
ಮಾಹಿತಿ ತಂತ್ರಜ್ಞಾನ ಕ್ಷೇತ್ರದ ಪಾಲಿಗೆ ಹೆಚ್ಚು ಧೂಳೆಬ್ಬಿಸಿದ ವರ್ಷ 2014. ಮೊಬೈಲ್ ಪ್ಲ್ಯಾಟ್‌ಫಾರ್ಮ್‌ಗಳಾದ ಆಂಡ್ರಾಯ್ಡ್, ವಿಂಡೋಸ್ ಹಾಗೂ ಆ್ಯಪಲ್‌ಗಳು ಅತ್ಯಾಧುನಿಕ ತಂತ್ರಜ್ಞಾನದ ಕಾರ್ಯಾಚರಣಾ ವ್ಯವಸ್ಥೆಯೊಂದಿಗೆ ಸ್ಮಾರ್ಟ್‌ಫೋನ್ ಜಗತ್ತಿನಲ್ಲಿ ಬಿರುಗಾಳಿಯೆಬ್ಬಿಸಿದರೆ, ನವನವೀನ ತಂತ್ರಜ್ಞಾನದ ಕಂಪ್ಯೂಟರ್‌ಗಳು, ಟು-ಇನ್-ಒನ್ ಕೈಗೆಟಕುವ ದರದಲ್ಲಿ ಲಭ್ಯವಾದವು. ಆನ್‌ಲೈನ್ ಮಾರಾಟದ ಮೂಲಕ ಕುಳಿತಲ್ಲೇ ಶಾಪಿಂಗ್ ಅನುಭವ ನೀಡಿದ ಇ-ಟೇಲರ್‌ಗಳು, ಮಳಿಗೆಗಳನ್ನಿಟ್ಟು ಗ್ರಾಹಕರ ಸೆಳೆಯಲು ಸಂಕಷ್ಟಪಡುತ್ತಿದ್ದ ರೀಟೇಲರ್‌ಗಳ ಕಣ್ಣು ಕೆಂಪಗಾಗಿಸಿದವು. ಚೀನೀ ಮೊಬೈಲ್‌ಗಳ ದಾಂಗುಡಿಯಿಂದ ಸ್ಮಾರ್ಟ್‌ಫೋನ್ ದೈತ್ಯರು ಕಂಗೆಟ್ಟರು. ಸ್ಮಾರ್ಟ್ ವಾಚ್‌ಗಳ ಯುಗವೂ ಆರಂಭವಾಯಿತು.
—————
ಮೊಬೈಲ್, ಕಂಪ್ಯೂಟರ್, ಟ್ಯಾಬ್ಲೆಟ್, ಫ್ಯಾಬ್ಲೆಟ್ ಕ್ರಾಂತಿ
ವಿನೂತನ ತಂತ್ರಜ್ಞಾನಗಳು, ಆ್ಯಪ್‌ಗಳು, ಸ್ಟಾರ್ಟಪ್‌ಗಳ ರೂಪದಲ್ಲಿ ಜನರನ್ನು ಆಕರ್ಷಿಸತೊಡಗಿದರೆ, ಸ್ಮಾರ್ಟ್‌ಫೋನ್ ದಿಗ್ಗಜರು ಸಾವಿರಾರು ಸಂಖ್ಯೆಯ ಹೊಸ ಹೊಸ ಸಾಧನಗಳನ್ನು ಪೈಪೋಟಿ ದರದಲ್ಲಿ ಜನರಿಗೆ ನೀಡತೊಡಗಿದವು. ಚೀನಾದ ಪ್ರಮುಖ ಕಂಪನಿಗಳೂ ಭಾರತಕ್ಕೆ ಲಗ್ಗೆ ಇಟ್ಟಿದ್ದು ಪ್ರಧಾನ ಕಾರಣ. ಶ್ವೋಮಿ, ಹ್ಯುವೈ, ಒನ್‌ಪ್ಲಸ್, ಜಿಯೋನಿ, ಹೆಯರ್, ಒಪ್ಪೋ, ಝಡ್‌ಟಿಇ ಮುಂತಾದ ಚೀನೀ ಕಂಪನಿಗಳು ಸ್ಯಾಮ್ಸಂಗ್, ಸೋನಿ, ಹೆಚ್‌ಟಿಸಿ, ಆ್ಯಪಲ್‌ಗಳ 40-50 ಸಾವಿರ ರೂ. ಬೆಲೆ ಬಾಳುವ ಸ್ಮಾರ್ಟ್‌ಫೋನ್‌ಗೆ ಸರಿಸಮವಾದ ಸ್ಮಾರ್ಟ್‌ಫೋನ್‌ಗಳು 10ರಿಂದ 20 ಸಾವಿರ ರೂ. ಆಸುಪಾಸಿನಲ್ಲಿ ದೊರೆಯುವಂತೆ ಮಾಡಿದವು. ಭಾರತೀಯ ಗ್ರಾಹಕನಿಗೆ ಲಾಭವಾಗಿದ್ದಂತೂ ನಿಜ.

3 ಕಾರ್ಯಾಚರಣಾ ವ್ಯವಸ್ಥೆಗಳು: ಲಾಲಿಪಾಪ್, ವಿಂಡೋಸ್ 8.1, ಐಒಎಸ್ 8,
ಟಚ್ ಸ್ಕ್ರೀನ್ ಸ್ಮಾರ್ಟ್‌ಫೋನ್‌ಗಳ ಬೆಲೆಯೂ ಇಳಿಮುಖವಾಗಿ ಜನಾಕರ್ಷಣೆ ಹೆಚ್ಚಾಗಿರುವುದರೊಂದಿಗೆ ಜನರಿಗೆ ಅತ್ಯುತ್ತಮ ಸೌಕರ್ಯ ಒದಗಿಸಲು ಪ್ರಮುಖ ತಂತ್ರಾಂಶ ದಿಗ್ಗಜರು ಪೈಪೋಟಿ ನಡೆಸಿದವು. ಆಂಡ್ರಾಯ್ಡ್ ಕಾರ್ಯಾಚರಣಾ ವ್ಯವಸ್ಥೆಯಡಿ ಕಾರ್ಯಾಚರಿಸುವ ಮೊಬೈಲ್‌ಗಳಿಗೆ ಹೊಸ ಆವೃತ್ತಿ 5.0 ಲಾಲಿಪಾಪ್ ಹೆಸರಿನೊಂದಿಗೆ ಘೋಷಣೆಯಾದರೆ, ವಿಂಡೋಸ್ ಕೂಡ ಹಿಂದೆ ಬೀಳಲಿಲ್ಲ. ಟ್ಯಾಬ್ಲೆಟ್, ಲ್ಯಾಪ್‌ಟಾಪ್, ಸ್ಮಾರ್ಟ್‌ಫೋನ್ ಎಲ್ಲದಕ್ಕೂ ಹೊಂದಿಕೆಯಾಗುವ ವಿಂಡೋಸ್ 8.1 ಕಾರ್ಯಾಚರಣಾ ವ್ಯವಸ್ಥೆ ಹೊರತಂದಿತಲ್ಲದೆ, ಮುಂದಿನ ವರ್ಷ ವಿಂಡೋಸ್ 10 ಬಿಡುಗಡೆ ಮಾಡುವುದಾಗಿ ಘೋಷಿಸಿತು. ಆ್ಯಪಲ್ ಕಂಪನಿ ಐಒಎಸ್ 8 ಮೂಲಕ ತಂತ್ರಜ್ಞಾನದ ಉತ್ತುಂಗ ಅನುಭವವನ್ನು ಜನರಿಗೆ ಒದಗಿಸಿತು. ಜಾವಾ, ಸಿಂಬಿಯಾನ್ ಆಧಾರಿತ ಮೊಬೈಲುಗಳು ಬಹುತೇಕ ಅವಸಾನದ ಹಂತ ತಲುಪಿದವು.

4ಜಿ ತಂತ್ರಜ್ಞಾನ
ಭಾರತದಲ್ಲಿ ಜಿಪಿಆರ್‌ಎಸ್/ಎಡ್ಜ್ (2ಜಿ) ಇಂಟರ್ನೆಟ್ ಸಂಪರ್ಕ ವ್ಯವಸ್ಥೆ ಇನ್ನೂ ಕೂಡ ಸರಿಯಾಗಿ ದೇಶದ ಮೂಲೆ ಮೂಲೆಗೆ ತಲುಪಿಲ್ಲ. ಅಷ್ಟರಲ್ಲಾಗಲೇ 3ಜಿ ತಂತ್ರಜ್ಞಾನದ ಮೂಲಕ ಇಂಟರ್ನೆಟ್ ಸಂಪರ್ಕವು ನಗರ ಪ್ರದೇಶಗಳಲ್ಲಿ ತನ್ನ ಛಾಪು ಮೂಡಿಸಿತು. ವರ್ಷದ ಕೊನೆ ಕೊನೆಗೆ ಮತ್ತಷ್ಟು ವೇಗದ ತರಂಗಾಂತರವಿರುವ, ವೇಗವಾಗಿ ವೆಬ್ ಬ್ರೌಸ್ ಮಾಡುವ ಸಾಮರ್ಥ್ಯವಿರುವ 4ಜಿ ತಂತ್ರಜ್ಞಾನವೂ ಬೆಂಗಳೂರು ಸಹಿತ ದೇಶದ ಕೆಲವೇ ನಗರಗಳಲ್ಲಿ ಆರಂಭವಾಯಿತು. ಬೆಂಗಳೂರು, ಮೈಸೂರು, ಮೈಸೂರು ಮುಂತಾದ ಪಟ್ಟಣಗಳಲ್ಲಿ ವೈ-ಫೈ ಇಂಟರ್ನೆಟ್ ವಲಯವೂ ರೂಪುಗೊಂಡಿತು.

ನೋಕಿಯಾ ಇಳಿಮುಖ -ಮೈಕ್ರೋಸಾಫ್ಟ್ ಮೇಲುಗೈ
ಭಾರತೀಯರ ನೆಚ್ಚಿನ ಮೊಬೈಲ್ ಬ್ರ್ಯಾಂಡ್ ನೋಕಿಯಾದ ಮೊಬೈಲ್ ತಯಾರಿಕಾ ಘಟಕವನ್ನು ಮೈಕ್ರೋಸಾಫ್ಟ್ ಕಂಪನಿಯು 750 ಕೋಟಿ ಡಾಲರ್‌ಗೆ ಖರೀದಿಸುವ ಮೂಲಕ ಜಗತ್ತಿನ ಎರಡು ಅತಿ ಜನಪ್ರಿಯ ತಂತ್ರಜ್ಞಾನಗಳು ಒಂದಾದವು. ಸ್ಮಾರ್ಟ್‌ಫೋನ್‌ಗಳ ಅಬ್ಬರಕ್ಕೆ ಒಗ್ಗಿಕೊಳ್ಳಲಾಗದೆ ತೀರಾ ಹಿನ್ನಡೆ ಅನುಭವಿಸಿದ ನೋಕಿಯಾ, ಆಂಡ್ರಾಯ್ಡ್ ಎಕ್ಸ್ ಸರಣಿಯ ಮೂಲಕ ಚೇತರಿಸಿಕೊಳ್ಳಲು ಪ್ರಯತ್ನಿಸಿತಾದರೂ, ವಿಫಲವಾಯಿತು. ಮೈಕ್ರೋಸಾಫ್ಟ್‌ನ ವಿಂಡೋಸ್ ತಂತ್ರಾಂಶದ ಲುಮಿಯಾ ಫೋನುಗಳು ಮಾರುಕಟ್ಟೆಯಲ್ಲಿ ಛಾಪು ಮೂಡಿಸುತ್ತಿರುವಂತೆಯೇ, ಆ ಕಂಪನಿಯೇ ನೋಕಿಯಾ ವಿಭಾಗವನ್ನು ತನ್ನದಾಗಿಸಿಕೊಂಡು, ಮೈಕ್ರೋಸಾಫ್ಟ್ ಲುಮಿಯಾ 535 ಮೂಲಕ ಪರಿಪೂರ್ಣವಾಗಿ, ತನ್ನದೇ ಬ್ರ್ಯಾಂಡ್ ಬಲದಲ್ಲಿ ಮೊಬೈಲ್ ಮಾರುಕಟ್ಟೆಗೆ ಜಿಗಿಯಿತು. ನೋಕಿಯಾ ವರ್ಷಾಂತ್ಯದಲ್ಲಿ ಆಂಡ್ರಾಯ್ಡ್ ಆಧಾರಿತ ಟ್ಯಾಬ್ಲೆಟ್ ತಯಾರಿಗೆ ಮುಂದಾಗಿ, ಮುಂದಿನ ವರ್ಷಾರಂಭದಲ್ಲಿ ಎನ್1 ಸಾಧನದೊಂದಿಗೆ ಮತ್ತೆ ಮಾರುಕಟ್ಟೆಗೆ ಮರಳುವುದಾಗಿ ಘೋಷಿಸಿತು.

ಸ್ಮಾರ್ಟ್‌ವಾಚ್‌ಗಳ ಯುಗ
ಜನರಲ್ಲಿ ಫಿಟ್ನೆಸ್ ಬಗ್ಗೆ ಜಾಗೃತಿ ಹೆಚ್ಚಾಗಿ, ನಾವು ನಡೆದ ಹೆಜ್ಜೆಗಳ ಲೆಕ್ಕ ತಿಳಿಸುವ, ಕ್ಯಾಲೊರಿ ಲೆಕ್ಕಾಚಾರ ನೀಡುವ, ಜತೆಗೆ ಫೋನ್‌ಗೆ ಬಂದ ಸಂದೇಶಗಳನ್ನು ಕೈಯಲ್ಲಿ ಓದಲು ಅನುಕೂಲ ಮಾಡುವ ಸ್ಮಾರ್ಟ್‌ಫೋನುಗಳು ಮಾರುಕಟ್ಟೆಗೆ ಆಗಮಿಸತೊಡಗಿದವು. ಇದಕ್ಕಾಗಿಯೇ ಗೂಗಲ್, ‘ಆಂಡ್ರಾಯ್ಡ್ ವೇರ್’ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಿತು. ಇದರ ಆಧಾರದಲ್ಲಿ ಎಲ್‌ಜಿ ಜಿ ವಾಚ್, ಮೋಟೋರೋಲ ಮೋಟೋ 360, ಸ್ಯಾಮ್ಸಂಗ್ ಗಿಯರ್ ಲೈವ್, ಆಸುಸ್ ಝೆನ್‌ವಾಚ್ ಮುಂತಾದ ಸ್ಮಾರ್ಟ್‌ವಾಚ್‌ಗಳ ಆಗಮನವಾಯಿತು. ಆ್ಯಪಲ್ ಕೂಡ ಐವಾಚ್ ಸಿದ್ಧಪಡಿಸುತ್ತಿದೆ ಎಂಬ ಸುದ್ದಿಯು ಈ ಕಂಪನಿಗಳನ್ನು ತರಾತುರಿಗೊಳಿಸಿತು. ಮೈಕ್ರೋಸಾಫ್ಟ್ ಕೂಡ ಹಿಂದೆ ಬೀಳಲಿಲ್ಲ, ಫಿಟ್‌ಬಿಟ್ ಆ್ಯಪ್ ಮೂಲಕ ಮೈಕ್ರೋಸಾಫ್ಟ್ ಬ್ಯಾಂಡ್ ಅನ್ನು ಮಾರುಕಟ್ಟೆಗಿಳಿಸಿತು.

ದೇಶೀ ತಯಾರಕರಿಗೆ ಆಂಡ್ರಾಯ್ಡ್ ಒನ್, ವಿಂಡೋಸ್ 8
ದೇಶೀ ಮೊಬೈಲ್ ತಯಾರಕರಿಗೆ ಉತ್ತೇಜನ ನೀಡಿ ಜನ ಸಾಮಾನ್ಯರನ್ನು ತಂತ್ರಜ್ಞಾನದತ್ತ ಸೆಳೆಯುವ ನಿಟ್ಟಿನಲ್ಲಿ ಗೂಗಲ್ ಕಂಪನಿಯು, ಆಂಡ್ರಾಯ್ಡ್ ಒನ್ ಎಂಬ ವ್ಯವಸ್ಥೆಯನ್ನು ಪರಿಚಯಿಸಿ, ಆಂಡ್ರಾಯ್ಡ್ ಕಾರ್ಯಾಚರಣಾ ವ್ಯವಸ್ಥೆಯನ್ನು ಕಾರ್ಬನ್, ಮೈಕ್ರೋಸಾಫ್ಟ್ ಹಾಗೂ ಸ್ಪೈಸ್ ಕಂಪನಿಗಳಿಗೆ ವಿತರಿಸಿತು. ತತ್ಫಲವಾಗಿ 6 ಸಾವಿರ ರೂ. ಆಸುಪಾಸಿನಲ್ಲಿ ಆಧುನಿಕ ಸೌಲಭ್ಯದ ಸ್ಮಾರ್ಟ್‌ಫೋನ್‌ಗಳು ಮಾರುಕಟ್ಟೆಗೆ ಬಂದವು. ಅವು ಅಷ್ಟೇನೂ ಛಾಪು ಮೂಡಿಸಿದಂತೆ ತೋರುವುದಿಲ್ಲ. ಇದರಿಂದ ಪ್ರೇರಿತವಾದ ಮೈಕ್ರೋಸಾಫ್ಟ್ ಕೂಡ, ವಿಂಡೋಸ್ ಕಾರ್ಯಾಚರಣಾ ವ್ಯವಸ್ಥೆಯನ್ನು ದೇಶೀ ತಯಾರಕ ಕಂಪನಿಗಳಿಗೆ ಒದಗಿಸಿದ ಪರಿಣಾಮ, ವಿಂಡೋಸ್ ಆಧಾರಿತ ಟ್ಯಾಬ್ಲೆಟ್‌ಗಳು, ಸ್ಮಾರ್ಟ್‌ಫೋನುಗಳು ಅಗ್ಗದ ದರದಲ್ಲಿ ಮಾರುಕಟ್ಟೆಗೆ ಬಂದವು.

ಸೆಲ್ಫೀ ಎಂಬ ಮೇನಿಯಾ
ಮೊಬೈಲ್ ಫೋನ್‌ಗಳಲ್ಲಿ ತಮ್ಮ ಫೋಟೋ ತಾವೇ ತೆಗೆದುಕೊಳ್ಳುವ ಕ್ರೇಜ್ ಜನರಲ್ಲಿ ಹೆಚ್ಚಾಯಿತು. ಇದರ ಜತೆಗೆ ಮೊಬೈಲ್ ತಯಾರಿಕಾ ಕಂಪನಿಗಳು ಕೂಡ ಈ ರೀತಿಯ ಸೆಲ್ಫೀ ಚಿತ್ರಗಳಿಗೆ ಅನುಕೂಲವಾಗುವಂತೆ ಮುಂಭಾಗದ ಕ್ಯಾಮೆರಾಗಳ ರೆಸೊಲ್ಯುಶನ್ ಅನ್ನು ವರ್ಧಿಸತೊಡಗಿದವು. ತೀರಾ ಕಡಿಮೆ ರೆಸೊಲ್ಯುಶನ್ ಇದ್ದ ಮುಂಭಾಗದ ಕ್ಯಾಮೆರಾಗಳು ಐದರಿಂದ ಎಂಟು ಮೆಗಾಪಿಕ್ಸೆಲ್‌ವರೆಗೂ ವಿಸ್ತರಣೆಯಾದವು. ಹಲವು ಬ್ರ್ಯಾಂಡ್‌ಗಳು ಸೆಲ್ಫೀ ಫೋನ್ ಎನ್ನುತ್ತಲೇ ಮಾರುಕಟ್ಟೆಗೆ ಲಗ್ಗೆಯಿಟ್ಟವು. ಜನರಿಗಿದ್ದ ಮೇನಿಯಾವನ್ನು ಮಾರುಕಟ್ಟೆಗೆ ಬಳಸಿಕೊಂಡವು. ಇಲ್ಲೂ ಪೈಪೋಟಿಯಿಂದಾಗಿ ಕಡಿಮೆ ದರದಲ್ಲಿ ಉತ್ತಮ ಕ್ಯಾಮೆರಾ ಫೋನುಗಳು ಕೈಗೆ ಸಿಗುವಂತಾಯಿತು.

ಆನ್‌ಲೈನ್ ಶಾಪಿಂಗ್ ಉತ್ಸವ
ಪ್ರತಿವರ್ಷದಂತೆ ಗೂಗಲ್ ಕಂಪನಿಯು ಆನ್‌ಲೈನ್ ಶಾಪಿಂಗ್ ಉತ್ಸವವನ್ನು Gosf.in ತಾಣದ ಮೂಲಕ ವರ್ಷಾಂತ್ಯದಲ್ಲಿ ನಡೆಸಿತು. ಇದಕ್ಕೆ ಮುನ್ನವೇ, ವಿದೇಶದಲ್ಲಿ ಬ್ಲ್ಯಾಕ್ ಫ್ರೈಡೇ, ಸೈಬರ್ ಮಂಡೇ ಮುಂತಾದ ಹೆಸರಿನಲ್ಲಿ ನಡೆಯುತ್ತಿದ್ದ ಭರ್ಜರಿ ಆನ್‌ಲೈನ್ ವಹಿವಾಟು ಭಾರತದಲ್ಲಿಯೂ ಛಾಪು ಮೂಡಿಸಿತು. ಮುಖ್ಯವಾಗಿ ಫ್ಲಿಪ್ ಕಾರ್ಟ್, ಅಮೆಜಾನ್ ಹಾಗೂ ಸ್ನ್ಯಾಪ್‌ಡೀಲ್ ಅಂತರ್ಜಾಲ ತಾಣಗಳು, ಭರ್ಜರಿ ಕೊಡುಗೆಯ ಮೂಲಕ ಗ್ರಾಹಕರ ಖರೀದಿ ಚಾಳಿಗೆ ಹುಚ್ಚೆಬ್ಬಿಸಿದವು. ವಿಶೇಷವಾಗಿ ಎಲೆಕ್ಟ್ರಾನಿಕ್ ವಸ್ತುಗಳು ಅತ್ಯಂತ ಕಡಿಮೆ ಬೆಲೆಗೆ, ಸ್ಫರ್ಧಾತ್ಮಕ ಬೆಲೆಗೆ ಲಭ್ಯವಾದವು. ಫ್ಲಿಪ್‌ಕಾರ್ಟ್ ಅಕ್ಟೋಬರ್ ಆರರಂದು ನಡೆಸಿದ ‘ಬಿಗ್ ಬಿಲಿಯನ್ ಡೇ’ ಮಾರಾಟ ಅಂತಾರಾಷ್ಟ್ರೀಯವಾಗಿ ಸದ್ದು ಮಾಡಿತು. ತೀರಾ ಅಗ್ಗದ ದರದಲ್ಲಿ ಸರಕುಗಳು ದೊರೆತಾಗ, ರೀಟೇಲ್ ವ್ಯಾಪಾರಿಗಳು ತಕರಾರೆತ್ತಿದರು. ಸರಕಾರ ತನಿಖೆ ನಡೆಸುತ್ತದೆ ಎಂಬ ಮಟ್ಟಿಗೂ ವಿವಾದ ಹೋಯಿತು. ಅದೇ ದಿನ, ಪ್ರತಿಸ್ಫರ್ಧಿಗಳಾದ ಅಮೆಜಾನ್ ಮತ್ತು ಸ್ನ್ಯಾಪ್‌ಡೀಲ್ ಕೂಡ ಭರ್ಜರಿ ಕೊಡುಗೆ ಪ್ರಕಟಿಸಿ, ತಾವೂ ಲಾಭಾಂಶ ಬಾಚಿಕೊಂಡವು. ಗ್ರಾಹಕರಿಗೆ ಕಡಿಮೆ ದರದಲ್ಲಿ ಸರಕು ಲಭ್ಯವಾಯಿತು. ಅಗ್ಗದ ದರದಲ್ಲಿ ಎಲೆಕ್ಟ್ರಾನಿಕ್ ವಸ್ತುಗಳನ್ನು ಪಡೆಯುವ ಅವಕಾಶ ವಂಚಿತರು ಕೈಕೈ ಹಿಸುಕಿಕೊಂಡರು.

ಸ್ಯಾಮ್ಸಂಗ್‌ಗೆ ಹಿನ್ನಡೆ
ಜಾಗತಿಕವಾಗಿ ಸ್ಮಾರ್ಟ್‌ಫೋನ್ ಜಗತ್ತಿನಲ್ಲಿ ಸ್ಯಾಮ್ಸಂಗ್‌ನ ಪ್ರಾಬಲ್ಯವೂ, ವಾರ್ಷಿಕ ಆದಾಯವೂ ಕುಸಿಯತೊಡಗಿತು. ಹತ್ತು ಹಲವು ವಿಭಿನ್ನ ಮಾಡೆಲ್‌ಗಳನ್ನು ಮಾರುಕಟ್ಟೆಗಿಳಿಸಿ ಗೊಂದಲ ಮೂಡಿಸಿದ್ದೇ ಇದಕ್ಕೆ ಕಾರಣ ಎಂಬ ವಿಶ್ಲೇಷಣೆ ಒಂದೆಡೆಯಿಂದ ವ್ಯಕ್ತವಾಯಿತಾದರೂ, ಧೃತಿಗೆಡದ ಅದು ಗೆಲಾಕ್ಸಿ ಎಸ್ 5 ಸೇರಿದಂತೆ ಐಷಾರಾಮಿ ಫೋನುಗಳನ್ನು ಬಿಡುಗಡೆ ಮಾಡಿತು. ಆಂಡ್ರಾಯ್ಡ್ ಕಾರ್ಯಾಚರಣಾ ವ್ಯವಸ್ಥೆಗೆ ಗುಡ್‌ಬೈ ಹೇಳುವ ಮೊದಲ ಹೆಜ್ಜೆಯಾಗಿ, ತಾನೇ ರೂಪಿಸಿದ ಟೈಜೆನ್ ಎಂಬ ಕಾರ್ಯಾಚರಣಾ ವ್ಯವಸ್ಥೆಯಿರುವ ಫೋನುಗಳನ್ನು ಮಾರುಕಟ್ಟೆಗೆ ಬಿಡುವುದಾಗಿ ಘೋಷಿಸಿತು. ವರ್ಷಾಂತ್ಯಕ್ಕೆ ಮಾರುಕಟ್ಟೆಗೆ ಗೆಲಾಕ್ಸಿ ನೋಟ್ ಎಡ್ಜ್ ಎಂಬ ಅರುವತ್ತೈದು ಸಾವಿರ ಬೆಲೆಬಾಳುವ ಮಾಡೆಲ್ ಪರಿಚಯಿಸಿತು.

ಜಿಗಿದು ಕುಳಿತ ಮೋಟೋರೋಲ
ಭಾರತದಲ್ಲಿ ಕಾರ್ಯಾಚರಣೆ ಸ್ಥಗಿತಗೊಳಿಸಿದ ಬಳಿಕ, ಗೂಗಲ್‌ನಿಂದ ಖರೀದಿಗೊಳಪಟ್ಟು, ಆ ಬಳಿಕ ಲೆನೋವೋ ಕಂಪನಿಯ ಪಾಲಾದ ಮೋಟೋರೋಲ ಕಂಪನಿ, ಫ್ಲಿಪ್ ಕಾರ್ಟ್‌ನ ಮೂಲಕವಾಗಿ ಮರುಹುಟ್ಟು ಪಡೆಯಿತು. ಅಗ್ಗದ ದರದಲ್ಲಿ ಅತ್ಯಾಧುನಿಕ ತಂತ್ರಜ್ಞಾನವಿರುವ ಮೋಟೋ ಜಿ, ತದನಂತರದಲ್ಲಿ ಮೋಟೋ ಇ, ಮೋಟೋ ಎಕ್ಸ್ ಸ್ಮಾರ್ಟ್‌ಫೋನ್‌ಗಳ ಮೂಲಕವಾಗಿ, ಆನ್‌ಲೈನ್‌ನಲ್ಲಿ ಮಾತ್ರ ಲಭ್ಯ ಎಂಬ ಮಿತಿಯೊಂದಿಗೆ ಭಾರತೀಯರ ಮನ ಸೆಳೆದಿದ್ದು ವಿಶೇಷ. ಇದು ಆನ್‌ಲೈನ್ ಮಾರಾಟದ ವಿನೂತನ ತಂತ್ರಗಾರಿಕೆಯಾಗಿಯೂ ಜನ ಮಾನಸದಲ್ಲಿ ಉಳಿಯಿತು.

ಎದ್ದು ಬಿದ್ದ ಟ್ಯಾಕ್ಸಿ ಆ್ಯಪ್‌ಗಳು
ಮೊಬೈಲ್‌ನಲ್ಲೇ ಟ್ಯಾಕ್ಸಿ ಬುಕ್ ಮಾಡುವ ಆ್ಯಪ್‌ಗಳಾದ ಉಬೆರ್, ಓಲಾ ಕ್ಯಾಬ್ಸ್, ಟ್ಯಾಕ್ಸಿಫಾರ್‌ಶೂರ್, ಮೇರು ಮುಂತಾದವು ಅತ್ಯಂತ ಅಗ್ಗದ ದರದಲ್ಲಿ ಜನರಿಗೆ ಸೇವೆ ಒದಗಿಸತೊಡಗಿದವು. ಕರೆದಲ್ಲಿಗೆ ಬಾರದೆ, ಮೀಟರ್ ಹಾಕದೆ ಎರ್ರಾಬಿರ್ರಿ ದರ ವಿಧಿಸುವ ಕೆಲವು ಆಟೋ ರಿಕ್ಷಾದವರು ಮತ್ತು ಉತ್ತಮ ಸೇವೆ ನೀಡುತ್ತಿರುವ ಆಟೋವಾಲಾರೂ ಆತಂಕಕ್ಕೊಳಗಾದರು. ಒಂದು ಹಂತದಲ್ಲಿ, ಪ್ರಯಾಣ ದರ ಇಳಿಸದಿದ್ದರೆ ಉಳಿಗಾಲವಿಲ್ಲ ಎಂದು ಸ್ವತಃ ಆಟೋ ಚಾಲಕರೇ ತಮ್ಮ ಯೂನಿಯನ್ ಮೊರೆ ಹೋದ ಪ್ರಸಂಗವೂ ನಡೆಯಿತು. ಆದರೆ, ಅಷ್ಟರಲ್ಲಿ, ನವೆಂಬರ್ ತಿಂಗಳಲ್ಲಿ ದಿಲ್ಲಿಯಲ್ಲಿ ಉಬರ್ ಟ್ಯಾಕ್ಸಿ ಚಾಲಕನೊಬ್ಬ ಅತ್ಯಾಚಾರವೆಸಗಿ ಸಿಕ್ಕಿಬಿದ್ದದ್ದು ದೇಶಾದ್ಯಂತ ಸುದ್ದಿಯಾಯಿತು. ಪರಿಣಾಮ, ಆ್ಯಪ್ ಆಧಾರಿತ ಆಟೋ, ಟ್ಯಾಕ್ಸಿಗಳಿಗೆ ದೇಶಾದ್ಯಂತ ಮೂಗುದಾರ ತೊಡಿಸಲಾಯಿತು.

ಮೊಬೈಲ್ ಒನ್
ಕೇಂದ್ರದಲ್ಲಿ ನರೇಂದ್ರ ಮೋದಿ ಸರಕಾರ ಅಧಿಕಾರಕ್ಕೆ ಬಂದಾಕ್ಷಣವೇ ದೇಶದಲ್ಲಿ ಡಿಜಿಟಲ್ ಇಂಡಿಯಾ ಯೋಜನೆ ಘೋಷಿಸಿದರು. ಅದರ ಪರಿಣಾಮವಾಗಿ ಕೇಂದ್ರ ಸರಕಾರದ ಹಲವು ಇಲಾಖೆಗಳ ವೆಬ್ ತಾಣಗಳು ಬದಲಾದವು. ಕೇಂದ್ರವು Mygov.in ಎಂಬ ತಾಣದ ಮೂಲಕ, ನಾಗರಿಕರ ಸಲಹೆ ಪಡೆಯುವ ಕಾರ್ಯಕ್ಕೆ ಮುಂದಾಯಿತು. ಇತ್ತ, ಡಿಜಿಟಲ್ ಕ್ರಾಂತಿಯಲ್ಲಿ ಕರ್ನಾಟಕವೂ ಹಿಂದೆ ಬೀಳಲಿಲ್ಲ. ಸಿದ್ದರಾಮಯ್ಯ ನೇತೃತ್ವದ ಸರಕಾರವು ಬೆರಳ ತುದಿಯಲ್ಲಿ ಸರಕಾರ ಎಂಬ ಘೋಷಾ ವಾಕ್ಯದೊಂದಿಗೆ, ಮೊಬೈಲ್ ಒನ್ ಎಂಬ, ಸಕಲ ಸೇವೆಗಳ ಗುಚ್ಛವೊಂದನ್ನು ಅಕ್ಟೋಬರ್ ತಿಂಗಳಲ್ಲಿ ರಾಜ್ಯಕ್ಕೆ ಪರಿಚಯಿಸಿತು. ಆ್ಯಪ್ ಅಥವಾ ವೆಬ್ ಮೂಲಕ ಒಂದೇ ಕಡೆ ವಿವಿಧ ಸರಕಾರಿ ಸೇವೆಗಳು, ಕರೆನ್ಸಿ ರೀಚಾರ್ಜ್, ಬಿಲ್ ಪಾವತಿ, ಆರೋಗ್ಯ, ಮಹಿಳಾ ರಕ್ಷಣೆ… ಮುಂತಾದ ಸೇವೆಗಳು ಲಭ್ಯವಾಗಿ, ಹೊಸ ಅಧ್ಯಾಯ ಆರಂಭವಾಯಿತು.

ಮತ್ತಷ್ಟು ಗಮನಾರ್ಹ ಸಂಗತಿಗಳು
* ಮೈಕ್ರೋಸಾಫ್ಟ್ ಸಿಇಒ ಆಗಿ ಭಾರತದ ಸತ್ಯ ನಾಡೆಳ್ಲಾ ನೇಮಕ
* ಟ್ವಿಟರ್ ಮಾದರಿಯಲ್ಲೇ ಫೇಸ್‌ಬುಕ್‌ನಿಂದ ‘ಟ್ರೆಂಡಿಂಗ್ ಸುದ್ದಿ’
* ಸ್ಯಾನ್‌ಡಿಸ್ಕ್‌ನಿಂದ 128 ಜಿಬಿ ಸಾಮರ್ಥ್ಯದ, 200 ಡಾಲರ್ ಬೆಲೆಯ ಮೈಕ್ರೋ ಎಸ್‌ಡಿ ಕಾರ್ಡ್
* ಆತಂಕ ಮೂಡಿಸಿದ ಹಾರ್ಟ್‌ಬ್ಲೀಡ್ ಹೆಸರಿನ ಕಂಪ್ಯೂಟರ್ ವೈರಸ್
* ಚೀನಾದ ಶ್ವೋಮಿ ಕಂಪನಿಯ ಎಂಐ3, ರೆಡ್‌ಮಿ ಸಾಧನಗಳಿಗೆ ಮಾರುಹೋದ ಭಾರತೀಯರು
* ರೈಲು ಟಿಕೆಟ್ ಬುಕ್ ಮಾಡುವ ಐಆರ್‌ಸಿಟಿಸಿ ವೆಬ್ ತಾಣದ ಸಾಮರ್ಥ್ಯ ಹೆಚ್ಚಳ
* ಆ್ಯಪಲ್‌ನಿಂದ ಐಫೋನ್ 6, ಹಾಗೂ 6 ಪ್ಲಸ್ ಬಿಡುಗಡೆ
* ಗೂಗಲ್ ನೆಕ್ಸಸ್ 6 ಹಾಗೂ ನೆಕ್ಸಸ್ 9 ಟ್ಯಾಬ್ಲೆಟ್ ಬಿಡುಗಡೆ
* ಆ್ಯಪಲ್‌ನ ಐಕ್ಲೌಡ್‌ಗೆ ಹ್ಯಾಕರ್‌ಗಳು ಕನ್ನ, ಪರಿಣಾಮ ಹಾಲಿವುಡ್ ತಾರೆಯರ ನಗ್ನ ಚಿತ್ರಗಳು ಇಂಟರ್ನೆಟ್‌ನಲ್ಲಿ ಹರಿದಾಡಿದವು
* ಕೊನೆಯುಸಿರೆಳೆದ ಓರ್ಕುಟ್ ಎಂಬ ಸಾಮಾಜಿಕ ಜಾಲತಾಣ
* ಕ್ಲೌಡ್ ಸ್ಟೋರೇಜ್ ಸೇವೆ ಒದಗಿಸುವ ಕಂಪನಿ ಡ್ರಾಪ್‌ಬಾಕ್ಸ್‌ನ 70 ಲಕ್ಷ ಮಂದಿ ಬಳಕೆದಾರರ ಪಾಸ್‌ವರ್ಡ್ ಬಹಿರಂಗ
* ಫೇಸ್‌ಬುಕ್ ಸಂಸ್ಥಾಪಕ ಮಾರ್ಕ್ ಜುಕರ್‌ಬರ್ಗ್,ಅಮೆಜಾನ್‌ನ ಜೆಫ್ ಬೆಜೋಸ್ ಅವರಿಂದ ಭಾರತ ಭೇಟಿ
* ಸೋನಿ ಪಿಕ್ಟರ್ಸ್ ಕಂಪನಿಯ ಕಂಪ್ಯೂಟರ್ ಹ್ಯಾಕ್, ದಕ್ಷಿಣ ಕೊರಿಯಾ ಮತ್ತು ಅಮೆರಿಕ ಮಧ್ಯೆ ತಿಕ್ಕಾಟ, ‘ದಿ ಇಂಟರ್ವ್ಯೂ’ ಚಲನಚಿತ್ರ ಬಿಡುಗಡೆಗೆ ಅಡ್ಡಿ

ಸ್ಮಾರ್ಟ್‌ಫೋನ್ ಕಳೆದುಹೋದಾಗ ಇದನ್ನೂ ಪ್ರಯತ್ನಿಸಿ ನೋಡಿ…

ನಾವು ಅಷ್ಟು ಆಸ್ಥೆಯಿಂದ, ನಮ್ಮೆಲ್ಲಾ ಬೇಕು ಬೇಡಗಳನ್ನು ತುಂಬಿಸಿದ್ದ ಸ್ಮಾರ್ಟ್‌ಫೋನ್ ಕಳೆದು ಹೋದರೆ ಆಗುವ ಚಡಪಡಿಕೆ ಯಾರಲ್ಲೂ ಹೇಳಿಕೊಳ್ಳಲಾಗದು. ಅಷ್ಟೊಂದು ಅಮೂಲ್ಯ ಮಾಹಿತಿಗಳನ್ನು ನಾವು ಅದಕ್ಕೆ ಊಡಿಸಿಬಿಟ್ಟಿರುತ್ತೇವೆ. ಎಲ್ಲ ಲಾಗಿನ್‌ಗಳು, ಪಾಸ್‌ವರ್ಡ್‌ಗಳು, ಕ್ರೆಡಿಟ್-ಡೆಬಿಟ್ ಕಾರ್ಡ್ ವಿವರಗಳು ಎಲ್ಲವೂ ಅದರಲ್ಲಿ ಶೇಖರವಾಗಿರುವಾಗ ಹೃದಯವೇ ಬಾಯಿಗೆ ಬಂದಂತಾಗುತ್ತದೆ. ಹೊಸದಾಗಿ ಫೋನ್ ಕೊಂಡುಕೊಂಡರಂತೂ ಎಲ್ಲೋ ಮರೆತು ಬಿಟ್ಟು ಬಂದಾಗ ಆಗುವ ಯಾತನೆ ಹೇಳತೀರದು.

ನಮ್ಮ ಕಣ್ಣ ದೃಷ್ಟಿಯಿಂದ ಮರೆಯಾದ ಫೋನನ್ನು ಹುಡುಕುವುದು ಹೇಗೆ ಎಂಬುದು ಎಲ್ಲರನ್ನೂ ಕಾಡುವ ಪ್ರಶ್ನೆ. ಫೋನ್‌ನ ಐಎಂಐಇ ಸಂಖ್ಯೆಯನ್ನು (ಅದರ ಬಾಕ್ಸ್‌ನಲ್ಲಿರುವ ಸ್ಟಿಕರ್‌ನಲ್ಲಿರುತ್ತದೆ) ತೆಗೆದುಕೊಂಡು, ಪೊಲೀಸ್ ಠಾಣೆಗೆ ದೂರು ನೀಡುವುದು ಒಂದು ವಿಷಯವಾದರೆ, ಸೈಬರ್ ಪೊಲೀಸರು ಹುಡುಕಿ ತಂದುಕೊಡುವಷ್ಟರೊಳಗೆ ಸಾಧ್ಯವಾದಲ್ಲಿ ನಾವೂ ಒಂದು ಬಾರಿ ಪ್ರಯತ್ನಿಸಿ ನೊಡಲು ಇಲ್ಲಿದೆ ವಿಧಾನ.

ಇಂಟರ್ನೆಟ್ ಸಂಪರ್ಕ ಮೂಲಕ ನಮ್ಮ ಫೋನನ್ನು ಯಾವುದೇ ಇಮೇಲ್ ಐಡಿ ಜತೆಗೆ ಸಿಂಕ್ ಮಾಡಿಟ್ಟುಕೊಳ್ಳುವುದು ಪ್ರತಿಯೊಬ್ಬರ ಕರ್ತವ್ಯ. ಇಲ್ಲಿ ಸಂಪರ್ಕ ಸಂಖ್ಯೆಗಳೆಲ್ಲವೂ ಸಿಂಕ್ ಆಗಿರುವುದರಿಂದ ಯಾವಾಗಲಾದರೂ ಕಳೆದುಹೋದಾಗ ಅಥವಾ ಫೋನ್ ಬದಲಾಯಿಸಬೇಕಾದಾಗಲೂ, ಎಲ್ಲೋ ಮರೆತುಬಿಟ್ಟ ಫೋನ್ ಹುಡುಕಲೂ ಅನುಕೂಲ.

ಎಲ್ಲ ಸ್ಮಾರ್ಟ್‌ಫೋನ್‌ಗಳಲ್ಲಿ ಅಂತರ್ನಿರ್ಮಿತವಾದ ಒಂದು ವ್ಯವಸ್ಥೆ ಇದೆ. ಮನೆಯೊಳಗೆ ಎಲ್ಲಿ ಇಟ್ಟಿದ್ದೀರಿ, ಎಲ್ಲಿ ಮರೆಯಾಗಿದೆ ಅಂತ ಸುಲಭವಾಗಿ ತಿಳಿದುಕೊಳ್ಳಬಹುದು ಅಥವಾ ಹೊರಗೆಲ್ಲಾದರೂ ಇದ್ದರೆ ಇಲ್ಲವೇ ಕಳವಾದರೆ ಅದರ ಎಲ್ಲ ಮಾಹಿತಿಯನ್ನು ದೂರಸ್ಥವಾಗಿಯೇ ಅಳಿಸಿಬಿಡಬಹುದು ಅಥವಾ ಅದನ್ನು ಬಳಸಲಾಗದಂತೆ ಲಾಕ್ ಮಾಡಬಹುದು.

ಆಂಡ್ರಾಯ್ಡ್‌ನಲ್ಲಿ
ಆಂಡ್ರಾಯ್ಡ್ ಡಿವೈಸ್ ಮ್ಯಾನೇಜರ್ ಎಂಬ ಗೂಗಲ್‌ನ https://www.google.com/android/devicemanager ತಾಣಕ್ಕೆ ಹೋಗಿ, ನಿಮ್ಮ ಸಾಧನಕ್ಕೆ ಬಳಸಿದ ಜಿಮೇಲ್ ಖಾತೆಗೆ ಲಾಗಿನ್ ಆದಾಗ, ಹಿನ್ನೆಲೆಯಲ್ಲಿ ನಕ್ಷೆ ಇರುವ ಪುಟವೊಂದು ಕಾಣಿಸುತ್ತದೆ. ಅಲ್ಲಿ ನಿಮ್ಮ ಸಾಧನದ ಹೆಸರೂ ಕಾಣಿಸುತ್ತದೆ. ಹೆಚ್ಚು ಸಾಧನಗಳಿದ್ದರೆ, ಅಲ್ಲೇ ಕಾಣಿಸುವ ಡ್ರಾಪ್‌ಡೌನ್ ಮೆನುವಿನಿಂದ ಆಯ್ಕೆ ಮಾಡಿಕೊಳ್ಳಬಹುದು. ಆಯ್ಕೆ ಮಾಡಿದ ಬಳಿಕ, ಪಕ್ಕದಲ್ಲೇ ಕಾಣಿಸುವ ನ್ಯಾವಿಗೇಶನ್ ಬಟನ್ ಕ್ಲಿಕ್ ಮಾಡಬೇಕು. ಸಾಧನ ಕೊನೆಯ ಬಾರಿಗೆ ಎಲ್ಲಿತ್ತು ಎಂಬ ಮಾಹಿತಿ ನಕ್ಷೆ ಸಮೇತ ಕಾಣಿಸುತ್ತದೆ. ಕೆಳಗೆ ಮೂರು ಆಯ್ಕೆಗಳು ಗೋಚರಿಸುತ್ತವೆ. ಸಮೀಪದಲ್ಲೇ ಎಲ್ಲಾದರೂ ಇದ್ದರೆ ಜೋರಾಗಿ ರಿಂಗ್ ಮಾಡಿಸಬಲ್ಲ ಒಂದನೇ ಆಯ್ಕೆ, ಫೋನ್‌ನ ಸ್ಕ್ರೀನ್ ಲಾಕ್ ಬದಲಾಯಿಸಬಲ್ಲ ಎರಡನೇ ಆಯ್ಕೆ ಹಾಗೂ ಫೋನನ್ನು ಫ್ಯಾಕ್ಟರಿಯಿಂದ ಬಂದಾಗ ಹೇಗಿತ್ತೋ ಆ ಸ್ಥಿತಿಗೆ ರೀಸೆಟ್ ಮಾಡುವ ಮೂರನೇ ಆಯ್ಕೆ. ಹೀಗೆ ಮಾಡಿದರೆ, ನಿಮ್ಮ ಫೋನ್‌ನಲ್ಲಿರುವ ಎಲ್ಲ ಮಾಹಿತಿಯೂ ಅಳಿಸಿಹೋಗುತ್ತದೆ.

ಆದರೆ, ಇದಕ್ಕೆ ನಿಮ್ಮ ಸ್ಮಾರ್ಟ್‌ಫೋನ್‌ನ ಜಿಪಿಎಸ್ (ಗ್ಲೋಬಲ್ ಪೊಸಿಶನಿಂಗ್ ಸಿಸ್ಟಂ) ಎಂಬ ಲೊಕೇಶನ್ ಸೇವೆ ಹಾಗೂ ಕೆಲವೊಮ್ಮೆ ಇಂಟರ್ನೆಟ್ ಸೇವೆಯೂ ಸದಾ ಆನ್ ಆಗಿಟ್ಟಿರಬೇಕು. ಉಪಗ್ರಹ ಮೂಲಕ ಫೋನ್‌ನ ಇರುವಿಕೆಯನ್ನು ಸಂಪರ್ಕಿಸುವ ಸೇವೆಯಿದು. ಕಂಪ್ಯೂಟರ್‌ನಲ್ಲಿ ಇಲ್ಲದಿದ್ದರೆ, ಸ್ನೇಹಿತರ ಮೊಬೈಲ್ ಫೋನ್‌ನಲ್ಲಿ Device Manager ಆ್ಯಪ್ ಇನ್‌ಸ್ಟಾಲ್ ಮಾಡಿಕೊಂಡು, ಅದರ ಮೂಲಕವೂ ಇದೇ ಕೆಲಸಗಳನ್ನು ಮಾಡುವುದು ಸಾಧ್ಯವಾಗುತ್ತದೆ.

ವಿಂಡೋಸ್ ಫೋನ್‌ನಲ್ಲಿ
ಈಗಲೇ ನಿಮ್ಮ ವಿಂಡೋಸ್ 8.1 ಫೋನುಗಳಲ್ಲಿ ಮೊದಲು ಸೆಟ್ಟಿಂಗ್ಸ್‌ನಲ್ಲಿ ‘Find my phone’ ಎಂಬುದನ್ನು ಕ್ಲಿಕ್ ಮಾಡಿ, ಅಲ್ಲಿರುವ ಎರಡೂ ಚೆಕ್‌ಬಾಕ್ಸ್‌ಗಳನ್ನು ಕ್ಲಿಕ್ ಮಾಡಿಟ್ಟಿರಬೇಕು. ನಂತರ ವಿಂಡೋಸ್ ಆ್ಯಪ್‌ಗಳ ಸ್ಟೋರ್‌ಗೆ (http://www.windowsphone.com/en-in/store) ಹೋಗಿ, ನಿಮ್ಮ ಫೋನ್‌ಗೆ ಲಾಗಿನ್ ಆದ ಮೈಕ್ರೋಸಾಫ್ಟ್ ಖಾತೆ (ಲೈವ್, ಹಾಟ್‌ಮೇಲ್, ಔಟ್‌ಲುಕ್ ಇತ್ಯಾದಿ) ಮೂಲಕ ಲಾಗಿನ್ ಆಗಿ, Find My Phone ಆಯ್ಕೆ ಕ್ಲಿಕ್ ಮಾಡಿದರೆ, ರಿಂಗ್ ಮಾಡುವ, ಲಾಕ್ ಮಾಡುವ ಮತ್ತು ಫ್ಯಾಕ್ಟರಿ ಡೇಟಾ ರೀಸೆಟ್ ಮಾಡುವ ಆಯ್ಕೆಗಳು ಕಂಡುಬರುತ್ತವೆ.

ಐಫೋನ್‌ನಲ್ಲಿ
ಐಫೋನ್ ಇದ್ದವರು Settings > iCloud > Find My iPhone ಎನೇಬಲ್ ಆಗಿರುವಂತೆ ನೋಡಿಕೊಳ್ಳಬೇಕು. ನಂತರ ಫೋನ್ ಕಳೆದುಹೋದರೆ, ಸ್ನೇಹಿತರ ಐಫೋನ್ ಅಥವಾ ಐಪ್ಯಾಡ್ ಅಥವಾ ಐಒಎಸ್ ಇರುವ ಕಂಪ್ಯೂಟರ್ ಮೂಲಕ ಐಟ್ಯೂನ್ಸ್ ಎಂಬ ಸ್ಟೋರ್‌ನಿಂದ Find My iPhone ಎಂಬ ಆ್ಯಪ್ ಡೌನ್‌ಲೋಡ್ ಮಾಡಿಕೊಂಡು, ನಿಮ್ಮದೇ ಇಮೇಲ್ ಖಾತೆ ಮೂಲಕ ಲಾಗಿನ್ ಆದರೆ, ಮೇಲಿನ ಮೂರೂ ಆಯ್ಕೆಗಳು ಲಭ್ಯವಾಗುತ್ತವೆ.

ಬ್ಲ್ಯಾಕ್‌ಬೆರಿ ಫೋನ್‌ಗಳಲ್ಲಿಯೂ Settings > BlackBerry Protect ಎಂಬುದನ್ನು ಹಾಗೂ ಲೊಕೇಶನ್ ಸರ್ವಿಸಸ್ ಆನ್ ಮಾಡಿದ ಬಳಿಕ http://protect.blackberry.com/ ಎಂಬಲ್ಲಿ ಹೋಗಿ ಟ್ರ್ಯಾಕ್ ಮಾಡಬಹುದು.

ಟೆಕ್ ಟಾನಿಕ್: ಕಂಪ್ಯೂಟರಿನಲ್ಲಿ ಚಿತ್ರಗಳ ಮೂಲಕ ಎಬಿಸಿಡಿ
ಮಕ್ಕಳಿಗೆ ಇಂಗ್ಲಿಷ್ ವರ್ಣಮಾಲೆ ಕಲಿಸುವಾಗ ಎ ಫಾರ್ ಆ್ಯಪಲ್, ಬಿ ಫಾರ್ ಬನಾನ ಅಂತೆಲ್ಲಾ ಹೇಳಿಕೊಡುವುದನ್ನೇ, ಕಂಪ್ಯೂಟರ್‌ನಲ್ಲಿ ಚಿತ್ರಗಳ ಮೂಲಕ ಹೇಳಿದರೆ? ಇದಕ್ಕಾಗಿ MS Prima ಎಂಬ ಒಂದು ಫಾಂಟ್ ಇದೆ. ಅದನ್ನು ಇಲ್ಲಿ http://spr.ly/6182scfu ಡೌನ್‌ಲೋಡ್ ಮಾಡಿಕೊಂಡು ನಿಮ್ಮ ಕಂಪ್ಯೂಟರಿನಲ್ಲಿ fonts ಫೋಲ್ಡರ್‌ಗೆ ಅನ್‌ಝಿಪ್ ಮಾಡಿಕೊಳ್ಳಿ. ನಂತರ ನೋಟ್‌ಪ್ಯಾಡ್, ವರ್ಡ್, ವರ್ಡ್‌ಪ್ಯಾಡ್ – ಯಾವುದಾದರೂ ತೆರೆದು, ಅದರಲ್ಲಿ MS Prima ಫಾಂಟ್ ಆಯ್ಕೆ ಮಾಡಿಕೊಳ್ಳಿ. ಕೀಬೋರ್ಡ್‌ನಲ್ಲಿ A B C D ಒತ್ತುತ್ತಾ ಹೋಗಿ. ಚಿತ್ರಗಳೇ ಮೂಡುತ್ತವೆ. ಮಕ್ಕಳಿಗೆ ಮನರಂಜನೆಯ ಜತೆಗೆ ಕಲಿಕೆಯೂ ಸುಲಭವಾಗುತ್ತದೆ.

ಮಾಹಿತಿ@ತಂತ್ರಜ್ಞಾನ: ಅವಿನಾಶ್ ಬಿ., ವಿಜಯ ಕರ್ನಾಟಕ, ಡಿಸೆಂಬರ್ 22, 2014

ಮೊಬೈಲ್ ಒನ್‌ನಲ್ಲಿ ಏನಿದೆ, ಹೇಗಿದೆ: ಕ್ವಿಕ್ ರಿಯಾಲಿಟಿ ಚೆಕ್

ಅವಿನಾಶ್ ಬಿ.
ಕರ್ನಾಟಕ ಸರಕಾರದ ಮಹತ್ವಾಕಾಂಕ್ಷಿ ಮೊಬೈಲ್-ಒನ್ ಅಪ್ಲಿಕೇಶನ್ ಒಂದೇ ಮಾತಿನಲ್ಲಿ ಹೇಳುವುದಾದರೆ, ‘ಆ್ಯಪ್‌ಗಳ ಗುಚ್ಛ’. ಹಲವಾರು ಆ್ಯಪ್‌ಗಳ ಬದಲು ಇದೊಂದನ್ನೇ ಡೌನ್‌ಲೋಡ್ ಮಾಡಿಕೊಂಡರೆ, ಹಲವು ಸೇವೆಗಳಿಗೆ ಇಲ್ಲಿಂದಲೇ ಪ್ರವೇಶ ಪಡೆಯಬಹುದು.

ಜನಸಾಮಾನ್ಯರ ಕೈಯಲ್ಲಿರಬಹುದಾದ ಆಂಡ್ರಾಯ್ಡ್ ಸ್ಮಾರ್ಟ್‌ಫೋನ್‌ನಲ್ಲಿ ಗೂಗಲ್ ಪ್ಲೇ ಸ್ಟೋರ್‍‌ಗೆ ಹೋಗಿ Karnataka Mobileone ಅಂತ ಟೈಪ್ ಮಾಡಿ ಸರ್ಚ್ ಮಾಡಿದಾಗ ಈ ಆ್ಯಪ್ ಲಭ್ಯವಾಗುತ್ತದೆ. Mobile ಮತ್ತು one ಮಧ್ಯೆ ಸ್ಪೇಸ್ ಇರಬಾರದು. ಸ್ಪೇಸ್ ನೀಡದಿದ್ದರೆ, ಕರ್ನಾಟಕ ಸರಕಾರದ ಲಾಂಛನವಿರುವ ಬೇರೊಂದು ಆ್ಯಪ್ ಕಾಣಿಸಿಕೊಳ್ಳುತ್ತದೆ.

ಸುಮಾರು 9.5 ಎಂಬಿ ತೂಕವಿರುವ ಅಧಿಕೃತ ಆ್ಯಪ್ ಡೌನ್‌ಲೋಡ್ ಆದ ಬಳಿಕ ನಿಮ್ಮ ಮೊಬೈಲ್ ಸಂಖ್ಯೆ ನೀಡಿ ನೋಂದಾಯಿಸಿಕೊಳ್ಳಬೇಕಾಗುತ್ತದೆ. ಅದೇ ಮೊಬೈಲ್‌ಗೆ ಪಿನ್ ಸಂಖ್ಯೆಯನ್ನು ಕಳುಹಿಸಲಾಗುತ್ತದೆ. ಲಾಗ್ ಇನ್ ಆಗಲು ಇದು ಬೇಕಾಗುತ್ತದೆ. ಇದರಲ್ಲಿರುವ ಸೇವೆಗಳ ಬಗ್ಗೆ ಕ್ಷಿಪ್ರನೋಟ ಇಲ್ಲಿದೆ.

* ಅಗತ್ಯ ಸೇವೆಗಳಲ್ಲಿ ಪ್ರಸ್ತುತ ಬೆಸ್ಕಾಂ, ಹೆಸ್ಕಾಂ ಹಾಗೂ ಬೆಂಗಳೂರು ಜಲಮಂಡಳಿಯ ಬಿಲ್ ಪಾವತಿ ವ್ಯವಸ್ಥೆ, ಬ್ಯಾಂಕಿಂಗ್ ಸೇವೆಗಳಡಿ ಕೆಲವು ಬ್ಯಾಂಕ್‌ಗಳ ಖಾತೆ ತೆರೆಯಬಹುದು.

* ಪೊಲೀಸ್ ಸೇವೆಗಳಲ್ಲಿ, ಬೆಂಗಳೂರು ಪೊಲೀಸ್, ಬೆಂಗಳೂರು ಸಂಚಾರಿ ಪೊಲೀಸ್ ಹಾಗೂ ರಾಜ್ಯ ಅಪರಾಧ ದಾಖಲೆಗಳ ಬ್ಯುರೋದ ಲಿಂಕ್ ಇವೆ. (ಸಮೀಪದ ಪೊಲೀಸ್ ಠಾಣೆ ಯಾವುದು ಮತ್ತು ಅದರ ಸಂಪರ್ಕ ಸಂಖ್ಯೆ, ಇಮೇಲ್, ಅಲ್ಲದೆ, ಜಿಪಿಎಸ್ ಆನ್ ಮಾಡಿದರೆ ಅಲ್ಲಿಗೆ ಹೋಗುವ ನಕ್ಷೆಯೂ ಗೂಗಲ್ ಮ್ಯಾಪ್ ಮೂಲಕ ಲಭ್ಯ. ಪೊಲೀಸರಿಗೆ ದೂರು/ಸಲಹೆ ನೀಡುವ ವ್ಯವಸ್ಥೆ ಸದ್ಯಕ್ಕೆ ಕಾರ್ಯತತ್ಪರವಾಗಿಲ್ಲ. ವಾಹನದ ಸಂಖ್ಯೆ ನೋಂದಾಯಿಸಿ, ದಂಡ ಕಟ್ಟುವ ಅವಕಾಶವಿದೆ. ಪೊಲೀಸ್ ದೃಢೀಕರಣ, ಧ್ವನಿವರ್ಧಕ (ಮೈಕ್) ಅಳವಡಿಸಲು ಅನುಮತಿ, ಕಳವು ವಾಹನದ ದೂರು ನೀಡಲು ಇಲ್ಲಿ ಸಾಧ್ಯ.

* ಆಸ್ಪತ್ರೆಗಳು ಹಾಗೂ ವೈದ್ಯರ ಅಪಾಯಿಂಟ್‌ಮೆಂಟ್ ಪಡೆಯುವ ಅವಕಾಶವಿದ್ದು, ಪೂರ್ಣರೂಪದಲ್ಲಿ ಇನ್ನಷ್ಟೇ ಕಾರ್ಯಾಚರಿಸಬೇಕಿದೆ.

* ಸಾರಿಗೆ ವಿಭಾಗದಲ್ಲಿ, ಮೇರು ಕ್ಯಾಬ್ಸ್, ಓಲಾ ಕ್ಯಾಬ್ಸ್, ರೈಡಿಂಗೋ ಹಾಗೂ ಮೈಸೂರಿನ ಐಟಿಎಸ್ ವ್ಯವಸ್ಥೆಯ ಲಿಂಕ್ ಇವೆ. ಆರ್‌ಟಿಒ ಸೇವೆಯಡಿ, ಚಾಲನಾ ಪರವಾನಗಿ (ಡಿಎಲ್), ಕಲಿಕಾ ಪರವಾನಗಿ (ಎಲ್ಎಲ್)ಗೆ ಅರ್ಜಿ ಸಲ್ಲಿಸಬಹುದು. ಮೆಟ್ರೋ ರೈಲಿನ ದರ ಮಾಹಿತಿ, ಸ್ಮಾರ್ಟ್ ಕಾರ್ಡ್ ರೀಚಾರ್ಜ್ ವ್ಯವಸ್ಥೆಯಿದೆ.

* ಟೆಲಿಕಾಂ ಸೇವೆಯಡಿ, ಪೋಸ್ಟ್‌ಪೇಯ್ಡ್ ಬಿಲ್ ಪಾವತಿ ಹಾಗೂ ಪ್ರೀಪೇಯ್ಡ್ ರೀಚಾರ್ಜ್ ಆಯ್ಕೆಗಳಿವೆ.

* ಮುನಿಸಿಪಲ್ ಸೇವೆಗಳ ಅಡಿ, ಬೆಂಗಳೂರಿನ ಆಸ್ತಿ ತೆರಿಗೆ ಪಾವತಿ ಆಯ್ಕೆಯಿದ್ದರೆ, ಪೌರಾಡಳಿತ ನಿರ್ದೇಶನಾಲಯದ ಲಿಂಕ್ ಮೂಲಕ ರಾಜ್ಯದ ಯಾವುದೇ ಸ್ಥಳದಿಂದ ಜನನ ಮತ್ತು ಮರಣ ಪ್ರಮಾಣಪತ್ರಕ್ಕೆ ಅರ್ಜಿ ಸಲ್ಲಿಸಬಹುದು.

* ಪ್ರವಾಸ ಸೇವೆಯಡಿ, ಕೆಎಸ್ಸಾರ್ಟಿಸಿ, ರೆಡ್‌ಬಸ್ ಮೂಲಕ ಬಸ್ಸು ಟಿಕೆಟ್, ಐಆರ್‌ಸಿಟಿಸಿ ಮೂಲಕ ರೈಲು ಟಿಕೆಟ್ ಹಾಗೂ ಕರ್ನಾಟಕ ಪ್ರವಾಸೋದ್ಯಮ ಇಲಾಖೆಯ ಲಿಂಕ್ ಮೂಲಕ ಪ್ಯಾಕೇಜ್ ವಿಚಾರಿಸುವ, ಕಾಯ್ದಿರಿಸುವ ಆಯ್ಕೆಯಿದೆ.

* ಉದ್ಯೋಗ ಸೇವೆಯಡಿ ಬಾಬಾ ಜಾಬ್ ಪೋರ್ಟಲ್‌ನ ಲಿಂಕ್ ಇದ್ದು, ನೋಂದಾಯಿಸಿಕೊಳ್ಳಬೇಕಾಗುತ್ತದೆ.

* ಆಸ್ತಿ ತೆರಿಗೆ, ಆದಾಯ ತೆರಿಗೆ ಇಲಾಖೆಗಳ ಲಿಂಕ್, ತೆರಿಗೆ ಪಾವತಿಗಾಗಿ ಕ್ಲಿಯರ್‌ಟ್ಯಾಕ್ಸ್ ಎಂಬ ಸೇವೆಯ ಲಿಂಕ್ ಇದೆ.

* ಏಕಾಂಗಿಯಾಗಿ ಓಡಾಡುತ್ತಿರುವ ಮಹಿಳೆಯರು, ವಯೋವೃದ್ಧರು, ಮಕ್ಕಳ ಭದ್ರತೆಗಾಗಿ ಎಂ-ಪವರ್ ಎಂಬ ಆ್ಯಪ್ ವ್ಯವಸ್ಥೆಯಿದ್ದು, ಕಾರ್ಯಾಚರಿಸುತ್ತಿದೆ.

* ಟ್ರಾಫಿಕ್ ಪೊಲೀಸರಿಗೆ, ಆರ್‌ಟಿಒಗೆ ಮತ್ತು ಬಿಬಿಎಂಪಿಗೆ ಯಾವುದೇ ಸಮಸ್ಯೆಯ ಬಗ್ಗೆ ದೂರು ನೀಡಬೇಕಿದ್ದರೆ, ಮೊಬೈಲ್‌ನಿಂದಲೇ ಫೋಟೋ ತೆಗೆದು ಅಪ್‌ಲೋಡ್ ಮಾಡಿ ಸಾಕ್ಷ್ಯಾಧಾರ ಸಮೇತ ದೂರು ನೀಡುವ ಆ್ಯಪ್ ಕೂಡ ಅಡಕವಾಗಿದೆ.

* ಕೃಷಿ ಸೇವೆಯಡಿ ರಾಜ್ಯ ಕೃಷಿ ಇಲಾಖೆಯು ಉಚಿತ ಎಸ್ಎಂಎಸ್ ಬೆಳೆಗಳ ಬೆಲೆ ತಿಳಿದುಕೊಳ್ಳಲು, ಪ್ರಕೃತಿ ವಿಕೋಪ, ಹವಾಮಾನ ಮುನ್ಸೂಚನೆ ಪಡೆಯುವ, ಬೆಳೆ ರಕ್ಷಣೆಗೆ ಯೋಜನೆ ರೂಪಿಸಲು ನೆರವಾಗುವ ಆ್ಯಪ್ ಇದೆ.

* ಪಾಸ್‌ಪೋರ್ಟ್, ಮುದ್ರಾಂಕ ಮತ್ತು ನೋಂದಣಿ ಇಲಾಖೆ, ಕಾನೂನು ಸಹಾಯ, ಸಕಾಲ, ಬಿ2ಸಿ (ಉದ್ದಿಮೆಗಳಿಂದ ಗ್ರಾಹಕನ ಬಳಿಗೆ) ಆ್ಯಪ್‌ಗಳ ಗುಚ್ಛವಿದೆ.

* ಪಿಯುಸಿ ಅಂಕಗಳ ಮರುಮಾಪನಕ್ಕೆ ಅರ್ಜಿ, ನಕಲು ಪ್ರತಿಗೆ ಅರ್ಜಿ ಸಲ್ಲಿಸಲು ಮತ್ತು ಎಸ್ಸೆಸ್ಸೆಲ್ಸಿ ಫಲಿತಾಂಶ ತಿಳಿದುಕೊಳ್ಳುವ ಆ್ಯಪ್ ಇದರಲ್ಲೇ ಅಡಕವಾಗಿದೆ.

* ಅಂಚೆ ಇಲಾಖೆ ಮೂಲಕ ಕಳುಹಿಸಲಾದ ಸರಕು, ಲಕೋಟೆಗಳ ಸ್ಥಿತಿಗತಿ ತಿಳಿದುಕೊಳ್ಳಬಹುದು. ಸರಕಾರಿ ನೌಕರರು ತಾವು ಕೆಲಸಕ್ಕೆ ಸೇರಿದಂದಿನಿಂದ ನಿವೃತ್ತಿಯಾಗುವವರೆಗಿನ ಕೆಲಸದ ಮಾಹಿತಿಯನ್ನು ಪಡೆದುಕೊಳ್ಳುವ ಹೆಚ್ಆರ್‌ಎಂಎಸ್ ವ್ಯವಸ್ಥೆಯಿದೆ.

ಬೆಂಗಳೂರು ಕೇಂದ್ರಿತ

ಇವಿಷ್ಟು ಸೇವೆಗಳಿರುವ ಈ ಆ್ಯಪ್ ಅನ್ನು ಹಲವರು ಈಗಾಗಲೇ ಇನ್‌ಸ್ಟಾಲ್ ಮಾಡಿಕೊಂಡಿದ್ದಾರೆ, ಶಹಭಾಸ್ ನೀಡಿದ್ದಾರೆ. ಆದರೆ ಬೆಂಗಳೂರು ಕೇಂದ್ರಿತವಾಗಿಯೇ ಸೇವೆಗಳಿವೆ ಎಂಬ ಬಗ್ಗೆ ಈ ಆ್ಯಪ್‌ನ ಕೆಳಗೆಯೇ ಕಾಮೆಂಟ್‌ಗಳ ಮೂಲಕ ಗಮನ ಸೆಳೆದು, ರಾಜ್ಯದ ಬೇರೆಡೆಯ ಸೇವೆಗಳನ್ನೂ ಸೇರ್ಪಡೆಗೊಳಿಸಲು ಕೋರಿದ್ದಾರೆ.

ಕನ್ನಡ
ಇದೇ ಆ್ಯಪ್ ಅನ್ನು ಕನ್ನಡದಲ್ಲಿ ನೋಡಿದರೆ, ಕೆಲವು ಪದಪ್ರಯೋಗಗಳು, ಅಕ್ಷರ ತಪ್ಪುಗಳು ಜನರು ಆಡಿಕೊಳ್ಳುವಂತೆ ಮಾಡಿವೆ. ಉದಾಹರಣೆಗೆ, ಸಹಾಯ ವಿಭಾಗದಲ್ಲಿ, ಸಹಾಯಕ ‘ಐಕೆ’ಗಳು ಎಂದಿದೆ. ಮರುಪಾವತನೆ (ಮರುಪಾವತಿ), ರಾದ್ಧುಪಡಿಸುವಿಕೆ (ರದ್ದುಪಡಿಸುವಿಕೆ), ಸಂಬಾಂಧಿಸಿದ (ಸಂಬಂಧಿಸಿದ), ನಮ್ಮನು (ನಮ್ಮನ್ನು) ಸಂಪರ್ಕಿಸಿ, ನಿಯಮ ಮತ್ತು ನಿರ್ಭಂಧಿಗಳು (ನಿಯಮ ಮತ್ತು ನಿಬಂಧನೆಗಳು), ವೈದ್ಯರ ಭೇಟಿ ನಿಗದಿಪಡಿಸಲು ಅಪಾಯಿಂಟ್‌ಮೆಂಟ್ ಅನ್ನು ‘ವೈದ್ಯರ ನೇಮಕಾತಿ’ ಅಂತಲೂ, ಹೋಂ (ಮುಖ್ಯಪುಟಕ್ಕೆ) ‘ಮನೆ’ ಎಂದು ಭಾಷಾಂತರಿಸಿ ಬರೆಯಲಾಗಿದೆ. ಮುಂದಿನ ಆವೃತ್ತಿಯಲ್ಲಿ ಇವನ್ನೆಲ್ಲಾ ಸರಿಪಡಿಸುವ ನಿರೀಕ್ಷೆ ಇದೆ.

ಪ್ರಮುಖಾಂಶಗಳು
ಆಂಡ್ರಾಯ್ಡ್ ಮತ್ತು ಆ್ಯಪಲ್ ಸ್ಮಾರ್ಟ್‌ಫೋನ್‌ಗಳಲ್ಲಿ Karnataka Mobileone ಆ್ಯಪ್ ಲಭ್ಯವಿದೆ.
ಸಾಮಾನ್ಯ ಫೀಚರ್ ಫೋನ್‌ಗಳಲ್ಲಿ *161# ಅಂತ ಟೈಪ್ ಮಾಡಿ ಕಳುಹಿಸುವ ಮೂಲಕ, ಸೇವೆಗಳ ಮಾಹಿತಿ ಪಡೆಯಬಹುದು.
ಕಂಪ್ಯೂಟರಿನಲ್ಲೇ ನೋಡುವವರಿಗೆ mobile.karnataka.gov.in ತಾಣವಿದೆ.
ಗ್ರಾಹಕ ಸಹಾಯವಾಣಿಗೆ ಕರೆ ಮಾಡಿ ವಿಚಾರಿಸಲು: 1800-425-425-426
1800-425-425-425 ಗೆ ಮಿಸ್ಡ್ ಕಾಲ್ ನೀಡಿದರೆ, ಈ ಮೇಲಿನ ವಿವರ ಎಸ್ಎಂಎಸ್ ರೂಪದಲ್ಲಿ ಲಭ್ಯ.
161 ಗೆ ಎಸ್ಎಂಎಸ್ ಸೇವೆ ಇದೆ ಎಂದು ಹೇಳಲಾಗಿದೆ. ಪ್ರಯೋಗಕ್ಕಾಗಿ ಹಲೋ ಎಂದು ಟೈಪ್ ಮಾಡಿ ಕಳುಹಿಸಿದ ತಕ್ಷಣ, ನಿರ್ದಿಷ್ಟ ಸೇವೆಗೆ ನಿರ್ದಿಷ್ಟ ಪದಗಳನ್ನು ಎಸ್ಎಂಎಸ್ ರೂಪದಲ್ಲಿ ಕಳುಹಿಸಿ ಎಂಬ ಪ್ರತ್ಯುತ್ತರವೂ ಜತೆಗೆ ಸಂಪೂರ್ಣ ಲಿಂಕ್‌ಗಳ ವಿವರವುಳ್ಳ ಮಾಹಿತಿಯೂ ಬಂದಿದೆ.

ವಿಜಯ ಕರ್ನಾಟಕ, ಡಿಸೆಂಬರ್ 09, 2014

ನಿಮ್ಮ ಫೋನ್ ಲಾಲಿಪಾಪ್‌ಗೆ ಅಪ್‌ಗ್ರೇಡ್ ಆಯಿತೇ? ಇದನ್ನು ತಿಳಿದುಕೊಳ್ಳಿ

ಅವಿನಾಶ್ ಬಿ.
ಆಂಡ್ರಾಯ್ಡ್ ಫೋನುಗಳ ಕಾರ್ಯಾಚರಣಾ ವ್ಯವಸ್ಥೆಯ (ಒಎಸ್) ತಾಜಾ ಆವೃತ್ತಿ 5.0 ಅಂದರೆ ಲಾಲಿಪಾಪ್‌ಗೆ ಅಪ್‌ಗ್ರೇಡ್ ಆಗಲು ಹಲವರು ಕಾಯುತ್ತಿದ್ದಾರೆ. ಗೂಗಲ್ ನೆಕ್ಸಸ್ ಸರಣಿಯ ಸಾಧನಗಳ ಬಳಿಕ, ಮೋಟೋರೋಲ ಹಾಗೂ ಉಳಿದ (ಸ್ಯಾಮ್ಸಂಗ್, ಹೆಚ್‌ಟಿಸಿ, ಎಲ್‌ಜಿ, ಸೋನಿ ಇತ್ಯಾದಿ) ಬ್ರ್ಯಾಂಡ್‌ಗಳ ಕಿಟ್‌ಕ್ಯಾಟ್ ಸಾಧನಗಳಿಗೆ ಇದು ಅಪ್‌ಗ್ರೇಡ್ ಆಗಲಿದೆ. ಈಗಾಗಲೇ ಅಪ್‌ಗ್ರೇಡ್ ಆಗಿರುವ ಕೆಲವೇ ಸಾಧನಗಳಲ್ಲಿ ನೆಕ್ಸಸ್ 7 ಟ್ಯಾಬ್ಲೆಟ್ ಒಂದಾಗಿದ್ದು, ನಾನೂ ಅಪ್‌ಗ್ರೇಡ್ ಮಾಡಿಕೊಂಡಿದ್ದೇನೆ. ತಟ್ಟನೇ ಗೋಚರವಾದ ಕೆಲವೊಂದು ವೈಶಿಷ್ಟ್ಯಗಳು ಹಾಗೂ ಬದಲಾಯಿಸಿಕೊಳ್ಳಬಹುದಾದ ಸೆಟ್ಟಿಂಗ್ ಬಗ್ಗೆ ಇಲ್ಲಿ ಕೊಂಚ ಮಾಹಿತಿ ಇದೆ. ನಿಮ್ಮ ಸ್ಮಾರ್ಟ್‌ಫೋನ್‌ಗಳು ಅಪ್‌ಗ್ರೇಡ್ ಆದಾಗ, ನಿಮಗೂ ಉಪಯುಕ್ತವಾಗಬಹುದು.

ಮೊದಲನೆಯದಾಗಿ, ಆಕರ್ಷಕ ನೋಟವಿದೆ. ಸಾಧನದ ಕಾರ್ಯಾಚರಣೆಯ ವೇಗ, ಬ್ಯಾಟರಿ ಚಾರ್ಜ್ ಆಗುವ ವೇಗ ಗಮನ ಸೆಳೆಯುತ್ತದೆ. ಬ್ಯಾಟರಿಯು ಹೆಚ್ಚು ಸಮಯ ಬಾಳಿಕೆ ಬರುತ್ತದೆ. ಚಾರ್ಜ್ ಆಗುತ್ತಿರುವಾಗ, ಚಾರ್ಜ್ ಆಗಲು ಎಷ್ಟು ಸಮಯ ಬೇಕೆಂಬುದು ಲಾಕ್ ಸ್ಕ್ರೀನ್‌ನಲ್ಲೇ ಕಾಣಿಸುತ್ತದೆ. ಪ್ರಮುಖವಾಗಿ ಸೆಟ್ಟಿಂಗ್ಸ್ ಸ್ಕ್ರೀನ್ ಬದಲಾಗಿದೆ. ಜತೆಗೆ, ಈಗಾಗಲೇ ಕಿಟ್‌ಕ್ಯಾಟ್ ಸಾಧನಗಳಲ್ಲಿನ ಐಕಾನ್‌ಗಳ (ವಿಶೇಷವಾಗಿ ಮ್ಯಾಪ್ಸ್, ಜಿಮೇಲ್, ಪ್ಲೇಸ್ಟೋರ್ ಇತ್ಯಾದಿ) ಬಣ್ಣ ಮತ್ತು ವಿನ್ಯಾಸಗಳು ಇತ್ತೀಚೆಗೆ ಬದಲಾಗಿ ಅಪ್‌ಡೇಟ್ ಆಗಿರುವುದು ಹೆಚ್ಚಿನವರ ಗಮನಕ್ಕೆ ಬಂದಿರಬಹುದು. ಇದು ಲಾಲಿಪಾಪ್‌ಗಾಗಿಯೇ ರೂಪುಗೊಂಡ ಬದಲಾವಣೆ.

ನಮಗೆ ಉಪಯುಕ್ತವಾದ ಪ್ರಮುಖ ಮೂರು ಅಂಶಗಳ ಬದಲಾವಣೆಯ ಮಾಹಿತಿ ಇಲ್ಲಿದೆ:
1. ಕನ್ನಡ ಕೀಬೋರ್ಡ್: ಮುಖ್ಯವಾಗಿ ಕನ್ನಡ ಕೀಬೋರ್ಡ್ ಇನ್‌ಬಿಲ್ಟ್ (ಅಂತರ್‌ನಿರ್ಮಿತ) ಆಗಿದೆ. ಎನೇಬಲ್ ಮಾಡಲು, ಸೆಟ್ಟಿಂಗ್ಸ್ > ಲಾಂಗ್ವೇಜ್ & ಇನ್‌ಪುಟ್ ಎಂಬಲ್ಲಿರುವ, ಗೂಗಲ್ ಕೀಬೋರ್ಡ್ ಒತ್ತಿದರೆ, ಅದರ ಸೆಟ್ಟಿಂಗ್ಸ್‌ನಲ್ಲಿ, ಇಂಗ್ಲಿಷ್ ಜತೆಗೆ ಕನ್ನಡ, ತಮಿಳು, ಮಲಯಾಳಂ, ಹಿಂದಿ, ತೆಲುಗು ಮುಂತಾದ ಭಾರತೀಯ ಭಾಷೆಗಳ ಆಯ್ಕೆ ದೊರೆಯುತ್ತದೆ. ಆದರೆ ಕನ್ನಡ ಕೀಬೋರ್ಡ್‌ನಲ್ಲಿ ಒಂದು ಸಮಸ್ಯೆಯಿದೆ. ಸ್ವರಾಕ್ಷರ ‘ಒ’ ಇದೆಯಾದರೂ, ವ್ಯಂಜನಕ್ಕೆ ಹೃಸ್ವ ಸ್ವರ ಸೇರಿಸಲು ಇರುವ ಒ ಅಕ್ಷರ ಭಾಗಕ್ಕೆ ಸೇರಿಸಲು ಕೀ ಇಲ್ಲ. ಹೀಗಾಗಿ ‘ಕೊ’ ಬರೆಯುವ ಬದಲಾಗಿ ದೀರ್ಘ ಸ್ವರವನ್ನು ಸೇರಿಸಿ ‘ಕೋ’ ಅಂತ (ಸಮೀಪದ ಅಕ್ಷರ) ಸದ್ಯಕ್ಕೆ ಬರೆಯಬೇಕಾಗುತ್ತದೆ. ಇದನ್ನು ಗೂಗಲ್ ಗಮನಕ್ಕೆ ತರಲಾಗಿದೆ, ಗಮನಿಸಿ ಸರಿಪಡಿಸುವ ಆಶಾವಾದವಿದೆ.

2. ಫೇಸ್ ಲಾಕ್: ನಮ್ಮ ಮುಖವನ್ನೇ ಅನ್‌ಲಾಕ್ ಪಾಸ್‌ವರ್ಡ್ ಆಗಿ ಹೊಂದಿಸಬಹುದು. ಸೆಟ್ಟಿಂಗ್ಸ್ > ಸೆಕ್ಯುರಿಟಿ > ಸ್ಮಾರ್ಟ್‌ಲಾಕ್ > ಟ್ರಸ್ಟೆಡ್ ಫೇಸ್ ಎಂಬಲ್ಲಿ ಹೋಗಿ ನಿಮ್ಮ ಮುಖವನ್ನು (ಎದುರಿನ ಕ್ಯಾಮೆರಾ ಮೂಲಕ) ದಾಖಲಿಸಿದರೆ, ಈ ಸಾಧನದ ಸ್ಕ್ರೀನ್ ಅನ್‌ಲಾಕ್ ಮಾಡಬೇಕಿದ್ದರೆ, ನಿಮ್ಮ ಮುಖವೇ ಆಗಬೇಕು. ಬೇರೆಯವರಿಗೆ ಅನ್‌ಲಾಕ್ ಮಾಡಲಾಗದು. ಆದರೆ ಇದು ಅಷ್ಟೇನೂ ಸುರಕ್ಷಿತವಲ್ಲ ಯಾಕೆಂದರೆ, ಮುಖವನ್ನು ಕ್ಯಾಮೆರಾಕ್ಕೆ ನಿಖರವಾಗಿ ಗುರುತಿಸುವುದು ಕಷ್ಟ ಮತ್ತು ಕೆಲವರ ಮುಖವು ನಿರ್ದಿಷ್ಟ ಭಾಗದಲ್ಲಿ ಒಂದೇ ರೀತಿಯಾಗಿರಲೂಬಹುದು. ಬೇರೆ ಕಂಪನಿಗಳು (ಮೋಟೋ ಜಿ, ಝೆನ್‌ಫೋನ್, ಗ್ಯಾಲಕ್ಸಿ ಇತ್ಯಾದಿ) ಬದಲಾವಣೆ ಮಾಡಿರುವ ಆಂಡ್ರಾಯ್ಡ್ ಆವೃತ್ತಿಗಳಲ್ಲಿ ಈಗಾಗಲೇ ಫೇಸ್ ಅನ್‌ಲಾಕ್ ತಂತ್ರಜ್ಞಾನವನ್ನು ಅಳವಡಿಸಲಾಗಿದೆ.

3. ಗೂಗಲ್ ನೌ: ಹಿಂದಿನ ಆವೃತ್ತಿಗಳಲ್ಲಿ ಗೂಗಲ್ ನೌ ಎಂಬ, ನಾವು ಹೇಳಿದ್ದನ್ನು ಸರ್ಚ್ ಮಾಡಿ ತೋರಿಸುವ ಧ್ವನಿ ಆಧಾರಿತ ಆಪ್ತ ಸಹಾಯಕವನ್ನು ಸ್ಕ್ರೀನ್ ಅನ್‌ಲಾಕ್ ಮಾಡಿದ ಮೇಲಷ್ಟೇ ತೆರೆಯಬಹುದಾಗಿತ್ತು. ಆದರೆ, ಲಾಲಿಪಾಪ್‌ನಲ್ಲಿ ಒಂದಿಷ್ಟು ಕೆಲಸ ಮಾಡಿದರೆ, ಸ್ಕ್ರೀನ್ ಆಫ್ ಆಗಿರುವಾಗಲೇ, ‘ಓಕೆ ಗೂಗಲ್’ ಅಂತ ಹೇಳಿದರೆ, ನಿಮ್ಮ ಆದೇಶಕ್ಕಾಗಿ ಕಾಯುವ ಮೈಕ್ ಐಕಾನ್ ತೆರೆದುಕೊಂಡು, “ಈಗ ಹೇಳಿ” ಅಂತ ನಿಮ್ಮನ್ನು ಕೇಳುತ್ತದೆ. ಇದನ್ನು ಎನೇಬಲ್ ಮಾಡಲು, ಸೆಟ್ಟಿಂಗ್ಸ್ > ಲ್ಯಾಂಗ್ವೇಜ್ & ಇನ್‌ಪುಟ್ > ವಾಯ್ಸ್ ಇನ್‌ಪುಟ್ > ಎನ್‌ಹ್ಯಾನ್ಸ್‌ಡ್ ಗೂಗಲ್ ಸರ್ವಿಸಸ್ ಎಂಬಲ್ಲಿರುವ ಗಿಯರ್ ಐಕಾನ್ ಒತ್ತಿರಿ. ಅದರಲ್ಲಿ ಭಾಷೆಯನ್ನು English (India) ಅಂತ ಹೊಂದಿಸಿ, ಬಳಿಕ “Ok Google Detection” ಅಂತ ಕ್ಲಿಕ್ ಮಾಡಿ. ಅಲ್ಲಿರುವ When Locked ಎಂಬ ಆಯ್ಕೆಯನ್ನು ಆನ್ ಮಾಡಿದರೆ, ಸ್ಕ್ರೀನ್ ಲಾಕ್ ಆಗಿದ್ದಾಗಲೂ “ಓಕೆ ಗೂಗಲ್” ಅಂತ ಹೇಳಿದರೆ ಸ್ಕ್ರೀನ್ ಓಪನ್ ಆಗುತ್ತದೆ.

ಟೆಕ್ ಟಾನಿಕ್: ಆಂಡ್ರಾಯ್ಡ್‌ನಲ್ಲಿ ಅಡಗಿರುವ ಆಟ
ಆಂಡ್ರಾಯ್ಡ್ ಜೆಲ್ಲಿಬೀನ್, ಕಿಟ್‌ಕ್ಯಾಟ್ ಹಾಗೂ ಲಾಲಿಪಾಪ್ ಕಾರ್ಯಾಚರಣಾ ವ್ಯವಸ್ಥೆ ಇರುವ ಸ್ಮಾರ್ಟ್‌ಫೋನ್‌ಗಳಲ್ಲಿ ಗೌಪ್ಯವಾದ ಗೇಮ್ ಇದೆ ಎಂಬುದು ಹೆಚ್ಚಿನವರಿಗೆ ಗೊತ್ತಿಲ್ಲ. ಹಲವು ಫೋನ್‌ಗಳಲ್ಲಿ ಪರೀಕ್ಷಿಸಿ ನೋಡಿದೆ. ನೀವೂ ಮಾಡಿ ನೋಡಿ. ಸೆಟ್ಟಿಂಗ್ಸ್‌ನಲ್ಲಿ About Phone (ಅಥವಾ Tablet) ಎಂದಿರುವಲ್ಲಿ ನಾಲ್ಕೈದು ಬಾರಿ ಬೆರಳಿಂದ ತಟ್ಟಿರಿ. ಕಿಟ್‌ಕ್ಯಾಟ್ ಅಥವಾ ಲಾಲಿಪಾಪ್ ಚಿತ್ರ ಕಾಣಿಸುತ್ತದೆ. ಅದನ್ನು ತಟ್ಟಿರಿ ಮತ್ತು ಒಂದು ಮೂರ್ನಾಲ್ಕು ಸೆಕೆಂಡು ಒತ್ತಿಹಿಡಿಯಿರಿ. ಫ್ಲ್ಯಾಪಿಬರ್ಡ್ ಮಾದರಿಯ ಗೇಮ್ ತೆರೆದುಕೊಳ್ಳುತ್ತದೆ! ಸಮಯ ಕಳೆಯಲು ಯಾರ ಕಣ್ಣಿಗೂ ಕಾಣಿಸದಿರುವ ರಹಸ್ಯ ವ್ಯವಸ್ಥೆ. ಎಲ್ಲೆಲ್ಲಾ ಏನೇನು ಅಡಗಿದೆಯೋ! ಇದು ನಿಮಗೆ ಬೋನಸ್ ಮಾಹಿತಿ. (ಜಿಂಜರ್‌ಬ್ರೆಡ್‌ನಲ್ಲಿ ಒಂದು ಚಿತ್ರ ಕಾಣಿಸುತ್ತದೆ.)
ವಿಜಯ ಕರ್ನಾಟಕದಲ್ಲಿ ಮಾಹಿತಿ@ತಂತ್ರಜ್ಞಾನ: ಡಿಸೆಂಬರ್ 08, 2014

ಟ್ರೂಕಾಲರ್‌ನ ಟ್ರೂ ಬಣ್ಣ; ಸ್ವಲ್ಪ ಎಚ್ಚರಿಕೆ ವಹಿಸಿರಣ್ಣ!

ಅವಿನಾಶ್ ಬಿ.
ಸ್ಮಾರ್ಟ್‌ಫೋನ್ ಬಳಸುತ್ತಿರುವ ಹೆಚ್ಚಿನವರಿಗೆ ಟ್ರೂ ಕಾಲರ್ ಗೊತ್ತಿದೆ. ಈ ಆ್ಯಪ್ ಇನ್‌ಸ್ಟಾಲ್ ಮಾಡಿಕೊಂಡರೆ, ಯಾವುದೇ ಫೋನ್‌ನಿಂದ ಕರೆ ಬಂದರೂ, ಅವರ ಹೆಸರು/ಊರು/ಚಿತ್ರಗಳು ನಮ್ಮ ಮೊಬೈಲ್ ಫೋನ್‌ನ ಸ್ಕ್ರೀನ್ ಮೇಲೆ ಕಾಣಿಸುತ್ತದೆ. ಇದೊಂದು ಉಪಯುಕ್ತ ಆ್ಯಪ್ ಅಂತ ನಾವೆಲ್ಲ ಅಂದುಕೊಂಡರೂ ವಿಷಯ ಬೇರೆಯೇ ಇದೆ.

ಮೂಲತಃ ಸ್ಕ್ಯಾಂಡಿನೇವಿಯಾದ ಟ್ರೂಕಾಲರ್, ಜಗತ್ತಿನ ಅತಿದೊಡ್ಡ ಮೊಬೈಲ್ ಫೋನ್ ಸಮುದಾಯ ಅಂತ ಹೇಳಲಡ್ಡಿಯಿಲ್ಲ. ಆಂಡ್ರಾಯ್ಡ್, ಬ್ಲ್ಯಾಕ್‌ಬೆರಿ, ಆ್ಯಪಲ್, ಸಿಂಬಿಯಾನ್, ವಿಂಡೋಸ್… ಹೀಗೆ ಬಹುತೇಕ ಎಲ್ಲ ಸ್ಮಾರ್ಟ್ ಆಪರೇಟಿಂಗ್ ಸಿಸ್ಟಂಗಳಲ್ಲಿಯೂ ಈ ಆ್ಯಪ್ ಕೆಲಸ ಮಾಡುವುದರಿಂದ, ಇದರ ಜಾಗತಿಕ ಬಳಕೆದಾರರ ಸಂಖ್ಯೆ ಕೋಟ್ಯಂತರವಿದೆ.

“ನಿಮ್ಮ ಅತ್ಯಂತ ವ್ಯಕ್ತಿಗತವಾಗಿರುವ ಫೋನ್‌ಗೆ ಅಪರಿಚಿತರ ಕರೆ ಬರುವುದರಿಂದ ನಿಮ್ಮನ್ನು ನೀವು ರಕ್ಷಿಸಿಕೊಳ್ಳಿ, ಅಪರಿಚಿತರಿಂದ ಬರುವ ಕರೆಗಳನ್ನು ಸ್ವೀಕರಿಸಬೇಡಿ” ಅಂತ ಟ್ರೂಕಾಲರ್ ಕಂಪನಿ ಹೇಳಿಕೊಳ್ಳುತ್ತಿದ್ದರೂ, ಅದು ನಿಜವಾಗಿಯೂ ಏನು ಮಾಡುತ್ತಿದೆ ಗೊತ್ತೇ? ಆ್ಯಪ್ ಇನ್‌ಸ್ಟಾಲ್ ಮಾಡಿದ ತಕ್ಷಣ, ಹಿಂದೆ, ಮುಂದೆ ನೋಡದೆ ನೀವು Accept ಅಂತನೋ, Yes ಅಂತನೋ ಬಟನ್ ಒತ್ತಿರುತ್ತೀರಿ. ಆವಾಗ ಅದು ನಮ್ಮ ಮೊಬೈಲ್‌ನಲ್ಲಿ ಸಂಗ್ರಹವಾಗಿರುವ ಸಂಪರ್ಕ ಸಂಖ್ಯೆಗಳ (ಕಾಂಟಾಕ್ಟ್ಸ್) ಪ್ರದೇಶಕ್ಕೆ ಒಳಪ್ರವೇಶಿಸಿಬಿಡುತ್ತದೆ ಮತ್ತು ಯಾವೆಲ್ಲಾ ಸಂಖ್ಯೆಗಳಿವೆಯೋ, ಅವನ್ನೆಲ್ಲಾ ಅನಾಮತ್ತಾಗಿ ಎತ್ತಿಕೊಂಡು, ತನ್ನ ಸರ್ವರ್‌ಗೆ, ತನ್ನ ಸಂಗ್ರಹಾಗಾರಕ್ಕೆ ಕಾಪಿ ಮಾಡಿಕೊಂಡುಬಿಟ್ಟಿರುತ್ತದೆ.

ಕೆಲವೊಮ್ಮೆ ನಮ್ಮ ಲ್ಯಾಂಡ್‌ಲೈನ್ ಫೋನ್ ನಂಬರುಗಳನ್ನು ಸ್ನೇಹಿತರು, ಕಚೇರಿ ಅಥವಾ ಬಂಧುಗಳ ಹೆಸರಿಗೆ ಬೇರೆಯವರು ಸೇವ್ ಮಾಡಿಕೊಂಡಿರುತ್ತಾರೆ. ಈ ರೀತಿ ಸೇವ್ ಆಗಿರುವ ಮೊಬೈಲ್‌ನಲ್ಲಿ ಟ್ರೂಕಾಲರ್ ಆ್ಯಪ್ ಅಳವಡಿಸಿದರೆ, ಎಲ್ಲ ಮಾಹಿತಿಯೂ ಅದರ ಸರ್ವರ್‌ಗೆ ಅಪ್‌ಡೇಟ್ ಆಗುತ್ತದೆ. ನಮ್ಮ ಸ್ನೇಹಿತರ, ಬಂಧುಗಳ ಸಂಖ್ಯೆಯನ್ನೆಲ್ಲಾ ಈ ಆ್ಯಪ್‌ಗೆ ನಾವೇ ಧಾರೆಯೆರೆದುಬಿಟ್ಟಿರುತ್ತೇವೆ.

ಪ್ರೈವೆಸಿಗೆ ಧಕ್ಕೆ ಎಂಬ ಕಾರಣಕ್ಕೆ ವರ್ಷಗಳ ಹಿಂದೆ ಅದನ್ನು ಯುನೈಟೆಡ್ ಕಿಂಗ್‌ಡಂನಲ್ಲಿ ನಿಷೇಧಿಸಲಾಗಿತ್ತು. ನಮ್ಮಲ್ಲೇ ಹೇಳುವುದಾದರೆ, ನೀವು ನಿಮ್ಮ ಕಚೇರಿ ಲ್ಯಾಂಡ್‌ಲೈನ್ ಫೋನ್‌ನಿಂದ ಯಾರಿಗೋ ಅಗತ್ಯ ಉದ್ದೇಶಕ್ಕಾಗಿ ಕರೆ ಮಾಡಿರುತ್ತೀರಿ. ಅವರು, ಆ ಸಂಖ್ಯೆಯನ್ನು ನಿಮ್ಮ ಹೆಸರಿಗೆ ಸೇವ್ ಮಾಡಿಕೊಂಡಿರುತ್ತಾರೆ. ಕಚೇರಿಯ ಈ ಸಂಖ್ಯೆಯಿಂದ ಯಾರೇ ಆದರೂ ಟ್ರೂಕಾಲರ್ ಅಳವಡಿಸಿಕೊಂಡಿರುವ ಯಾರಿಗೇ ಫೋನ್ ಮಾಡಿದರೂ, ನಿಮ್ಮ ಹೆಸರೇ ಕಾಣಿಸುತ್ತದೆ. ಬೇಕಿದ್ದರೆ http://www.truecaller.com ನಲ್ಲಿ ಚೆಕ್ ಮಾಡಿ ನೋಡಿ. ಕೆಲವೊಮ್ಮೆ ತಪ್ಪುಗಳಿರುವ ಸಾಧ್ಯತೆಗಳೂ ಇವೆ.

ನಿಮ್ಮ ಕಚೇರಿಯ ಅಥವಾ ಸ್ನೇಹಿತರ ಮನೆಯ ಫೋನ್ ಸಂಖ್ಯೆಗೆ ಅದು ನಿಮ್ಮ ಹೆಸರನ್ನು ತೋರಿಸುತ್ತದೆ ಎಂದಾದರೆ, ಅಥವಾ ನಮ್ಮ ಹೆಸರು ಅವರ ಡೇಟಾಬೇಸ್‌ನಲ್ಲಿ ಇರುವುದು ಬೇಡ ಅಂತಾದರೆ ನೀವದನ್ನು ತೆಗೆದುಹಾಕಬಹುದು. http://www.truecaller.com/unlist ಎಂಬಲ್ಲಿಗೆ ಹೋಗಿ, ಲಾಗಿನ್ ಆಗಿ (ಯಾವುದೇ ಕಾಂಟಾಕ್ಟ್ ವಿವರಗಳು ಸಿಂಕ್ ಆಗಿಲ್ಲದ, ಜಾಸ್ತಿ ಬಳಸದೇ ಇರುವ ಇಮೇಲ್ ಐಡಿಯಿಂದ ಆದರೆ ಉತ್ತಮ), ಫೋನ್ ಸಂಖ್ಯೆಯನ್ನು ದಾಖಲಿಸಿ. (+91 ಎಂಬ ಕೋಡ್ ಮೊದಲು ಹಾಕಿದ ನಂತರ, ನಿಮ್ಮ ಮೊಬೈಲ್ ನಂಬರ್ ದಾಖಲಿಸಿ. ಲ್ಯಾಂಡ್‌ಲೈನ್ ಆಗಿದ್ದರೆ, ದೇಶದ ಕೋಡ್ +91, ನಂತರ ನಿಮ್ಮ ಪ್ರದೇಶದ ಎಸ್‌ಟಿಡಿ ಕೋಡ್ ದಾಖಲಿಸಬೇಕಾಗುತ್ತದೆ. ಉದಾಹರಣೆಗೆ, ಬೆಂಗಳೂರಿನ ಕೋಡ್ 080 ಇದ್ದರೆ, +9180 ಅಂತ ದಾಖಲಿಸಿದ ನಂತರ ಲ್ಯಾಂಡ್‌ಲೈನ್ ಸಂಖ್ಯೆ ನಮೂದಿಸಬೇಕು). ಸೂಕ್ತ ಕಾರಣಗಳನ್ನು ಟಿಕ್ ಗುರುತು ಮಾಡಿ, ಅಲ್ಲೇ ಕಾಣಿಸುವ ವೆರಿಫಿಕೇಶನ್ ಕೋಡ್ ದಾಖಲಿಸಿ Submit ಬಟನ್ ಒತ್ತಿದರೆ, ಒಂದೆರಡು ದಿನದಲ್ಲಿ ನಿಮ್ಮ ಹೆಸರು ಮಾಯವಾಗುತ್ತದೆ.

ವಾಸ್ತವವಾಗಿ, ಈಗಿನ ಸ್ಮಾರ್ಟ್‌ಫೋನ್ ಯುಗದಲ್ಲಿ ನಾವು ನಿಮ್ಮ ಇಮೇಲ್ ಐಡಿ ಹಾಗೂ ಫೇಸ್‌ಬುಕ್ ಐಡಿ ಜತೆಗೆ ನಮ್ಮ ಸಂಪರ್ಕ ಸಂಖ್ಯೆಗಳನ್ನು ಅಪ್‌ಡೇಟ್ ಮಾಡಿಕೊಂಡಿರುತ್ತೇವೆ. ಅವುಗಳ ಪ್ರೊಫೈಲ್ ಚಿತ್ರಗಳು ಕೂಡ ಟ್ರೂಕಾಲರ್ ಸರ್ವರ್‌ಗೆ ಸಿಂಕ್ರನೈಸ್ ಆಗುತ್ತದೆ. ಇದು ಕೂಡ ಒಂದು ರೀತಿಯಲ್ಲಿ ಕ್ರೌಡ್ ಸೋರ್ಸಿಂಗ್ ಇದ್ದಂತೆ. ಆದರೆ ಈ ರೀತಿ ಪುನಃ ಯಾರಾದರೂ ನಮ್ಮ ಹೆಸರನ್ನು ಸೇರಿಸಿಕೊಳ್ಳದಂತೆ ಮಾಡುವುದು ನಮ್ಮ ಕೈಯಲ್ಲಿರುವುದಿಲ್ಲವಾದುದರಿಂದ, ಟ್ರೂಕಾಲರ್ ಬಳಸಬೇಡಿ ಅಂತ ತಿಳಿಹೇಳಬಹುದಷ್ಟೆ. ಯಾಕೆಂದರೆ, ನಿಮ್ಮ ಅನುಮತಿಯಿಲ್ಲದೆ ಯಾರು ಬೇಕಾದರೂ ಟ್ರೂಕಾಲರ್ ಡೇಟಾಬೇಸ್‌ಗೆ ನಿಮ್ಮ ಸಂಖ್ಯೆ, ಹೆಸರನ್ನು ಸೇರಿಸಬಹುದು ಅದೇ ರೀತಿ ತೆಗೆದುಹಾಕಲೂಬಹುದಾಗಿದೆ. ಎಲ್ಲಿದೆ ನಮ್ಮ ಪ್ರೈವೆಸಿ?
ಟೆಕ್ ಟಾನಿಕ್: ಕನ್ನಡಿಯಾಗಿ ಸ್ಮಾರ್ಟ್‌ಫೋನ್
ಸ್ಮಾರ್ಟ್ ಮೊಬೈಲ್ ಫೋನ್ ಇದ್ದರೆ ಟಾರ್ಚ್ ಆಗಿ, ರೇಡಿಯೋ ಆಗಿ, ಕ್ಯಾಮೆರಾ ಆಗಿಯೂ ಅದನ್ನು ಬಳಸಬಹುದು. ಆದರೆ, ವೀಡಿಯೋ ಚಾಟಿಂಗ್‌ಗೆ ಅವಕಾಶ ಮಾಡಿಕೊಡಲೆಂದು, ಮತ್ತು ಇತ್ತೀಚೆಗೆ ಸೆಲ್ಫೀಗಳಿಗಾಗಿ (ಸ್ವಯಂ ಫೋಟೋ ತೆಗೆದುಕೊಳ್ಳುವುದು) ಎರಡೆರಡು ಕ್ಯಾಮೆರಾಗಳು ಇರುವ ಸ್ಮಾರ್ಟ್‌ಫೋನ್‌ಗಳಿಂದ ಮತ್ತೊಂದು ಪ್ರಯೋಜನವೂ ಇದೆ. ಅದೆಂದರೆ, ಅಗತ್ಯಬಿದ್ದರೆ, ಎದುರುಭಾಗದ ಕ್ಯಾಮೆರಾವನ್ನು ಕನ್ನಡಿಗೆ ಪರ್ಯಾಯವಾಗಿಯೂ ಉಪಯೋಗಿಸಬಹುದು. ಮೊಬೈಲನ್ನು ಕನ್ನಡಿಯಂತೆ ಉಪಯೋಗಿಸಲು ಆಂಡ್ರಾಯ್ಡ್‌ನಲ್ಲಿ ಕೆಲವು ಆ್ಯಪ್‌ಗಳಿದ್ದರೂ (Mirror ಅಂತ ಗೂಗಲ್‌ಪ್ಲೇ ಸ್ಟೋರ್‌ನಲ್ಲಿ ಸರ್ಚ್ ಮಾಡಿ), ಅವುಗಳೂ ಉಪಯೋಗಿಸುವುದು ಫ್ರಂಟ್ ಕ್ಯಾಮೆರಾವನ್ನೇ. ಹೀಗಾಗಿ ನೀವಿದನ್ನು ಪ್ರಯೋಗಿಸಿನೋಡಬಹುದು.
ವಿಜಯ ಕರ್ನಾಟಕದಲ್ಲಿ ಅಂಕಣ ಮಾಹಿತಿ@ತಂತ್ರಜ್ಞಾನ ಅಂಕಣ: ನವೆಂಬರ್ 24, 2014

ಆಂಡ್ರಾಯ್ಡ್‌ನಿಂದ ವಿಂಡೋಸ್ ಫೋನ್‌ಗೆ ಸಂಪರ್ಕಗಳ ವರ್ಗಾವಣೆ ಹೇಗೆ?

ವಿಜಯ ಕರ್ನಾಟಕ ಮಾಹಿತಿ@ತಂತ್ರಜ್ಞಾನ ಅಂಕಣ -102: ನವೆಂಬರ್ 17, 2014
ಆಂಡ್ರಾಯ್ಡ್ ಫೋನ್ ಬಳಸುತ್ತಿರುವ ಕೆಲವರಿಗೆ ಮೈಕ್ರೋಸಾಫ್ಟ್ ವಿಂಡೋಸ್ ಫೋನ್‌ನಲ್ಲಿನ ವೈಶಿಷ್ಟ್ಯಗಳಿಂದಾಗಿ ಮತ್ತು ಕಂಪ್ಯೂಟರ್, ಲ್ಯಾಪ್‌ಟಾಪ್ ಜತೆಗೆ ಸಿಂಕ್ರನೈಸ್ ಮಾಡುವ ಅವಕಾಶವಿರುವುದರಿಂದಾಗಿ ಅದು ಇಷ್ಟವಾಗಿರಬಹುದು. ಆಂಡ್ರಾಯ್ಡ್‌ನಿಂದ ವಿಂಡೋಸ್ ಫೋನ್‌‌ಗೆ ಬದಲಾಯಿಸುವಾಗ ಮುಖ್ಯವಾಗಿ ತೊಡಕಾಗುವುದು ಸಂಪರ್ಕ ವಿವರಗಳನ್ನು (ಕಾಂಟ್ಯಾಕ್ಟ್) ವರ್ಗಾಯಿಸುವುದು. ಹೊಸ ವಿಂಡೋಸ್ ಫೋನ್‌ಗೆ ಒಂದೊಂದೇ ಸಂಖ್ಯೆಯನ್ನು ಪುನಃ ಫೀಡ್ ಮಾಡುವುದು ತೀರಾ ಕಷ್ಟ. ಸುಲಭವಾಗಿ ಸಂಪರ್ಕ ಸಂಖ್ಯೆಗಳನ್ನು ಹೇಗೆ ವರ್ಗಾಯಿಸಬಹುದೆಂಬ ಮಾಹಿತಿ ಇಲ್ಲಿದೆ.

ಆಂಡ್ರಾಯ್ಡ್ ಫೋನ್‌ಗಳಿಗೆ ಗೂಗಲ್ ಖಾತೆ ಹೇಗೆ ಅತ್ಯಗತ್ಯವೋ, ವಿಂಡೋಸ್ ಫೋನ್ ತೆಗೆದುಕೊಂಡವರಿಗೆ ಮೈಕ್ರೋಸಾಫ್ಟ್‌ನ ಇಮೇಲ್ ಖಾತೆ (ಲೈವ್, ಔಟ್‌ಲುಕ್, ಹಾಟ್‌ಮೇಲ್) ಅಷ್ಟೇ ಅಗತ್ಯ. ವಿಂಡೋಸ್ ಸ್ಟೋರ್‌ನಿಂದ ಯಾವುದೇ ಆ್ಯಪ್ ಇನ್‌ಸ್ಟಾಲ್ ಮಾಡಿಕೊಳ್ಳಬೇಕಿದ್ದರೆ ಬೇಕಾಗುತ್ತದೆ. ಇಲ್ಲದಿದ್ದರೆ Live.com ಮೂಲಕ ಹೊಸ ಮೇಲ್ ಐಡಿ ರಚಿಸಿಕೊಳ್ಳಬಹುದು.

ಫೋನ್ ಬದಲಿಸುವ ಮುನ್ನ, ಆಂಡ್ರಾಯ್ಡ್ ಸ್ಮಾರ್ಟ್‌ಫೋನ್ ಸಂಪರ್ಕಗಳನ್ನು ಜಿಮೇಲ್ ಖಾತೆಯ ಜತೆ ಸಿಂಕ್ರನೈಜ್ ಮಾಡಿರಬೇಕು. ಇದಕ್ಕೆ ಇಂಟರ್ನೆಟ್ ಆನ್ ಆಗಿರಬೇಕು. ಎಲ್ಲ ಆಂಡ್ರಾಯ್ಡ್ ಫೋನ್‌ಗಳಲ್ಲಿರುವ People ಎಂಬ ಆ್ಯಪ್‌ನಲ್ಲಿ, Accounts ಎಂಬಲ್ಲಿ, Sync ಎಂಬ ಆಯ್ಕೆ ದೊರೆಯುತ್ತದೆ. ನಿಮ್ಮ ಪ್ರಧಾನ ಜಿಮೇಲ್ ಐಡಿ ಆಯ್ಕೆ ಮಾಡಿಕೊಂಡು ಅದರಲ್ಲಿ Contacts ಆಯ್ಕೆ ಮಾಡಿದಾಗ, ಕೆಲವು ನಿಮಿಷಗಳಲ್ಲಿ ಸಂಪರ್ಕ ಸಂಖ್ಯೆಗಳು ಜಿಮೇಲ್ ಖಾತೆಯ ಜತೆಗೆ ಸಿಂಕ್ರನೈಸ್ ಆಗುತ್ತದೆ. ಹಳೆಯ ಆವೃತ್ತಿಗಳಲ್ಲಿ, ಮುಖ್ಯ ಮೆನುವಿನ Settings ನಲ್ಲಿ Accounts & Sync ಕ್ಲಿಕ್ ಮಾಡಿ. ಜಿಮೇಲ್ ಐಡಿ ಕ್ಲಿಕ್ ಮಾಡಿ, Sync Contacts ಆಯ್ದುಕೊಳ್ಳಿ. ಸ್ವಲ್ಪ ಹೊತ್ತಿನಲ್ಲಿ ಸಂಪರ್ಕ ಸಂಖ್ಯೆಗಳು ಜಿಮೇಲ್‌ಗೆ ಅಪ್‌ಡೇಟ್ ಆಗುತ್ತವೆ.

ಹೊಸ ವಿಂಡೋಸ್ 8.1 ಕಾರ್ಯಾಚರಣಾ ವ್ಯವಸ್ಥೆಯಿರುವ ಫೋನ್‌ಗಳಲ್ಲಿ ಸಂಪರ್ಕ ವಿವರಗಳನ್ನು ಆಮದು ಮಾಡಿಕೊಳ್ಳುವುದು ತೀರಾ ಸುಲಭ. ಅದೇ ಫೋನ್‌ನಲ್ಲಿ ಸೆಟ್ಟಿಂಗ್ಸ್‌ನಲ್ಲಿ email+Accounts ಅಂತ ಇರುವಲ್ಲಿ ಗೂಗಲ್ ಖಾತೆ ಸೇರಿಸಿದರೆ ಸಾಕು. ಸಂಪರ್ಕ ಸಂಖ್ಯೆಗಳು ಸ್ವಯಂಚಾಲಿತವಾಗಿ ಸಿಂಕ್ರನೈಸ್ ಆಗಿಬಿಡುತ್ತದೆ. ಬಳಿಕ People ಆ್ಯಪ್‌ನ ಸೆಟ್ಟಿಂಗ್‌ಗೆ ಹೋಗಿ, Display Preference ನಲ್ಲಿ ಯಾವ ಖಾತೆಯ ಸಂಪರ್ಕ ವಿವರಗಳನ್ನು ತೋರಿಸಬೇಕೆಂಬುದನ್ನು ಆಯ್ಕೆ ಮಾಡಿಕೊಳ್ಳಬಹುದು.

ಮತ್ತೊಂದು ಆಯ್ಕೆಯೆಂದರೆ, ನಿಮ್ಮ ವಿಂಡೋಸ್ ಫೋನ್‌ನಲ್ಲಿಯೂ People ಎಂಬ ಆ್ಯಪ್‌ನಲ್ಲಿ add contacts ಆಯ್ಕೆ ಮಾಡಿಕೊಂಡು, ಮೈಕ್ರೋಸಾಫ್ಟ್ ಖಾತೆಗೆ ಲಾಗಿನ್ ಆಗುವ ಮೂಲಕ ನೇರವಾಗಿ ಈ ಮೇಲಿನ ಹಂತವನ್ನೂ ಮಾಡಬಹುದು. ಮೈಕ್ರೋಸಾಫ್ಟ್ ಖಾತೆಗೆ ಲಾಗಿನ್ ಆಗುವಾಗಲೇ, ನಿಮಗೆ Import Contacts from ಎಂಬ ಆಯ್ಕೆ ದೊರೆಯುತ್ತದೆ.

ತೀರಾ ಹಳೆಯ ಆವೃತ್ತಿಯ ವಿಂಡೋಸ್ (7 ಅಥವಾ 7.5) ಫೋನುಗಳಲ್ಲಾದರೆ ಸ್ವಲ್ಪ ಹೆಚ್ಚುವರಿ ಕೆಲಸ ಇರುತ್ತದೆ. ಕಂಪ್ಯೂಟರಿನಲ್ಲಿ ನಿಮ್ಮ ಜಿಮೇಲ್ ಖಾತೆಗೆ ಲಾಗಿನ್ ಆಗಿ. ಅಲ್ಲಿ ಎಡಭಾಗದಲ್ಲಿ Gmail ಬಟನ್ ಕ್ಲಿಕ್ ಮಾಡಿದಾಗ, ಕಾಣಿಸಿಕೊಳ್ಳುವ ಡ್ರಾಪ್‌ಡೌನ್ ಮೆನುವಿನಲ್ಲಿ Contacts ಎಂಬಲ್ಲಿ ಎಲ್ಲ ಸಂಪರ್ಕ ಸಂಖ್ಯೆಗಳು ಹಾಗೂ ಇಮೇಲ್ ಐಡಿ ಕಾಣಿಸಿಕೊಳ್ಳುತ್ತವೆ. ಪ್ರತಿಯೊಬ್ಬರ ಸಂಪರ್ಕ ವಿವರಗಳನ್ನೂ ಇಲ್ಲೇ ತಿದ್ದುಪಡಿ ಮಾಡಿಕೊಳ್ಳಬಹುದು. ನಂತರ ಮೇಲ್ಭಾಗದ More ಬಟನ್ ಕ್ಲಿಕ್ ಮಾಡಿದಾಗ ಕಾಣಿಸುವ ಡ್ರಾಪ್‌ಡೌನ್ ಮೆನುವಿನಿಂದ Export ಎಂಬುದನ್ನು ಆಯ್ಕೆ ಮಾಡಿಕೊಳ್ಳಿ. All Contacts ಎಂಬ ರೇಡಿಯೋ ಬಟನ್ ಕ್ಲಿಕ್ ಆಗಿರುವಂತೆ ನೋಡಿಕೊಳ್ಳಿ. Which export format ಎಂದಿರುವಲ್ಲಿ, Google CSV format ಅಂತ ಆಯ್ಕೆ ಮಾಡಿದ ಬಳಿಕ Export ಬಟನ್ ಕ್ಲಿಕ್ ಮಾಡಿ. ಒಂದು ಸಿಎಸ್‌ವಿ ಫಾರ್ಮ್ಯಾಟ್‌ನ ಫೈಲ್ (Google.csv) ಕಂಪ್ಯೂಟರಿಗೆ ಡೌನ್‌ಲೋಡ್ ಆಗುತ್ತದೆ.

ಲಾಗೌಟ್ ಆಗಿ, ಬಳಿಕ live.com ಎಂಬಲ್ಲಿ ಮೈಕ್ರೋಸಾಫ್ಟ್ ಇಮೇಲ್ ಐಡಿ ಮೂಲಕ ಲಾಗಿನ್ ಆಗಿ. ಮೇಲ್ಭಾಗದ ಎಡ ಮೂಲೆಯಲ್ಲಿರುವ ಮೆನು ಬಟನ್ ಮತ್ತು ಅದರಲ್ಲಿ People ಕ್ಲಿಕ್ ಮಾಡಿ. Add People to your contact list ಎಂದಿರುವಲ್ಲಿ ಕೆಳಭಾಗದಲ್ಲಿ Start import ಕ್ಲಿಕ್ ಮಾಡಿ. ಆಗ ಕಾಣಿಸುವ ಹಲವು ಆಯ್ಕೆಗಳಿಂದ Google ಆಯ್ಕೆ ಮಾಡಿ, Choose file ಬಟನ್ ಒತ್ತಿ, ನೀವು ಸೇವ್ ಮಾಡಿಕೊಂಡಿರುವ google.csv ಫೈಲ್ ಕ್ಲಿಕ್ ಮಾಡಿದರೆ, ಸಂಪರ್ಕಗಳು ಸಿಂಕ್ ಆಗುತ್ತವೆ.

ಟೆಕ್ ಟಾನಿಕ್: ಬಿಎಸ್ಸೆನ್ನೆಲ್ ಪೋರ್ಟಲ್
ಕರ್ನಾಟಕದಲ್ಲಿರುವ ತನ್ನ ಬಳಕೆದಾರರಿಗಾಗಿ ಬಿಎಸ್ಸೆನ್ನೆಲ್ ಹೊಸ ವೆಬ್ ಪೋರ್ಟಲ್ ಒಂದನ್ನು ತೆರೆದಿದೆ. ಅದರಲ್ಲಿ ಹೆಸರು ನೋಂದಾಯಿಸಿಕೊಂಡರೆ, ಇಂಟರ್ನೆಟ್ ಮೂಲಕವೇ ನಮ್ಮ ಬಿಎಸ್ಸೆನ್ನೆಲ್ ಸಿಮ್ ಕಾರ್ಡಿಗೆ ರೀಚಾರ್ಜ್ ಮಾಡಿಸಿಕೊಳ್ಳಬಹುದು, ವ್ಯಾಲಿಡಿಟಿ, ಎಷ್ಟು ಉಚಿತ ಕರೆ, ಎಸ್ಸೆಮ್ಮೆಸ್, ಡೇಟಾ ಬಾಕಿ ಇದೆ ಅಂತೆಲ್ಲಾ ತಿಳಿದುಕೊಳ್ಳಬಹುದು. http://gsmprepaid.genext.bsnl.co.in/